Jehova, Leza ‘Uufwamba Kujatila’

“Yebo, O Mwami, uli mubotu, ulafwamba kujatila.”—INTEMBAUZYO 86:5.

1. Mukuli nzi mulemu Mwami Davida ngwaakayumwide, alimwi wakajana buti luumbulizyo lwamoyo wakwe wakapengede?

IMWAMI DAVIDA wamu Israyeli yansiku wakaluuzi mboulema mukuli wakukatazigwaa manjeezyezya aakubaa mulandu. Wakalemba kuti: “Zibi zyangu zyandibbizya, zyandilemena kwiinda mukuli mulemu. Ndafwa cinywe, ndatyolaulwa; ndatongela nkaambo kakupilingana kwamumoyo wangu.” (Intembauzyo 38:4, 8) Nokuba boobo, Davida wakajana luumbulizyo lwamoyo wakwe wakapengede. Wakalizi kuti nokuba kuti Jehova ulicisulide cibi, kunyina namusulide sizibi—ikuti naa weempwa ncobeni akuleka nzila zyakwe zyabubi. (Intembauzyo 32:5; 103:3) Kasyomede kapati kuti Jehova ulilisungude kubafwida luzyalo abo beempwa, Davida wakati: “Yebo, O Mwami, uli mubotu, ulafwamba kujatila.”—Intembauzyo 86:5.

2, 3. (a) Ciindi notubisya, mukuli nzi ngotukonzya kuyumuna akaambo kakucita boobo, alimwi nkaambo nzi eci ncocili buyo kabotu? (b) Nintenda nzi iiliko kuti ‘twalilekela kwiindila’ kulemenwaa mulandu? (c) Ino Bbaibbele litusyomezya nzi kujatikizya mbwalibambilide kulekelela Jehova?

² Twabisya, aswebo tulakonzya kuyumuna mukuli uuminya wakukatazigwaa manjezyeezya. Ikulisenda oku kuli buyo kabotu, alimwi kulagwasya. Kulakonzya kutupa kuti tubweze ntaamu iiluzi kululamika waawo mpotwalubizya. Nokuba boobo, Banakristo bamwi balakatazigwa kapati akaambo kakulipa mulandu. Imoyo wabo inga kauzumanana kwaamba kuti Leza kunyina nayoobalekelela bwini pe, nobeempwa cinani. Umwi mucizi naakayeeya cibi ncaakacitide wakaamba kuti, “Cilapenzya kapati wayeeya kuti kunyina nayookuyanda limbi Jehova.” Noliba ciindi naakeempwa akutobela malailile aagwasya kuzwa kubaalu bamumbungano, wakayaambele kulimvwa kutayelela kulekelelwaa Leza. Wakapandulula ategwa: “Tabwiindi buzuba kanditamulombi Jehova kuti andilekelele.” Ikuti naa ‘twaindila kulemenwa’ amukuli wakulipa mulandu, Saatani ulakonzya kututyompya, akutupa kuti tulimvwe kuti tatweelede kubelekela Jehova pe.—2 Ba-Korinto 2:5-7, 11.

³ Pele obo tabusi mbwazilanga zintu Jehova! Ijwi lyakwe lilatusyomezya kuti, ikuti naa twatondezya kweempwa kwini-kwini, Jehova uliyandide, inzya, ulilibambide kutulekelela. (Tusimpi 28:13) Ikuti naa kuli nomwakabwene kuti ikulekelelwaa Leza takukonzeki, ambweni muyandika kuteelelesya mbwalekelela alimwi ancacitila boobo.

Nkaambo nzi Jehova ‘Ncafwamba Kujatila’?

4. Ncinzi ncayeeya Jehova kujatikizya mbotubambidwe, alimwi eci ciijatikizya buti nzila njatweendelezyela mumo?

⁴ Tubala kuti: “Mbuli kujwe mbokuli kule kuzwa kumbo, mbuboobu mbwaalampya insotoko zyesu kuzwa kulindiswe. Mbuli muntu mbwafwida bana bakwe luzyalo, alakwe Jehova ulabafwida luzyalo abo bamuyoowa.” Nkaambo nzi Jehova ncatondezya luzyalo? Kapango katobela kalaingula ategwa: “Nkaambo ulizi mbububede buntu bwesu, ulaibulukwa kuti tuli bulongo buyo.” (Intembauzyo 103:12-14) Inzya, Jehova talubi pe kuti tulizilenge zyabulongo, izilubizya naa zikompeme akaambo kakutalondoka. Ikaambo kakuti ulizi “mbububede buntu bwesu” katuyeezya kuti Ibbaibbele likozyanisya Jehova kumubumbi elyo swebo litukozyanisyaa zilongo nzyabumba.a (Jeremiya 18:2-6) Imubumbi ulazijatisya zilongo zyakwe zyabulongo pele kumwi kazikombelela kapati kayeeyede bubambe bwazyo. Aboobo, awalo Jehova, Mubumbi Mupati ulatweengelela natulanganya kweelanaa bubambe bwesu bwabulubizi.—Amweezyanisye 2 Ba-Korinto 4:7.

5. Ino bbuku lya Ba-Roma likupandulula buti kujatisya kwacibi anyama yesu iiwide?

⁵ Jehova ulaciteelela mbocili anguzu cibi. Imagwalo apandulula kuti cibi ninguzu zyalo izijatide muntu cabujayi. Ino cibi cijatisya kapati buti? Kubbuku lya Ba-Roma, imwaapostolo Paulo ulapandulula munzila iisalala ategwa: Tuli ‘muzibi’ mbubwenya basilumamba mbobali mubweendelezi bwamupati wamasole (Ba-Roma 3:9); cilaa “nguzu” kubantu mbuli mwami (Baloma 5:21, BT); ‘cilikkalilide’ mulindiswe (Ba-Roma 7:17, 20); “mulao” waco ulazumanana kubeleka mulindiswe, atwaambe ulasoleka kweendelezya buumi bwesu. (Ba-Roma 7:23, 25) Ilakatazya kaka nkondo njotweelede kulwana ikutantamuka nguzu zyacibi kunyama yesu iiwide!—Ba-Roma 7:21, 24.

6. Ino Jehova ubalanga buti abo balomba luzyalo lwakwe amoyo uuzwide kuusa?

⁶ Aboobo Leza wesu siluzyalo ulizi kuti takukonzyeki pe kumuteelela cakumaninina, noiyanda buti myoyo yesu kucita boobo. (1 Bami 8:46) Ulatusyomezya caluyando kuti uyootulekelela, kufwumbwa kuti twamulomba kuti atufwide luzyalo mumoyo uuzwide kuusa. Sintembauzyo Davida wakati: “Cipaizyo ncayanda Leza muuya uutyokede; moyo uupengede akweempwa tokuusampauli, O Leza.” (Intembauzyo 51:17) Jehova takaukaki naa kuusulaika moyo uupengede akweempwa akaambo kamukuli wamulandu. Tailiboteli nzila eyi yakupandulula Jehova mbwalibambilide kulekelela!

7. Nkaambo nzi ncotuteelede kubisya acaali akaambo kaluzyalo lwa Leza?

⁷ Mbwali siluse Leza, sena tulakonzya kubisya acaali, katulibesya kuti kayi tuli basizibi? Peepe! Jehova tacengwi aciimo ncotutondezya. Iluzyalo lwakwe lulaampolugolela. Kunyina nayoobalekelela abo babisya caali cakuyumya moyo kabateempwi pe. (Ba-Hebrayo 10:26-31) Pele, abona moyo “uupengede akweempwa” “ulafwamba kujatila.” (Tusimpi 17:3) Atulange-lange iŋambilo zimwi zibelesegwa mu Bbaibbele ikupandulula mbwalekelela Leza cakumaninina.

Ino Jehova Ulekelela Buti Cakumaninina?

8. Ncinzi cini-cini ncacita Jehova nalekelela zibi zyesu, alimwi eci ceelede kutujatikizya buti?

⁸ Imwami Davida wakeempwa wakaamba kuti: “Mpoonya awo ndakalyaambawida cibi cangu kulinduwe, teendakasisa bubi bwangu; ndakati, Nkondyaambawide milandu yangu kuli-Jehova, nkabela wakandilekelela mulandu wazibi zyangu.” (Intembauzyo 32:5) Ibbala lyakuti “wakandilekelela” lisandulula bbala lya Cihebrayo lyalo lyaamba “kunyamuna,” “kuyumuna, kutola.” Ikubelesyegwa kwalyo awa kwaamba ‘kugwisya mulandu, bubi, bulubizi.’ Aboobo cili mbuli kuti Jehova wakanyamuna zibi zya Davida akuzitola. (Amweezyanisye Levitiko 16:20-22.) Kakunyina kudooneka, eci cakaubya-ubya mukuli wamilandu ngwaakanyamude Davida. (Amweezyanisye Intembauzyo 32:3.) Aswebo mbubonya tulakonzya kusyoma muli Leza walo uulekelela zibi zyabaabo balomba kulekelelwa kwiinda mulusyomo lwabo lwacituuzyo ca Jesu Kristo. (Matayo 20:28; amweezyanisye Isaya 53:12.) Aboobo abo balaazibi nzyanyamuna Jehova akuzitola tabeelede kuzumanana kubaa mukuli wakulipa mulandu wazibi zyamusyule.

9. Ino majwi aa Jesu aakuti: “Utulekelele milandu yesu” aamba nzi?

⁹ Jesu wakabelesya ciimo cili akati kabasimilandu abaabo bacitilwa milandu ikutondezya mbwalekelela Jehova. Mucikozyanyo, Jesu wakatukulwaizya kupaila kuti: “Utulekelele milandu yesu.” (Matayo 6:12) Aboobo Jesu wakakozyanisya ‘zibi’ ku “milandu.” (Luka 11:4) Ciindi notubisya tuba ‘basimilandu’ kuli Jehova. Ibbala (iciti) lya Cigiliki lyakasandululwa “kulekelela” lilakonzya kwaamba “kulekezya, ikuleka mulandu cakutauyeeya limbi.” Munzila imwi, Jehova nalekelela ulauzimaazya mulandu walo ngotweelede kupegwa. Aboobo basizibi beempwa balakonzya kuumbulizigwa. Kunyina nayoolomba kubbadelelwa Jehova kumulandu ngwaazimaazya!—Intembauzyo 32:1, 2; amweezyanisye Matayo 18:23-35.

10, 11. (a) Ncinzi ncolyaamba bbala lyakuti “zijatilwe” ilijanwa kubbuku lya Incito 3:19? (b) Ino kulekelela kwa Jehova cakumaninina kwatondezyegwa buti?

¹⁰ Kubbuku lya Incito 3:19, Ibbaibbele libelesya imbi nzila ikupandulula kulekelela nkwalekelela Leza ategwa: “Aboobo amweempe, musanduke, kuti zibi zyanu zijatilwe.” Ikaambo kakuti, ‘kuti zijatilwe’ kasandulula bbala lya Cigiliki ilinga kuti lyabelesyegwa mumaambila mbali likonzya kwaamba “ikumaninzya, kugwisya, kuzimaazya naa kunyonyoona.” Ikweelana abasikwiiya bamwi, imuzeezo uukankaizigwa awa nguyooyo wakumwaya bulembo. Ino eci cakalikukonzyeka buti? Inki wakalikubelesyegwa kapati nsiku wakavwelanizidwe nsizi, bulimbula alimwi amaanzi. Mbokwamanina buyo kulembwa ainki ili boobu, muntu wakali kukonzya kuboola amunganganga mutete akuzimaazya malembe oonse.

¹¹ Mboobu bupanduluzi bubotu bwanzila njalekelela Jehova cakumaninina. Nalekelela zibi zyesu, cili mbuli kuti wabweza munganganga akuzizimaazya. Tatweelede kuyoowa kuti uyootupa mulandu kuzibi ezi kumbele nkaambo Bbaibbele liyubununa cimbi cintu cigambya kujatikizya luzyalo lwa Jehova: Nalekelela, ulubila limwi!

“Zibi Zyabo Nsikoozooziibalukwa Limbi”

12. Ibbaibbele nolyaamba kuti Jehova ulaziluba zibi zyesu, sena lyaamba kuti takonzyi kuziyeeya, alimwi nkaambo nzi ncomwainguda boobo?

¹² Ikwiinda mumusinsimi Jeremiya, Jehova wakasyomezya kujatikizya baabo bali mucizuminano cipya ategwa: “Nzoobalekelela milandu yabo, azyalo zibi zyabo nsikoozooziibalukwa limbi.” (Jeremiya 31:34) Sena eci caamba kuti Jehova nalekelela takonzyi kuziyeeya limbi zibi? Tacikonzyi kuba boobo pe. Ibbaibbele lilatwaambila zibi zyakacita bantu banji balo mbaakalekelela Jehova, kubikkilizyaa Davida. (2 Samuele 11:1-17; 12:1-13) Jehova ucizizi zibi nzyobakacita mbubwenya mbotweelede kuziba aswebo. Imakani aajatikizya zibi zyabo antoomwe akweempwa akulekelelwaa Leza, zyakalembelwa kuti zitugwasye. (Ba-Roma 15:4) Ino ono Bbaibbele lyaamba nzi noliti Jehova ‘taziibaluki’ pe zibi zyabaabo mbalekelela?

13. (a) Ncinzi cibikkilizidwe mucciti lya Cihebrayo ilyakuti “nsikoozooziibalukwa”? (b) Ino ncinzi ncatusyomezya Jehova naamba kuti, “Zibi zyabo nsikoozooziibalukwa limbi”?

¹³ Ijwi lyamu Cihebrayo ilisanduludwe kuti “nsikoozooziibalukwa” lyaamba zinji kunze lyakuyeeya buyo zyamusyule. Kweelana abbuku litegwa Theological Wordbook of the Old Testament, libikkilizya “ntaamu iiluzi yeelede kucitwa.” Aboobo munzila eyi, ‘ikwiibaluka’ cibi kubikkilizya kubweza ntaamu kuli basizibi. Imusinsimi Hosea naakaamba kujatikizya bana Israyeli batamvwi kuti, “Leza takooyooluba kubisya kwabo,” oyu musinsimi wakali kwaamba kuti Jehova uyoobweza ntaamu kubasubula akaambo kakuteempwa. Aboobo kapango kacaala kalayungizya kuti: “Uyoobapa mulandu kuzibi zyabo.” (Hosea 9:9) Pele Jehova naamba kuti, “Zyalo zibi zyabo nsikoozooziibalukwa limbi” utusyomezya kuti, kuti wamulekelela kale sizibi weempwa, kunyina nayootola ntaamu kulinguwe akaambo kazibi ezyo kumbele. (Ezekiele 18:21, 22) Aboobo ulaluba mukuti tatuyeezyi-yeezyi zibi zyesu pe kutegwa atupe mulandu naa kutusubula lyoonse-lyoonse. Elyo Jehova watupa cikozyanyo cibotu cakuti twiiye mukweendelezya bamwi. Naa kwabuka mazwanga tacili cibotu pe kuyeeya milandu yakaindi yalo njomwakazuminide kuti mwalekelela.

Ino Mbuti Kumakani aa Mapenzi Aatobela?

14. Nkaambo nzi kulekelelwa ncokutaambi kuti sizibi weempwa waangululwa kumapenzi oonse aaboola akaambo kanzila yakwe iitaluzi?

¹⁴ Sena ikufwamba kujatila Jehova nkwacita caamba kuti sizibi weempwa ulaangulukide kumapenzi oonse aaboola akaambo kanzila yakwe iitaluzi? Peepe. Tatukonzyi kubisya twamana katutasubulwi. Paulo wakalemba kuti: “Kufumbwa ncabyala muntu, ulatebula eco nciconya.” (Ba-Galatiya 6:7) Tulakonzya kubaa mapenzi amwi akaambo kamicito yesu, pele atulekelela Jehova tapi kuti tusikilwe mapenzi pe. Ciindi nokubuka manyongwe, Munakristo tayelede kulimvwa kuti, ‘Ambweni Jehova wandisubula akaambo kazibi zyangu zyamusyule.’ (Amweezyanisye Jakobo 1:13.) Pele, Jehova tatukwabilili kuli zyoonse zikonzya kucitika akaambo kamicito yesu iitaluzi. Ikulekana, mada aamusokwe, malwazi aapedanwa kwiinda mukoonana, ikutasyomwa naa kutalemekwa—zyoonse ezi zilakonzya kuba mapenzi aaboola akaambo kacibi alimwi Jehova takatukwabilili pe kuli yaaya. Amuyeeye kuti nokuba kuti Jehova wakalekelela zibi zya Davida kumakani aajatikizya Bateseba alimwi a Uriya, taakamukwabilila Davida kumapenzi aakatobela.—2 Samuele 12:9-14.

15, 16. Ino mulawo uulembedwe ku Levitiko 6:1-7 wakali kubagwasya buti boonse bobile uubisilwa asikubisya?

¹⁵ Azyalo zibi zyesu zilakonzya kazijisi mapenzi aazyo. Mucikonzyanyo, amulange makani aali kubbuku lya Levitiko caandaano 6. Aawa Mmulawo wa Musa waamba muntu uucita cibi cipati cijatikizya kubweza zintu zyamuna Israyelinyina kwiinda mukubba, kunyanzya naa kuunina. Mpoonya sizibi waukaka mulandu mane wayuma buya akukonka cakubeja. Eci ciimo cijatikizya mulandu uutakwe bumboni pe. Nokuba boobo, kwainda ciindi sikubisya wapenzyegwa mumizeezo amane walyaambilila zibi zyakwe. Ikutegwa alekelelwe a Leza, weelede kucita azimbi zintu zyotatwe: apilusye nzyaakabwezede, amubbadele ngwaakabbida akuyungizizya alimwi akupa mugutu kuti ncipaizyo candubyo. Mpoonya mulawo ulaamba: “Mupaizi amanye mulandu wakwe kubusyu bwa-Jehova, kuti alekelelwe cibi.”—Levitiko 6:1-7; amweezyanisye Matayo 5:23, 24.

¹⁶ Oyu mulawo cakali cipo caluzyalo kuzwa kuli Leza. Wakali kugwasya yooyo wakabbidwa iwakapilusilwa zintu walo weelede kuti wakaubulukwa ciindi sikumubisizya naakazumina cibi cakwe. Alimwi mulawo wakali kugwasya yooyo wakakulwaizigwaa manjezyeezya aakwe ikuzumina mulandu wakwe akubambulula cibi cakwe. Inzya, ikuti naakakaka kucita boobo, naanga kunyina kulekelelwaa Leza.

17. Iciindi nobabijilwa bamwi akaambo kazibi zyesu, ncinzi ncalangila kuti tucite Jehova?

¹⁷ Nokuba kuti tatucitobeli Mulawo wa Musa, ulatutondezya kabotu mizeezo ya Jehova mibotu, kubikkilizyaa mbwakulanga kulekelela. (Ba-Kolose 2:13, 14) Kuti bamwi babijilwa naa kuuninwaa zibi zyesu, Jehova ulakondwa ciindi notusoleka kucita mbuli mbotukonzya ‘kululamika cinyonyoono.’ (2 Ba-Korinto 7:11) Eci cibikkilizya kuzumina cibi cesu, kuzumina mulandu wesu alimwi akulilekelela kuli yooyo ngutwabisizya. Mpoonya tulakonzya kulomba kulekelelwa kuli Jehova kwiinda mucipaizyo ca Jesu elyo inga twakatalukwa akubaa manjeezezya aasalala acisyomezyo cakuti twalekelelwaa Leza.—Ba-Hebrayo 10:21, 22.

18. Ndulayo nzi lukonzya kweendelaamwi akulekelela kwa Jehova?

¹⁸ Mbubwenya mbuli muzyali siluyando, Jehova ulalekelela akupa cisubulo cili mbocibede. (Tusimpi 3:11, 12) Munakristo weempwa ulakonzya wanyanzigwa mukuli wakwe wabwaalu, wabukutausi naa wabupainiya. Cilakonzya kumucisa ikuleka mikuli eyi kwaciindi cili mbocibede yalo njaali kuyandisya. Nokuba boobo, ilulayo luli boobu talwaambi kuti waleka kuyandwaa Jehova naa kuti Jehova taamulekelela. Kunze lyaboobo, tweelede kuyeeya kuti ilulayo luzwa kuli Jehova ncisinizyo cakuti ulatuyanda. Ikuluzumina akulutobela kulakonzya kutugwasya kapati alimwi kulakonzya kutusololela kubuumi butamani.—Ba-Hebrayo 12:5-11.

19, 20. (a) Ikuti naa mwakacita zibi zinji, nkaambo nzi ncomuteelede kulimvwa kuti takucikonzyeki kutambula luzyalo lwa Jehova? (b) Ncinzi ciyoobandikwa mucibalo citobela?

¹⁹ Cilakatalusya kaka kuziba kuti tubelekela Leza ‘uufwamba kujatila’! Jehova ulabona azimbi kunze lyazibi zyesu alimwi akulubizya. (Intembauzyo 130:3, 4) Ulicizi cili mumyoyo yesu. Ikuti naa mwalimvwa kuti moyo wenu ulityokede akupengana akaambo kazibi zyamusyule mutaambi kuti takucikonzyeki pe kutambula luzyalo kuzwa kuli Jehova. Nokuba kuti kuli kulubizya nkomwakacita, naa mweempwa ncobeni, mwabweza ntaamu yakululamika cilubide akukomba kuli Jehova cakusinizya kuti mulekelelwe kwiinda mubulowa bwa Jesu bwakatika, mulakonzya kusyoma kuti majwi aali kuli 1 Johane 1:9 alabeleka kulindinywe: “Kuti twalyaamba zibi zyesu, walo ulasyomeka akululama, ulatulekelela zibi zyesu akutusalazizya zitaluleme zyoonse.”

²⁰ Ibbaibbele litukulwaizya kwiiya kulekelela nkwacita Jehova notweendelezyanya abamwi. Nokuba boobo, mpaaciimo nzi mpotukonzya kulangilwa kulekelela akulubila limwi ciindi bamwi nobatulubizyila? Aya makani ayoobandikwa mucibalo citobela.

Bupanduluzi buyungizidwe

Inga Mwaingula Buti?

◻ Nkaambo nzi Jehova ‘ncafwamba kujatila’?

◻ Ino Bbaibbele likupandulula buti kujatila nkwajatila Jehova cakumaninina?

◻ Ciindi Jehova nalekelela, muunzila nzi mwalubila limwi?

◻ Ino Jehova ulangila kuti tucite nzi ciindi nobabijilwa bamwi akaambo kazibi zyesu?

[Cifwanikiso icili apeeji 22]

Ciindi nobabijilwa bamwi akaambo kazibi zyesu, Jehova ulangila kuti tululamike awo mpotwakabisya