LAIBBULALI YAA INTANETI ya Watchower
Watchtower
LAIBBULALI YAA INTANETI
Chitonga
  • BBAIBBELE
  • ZYAKAMWAIGWA
  • MISWAANGANO
  • w97 8/1 map. 26-31
  • Luyando Lwanu Lwabunyina Aluzumanane!

Kunyina vidiyo aawa mpomwasala.

Vidiyo yakaka kulila.

  • Luyando Lwanu Lwabunyina Aluzumanane!
  • Ngazi Yamulindizi 1997
  • Tutwe Twamakani
  • Makani Aakozyenye
  • Amube Alweetelelo
  • Ikukondwa Amuntu
  • Micito Yaluzyalo
  • Amukanze Kuti ‘Luyando Lwanu Lwabunyina Luzumanane’!
    Ngazi Yamulindizi Yaambilizya Bwami bwa Jehova (Yakwiiya)—2016
  • Lugwalo Lwamwaka wa 2016
    Bbuku Lyaamwaka lya Bakamboni ba Jehova Lyamu 2016
  • “Amuzumanane Kweenda Muluyando”
    Amube Acilongwe a Jehova
  • Mbotukonzya Kuyumya Luyando Ndotujisi Akati Kesu
    Ngazi Yamulindizi Yaambilizya Bwami bwa Jehova (Yakwiiya)—2023
Amubone Azimwi
Ngazi Yamulindizi 1997
w97 8/1 map. 26-31

Luyando Lwanu Lwabunyina Aluzumanane!

“Kuyandana kwabunyina akujatisigwe.”—BA-HEBRAYO 13:1.

1. Ino ncinzi ncomunga mwacita kucita kuti mulilo uzumanane kuyaka masiku nokutontola, alimwi ino tujisi mukuli nzi toonse uukozyenye aceeci?

AANZE takulitontwedi, alimwi kuyabwiindila. Cilikke cipa kuti kakukasaala muŋanda mmakala masyoonto buyo aamulilo aaciyaka aacikko. Mulilo oyu weelede uzumanane, buyo-buyo boonse balamana kufwa ampeyo. Sena mulakkala buyo kamulangilila kusikila mane mulilo oyu wamaninina kuzima, makala oonse alota? Peepe. Mulayuma kuusosela akubikkilila tukuni tumbi kutegwa uzumanane. Mbubonya mbocibede akulindiswe caboola kumulilo mupati kwiinda “mulilo” wini-wini weelede kuba mumyoyo yesu—luyando.

2. (a) Nkaambo nzi ncokunga kwaambwa kuti luyando lwatontola mumazubaaya aamamanino? (b) Ino luyando ncintu cipati buti ku Banakristo beni-beni?

2 Tukkede muciindi Jesu ncaakasinsima kuti ciyakuba ciindi luyando nolunooyabumana akati kabantu balyaamba Bunakristo nyika yoonse mbwiizulwa. (Matayo 24:12) Jesu wakali kwaamba luyando lupati kapati, olo lutegwa luyando lwa Jehova Leza a Jwi lyakwe Bbaibbele. Aimbi misyobo yaluyando ayalo iyabumana. Ibbaibbele lyakasinsima kuti “kumazuba aamamanino,” bantu banji banooli “basilunya.” (2 Timoti 3:1-5, Ci) Aaya mmasimpe! Mumukwasyi imweelede kuti kamuli luyandano, amwalo mwazula bulwani aluciso—izicitwa cimwi ciindi munzila iyoosya kapati. Nokuba boobo munyika eyi itontola, Banakristo tabaambilwi buyo kuyandana akati kabo, baambilwa kuba aluyando lwakulyaaba, ikuyanda beenzinyina kwiinda mbobaliyanda. Luyando lwesu alulibonye kuli boonse cakuti cibe citondezyo naa caando cambungano yakasimpe ya Bunakristo.—Johane 13:34, 35.

3. Ino luyando lwabunyina lwaamba nzi, alimwi caamba nzi kuluzumanana?

3 Kwiinda mukusololelwaa muuya uusalala mwaapostolo Paulo wakalailila kuti: “Kuyandana kwabunyina akujatisigwe.” (Ba-Hebrayo 13:1) Kweelana abwakalembwa mubbuku limwi, ibbala lya Cigiliki lisandulwidwe kuti “kuyandana kwabunyina” awa (phi·la·del·phiʹa) “lyaamba luyando lwaluzyalo, luse, lubomba, kuyanda kugwasya.” Ino ncinzi Paulo ncaakali kwaamba ciindi naakati luyando olu alujatisigwe? Eelyo bbuku ndyoonya lyaamba kuti, “talweelede kutontola pe.” Aboobo tatweelede buyo kubafwida luse bakwesu; atulutondezye luse lwesu, lulibonye. Kunze lyaboobo, luyando olu lweelede kuzumanana, talweelede kutontola pe. Sena tacikatazyi eci? Cilakatazya, pele muuya wa Jehova ulakonzya kutugwasya kwiiya kubaa luyando lwabunyina alimwi akuzumanana mulindulo. Atubone nzila zyotatwe nzyotunga twasosela mulilo waluyando olu mumyoyo yesu.

Amube Alweetelelo

4. Ino kweetelelana caamba nzi?

4 Ikuti kamuyanda kuti luyando lwanu lwabakwesu abacizi Banakristo luye ambele, inga mwayandika kusaanguna kulimvwa mbuli mbobalimvwa, ikubeetelela nobasunkwa alimwi anobapenga. Oobo mbombubo mbwaakaamba mwaapostolo Petro ciindi naakalemba kuti: “Amube amoyo omwe, amube akweetelelana akuyandana kwabunyina, aluzyalo, amoyo mutete.” (1 Petro 3:8) Ibbala lya Cigiliki ilibelesegwa waawa kutondezya “kweetelelana” lipandulula “kupengela amwi.” Umwi haabupampu wa Cigiliki camu Bbaibbele waamba kuti ibbala eeli: “Lipandulula ciimo camizeezo ncotubaa ncico ciindi notulibikka muciimo cabantu akulimvwa mbuli mbobalimvwa.” Aboobo lweetelelo lulayandika. Umwi mubelesi wa Jehova uusyomeka cimwi ciindi wakati: “Lweetelelo nkuciswa kwako nkondimvwa mumoyo wangu.”

5. Ino tuzi buti kuti Jehova ngusilweetelelo?

5 Sena Jehova ulimvwa kweetela boobo? Mmasimpe mbwalimvwa. Mucikozyanyo, mboobu mbokulembedwe kujatikizya kupenga kwabantu bakwe bana Israyeli: “Mumapenzi aabo oonse wakapenga alakwe.” (Isaya 63:9) Jehova taakwe buyo naakabona mapenzi aabantu; wakalimvwa mbobakali kulimvwa. Ikutondezya mbuli mbwalimvwa Jehova, majwi aa Zekariya 2:8, aamba kuti: “Woonse uumuguma ulaguma imboni yaliso lyakwe.”a Kapandulula kapango aka, umwi haabupampu mubupanduluzi wakati: “Iliso lili akati kazizyo zyamubili wamuntu izijisi bubambe bukatazya kuteelela alimwi bukompeme kapati; alimwi amboni yaliso—imunjilila mumuni uuzwa kujulu uucita kuti liso kalibona—ncecintu cipati alimwi cifwambaana kumvwa kucisa kwiinda zintu zyoonse mububambe bwaliso. Taakwe bumbi bupanduluzi ibupandulula kabotu kwiinda boobu ikujatikizya luzyalo lupati Jehova ndwajisi kuzintu nzyayanda.”

6. Mbuti Jesu Kristo mbwaatondezya lweetelelo?

6 Awalo Jesu lyoonse wakali kutondezya lweetelelo kapati. Kanjikanji wakali ‘kubafwida luzyalo’ bantunyina ibakali kupenga akaambo kakuciswa naa buyumu-yumu bumwi. (Marko 1:41; 6:34) Wakaamba kuti ciindi muntu uli woonse natalanganyi kabotu basikumutobela bakwe bananike, Jesu ulimvwa mbuli kuti nguwe uucitwa boobo. (Matayo 25:41-46) Alimwi sunu mbwali ‘Mupaizi wesu Mupati’ wakujulu, ngonguwe uukonzya “kutweetelela mukulengauka kwesu.”—Ba-Hebrayo 4:15.

7. Ino lweetelelo inga lwatugwasya buti ciindi mukwesu naa mucizi naatunyemya?

7 Ategwa ulakonzya “kutweetelela mukulengauka kwesu”—sena ayo taali majwi aaumbulizya? Aboobo andiswe tweelede kweetelelana. Aino ncuuba-uba kapati kulangana tumpenda tubi. (Matayo 7:3-5) Elyo ikuzwa sunu, sena inga tamukasoli kweetelela munyoko naa mucizi ciindi nayoomunyemya? Amulibikke muciimo camuntu ooyo, atwaambe mwakakomezegwa mbuli nguwe, muli mbuli nguwe, mujisi tumpenda ntwajisi. Sena muli masimpe kuti tamukonzyi kulubizya mbuli nguwe—nokuba kwiinda nguwe? Muciindi cakulangila bamwi kucita zintu kwiinda nzyotukonzya swebo kucita, tweelede kulibikka muciimo cabo, eco inga catugwasya kuzyeendelezya mbozyeelede zintu, mbuli mbwacita Jehova walo ‘uuibaluka kuti tuli bulongo buyo.’ (Intembauzyo 103:14; Jakobo 3:17) Ulizi mpotugolela. Tatulangili kucita zintu kwiinda mpotugolela. (Amukozyanisye a 1 Bami 19:5-7.) Toonse atutondezye ciimo calweetelelo cili boobu kuli bamwi.

8. Ino tweelede kulimvwa buti ciindi mukwesu naa mucizi nali mupenzi?

8 Paulo wakalemba kuti imbungano ili mbuli mubili, uujisi zizyo zyaandeene-andeene izyeelede kubelekela antoomwe mulukamantano. Wakayungizya kuti: “Kuti caciswa cizo cimwi, zilaciswa zizonyina zyoonse azyalo.” (1 Ba-Korinto 12:12-26) Tweelede kucisilwa amwi naa kulimvwa mbuli baabo balimukupenga. Baalu beelede kupa cikozyanyo mukucita boobo. Alimwi Paulo wakalemba kuti: “Na muntu ulikompeme, sa nsikompeme ambebo? Na muntu walebegwa, sa mebo nsipyi mucamba?” (2 Ba-Korinto 11:29) Baalu abalangizi beendeenda baiya Paulo kumakani aya. Nobabandika makani aacibumbili, nobacita mulimo wabo wabweembezi nociba ciindi nobabeteka makani, beelede kusola kulibikka muciimo cabantu. Paulo wakakulwaizya kuti: “Amusekelezyanye abo basekelela, akulilana abo balila.” (Ba-Roma 12:15) Ikuti naa mbelele zyabona kuti beembezi balimvwa mbozilimvwa akuteelela naa kubona mpozigolela alimwi balazyeetelela mumapenzi aazyo, inga zilayandisya kutambula lulayo, kusololelwa alimwi akululamikwa. Zilayandisya kujanika kumiswaangano, kazijisi lusyomo lwakuti ‘zilakatulukwa mumyoyo yazyo.’—Matayo 11:29.

Ikukondwa Amuntu

9. Ino Jehova utondezya buti kuti ulakondwa ambazu mpotuli babotu?

9 Inzila yabili yakusosela luyando lwabunyina njakukondwa amuntu. Ikutegwa bantu batukonde, tweelede kulanga akulombozya bubotu bwabo alimwi amilimo yabo. Ikuti naa twacita boobo, tulaba mbuli mbwabede Jehova. (Ba-Efeso 5:1) Buzuba abuzuba ulatulekelela zibi zyesu zinji izitali zipati. Alimwi zibi zyesu zikomene zibe buti, ulatulekelela kufwumbwa kuti tweempwa cini-cini. Ikuti naa walitulekelelede, ezyo zibi nzyaatulekelela inga tacizibikki kumoyo pe. (Ezekiele 33:14-16) Sintembauzyo wakabuzya kuti: “O Jehova, nowakabika moyo wako kuzibi zyesu, ngwani wakali kunoopona, O mwami?” (Intembauzyo 130:3) Jehova ulanga buyo zintu zibotu nzyotucita notumubelekela.—Ba-Hebrayo 6:10.

10. (a) Nkaambo nzi ncocinga caleta ntenda kubanabukwetene kuti aumwi katakondwi amweenzinyina? (b) Ino ncinzi umwi ncayelede kucita kuti wabona kuti tacikondwi amusaanyina?

10 Eeci ncikozyanyo ncotweelede kutobela, ikapati mumukwasyi. Ikuti bazyali kabalumbaizyanya, batondezya cikozyanyo cakutobela mumukwasyi. Akaambo kakuti tukkede mumazuba bantu nobatacikwe makani alukwatano, ncuuba-uba kunyansya muntu ngomukwetene awe akubikkila maanu kapati kutuntu tusyoonto ntwalubizya, kutayeeya abubotu bwakwe. Ikuyeeya kwamusyobo oyu kutaluzi kunyonyoona lukwatano, kucita kuti lukwatano cibe cintu citakkomanisyi, ube mukuli uuminya. Ikuti naa muntu ngomukwetene limwi tacimukondi, amulibuzye kuti, ‘Sena oyu musaama taakwe mpali mubotu?’ Amuyeeye kaambo ncomwakamuyandila akumukwatila. Sena toonse twaambo twakamupa kuti mumuyande muntu oyu uulibedelede twamana na? Peepe tatukonzyi kumana pe; aboobo amusole kapati kubona bubotu bwamusaanyoko alimwi amumulumbaizye.—Tusimpi 31:28.

11. Ikutegwa luyando lwamulukwatano lutabi lwakuupaupa ameso, nzintu nzi ziteelede kucita?

11 Ikuti aumwi kakondwa amweenzinyina, banabukwetene tabakooba aluyando lwakuupa-upa ameso. (Amukozyanisye 2 Ba-Korinto 6:6; 1 Petro 1:22.) Ikuti muntu kajisi luyando lwamusyobo oyu ilusoselwa akukondwa amukaakwe camoyo omwe, takoomucitila lunya nobali balikke kuŋanda, takoomubbodweda akumutola ansi, takoomusula akuleka kwaambaula anguwe kwamazuba manji alimwi takoomuuma. (Ba-Efeso 5:28, 29) Mulumi amukaintu ibakondwa cini-cini amweenzinyina balalemekana. Tabalemekani buyo kumbele lyabantu, pele balacita obo ciindi coonse Jehova ncalangilila—atwaambe kuti lyoonse balalemekana.—Tusimpi 5:21.

12. Nkaambo nzi bazyali ncobeelede kubalumbaizya mumbazu nzyobacita kabotu bana babo?

12 Abalo bana bayandika kukkomanina. Eeci tacaambi kuti bazyali beelede kwiide kubalumbaizya buyo aatakwe aciliko, pele beelede kulumbaizya ciimo cabo cibotu alimwi azintu zibotu nzyobacita. Amuyeeye cikozyanyo ca Jehova naakali kulumbaizya Jesu. (Marko 1:11) Alimwi amuyeeye citondezyo ca Jesu kali “mwami” mucikozyanyo. Awalo wakalumbaizya bazike bakwe bobile bamucikozyanyo kuti, ‘mwabotya nobazike babotu basyomesi,’ nokuba kuti nzyobakapegwa zyakaliindene alimwi umwi aumwi wabo wakajana mpindu yiindene kweelana akupegwa kwakwe. (Matayo 25:20-23; amukozyanisye Matayo 13:23.) Abalo bazyali basongo balasola kujana nzila zyakulumbaizya mwana umwi aumwi kuciimo cakwe cibotu cilibedelede, izintu nzyakonzya kucita, alimwi amilimo njacita. Pele tabasiminini kapati aakulumbaizya milimo njobacita bana ikutegwa batakulwaizyi muuya wakuzundana akati kabo. Tabakooyanda kuti bana babo bakomene kabatyompedwe.—Ba-Efeso 6:4; Ba-Kolose 3:21.

13. Ino nguni weelede kupa citondezyo mukukkomanina umwi aumwi wamumbungano?

13 Mumbungano ya Bunakristo, baalu abalangizi beendeenda bapa cikozyanyo mukukkomanina muntu umwi aumwi wabutanga bwa Leza. Mukuli ngobajisi mulemu akaambo kakuti balijisi alimwi mukuli mupati wakulaya mubululami, ikululamika baabo balubila mumoyo mubombe, alimwi akusinsa baabo bayandika kusinsa. Ino baiyumuna buti mikuli eyi yiindene yoonse yobile?—Ba-Galatiya 6:1; 2 Timoteo 3:16.

14, 15. (a) Ino mbuti Paulo mbwaakatondezya nzila yeelede yakusinsa? (b) Mbuti balangizi Banakristo mbobanga bazuzikizya kabotu mulimo wakululamika zintu zyalubila awakulumbaizya? Amupandulule.

14 Icikozyanyo ca Paulo inga cagwasya kapati. Wakali mwiiyi, mwaalu alimwi amweembezi mupati. Imbungano nzyaakali kweendelezya zyakajisi mapenzi aakatazya, alimwi taakayoowa kuzisinsa ciindi nozyakali kuyandika kusinsa. (2 Ba-Korinto 7:8-11) Ikuti twalanga mulimo wa Paulo, cilalibonya kuti taakali buyo kwiide kusinsa—wakali kusinsa buyo ciindi nokwakali kuyandika kucita boobo. Munzila eyi wakatondezya busongo buzwa kuli Leza.

15 Ikuti naa mulimo wabwaalu twaukozyanisya aciimbo, ikusinsa akulaya inga kwaba mbuli kajwi komwe ikeendelana aciimbo coonse. Ikajwi kaleelela mubusena bwako. (Luka 17:3; 2 Timoteo 4:2) Atwaambe kuli ciimbo cakajwi ako komwe buyo, ikaide kwiindululwa. Talikoolampa, kalaleka kukondelezya akutalika buyo kutusabila. Mbweena buyo abaalu Banakristo, balasoleka kubotya nzila yabo yakuyiisya akuiindanya-indanya. Taikooba buyo yakululamika nokuli mapenzi. Ikuyiisya kwabo kanjikanji kulaba kuya kwakukulwaizya. Mbweena mbuli Jesu Kristo, ibaalu basiluyando kusaanguna bayandaula mbazu mpali mubotu muntu, mpayandika kulumbaizya, tabalangi mpali mubi kutegwa bamutongooke pe. Balakondwa amilimo njobasola kapati kucita Banakristonyina. Balasyoma kuti umwi-aumwi ulimukusola mbuli mbwakonzya kubelekela Jehova. Alimwi baalu tabamuki kulumbaizya.—Amukozyanisye 2 Ba-Tesalonika 3:4.

16. Ino Banakristonyina Paulo bakajatikizigwa buti aciimo cakwe calweetelelo acakubakkomanina?

16 Cakutadooneka, ibunji bwa Banakristo mbaakali kubelekela Paulo bakabona kuti wakali kubakkomanina alimwi akubeetelela. Ino tuzi buti? Amubone mbobakalimvwa kujatikizya Paulo. Teebakali kumuyoowa nokuba kuti wakalaa cuuno cipati. Pele, bakali kumuyanda akumusikila cakutaenkeenka. Ciindi naakalaya kubusena bumwi, baalu ‘bakawida ansingo yakwe, bamumyonta’! (Incito 20:17, 37) Ibaalu beelede kulumba—kubikkilizya andiswe akaambo kakuti Paulo wakasiya cikozyanyo cakutobela! Ee, umwi-aumwi kakondwa amweenzinyina.

Micito Yaluzyalo

17. Ino kucitilana micito yaluse mumbungano inga kwaleta zintu nzi zibotu?

17 Icintu cipati cisosela luyando lwabunyina nkucita kacito kaluse. Jesu wakaamba kuti, “ikupa kuletela kukondwa kapati kwiinda kutambula.” (Incito 20:35, NW) Kufwumbwa nzila njotunga twapa, ibe yakumuuya, ibe yakumubili, naa yaciindi cesu alimwi anguzu, tatukkomanisyi buyo bantu, pele tulalikkomanisya andiswe. Mumbungano, iluse lulatabukila. Imucito omwe waluse ubusya mucito umbi waluse. Talikoolampa, luyando lwabunyina lulazula!—Luka 6:38.

18. Ino “luzyalo” lwaambwa kuli Mika 6:8 lwaamba nzi?

18 Jehova wakakulwaizya bantu bakwe bana Israyeli kutondezya luse. Kuli Mika 6:8, tubala kuti: “Wakutondezya, O muntu, cintu cibotu mbucibede. Taakwe cintu cimbi Jehova ncayanda kulinduwe, pele kucita bululami akuyanda luzyalo akweenda cakulibombya a-Leza wako.” Ino caamba nzi “kuyanda luzyalo”? Aawa bbala lya Cihebrayo lyakasandululwa kuti “luzyalo” (cheʹsedh) amwalo mu Cingisi lisandulwidwe kuti “luse.” Kweelana a The Soncino Books of the Bible, eeli bbala “talyaambi buyo luse. Lyaamba ‘luse lutondezegwa amicito,’ ikucita micito yaluzyalo kubantu bacete abayandika kugwasya, alimwi akubantuma boonse.” Aboobo umwi haabupampu mulwiiyo waamba kuti ibbala lya cheʹsedh lyaamba “luyando ilutondezegwaa micito.”

19. (a) Muunzila nzi nzyotunga twaliyeeyela kutondezya luyando kuli bamwi mumbungano? (b) Amupe cikozyanyo caluyando lwabunyina mbuli mbolwatondezegwa kulindinywe.

19 Iluyando lwesu lwabunyina taluli lwakwaamba buyo pe. Ndwamasimpe. Aboobo amuyandaule nzila zyakucitila bakwesu abacizi micito yaluyando. Amube mbuli Jesu watakali kulindila bantu lyoonse kuti bamusikile akumulomba lugwasyo, pele kanjikanji wakaliyeeyela mwini. (Luka 7:12-16) Amuyeeye kapati aabo bayandika kugwasya. Sena muntu uucembeede naa uukompeme uyandika kuswaya naa ambweni uyanda muntu wakutuma? Sena “mucaala” uyandika kujanina ciindi cakubaa walo naa kumubikkila maanu? Sena muntu uutyompedwe uyandika kuswiilila naa kuumbulizya? Atusole mbuli mbotukonzya kujana ciindi cakutondezya luse luli boobo. (Jobu 29:12; 1 Ba-Tesalonika 5:14; Jakobo 1:27) Mutalubi kuti mumbungano iizwide bantu batalondokede, icintu ciyandika kapati akati kamicito yaluse nkulekelelana—mutabedani amfwundiilili nociba ciindi nomulaa kaambo kumweenzinyoko. (Ba-Kolose 3:13) Ikutawayawaya kulekelelana kupa kuti kutabi muuya walwaandaano, wamfwundiilili, awamazwanga mumbungano uuli mbuli ngubo izyanyikwa mumaanzi izizima mulilo waluyando lwabunyina.

20. Mbuti toonse mbotunga twazumanana kulilingula?

20 Toonse atusungwaale kucita kuti mulilo oyu waluyando uzumanane kuyaka mumyoyo yesu. Lyoonse katulilingula. Sena tulabeetelela bantu? Sena tulabacitila bantu micito yaluse? Kufwumbwa kuti katucita boobo, mulilo waluyando ulakasaazya bunyina bwesu nokusika aciimo cilibuti kutontola kwaluyando lwabantu munyika eyi alimwi nobatabikkilani maanu munzila ilibuti. Aboobo ziyume zibe buti, “kuyandana kwabunyina akujatisigwe”—lino kusikila kukabe kutamani!—Ba-Hebrayo 13:1.

Bupanduluzi buyungizidwe

a Amwi ma Bbaibbele ikapango aka akasandulula kuti, ooyo uuguma bantu ba Leza uguma liso lya Israyeli naa lyakwe mwini, ikutali liso lya Leza pe. Oobu busanduluzi bulubide bwakaletwaa balembi bamumyaanda yamyaka yaakati-kati, aabo kwiinda mukubula luzibo ibakacinca kapango aaka mukusola kululamika zibalo zimwi nzyobakali kuyeeyela kuti zyuubya-ubya Leza. Munzila eyi bakasisa lweetelelo lwa Jehova.

Muyeeya Buti?

◻ Ino luyando lwabunyina lwaamba nzi, alimwi nkaambo nzi ncotweelede kuzumanana mulindulo?

◻ Mbuti kubaa lweetelelo mbokutugwasya kuzumanana muluyando lwesu lwabunyina?

◻ Ino kukondwa abantu kugwasya buti muluyando lwabunyina?

◻ Ino micito yaluse icita buti kuti luyando luvwule mumbungano ya Bunakristo?

[Kabbokesi kali apeeji 28]

Iluyando Lwatondezegwa

Myaka yainda, umwi mwaalumi wakali kwiiya Bbaibbele kwaciindi cilamfwu a Bakamboni ba Jehova wakacili kudooneka kumakani aakutondezya luyando lwabunyina. Wakalizi kuti Jesu wakati: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Johane 13:35) Pele cakamuyumina kusyoma. Bumwi buzuba wakalubona luyando lwa Bunakristo kalutondezegwa.

Nokuba kuti oyu mwaalumi wakali muntu mulema, uukkubilwa acuuno camavwili, wakabweza lweendo kule ankwaakali kukkala. Kali ku Betelehemu, mucisi ca Israyeli, wakaunka kumuswaangano wambungano. Kali kumuswaangano oyu, umwi Kamboni mu Arabu wakalomba aumbi mweenzu Kamboni kuti akalalile kwakwe kuŋanda, elyo sikwiiya Bbaibbele oyu wakatambwa awalo. Kabatanaya kukoona, oyu mweenzu wakalomba beni ŋanda kuti akafwumine kuya anze mukkoce lyaŋanda kutegwa akalangilile zuba mbolizwa. Mwini ŋanda wakamukasya. Nobwakaca ooyu mukwesu mu Arabu wakapandulula kaambo ncaakamukasizya. Kwiinda mumusanduluzi, wakaamba kuti, ikuti naa basimukobonyina baziba kuti ujisi beenzu bamusyobo waba Juda—mbuli mbwaakabede oyu sikwiiya Bbaibbele—inga bamuumpila ŋanda kubikkilizya anguwe amukwasyi wakwe mukati. Kacimukopede, oyu sikwiiya Bbaibbele wakamubuzya kuti, “Ino nkaambo nzi ncomwalibikka muntenda eeyi?” Oyo mukwesu mu Arabu wakaingula katabelesyi sikusandulula kumwi kamulangide kumeso, wakati buyo, “Johane 13:35.”

Sikwiiya Bbaibbele oyu cakamunjila naakabona kuti luyando lwabunyina nkoluli ncobeni. Wakabbapatizigwa kuzwa waawo.

[Cifwanikiso icili apeeji 31]

Ciimo ca mwaapostolo Paulo cakuyanzana abantu alimwi acakubakkomanina cakamupa kuti abe muntu ngobakonzya kusikila cakutayoowa bantu

    Chitonga Publications (1991-2024)
    Log Out
    Log In
    • Chitonga
    • Amutumine Bamwi
    • Makani Ngomuyanda
    • Copyright © 2025 Watch Tower Bible and Tract Society of Pennsylvania
    • Nzyomweelede Kuzumina
    • Mulawo Uujatikizya Kubamba Maseseke
    • Privacy Settings
    • JW.ORG
    • Log In
    Amutumine Bamwi