Basikwaambilizya Bwami Balaluula

“Milazyo Yako Yoonse Njalusinizyo”

KAKUSYEEDE buyo kaindi kasyoonto kuti afwe, Musa wakakulwaizya bantu ba Israyeli kuti kabiimvwa yoonse milawo ya Jehova. Wakati: “Amubike myoyo yanu kumajwi oonse ngendamucenjezya buzuba obuno, kuti mukalailile bana banu mbubonya, kuti bacenjele kubamba majwi oonse aayooyu Mulao. Nkaambo tacili cintu ciniini buyo pe, mbobuumi bwanu.”—Deuteronomo 32:46, 47.

Nokwakainda myaanda yamyaka, sintembauzyo wakatondezya mbozili zipati iziyiisyo zya Leza naakati: “Yebo uli kufwaafwi, O Jehova; amilazyo yako yoonse njalusinizyo.” (Intembauzyo 119:151) Mumwaanda wamyaka wakusaanguna, Jesu lwakwe wakaamba mbuli mbwaagwasya “majwi oonse aazwa kumulomo wa-Leza.” (Matayo 4:4) Alimwi mubusolozi bwa Leza mwaapostolo Paulo wakalemba kuti “Magwalo aya oonse akazwa kuli-Leza, alikondede.”—2 Timoteo 3:16.

Kulalibonya ikuti Jehova Leza uyanda kuti bakombi bakwe kabuuyeeyesya mulumbe uupandululwa mumapeeji aa Jwi lyakwe. Taakwe kabalo nokaba komwe mu Bbaibbele ikatakwe mulimo. Mbombubo Bakamboni ba Jehova mbobalibona Ijwi lya Leza, mbuli butondezya makani aya aaluulwa kuzwa ku Mauritius.

Mr. D—— wakali kukkala mumunzi uuli kule kwalo nkwaakali kubeleka mulimo wabulindizi masiku. Kwaciindi cilamfwu wakaluujisi ikuyandaula nzila iiluzi yakukomba Leza. Imasiku mukulinda kwakwe, wakatalika kubala Bbaibbele. Muciindi wakalibala kuzwa kumatalikilo kusikila kumamanino. Wakaiya kuti zina lya Leza ngu Jehova—izina lyalo lilibonya ziindi zinji mu Bbaibbele lyakwe lyaci Hindi. Wakajana kuti ikapati bbuku lya Ciyubunuzyo lyakali kulamya.

Mpoona wakalibuzya kuti naa inga kwaba cikombelo icilitobela Bbaibbele cakulimaninizya. Wakabona kuti zikombelo zinyinzi nzyaakazi zyakali kwiide kutobela zibeela-beela zya Bbaibbele. Zikombelo zimwi zyakali kuzumina Magwalo aa Cihebrayo akukaka Magwalo aa Bunakristo aa Cigiliki. Izimbi zyakali kwaainda ambali Magwalo aa Cihebrayo, akubona buyo Magwalo aa Bunakristo aa Cigiliki kuti ngaagwasya.

Bumwi buzuba Mr. D—— wakabona banabukwetene bawigwa mvwula anze mpoona wakabaita kuti bazooyuse muŋanda yakwe. Bakali Bakamboni ba Jehova. Imukaintu wakajisi bbuku litegwa Revelation—Its Grand Climax At Hand! (Ciyubunuzyo—Mamanino Aaco Mapati Aswena!)a Mpoona-mpoona Mr. D—— wakabalomba bbuku elyo. Bakamboni abo bakayeeya kuti imakani aajatikizya businsimi bwa Ciyubunuzyo inga amuyumina oyu muntu, aboobo bakasola kumupa limbi bbuku. Pele Mr. D—— wakazumanana kuyanda bbuku lya Revelation.

Naakajana kkopi lyakwe, wakalibala bbuku cakufwambaana. Mpoona wakazumina kubaa ciiyo ca Bbaibbele a Bakamboni ba Jehova. Teelyakalampa wakalamwa ikubona kuti Bakamboni balalilemeka Bbaibbele lyoonse mbolizulwa. Wakatalika kujanika cakusitikila kumiswaangano yaku Ŋanda ya Bwami ya Bakamboni ba Jehova kwalo Magwalo aa Cihebrayo alimwi a Magwalo aa Bunakristo aa Cigiliki nkwaayiigwa kabotu-kabotu. Lino ngusikwaambilizya Bwami alimwi ngusimbungano ya Bunakristo uubbapatizidwe.

Bupanduluzi buyungizidwe