Itempele Pati lya Jehova Ilyakumuuya
“Tulijisi mupaizi mupati uuli bobuya, . . . uubeleka mulimo uusalala wakucikombelo cinicini. Eco cikombelo cakayakwa a-Jehova, teecakayakwa kumaanza aabantu pe.”—BA-HEBRAYO 8:1, 2.
1. Mbubambe nzi Leza mbwaakacitila bantu basizibi?
JEHOVA LEZA, akaambo kaluyando lwakwe lunji kubantu, wakapa cipaizyo cakugwisya zibi zyanyika. (Johane 1:29; 3:16) Cakali kuyandika kuti buumi bwa Mwanaakwe mutaanzi abulonzye kuzwa kujulu kubutola mwida lyanakalindu mu Juda uutegwa Mariya. Mungelo wa Jehova wakacisalazya kupandulwida Mariya kuti uzooba muntu “Uusalala uti tumbukwe uzooambwa kuti Mwana a-Leza.” (Luka 1:34, 35) Josefa, walo wakatangilide Mariya, wakaambilwa kumitwa kwa Jesu mbokuzooba kwamaleele alimwi wakazibisigwa kuti ooyu “uuzoofutula bantu bakwe kuzwa kuzibi zyabo.”—Matayo 1:20, 21.
2. Ncinzi Jesu ncaakacita ciindi naakasisya myaka 30, alimwi nkaambo nzi?
2 Jesu naakali kuyaabukomena, weelede kuti wakali kuyaabututeelela otu tumwi twaambo tujatikizya kuzyalwa kwakwe kwamaleele. Wakalizi kuti Wisi wakujulu wakamujisilidi mulimo wabufwutuli anyika. Aboobo naakakomena kusika myaka iili 30 yakuzyalwa, Jesu wakaboola kumusinsimi wa Leza Johane kuti abbapatizigwe mu Mulonga wa Jordano.—Marko 1:9; Luka 3:23.
3. (a) Ncinzi Jesu ncaakali kwaamba naakabelesya majwi aakuti, “Cipaizyo nociba cituuzyo enzyo nzyoyanda pe”? (b) Ncikozyanyo nzi Jesu ncaakapa kulibaabo boonse bayanda kuba basikumutobela?
3 Jesu wakali kupaila ciindi naakali kubbapatizigwa. (Luka 3:21) Kulibonya kuti kuzwa kuciindeeco mubuumi bwakwe, wakaazuzikizya majwi aa Intembauzyo 40:6-8, mbuli bwakazootondezyegwa amwaapostolo Paulo kumbele ikuti: “Cipaizyo nociba cituuzyo enzyo nzyoyanda pe, pele mubili ngowandibambila.” (Ba-Hebrayo 10:5) Oobu Jesu wakalitondezya kuziba kuti zipaizyo zyabanyama ‘enzyo nzyaakali kuyanda’ Leza kuti zizumamane kucitwa mutempele ku Jerusalemu. Muciindi caboobo, Jesu wakaziba kuti Leza wakamubambilide mubili uulondokede iwakuti aupaizye. Ooku kwakali kuzoolesya kuyandika kwazipaizyo zyabanyama. Katondezya mbuli mbwaakali kuyandisya kulibombya kuluyando lwa Leza, Jesu wakazumanana kupaila kaamba kuti: “Ndime uno, ndaza kuzoocita nzyoyanda, O Leza, mbubonya mbuli mbokulembedwe zyandime mubbuku lya Mulawo.” (Bahibulu 10:7, Ci) Ma! Ino Jesu wakacipa kaka cikozyanyo cini-cini cabukombi bwabusicamba ibwakutaliyanda mubuzuba oobo kuli boonse bakali kuzooba basiciiya bakwe kumbele!—Marko 8:34.
4. Mbuti Leza mbwaakatondezya kuti wakuzumina kulituuzya kwa Jesu?
4 Sena Leza wakatondezya kuti wuuzumina mupailo wa Jesu wakubbapatizigwa? Nkooko aingule umwi wabaapostolo, Jesu mwini mbaakalisalila: “Lino Jesu naakamana kubapatizigwa, mpawo wakazwa mumaanzi. Nkabela kujulu kwakajaluka, elyo wakabona Muuya wa-Leza, ulaseluka mbuli inziba, uleza kulinguwe. Lino kwakazwa ijwi kujulu, lyakati, Ngooyu mwanaangu uuyandika ngunkondelwa.”—Matayo 3:16, 17; Luka 3:21, 22.
5. Ncinzi cakali kwiimininwa acipaililo cini-cini camutempele?
5 Mbokunga Leza wakuuzumina mubili wa Jesu oyo ngwaakapaizya, munzila yakumuuya caamba kuti icipaililo cipati kwiinda ali ceciya cakali mutempele lyaku Jerusalemu lino ncicakazaambele. Icipaililo cini-cini aawo aakali kupaizilwa banyama cakali kwiiminina cipaililo cakumuuya, calo icakali “[ndo]luyando” naa bubambe bwakuzumina buumi bwa Jesu bwabuntu kuti cibe cipaizyo. (Ba-Hebrayo 10:10) Ncencico mwaapostolo Paulo ncaakakonzya kulembela Banakristonyina kuti: “Lino bapaizi ba Bajuda tabakonzyi kulya zituulwa acipaililo cesu.” (Bahibulu 13:10, Ci) Naa twaambe kuti Banakristo beni-beni balagwasigwa acipaizyo cakumanya milandu iciinda, calo ncobakakaka bapaizi banji ba Juda.
6. (a) Ncinzi cakazooba ambele iciindi Jesu naakabbapatizigwa? (b) Ncinzi ncelyaamba bbala lyabulemu lyakuti Mesiya, naa Kristo?
6 Ikunanikwa Jesu nkwaakananikwa amuuya uusalala kwakali kutondezya kuti Leza lino wakali wabutalisya bubambe boonse bwatempele lyakwe lyakumuuya, Jesu kali ngo Mupaizi Mupati. (Incito 10:38; Ba-Hebrayo 5:5) Siciiya Luka mukusololelwa amuuya uusalala wakaugama buya kuwaamba mwaka eeci cintu cipati nocakacitika kuti kwakali “kumwaaka wekumi amusanu wabwami bwa-Tiberiyo Kaisara.” (Luka 3:1-3) Ooyo mwaka uleendelana a 29 C.E.—insondo zyamyaka izini-zini zili 69, naa myaka iili 483, kuzwa ciindi Mwami Aritasasta naakapede malailile aakuti bwaanda bwa Jerusalemu buyakululwe. (Nehemiya 2:1, 5-8) Kutobela businsimi, “mwami uunanikidwe” wakali kuzoolibonya mumwaka wakaambikwe kale ooyo. (Daniele 9:25) Bama Juda banji kulibonya kuti bakalaazi makani ayo. Luka uluula kuti “lusyomo lwabantu lwakakomena” lwakuboola kwa Mesiya, naa Kristo, imazina aabulemu aazwa mumabala aaci Hebrayo a Cigiliki alo aa amba cintu comwe, ikuti “munanike.”—Luka 3:15, Ci.
7. (a) Ndilili Leza naakananika “Busena Busalalisya,” alimwi eci cakali kwaamba nzi? (b) Ncinzi cimbi cakacitika ciindi Jesu naakabbapatizigwa?
7 Kuciindi cakubbapatizigwa kwa Jesu, makkalilo okwa Leza aakujulu akananikwa, naa kupambulwa, kuti abe “[mbo]busena busalalisya.” (Daniele 9:24) Lino kwakatalika kubeleka “cikombelo [naa, tempele] cakayakwa a-Jehova, teecakayakwa kumaanza aabantu pe.” (Ba-Hebrayo 8:2) Alimwi kwiinda mukubbapatizigwa kwakwe mumaanzi alimwi amumuuya uusalala, imuntu Jesu Kristo wakazyalululwa kuba Mwanaa Leza wakumuuya. (Amweezyanye a Johane 3:3.) Eeci cakali kwaamba kuti Leza muciindi uyoomwiita alimwi Mwanaakwe kuyoopona buumi bwakujulu, ooko nkwaakali kuyoobeleka kululyo lwa Wisi kali Mwami alimwi Mupaizi Mupati “kuciyanza cili mbuli ca-Melkisideke.”—Ba-Hebrayo 6:20; Intembauzyo 110:1, 4.
Busena Busalalisya Ibwakujulu
8. Nimbazu nzi zipya nzicakabaazyo cuuno ca Leza cabwami lino?
8 Mubuzuba Jesu mbwaakabbapatizigwa, cuuno ca Leza cabwami cakabaa mbazu zipya. Oobu mbwaakayanda cipaizyo cabuntu cilondokede icakumanya milandu yanyika citondezya kusalala kwa Leza mbokwaandeene abusizibi bwabantu. Luzyalo lwa Leza alimwi lwakatondezegwa mukuti lino wakalibonya kuti uliyandide kukombelelwa, naa kutontozegwa. Munzila eyi icuuno ca Leza cakujulu cakaba mbuli busena bwamukati katempele imwini-mwini, oomo mwalo mupaizi mupati mwaakali kunjila lomwe mwakaa mwaka abulowa bwabanyama ikumanya milandu munzila yacikozyanyo.
9. (a) Ino cisitilizyo caakati ka Busena Busalala a Busena Busalalisya cakali kwiiminina nzi? (b) Mbuti Jesu mbwaakaciinda cisitilizyo catempele lya Leza lyakumuuya?
9 Icisitilizyo cakali kwaandaanya Busena Busalala a Busena Busalalisya cakali kwiiminina mubili wa Jesu wanyama. (Ba-Hebrayo 10:19, 20) Eeci ncicakali cisinkilizyo cakali kukasya Jesu naakali muntu anyika ikunjila kusika kubusyu bwa Wisi. (1 Ba-Korinto 15:50) Ciindi Jesu naakafwa, “cisitilizyo camuntempele cakadeluka kujulu akusikila ansi.” (Matayo 27:51) Eeci cakatondezya munzila iitalubiki kuti cisinkilizyo icakali kukasya Jesu kunjila kujulu lino cagwisigwa. Nokwakainda mazuba otatwe, Jehova Leza wakacita maleele mapati. Wakabusya Jesu kuzwa kubafwu, katali muntunsi uufwa iwanyama abulowa, pele kali cilenge camuuya icilemenede “[ici]kalilila lyoonse.” (Ba-Hebrayo 7:24) Nokwakainda mazuba aali makumi one, Jesu wakatanta kuya kujulu ikuyoonjila “mu-Busena Busalal[isy]a,” “kuti akapompe kubusyu bwa-Leza nkaambo kandiswe.”—Ba-Hebrayo 9:24.
10. (a) Ncinzi cakacitika Jesu naakamana kutola muulo wacipaizyo cakwe kuli Wisi wakujulu? (b) Ino kunanikwa amuuya uusalala kwakalaa bupanduluzi nzi kuli basiciiya ba Kristo?
10 Sena Leza wakuuzumina muulo wabulowa bwa Jesu butikide kuti umanye zibi zyanyika? Ee, wakuuzumina. Eeci cakasinizigwa nokwakainda mazuba aali 50 kuzwa naakabusigwa Jesu, kupobwe lya Pentekoste. Muuya uusalala wa Leza wakatilwa ali basiciiya ba Jesu ibali 120 balo bakabungene mu Jerusalemu. (Incito 2:1, 4, 33) Mbuli Mupaizi wabo Mupati, Jesu Kristo, abalo lino bakananikwa kuti babeleke “akuba bapaizi basalala, kuti [ba]katuule zipaizyo” mububambe bwa Leza bupati ibwatempele lyakumuuya. (1 Petro 2:5) Kuyungizya awo, aaba bananike ncisi cipya, “cisi cisalala” ica Leza cabana Israyeli bakumuuya. Kuzwa waawo, boonse businsimi bwazintu zibotu bujatikizya Israyeli, mbuli cisyomezyo “[ca]cizuminano cipya” eeco cakalembwa kuli Jeremiya 31:31, boonse bwakali kuzoocitikila mbungano ya Banakristo bananike, “ba-Israyeli ba-Leza” beni-beni.—1 Petro 2:9; Ba-Galatiya 6:16.
Imbazu Zimbi Zyatempele lya Leza Lyakumuuya
11, 12. (a) Ncinzi cakali kwiimininwa alubuwa lwabupaizi kumakani aa Jesu, alimwi lwiiminina nzi kumakani aabasikumutobela bananike? (b) Ino cisambilio ciiminina nzi?
11 Nokuba kuti Busena Busalalisya bwakali kwiiminina “kujulu kwini buya,” kwalo Leza nkwakkede acuuno ca Bwami, zyoonse zimbi mbazu zyatempele lya Leza lyakumuuya zijatikizya zintu zili anyika. (Ba-Hebrayo 9:24) Mutempele lyaku Jerusalemu, kwakali kamwi kabuwa ikamukati kabapaizi mwalo mwakali cipaililo alimwi acisambilo, ncobakali kubelesya bapaizi kulisalazya nobatana kutalika milimo iisalala. Ino ezi ziiminina nzi mububambe bwatempele lya Leza lyakumuuya?
12 Kumakani aa Jesu Kristo, luya lubuwa lwamukati lwabapaizi lwakali kwiiminina ciimo cakwe citakwe zibi kali Mwanaa Leza muntunsi uulondokede. Kwiinda mukubaa lusyomo mucipaizyo ca Jesu, basikutobela Kristo bananike balapegwa bululami. Oobu Leza ulakonzya kuti kaluzi kubeendelezya mbuli kuti tabali basizibi. (Ba-Roma 5:1; 8:1, 33) Aboobo lubuwa olu kumwi lwiiminina bululami bwabuntu mbwaulikidwe umwi aumwi waciinga cabupaizi busalala kubusyu bwa Leza. Aciindi mpoona awo, Ibanakristo bananike bacili bantu batalondokede alimwi ibacikonzya kucita zibi. Icisambilo cili mulubuwa ciiminina Jwi lya Leza, lyalo Mupaizi Mupati ndyabelesya kusanzya bupaizi busalala bucebuce. Kwiinda mukuzumina kusalazigwa ooku, basika aciimo cilemenede icipa bulemu kuli Leza akupa balaanze kuyanda kuti basike kubukombi bwakwe busalala.—Ba-Efeso 5:25, 26; amweezyanye a Malaki 3:1-3.
Busena Busalala
13, 14. (a) Ino Busena Busalala bwamutempele bwiiminina nzi kumakani aa Jesu alimwi abasikumutobela bananike? (b) Ino ciimikilo calampi cangolide ciiminina nzi?
13 Ibusena bwakusaanguna ibwatempele bwiiminina ciimo ciinda aliceeco calubuwa. Kumakani aa Jesu Kristo, imuntunsi uulondokede, ciiminina kuzyalululwa kwakwe kuba Mwanaa Leza wakumuuya uuyoopiluka kubuumi bwakujulu. Iciindi bamana kwaambwa bululami akaambo kalusyomo lwabo mubulowa bwa Kristo butikide, aaba basikutobela ibananike abalo muuya uusalala wa Leza ulabeleka alimbabo munzila eeyi yaalubazu. (Ba-Roma 8:14-17) Kwiinda mu “maanzi [nkokwaamba kuti ikubbapatizigwa kwabo] a-Muuya,” ‘balazyalululwa’ kuba bana ba Leza munzila yakumuuya. Nkakaambo kaako, balijisi bulangizi bwakubusyilwa buumi bwakujulu kuyooba bana ba Leza ibamuuya, kufwumbwa buyo kuti bazumanana kusyomeka kusikila kulufwu.—Johane 3:5, 7; Ciyubunuzyo 2:10.
14 Ibapaizi nobakali kubelekela mu Busena Busalala bwatempele lyaanyika teebakali kubonwa abakombi bakali anze. Munzila iikozyenye, Ibanakristo bananike balaa ciimo cakumuuya ncobatajisi naa ncobatateeleli cakumaninina ibunji bwa bakombi ba Leza, aabo ibalaa bulangizi bwakupona kukabe kutamani muparadaizo anyika. Iciimikilo calampi cangolida icamucikombelo ciiminina ciimo caluzibo ica Banakristo bananike. Kubeleka kwamuuya uusalala wa Leza, mbuli mungwimba wamumalampi, kulalimunika Ibbaibbele. Ikuteelela nkobajana akaambo kakumunika ooku, Ibanakristo tabaliyobwedi balikke pe. Muciindi caboobo balamumvwida Jesu, iwakati: “Ndinywe mumuni wanyika. . . . Mumuni wanu umunike kunembo lyabantu, kuti babone milimo yanu mibotu, balemeke Usowanu uuli kujulu.”—Matayo 5:14, 16.
15. Ino ncinzi ciimininwa acinkwa cakali atafwule lyacinkwa camabonwabonwa?
15 Kutegwa bakkalilile muciimo eeci caluzibo, Ibanakristo bananike beelede kusaninwa lyoonse aceeco ciimininwa acinkwa cakali atafwule lyacinkwa camabonwabonwa. Icipati cibaletela cilyo cakumuuya ndi Jwi lya Leza, lyalo ndyobasoleka kubala akuyeeyesya buzubaa buzuba. Alimwi Jesu wakasyomezya kuti uyoobapa “zilyo zyabo kuciindi ceelede” kwiinda “[mu]muzike musyomesi uucenjede.” (Matayo 24:45) Ooyu “muzike” nenkamu yoonse ya Banakristo bananike ibaliwo anyika aciindi cili coonse. Kristo wiibelesya nkamu eeyi iinanike ikumwaya luzibo lujatikizya kuzuzikizigwa kwabusinsimi alimwi akupa busolozi bweelede bwakubelesya njiisyo zya Bbaibbele mubuumi bwamazubaano. Aboobo, Banakristo bananike balasaninwa zilyo zyoonse ezi zyakumuuya cakulumba. Pesi kubambilila buumi bwabo bwakumuuya takugoleli buyo akujana luzibo lwa Leza mumizeezo amumyoyo yabo. Jesu wakati: “Icakulya cangu nkucita luyando lwayooyo uwakandituma, akulondola milimo yakwe.” (Johane 4:34) Mbweena buyo abalo Banakristo bananike, balakkomana buzubaa buzuba ikubikka nguzu kukucita kuyanda kwa Leza ikutondezyedwe.
16. Ino mulimo wakali kucitilwa acipaililo catunununkilizyo wakali kwiiminina nzi?
16 Mafwumofwumo alimwi akumangolezya, mupaizi umwi wakali kucita tununkilizyo kuli Leza acipaililo catununkilizyo mu Busena Busalala. Aciindi mpoona awo, bakombi batali bapaizi bakali kupaila kuli Leza kabaimvwi mulubuwa lwaanze aatempele lyakwe. (Luka 1:8-10) Ibbaibbele lipandulula kuti: “Tununkilizyo, otu nzenkombyo zyabasalali.” (Ciyubunuzyo 5:8) “Cikombyo cangu cibe mbuli tununkilizyo kubusyu bwako,” mbwaakalemba sintembauzyo Davida. (Intembauzyo 141:2) Banakristo bananike abalo balacilemeka coolwe cabo cakusikila Jehova mukupaila kwiinda muli Jesu Kristo. Imipailo iisinizizye iizwa kumoyo, ili mbuli tununkilizyo itununkilila kabotu. Alimwi Banakristo bananike balamutembaula Leza munzila zimbi, kubelesya milomo yabo kuyiisya bambi. Kuliyumya kwabo mukati kabuyumuyumu alimwi akusyomeka kwabo mumasunko nzintu zimubotela kapati Leza.—1 Petro 2:20, 21.
17. Ino ncinzi cakacitika mukuzuzikizigwa kwacikozyanyo cabusinsimi icakapegwa akunjila kwakusaanguna ikwamupaizi mupati mu Busena Busalalisya mu Buzuba Bwakumanya Milandu?
17 Mubuzuba Bwakumanya Milandu, mupaizi mupati wa Israyeli wakeelede kunjila mu Busena Busalalisya akutenta tununkilizyo mulukaye lwangolida lujisi makala aayaka. Eeci cakeelede kucitwa natana kuleta bulowa bwakutuuzya zibi. Ikuzuzikizya cikozyanyo eeci cabusinsimi, imuntunsi Jesu wakasyomeka cini-cini kuli Jehova Leza naatakalina kutuuzya buumi bwakwe kuti cibe cipaizyo comwe citamani icazibi zyesu. Munzila eyi wakatondezya kuti muntu uulondokede ulakonzya kucita bululami kuli Leza nakasyigwa buti a Saatani. (Tusimpi 27:11) Ciindi naakabikkwa mumasunko, Jesu wakakubelesya kupaila “mukulila kupati akubiiza, . . . nkabela wakamvwigwa nkaambo wakali kuyoowa Leza.” (Ba-Hebrayo 5:7) Munzila eyi wakalemya Jehova ikuti ngo Mwami wakoonse-koonse weelede imululami. Leza wakamupa bulumbu Jesu kwiinda mukumubusya kuzwa kubafwu kuti akabe abuumi bwakutafwa kujulu. Muciimo eeci cisumpukide, Jesu ulakalanganya kaambo kabili nkaakaboolela anyika, ikakuyanzanya bantu basizibi a Leza.—Ba-Hebrayo 4:14-16.
Bulemu Bwiinda Ibwatempele lya Leza Lyakumuuya
18. Mbuti Jehova mbwaakaletela tempele lyakwe lyakumuuya ibulemu bupati kapati?
18 “Bulemu busyaalizi bwaŋanda eyi buyooba bupati kwiinda bwakutaanguna,” mbwaakaambilizya Jehova. (Hagai 2:9) Kwiinda mukubusya Jesu kuti abe Mwami alimwi Mupaizi Mupati uutafwi, Jehova wakaletela tempele lyakwe lyakumuuya ibulemu bupati kapati. Jesu lino uli muciimo cakubaletela “lufutuko lutamani boonse abo abamumvwa.” (Ba-Hebrayo 5:9) Ibakasaanguna kulitondezya kumvwa munzila iili boobu mbaasiciiya bali 120 ibakatambula muuya uusaala lya Pentekoste mu 33 C.E. Ibbuku lya Ciyubunuzyo lyakaambilizya kuti aaba bana Israyeli bakumuuya limwi bayoosika kumweelwe wa 144,000. (Ciyubunuzyo 7:4) Ciindi nobakafwa, ibunji bwabo bakayandika kuti kabalede mucuumbwe cabantu boonse, kabalindila ciindi cakubako kwa Jesu munguzu zya bwami. Ibupime bwaciindi ibujanika kuli Daniele 4:10-17, 20-27 butondezya kuti 1914 nceciindi cakuti Jesu atalike kulela akati kabasinkondonyina. (Intembauzyo 110:2) Kwamakumi aamyaka, Banakristo bananike bakuulindila mwaka ooyo. Inkondo yanyika yakusaanguna alimwi amapenzi ambi aakasika anjiyo akapa cisinizyo cakuti ncobeni Jesu wakabikkwa kuba Mwami mu 1914. (Matayo 24:3, 7, 8) Muciindi cisyoonto buyo, kaluli lwasika lubeteko, “[i]lulatalikila kuciinga ca-Leza,” Jesu wakali kuzoozuzikizya cisyomezyo cakwe kuli basiciiya bakwe bakafwide icakuti: “Ndiyooboola alimwi, nzoomutolelele, kuti oko nkwembede anywebo mukabe nkuko.”—1 Petro 4:17; Johane 14:3.
19. Mbuti basyeede baciinga cabali 144,000 mbobayoonjila mu Busena Busalalisya bwakujulu?
19 Aabo bali 144,000 ibaciinga cabupaizi busalala tabana kumaninina kwaandwa cizibisyo akuyobololwa kuyakumunzi wabo wakujulu. Mweelwe wabo uusyeede ucipona anyika muciimo cakumuuya icakali kwiimininwa a Busena Busalala, bwalo bujedwe kubusyu bwa Leza busalala, imibili yabo yanyama “iyakali cisitilizyo” naa cisinkilizyo. Mbobafwida aaba mulusyomo, balabusigwa mpoona-mpoona akuba zilenge zyamuuya izitafwi kutegwa bakasangane abaciinga cabali 144,000 aabo ibali kale kujulu.—1 Ba-Korinto 15:51-53.
20. Mmulimo nzi uuyandika kapati basyeede babupaizi busalala ngobabeleka kwaciindi cino, alimwi waleta nzi?
20 Mbubali banji boobu bapaizi babeleka a Mupaizi Mupati kujulu, itempele lya Leza lyakumuuya lyabaa bulemu bwiinda. Kwaciindi cino, aabo basyeede ibabupaizi busalala babeleka mulimo uugwasya anyika. Kwiinda mukukambauka kwabo, Leza ‘uzungaanya zisi’ amajwi aakwe aalubeta, mbuli mbukwakaambilizigwa kuli Hagai 2:7. Aciindi mpoona, mamiliyoni aabakombi bategwa “zintu ziyandisi zyazisi” balayoboloka kunjila mulubuwa luli ansi lwatempele lya Jehova. Ino aba balaa lubazu nzi mububambe bwa Leza bwabukombi, alimwi mbulemu nzi bwakumbele mbotunga twalangila ibujatikizya tempele lyakwe lyakumuuya? Eeyi mibuzyo iyooingulwa mucibalo citobela.
Mibuzyo Yakwiindulula
◻ Ncitondezyo nzi cipati Jesu ncaakapa mu 29 C.E.?
◻ Mbubambe nzi ibwakatalika kubeleka mu 29 C.E.?
◻ Ncinzi ciimininwa a Busena Busalala alimwi a Busena Busalalisya?
◻ Mbuti tempele lipati lyakumuuya mbolyabaa bulemu kapati?
[Cifwanikiso icili apeeji 23]
Ciindi Jesu naakananikwa amuuya uusalala mu 29 C.E., itempele lya Leza ilyakumuuya lyakatalika kubeleka