Batumwa Baluumuno Lwa Bunaleza Baambwa Coolwe

“Nkabela banunwidwe ba-Jehova bayooboola akuza bwiimba kusikila ku-Zioni. Bayooba alukondo lutamani amitwe yabo.”—ISAYA 35:10.

1. Ino ncinzi nyika nciibulide kapati?

SUNU bantu nobayandika loko mutumwa wamakani mabotu kwiinda lyoonse. Kulayandika cakufwambaana-fwambaana imuntu waamba kasimpe kujatikizya Leza alimwi amakanze aakwe, kamboni sicamba uuyoocenjezya babi kuti kuyooba kunyonyoonwa alimwi akugwasya babotu myoyo kuti bajane luumuno lwa bunaleza.

2, 3. Mbuti Jehova mbwaakazuzikizya cisyomezyo cakwe kuli Israyeli icilembedwe kuli Amosi 3:7?

² Mumazubaa Israyeli, Jehova wakasyomezya kubusya batumwa bamusyobo oyo. Kumamanino aamwaanda wamyaka wafuka B.C.E., musinsimi Amosi wakaamba kuti: “Ncobeni Mwami Jehova taciti cintu, atana kuyubunwida balanda bakwe basinsimi maseseke aakwe.” (Amosi 3:7) Mumyaanda yamyaka yakatobelwa acaambilizyo eci, Jehova wakacita zitondezyo zinji zyanguzu. Mucikozyanyo, mu 607 B.C.E., wakabasubula kapati bantu bakwe akaambo kakuzanga kwabo alimwi amulandu wabo wabulowa. Alimwi wakasubula masi ngobakabambene limwi alo aakabotelwa kubona kupenga kwa Israyeli. (Jeremiya, zyaandaano zya 46-49) Mpoona mu 539 B.C.E., Jehova wakaletela bulelo bwa Babuloni bwanguzu ilunyonyooko, elyo cakacitika ncakuti mu 537 B.C.E., ibakasyaala ba Israyeli bakapiluka kucisi cabo kuyooyakulula tempele.—2 Makani 36:22, 23.

³ Eezi zintu zyakacitika zyakali zintu zipati loko, alimwi kweelana amajwi aa Amosi, Jehova wakabayubunwida basinsimi bakwe ibakali mbabatumwa bakwe, ikucenjezya Israyeli zintu zyakali kuboola kakucili ciindi. Akati kamwaanda wamyaka walusele B.C.E., wakabusya Isaya. Akati kamwaanda waciloba B.C.E., wakabusya Jeremiya. Mpoona kuya kumamanino aamwaanda ngweena oyo, wakabusya Ezekieli. Aaba abambi basinsimi basyomeka bakapa bumboni buzulide bwamakanze aa Jehova.

Ikuziba Batumwa Baluumuno Sunu

4. Ncinzi citondezya kuti muntu uyandika batumwa baluumuno?

⁴ Ino mbuti sunu? Banji bantu munyika eyi balalibilika ciindi nobabona kunyongana kwabuleya. Aabo bayanda bululami ilabacisa myoyo kubona kuupaupa ameso abumpelenge bwini-bwini bwa Kristendomu. Mbuli mbwaakaambilizya Jehova kwiinda muli Ezekieli, “boonse balila akutongela nkaambo kazisesemyo zyoonse zicitwa mukati kawo.” (Ezekiele 9:4) Nokuba boobo banji tabazi makanze aa Jehova mbwaabede. Bayandika kwaambila.

5. Mbuti Jesu mbwaakatondezya kuti kuzooba batumwa kuciindi cesu cino?

⁵ Sena kuli muntu sunu uuambaula amuuya wakutayoowa wa Isaya, Jeremiya, alimwi a Ezekieli? Jesu wakatondezya kuti kuli uuzoocita boobo. Ciindi naakali kwaambilizya zicitika sunu, wakaamba kuti: “Nkabela aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” (Matayo 24:14) Nguni sunu uuzuzikizya businsimi obo, uubeleka mubutumwa, imukambausi wamakani mabotu? Izikozyanyo akati kamazubaano alimwi amazubaa bana Israyeli zilatugwasya kwiingula mubuzyo oyo.

6. (a) Amupandulule ziluulwa kujatikizya “ba-Israyeli ba-Leza” kuciindi cankondo ya Nyika yakusaanguna. (b) Mbuti Ezekiele 11:17 mbuyakazuzikizigwa ali Israyeli yansiku?

⁶ Mumazubaa manyongwe aa Nkondo ya Nyika ya II, bantu ba Jehova bamazubaano, basyeede akati kabananike “ba-Israyeli ba-Leza,” bakatolwa bwaange munzila iikozyenye aya Israyeli mu Babuloni. (Ba-Galatiya 6:16) Bakazangalisigwa munzila yakumuuya muli Babuloni Mupati, yalo iili nimbunga yanyika yoonse yabukombi bwakubeja, mwalo Kristendomu mwiili cibeela cipati alimwi ciinda kubaa mulandu. Nokuba boobo majwi aa Jehova kuli Ezekieli akatondezya kuti teebakafwutatilwa pe. Wakati: “Njoomubunganya kuzwa kulibamasi akumuyobolola kuzwa kuzisi nkumumwailidwe, nkabela nzoomupa nyika ya-Israyeli.” (Ezekiele 11:17) Kutegwa azuzikizye cisyomezyo eco kuli Israyeli yansiku, Jehova wakabusya Koresi muna Persia, walo wakaatula Bulelo Bwanyika bwa Babuloni akujulila basyeede bana Israyeli kuti bapiluke kucisi cabo. Ino mbuti sunu?

7. Ncinzi cakacitika mu 1919 calo cakatondezya kuti Jesu watola ntaamu kulwana Babuloni Mupati? Amupandulule.

⁷ Kumatalikilo aamwaanda uno wamyaka kwakali bumboni bwakuti kwakali kubeleka umbi Koresi Mupati. Ino wakali ni? Kwiina umbi kunze lya Jesu Kristo, uubikkidwe acuuno ca Bwami bwakujulu kuzwa mu 1914. Ooyu Mwami mupati wakatondezya kuti ulababotelwa babunyina bananike baanyika ciindi Banakristo bananike nobakaangululwa mu 1919 kuzwa mubwaange munzila yakumuuya akupiluka “[ku]cisi” cabo, kubusena bwabo munzila yakumuuya. (Isaya 66:8; Ciyubunuzyo 18:4) Ezekiele 11:17 yakazuzikizigwa amwalo mumazubaano. Kuciindi cansiku kwakayandika kuwa kwa Babuloni kutegwa kujulwe nzila yabana Israyeli kuti bapiluke kucisi cabo. Mumazubaano kubusyigwa kwa ba-Israyeli ba-Leza cakali citondezyo cakuti Babuloni Mupati wawa kuli Koresi Mupati. Ooku kuwa kwakaambilizigwa amungelo wabili mu Ciyubunuzyo caandaano ca 14, ciindi naakoongolola kuti: “Wawa! Wawa Babuloni, munzi oyo mupati, nkaambo bantu bamasi oonse wakabanywisya waini wabukali bwamamambi aakwe.” (Ciyubunuzyo 14:8) Ino kwakali kusandukilwa kaka ooku kuli Babuloni Mupati, ikapati kuli Kristendomu! Cakali cilongezyo cini-cini ku Banakristo beni-beni!

8. Mbuti bbuku lya Ezekiele mbolipandulula lukkomano lwabantu ba Leza kuzwa ciindi cakwaangululwa kwabo mu 1919?

⁸ Kuli Ezekiele 11:18-20, tubala bupanduluzi bwamusinsimi ooyu ibwalukkomano lwabantu ba Leza bamana kupilusyigwa. Kuzuzikizigwa kwakusaanguna kwamajwi aaya kwakali kujatikizya kusalazigwa kwa Israyeli kuciindi ca Ezara alimwi a Nehemiya. Ikuzuzikizigwa kwamazubaano akwalo kwakali kujatikizya cintu cili boobu. Atubone mbucakabede. Jehova waamba kuti: “Lino basike buyo kulinjiyo [nyika yabo], bayoogwisya zyoonse zisesemyo azintu zibi zivundusya.” Mbobonya mbukwakasinsimwa, kutalika mu 1919, Jehova wakabasalazya bantu bakwe akubayumya kuti bamubelekele. Bakatalika kugwisya micito yoonse aziyiisyo zyoonse zina Babuloni mubukkale bwabo bwakumuuya eezyo zyalo izyakali kubasofwaazya mumeso aakwe.

9. Ino nzilongezyo nzi zipati Jehova nzyaakapa bantu bakwe, kutalikila mu 1919?

⁹ Mpoona mukapango ka 19, Jehova ulayaambele akwaamba kuti: “Nkabela njoobapa moyo omwe, akubika muuya mupya mukati kabo. Njoogwisya moyo wabbwe kuzwa kunyama yabo akubapa moyo wanyama.” Kweendelana amajwi aaya, mu 1919, Jehova wakakamantanya babelesi bakwe bananike alimwi inga wategwa wakabapa “moyo omwe,” kutegwa bamubelekele “camoyo woonse.” (Zefaniya 3:9) Kunze lyaboobo, Jehova wakapa bantu bakwe muuya uusalala kuti ubayumye mumulimo wabukamboni akuti uzyale mulimbabo micelo mibotu iibandaukwa ku Ba-Galatiya 5:22, 23. Alimwi muciindi camoyo uutakwe amakani, uuli mbuli wabbwe, Jehova wakabapa moyo mubombe, muteteete, uumvwa, imoyo wakali kuzoozumina kuyanda kwakwe.

10. Nkaambo nzi Jehova ncaakabalongezezya bantu bakwe bapilusyidwe kuzwa mu 1919 kuya kumbele?

¹⁰ Nkaambo nzi ncaakacitila boobu? Jehova mwini ulapandulula. Kuli Ezekiele 11:20 tubala kuti: “[N]kuti kabeenda mumilao yangu akubamba imbeta zyangu akuzicita. Lino bayooba bantu bangu, ambebo njooba Leza wabo.” Ba-Israyeli ba-Leza bakaiya kumvwa milawo ya Jehova muciindi cakutobela milawo yabo. Bakaiya kucita kuyanda kwa Leza cakutayoowa muntu. Aboobo bakali kulibonya buya kuti mbantu baindene loko a Banakristo bakucengeezya bamu Kristendomu. Bakali bantu ba Jehova. Aboobo Jehova wakali libambide kubabelesya kuba mutumwa wakwe, “muzike [wakwe] musyomesi uucenjede.”—Matayo 24:45-47.

Lukkomano lwa Batumwa ba Leza

11. Mbuti bbuku lya Isaya mbolipandulula lukkomano lwabantu ba Jehova?

¹¹ Sena inga mweezeezya lukkomano lwabo nobakazyiba coolwe cabo cakuba muciimo eco? Kabali mbunga bakaindulula majwi aa Isaya 61:10 aakuti: “Kusekelela njoosekelela muli-Jehova, amoyo wangu uyookondwa muli-Leza wangu.” Icisyomezyo ca Isaya 35:10 cakazuzikizigwa alimbabo icakuti: “Nkabela banunwidwe ba-Jehova bayooboola akuza bwiimba kusikila ku-Zioni. Bayooba alukondo lutamani amitwe yabo. Bayoojana lukondo abusekelezi, elyo buusu akutongela zyoonse ziyoocijilila.” Oolu ndulwakali lukkomano lwabatumwa ba Jehova baluumuno lwa bunaleza kuciindeeco mu 1919 nobakali kutalika kuya kukukambaukila bantu boonse makani mabotu. Kuzwa kuciindeeco kusikila sunu, taakwe nobaleka kucita mulimo ooyu, alimwi lukkomano lwabo lwayungizigwa. Mumulumbe wakwe Waacilundu, Jesu wakati: “Bali acoolwe basikutontozya, nkaambo bazootegwa bana ba-Leza.” (Matayo 5:9) Ikululama kwaceeco cakaambilizigwa waawo kwalikucitikila basyeede bananike “bana ba-Leza” kuzwa mu 1919 kusikila sunu.

12, 13. (a) Mbaani bakasangana antoomwe aba Israyeli ba Leza mukubelekela Jehova, alimwi bakabeleka mulimo nzi? (b) Ndukkomano nzi ndobajisi babelesi ba Jehova bananike?

¹² Mukwiinda kwamyaka, mweelwe waba Israyeli ba Leza wakatanta kusikila muma 1930 ciindi kuyobolola kwabasyeede bananike nokwakatandila kukumana. Sena mpoona kutanta kwamweelwe wabakambausi bamakani mabotu kwakaima? Peepe. Kwakatalikide kale kuyoboloka nkamu mpati ya Banakristo balaa bulangizi bwaanyika, alimwi boonse aba bakali kusangana ababunyina bananike mumulimo wakukambauka. Mwaapostolo Johane wakiibona nkamu eyi mucilengaano, alimwi inzila njaakabapandulula ileelede kubonwa kabotu iyakuti: “Bali kunembo lyacuuno ca-Leza, balamumanina milimo isikati amasiku.” (Ciyubunuzyo 7:15) Ee, inkamu mpati yakajata bubi kubelekela Leza. Aboobo ciindi mweelwe wabananike nowakatalika kuyaabuceya, ikuzwa mu 1935, imulimo wakatolwa ambele canguzu abeenzinyina aaba basyomeka.

¹³ Munzila eyi Isaya 60:3, 4 yakazuzikizigwa yalo yaamba kuti: “Nkabela bamasi balasika kuzoobona mumuni wako, abami kuzoobona kubekema kwakupasula kwako. Lanzya meso aako koonse koonse, ubone. Boonse bayoboloka, beza kulinduwe. Bana bako balombe baleza kuzwa kule, abana bako basimbi balayumunwa bubuketwe.” Lukkomano lwakucitika kwazintu ezi kuba Israyeli ba Leza lulapandululwa kabotu kuli Isaya 60:5, kwalo nkotubala kuti: “Lino wabona buyo, meso aako ayoomunika, amoyo wako uyookankama cakukondwa, nkaambo imbono yalwizi ziyooba zyako, abuvubi bwamasi bayooboola kulinduwe.”

Imbunga ya Jehova Iyaambele

14. (a) Ncilengaano nzi cazintu zyakujulu ncaakabona Ezekieli, alimwi malailile nzi ngaakatambula? (b) Ncinzi bantu ba Jehova bamazubaano ncobakaziba, alimwi ncinzi ncobakalimvwa kuti beelede kucita?

¹⁴ Mumwaka wa 613 B.C.E., Ezekieli wakabona cilengaano cambunga ya Jehova yakujulu iibaanga ninkalaki kaiyaambele. (Ezekiele 1:4-28) Kumbele Jehova wakazoomwaambila kuti: “O mwana amuntu, koya kuluzubo lwa-Israyeli, ukabaambile majwi aangu.” (Ezekiele 3:4) Mumwaka uno wa 1997, tulabona kuti mbunga ya Jehova yakujulu iciyabweenda canguzu kutegwa izuzikizye makanze aa Leza. Aboobo tucilimvwa kuti tweelede kwaambila bambi makanze aayo. Mumazubaayo, Ezekieli wakaamba majwi aakazwide kuli Jehova lwakwe kwiinda mumuuya uusalala. Sunu twaamba majwi aazwa mu Jwi lya Jehova, Ibbaibbele lyakalembwa kwiinda mumuuya uusalala. Alimwi oyo mmulumbe wini-wini elyo bbuku ngolijisilidi bantu! Nokuba kuti banji balalibilika zyakumbele, Ibbaibbele lilatondezya kuti zintu zyaindila kule-kule kubija—alimwi kumwi oku zyaindila kubota—kwiinda mbuli mbobayeeya.

15. Nkaambo nzi bukkale ncobuli bubi kwiinda mbobayeeya banji sunu?

¹⁵ Izintu zyabija akaambo kakuti, mbuli mbutwabona muzibalo ezi zyainda, Kristendomu alimwi abukombi boonse bumbi bwakubeja ino-ino buyo buyoonyonyoonwa cakumaninina, mbubonya mbuli bwakamaninina Jerusalemu mu 607 B.C.E. Kunze lyaboobo, pele bubambe bwanyika yoonse bwamapolitikisi, ibukozyanisyigwa acinyama camitwe iili ciloba ameja aali kkumi mubbuku lya Ciyubunuzyo, bulaafwi kulobesyegwa, mbuli bunji bwamasi aakabambene aa Jerusalemu aabuhedeni. (Ciyubunuzyo 13:1, 2; 19:19-21) Kuciindi ca Ezekieli, Jehova wakacisalazya kupandulula mbokwakali kuyoosya kunyonyoonwa kwa Jerusalemu ikwakali kuza. Pele aaya majwi ayoobaa bupanduluzi bwiinda awa ciindi bantu baakubona kuti kunyonyooka kwanyika eyi kulaza. Jehova wakati kuli Ezekieli: “Lino webo, O mwana amuntu, sintimuka. Sintimuka mumeso aabo camoyo uutyokede acakuusa loko. Lino nibazookubuzya kuti, Waba aanzi nosintimuka? uleelede kuvuwa kuti, Nkaambo kamakani ngendamvwa. Makani asike buyo, myoyo yoonse ileenzemuka amaanza oonse alakompama, myuuya yoonse ilawizuka amazwi oonse alateta mbuli maanzi. Ncobeni aleza, alazuzikizigwa, mbwaamba Mwami Jehova.” (Ezekiele 21:6, 7; Matayo 24:30) Ooku kumbele kuza zintu ziyoosya kapati. Iluyando ndotujisi kubantuma lweelede kutucita kuti twaambilizye ncenjezyo, twaambe “makani” aakuboola kwabukali bwa Jehova.

16. Kubabombe myoyo, nkaambo nzi bukkale ncobuli kabotu kwiinda mbobayeeya banji?

¹⁶ Pele kwalo kubantu babombe myoyo, izintu zilibeendelede kabotu kwiinda bunji bwabantu mbobanga beezeezya. Munzila nzi ino? Mukuti Jesu Kristo wafwida zibi zyesu alimwi ino ulalela kali Mwami mu Bwami bwa Leza. (1 Timoteo 1:15; Ciyubunuzyo 11:15) Imapenzi aabantu alo aalibonya kutakonzeka kumana, ino-ino ayoomanizigwa kwiinda mu Bwami obo bwakujulu. Lufwu, kuciswa, lweeno, nzala, alimwi amilandu ziyooba zintu zyajilo, alimwi Bwami bwa Leza buyoolela nyika yaparadaiso kakutakwe kulwanwa pe. (Ciyubunuzyo 21:3, 4) Boonse bantu bayoobaa luumuno lwa bunaleza—bayoobaa cilongwe caluumuno alimwi caluyando a Jehova Leza alimwi amuli cabo.—Intembauzyo 72:7.

17. Nkuvwula nzi ikukkomanisya batumwa baluumuno lwa bunaleza?

¹⁷ Mumasena amwi aanyika, makamu-makamu aakankamanisya aabantu babombe myoyo alauzumina mulumbe oyu waluumuno lwa bunaleza. Ikwaamba buyo zikozyanyo zisyoonto, basikumwaya bana Ukraine baluulwa kuti bakayungizigwa a 17 pasenti mwakali. Bana Mozambique baluulwa kuti bakayungizigwa a 17 pasenti, abalo bana Lithuania bakayungizigwa a 29 pasenti. Russia yakayungizigwa a 31 pasenti, kakuli yalo Albania yakayungizyigwa a 52-pasenti yabasikumwaya. Ooku kuyungizigwa kwiimimina makumi aazyuulu zyababombe myoyo aabo bayanda kubaa luumuno lwa bunaleza alimwi ibaima kulubazu lwabululami. Ooku kuyungizigwa kuletela bunyina boonse bwa Bunakristo ikukondwa.

18. Ibantu nobaswiilila nobataswiilili, ino swebo zintu tweelede kuzilanga buti?

¹⁸ Sena bantu mbobafwambaana obo kuzumina oko nkomukkala? Kuti kakuli boobo tulakondwa antoomwe andinywe. Pele mumabazu aamwi, citola mawoola manji-manji aakubeleka canguzu naya muntu uukkomanina kasimpe ajanike. Sena aabo babelekela mumabazu aali boobu balayozya naa kutyompokelwa? Peepe. Bakamboni ba Jehova balaibaluka majwi aa Leza ngaakaambila Ezekieli ciindi naakamutuma-tuma ooyu musinsimi mwana-mwana kuti akakambaukile bama Judanyina kuti: “Ambweni bayooswiilila, ambweni bayookaka (nkaambo mbana baluzubo lukataazya), nekubaboobo bayooziba kuti kwaba musinsimi akati kabo.” (Ezekiele 2:5) Mbuli Ezekieli, tulazumanana kwaambila bantu zyaluumuno lwa bunaleza nobazumina nobatazumini. Ciindi nobazumina tulakkomana kapati. Ikuti batufwutatila, batusampaula, nokuba kutupenzya, tulaliyumya. Tulamuyandisya Jehova, alimwi Ibbaibbele lyaamba kuti: “Luyandisyo . . . [luli] acamba kumapenzi oonse.” (1 Ba-Korinto 13:4, 7) Akaambo kakuti tulaliyumya mukukambauka kwesu, ibantu balizi lino kuti Bakamboni ba Jehova mbaani. Balizi amulumbe ngotujisi. Ciindi aakuboola mamanino, bayooziba kuti Bakamboni ba Jehova bakasoleka kubagwasya kubaa luumuno lwa bunaleza.

19. Mbotuli babelesi ba Leza mwini-mwini, ncoolwe nzi ncotukkomanina?

¹⁹ Sena kuli coolwe cipati kwiinda cakubelekela Jehova? Peepe! Ilukkomano lwesu lupati luzwa mucilongwe cesu a Leza alimwi amuluzibo lwakuti tuli mukucita kuyanda kwakwe. “Bali acoolwe bantu bezi kusekelela, beenda mumumuni wabusyu bwako, O Jehova.” (Intembauzyo 89:15) Aboobo lyoonse atukubambilile kukondwa kwesu kwakuba batumwa ba Leza baluumuno kubantu. Lyoonse atutole lubazu mumulimo ooyu kusikila mane Jehova akaambe kuti mbubo.

Sena Mulayeeya?

◻ Mbaani batumwa ba Leza baluumuno sunu?

◻ Ino tuzi buti kuti Babuloni Mupati wakawa mu 1919?

◻ Ncinzi ncobabikkila kapati maanu ba “nkamu impati”?

◻ Nkaambo nzi bukkale bwakumbele ncobulangilwa kubija kubunji bwabantu kwiinda mbobayeeya sunu?

◻ Kuli baabo babotu myoyo, nkaambo nzi bukkale bwakumbele ncobunga bwabota kwiinda mbuli mbobayeeya?

[Zifwanikiso izili apeeji 29]

Iciindi nobabona kunyongana kwabuleya, banji balalibilika

[Zifwanikiso izili apeeji 31]

Batumwa baluumuno lwa bunaleza mbabantu bainda kukkomana ano ansi sunu