CIBALO CAKWIIYA 7
LWIIMBO 15 Atumutembaule Mwana wa Jehova Mutaanzi Kuzyalwa!
Ino Mugwasyigwa Buti Akulekelela kwa Jehova?
“Yebo ulalekelela ncobeni.”—INT. 130:4.
ZILAAYIIGWE
Tulalanga-langa zikozyanyo zyamu Bbaibbele zipandulula Jehova mbwatulekelela zibi zyesu munzila iilibedelede. Cibalo eeci cilatugwasya kuzumanana kutondezya kulumba akaambo kakulekelela kwakwe.
1. Nkaambo nzi ncocikatazya kuzyiba muntu umwi ncapandulula ciindi naamwaambila kuti wamulekelela?
KWEELEDE kuti inga mwakkalwa moyo kuti muntu umwi wamwaambila kuti: “Ndakulekelela.” Inga mwakatalusyigwa kapati kwaambisya ikuti kamuzyi kuti mwakaamba naa kucita cintu cimwi cakamucisizya moyo muntu ooyo. Pele kanji-kanji cilakatazya kumvwisya ncapandulula muntu ciindi naamba kuti wamulekelela. Ambweni inga upandulula kuti mucili balongwe. Naa ambweni inga kapandulula kuti taciyandi kwaamvwa makani aayo, akuti cilongwe canu tacicili mbuli mbocakabede kumatalikilo. Bantu inga bapandulula zinji ciindi nobaamba kuti bamulekelela muntu umwi.
2. Ino kulekelela kwa Jehova kwaambidwe buti mu Magwalo? (Amubone abupanduluzi buyungizyidwe.)
2 Nzila Jehova mbwatulekelela tobantu batalondokede iliindene ambotulekelelana mulicesu. Kunyina muntu uukonzya kulekelela mbuli Jehova. Sintembauzyo wakaamba boobu kujatikizya Jehova: “Yebo ulalekelela ncobeni, ikutegwa bantu kabakulemeka.”a (Int. 130:4) Masimpe, Jehova “ulalekelela ncobeni.” Ulatutondezya ncokwaamba kulekelela ncobeni. Mutupango tumwi twamu magwalo aa Chihebrayo, balembi ba Bbaibbele bakapandulula kulekelela kwa Jehova kubelesya bbala liindene aleelyo likonzya kubelesyegwa nokwaambwa mbobalekelela bantu.
3. Ino kulekelela kwa Jehova kwiindene buti akulekelela kwesu? (Isaya 55:6, 7)
3 Ikuti Jehova wamulekelela muntu, ulacita oobo cakumaninina. Aboobo ulazumanana kuba acilongwe ciyumu anguwe. Eelo kaka tulalumba kapati kuti Jehova ulatulekelela cakumaninina!—Amubale Isaya 55:6, 7.
4. Mbuti Jehova mbwatugwasya kumvwisya kulekelela ncobeni ncokwaamba?
4 Mbwaanga kulekelela kwa Jehova kuliindene akwesu, mbuti mbotukonzya kuzyiba ncocaamba kulekelela ncobeni? Jehova ubelesya zikozyanyo zibotu kutugwasya kumvwisya mbwatulekelela. Mucibalo eeci, tulazilanga-langa zimwi. Zikozyanyo eezyi zilatugwasya kubona kuti ciindi notweempwa, Jehova ulakonzya kutulekelela zibi zyesu mpoonya tulatalika alimwi kuba balongwe bakwe. Aboobo kulanga-langa zikozyanyo eezyi, kulatugwasya kumuyanda kapati alimwi akumulumba Taateesu siluse alimwi siluzyalo, walo uutulekelela munzila zinji kapati.
JEHOVA ULAGUSYA ZIBI
5. Ncinzi cicitika ciindi Jehova natujatila zibi?
5 Mu Bbaibbele, kanji-kanji zibi zikozyanisyigwa kumukuli uuminya kapati. Mwami Davida wakazyaamba boobu zibi zyakwe: “Milandu yangu yandivwulila atala aamutwe wangu; yandiminya kapati mbuli mukuli mulemu.” (Int. 38:4) Pele Jehova ulabajatila zibi zyabo basizibi beempwa. (Int. 25:18; 32:5) Ibbala lya Chihebrayo ilyakasandululwa kuti ‘kujatila’ lyaamba “kunyamuna” naa “kugusya.” Aboobo, tulakonzya kukozyanisya Jehova kumwaalumi ulaanguzu walo munzila yamaambilambali uugusya mukuli mulemu wacibi amagwezyo eesu.
‘Kujatila’ (Int. 32:5)
6. Ino nkulamfwu buti Jehova nkwabikkide zibi zyesu?
6 Bbaibbele alimwi libelesya cikozyanyo cimbi kutondezya kuti Jehova uzibikkide kulamfwu kapati zibi zyesu. Lugwalo lwa Intembauzyo 103:12 lwaamba kuti: “Mbubonya kumapolelo aazuba mbokuli kulamfwu kapati kuzwa kumabbililo aazuba, akwalo nkwabikkide zinyonyoono zyesu mbokubede kulampa kuzwa kulindiswe.” Kujwe nkulamfwu kapati kusika kumbo. Ziyume zitete, kujwe akumbo takukonzyi kuswaangana. Munzila imwi inga twaamba kuti, Jehova uzibikka kulamfwu kapati zibi zyesu cakuti tatukonzyi akweezeezya. Eelo kaka oobu mbumboni busalede bwakuti Jehova ulatulekelela cakumaninina!
“Mbubonya kumapolelo aazuba mbokuli kulamfwu kapati kuzwa kumabbililo aazuba” (Int. 103:12)
7. Ncinzi Bbaibbele ncolyaamba kujatikizya Jehova ncacita kuzibi zyesu? (Mika 7:18, 19)
7 Nokuba kuti Jehova uzibikkide kulamfwu kapati zibi zyesu munzila yamaambilambali, sena eeci caamba kuti inga ulatubikkilila? Peepe. Mwami Hezekiya wakaamba boobu kujatikizya Jehova: “Zibi zyangu zyoonse wazisowela kusyule lyako.” Naa kweelana ambobwaamba bupanduluzi buyungizyidwe, “yebo wagusya zibi zyangu zyoonse kumbele aameso aako.” (Is. 38:9, 17; bupanduluzi buyungizyidwe.) Eeci caamba kuti ciindi Jehova nabalekelela bantu beempwa, ulacita oobo cakumaninina. Kaambo aaka alimwi inga kaambwa kuti: “Wapa kuti [zibi zyangu] zibe mbuli kuti tiizyakacitikide.” Bbaibbele lilazumanana kukakankaizya kaambo aaka mucikozyanyo cimbi cili kulugwalo lwa Mika 7:18, 19. (Amubale.) Lugwalo oolu lutondezya kuti Jehova usowa zibi zyesu mumpisi zyalwizi. Kaindi, muntu tanaakali kukonzya kununa cintu canyikila naa cayinkila mulwizi.
“Zibi zyangu zyoonse wazisowela kusyule lyako” (Is. 38:17)
“Alimwi zibi zyesu zyoonse uyoozisowela mumpisi zyalwizi” (Mik. 7:19)
8. Ino twaiya nzi kusikila waawa?
8 Cakusalazya, Bbaibbele litondezya kuti ciindi Jehova natulekelela ulacita oobo cakumaninina, aboobo tatweelede kulipa mulandu. Masimpe, aleelela majwi ngaakaamba Davida naakati, “balikkomene aabo bajatilwa milandu yabo abaabo bajisi zibi izyavwumbwa; ulikkomene muntu ooyo Jehova ngwatabikkilili zibi zyakwe.” (Rom. 4:6-8) Eelo kaka ooku nkulekelela ncobeni!
JEHOVA ULAMWAYA ZIBI
9. Mbuti Bbaibbele mbolitugwasya kubona kuti Jehova ulalekelela cakumaninina?
9 Kwiinda mucinunuzyo, Jehova ulakonzya kumwaya zibi zyabantu beempwa. Amubone Bbaibbele ncolyaamba kujatikizya Jehova mbwacita oobo. Munzila yamaambilambali, Jehova ulazisanzya alimwi akuzisukuluzya zibi. Eeci cipa kuti sizibi asalazyigwe. (Int. 51:7; Is. 4:4; Jer. 33:8) Mucikozyanyo, Jehova waamba kuti: “Nokuba kuti zibi zyanu zilasalala pyu, zilatubisyigwa buu mbuli caanda; nokuba kuti zilasubila mbuli cisani camubala wadowalowa, zilaba mbuli boya bwambelele.” (Is. 1:18) Cilakatazya kapati kusalazya cisani catimbila adooti lyamubala uusalala. Pele kwiinda mucikozyanyo eeci, Jehova utusyomezya kuti zibi zyesu zilakonzya kusalazyigwa cakumaninina.
“Nokuba kuti zibi zyanu zilasalala pyu, zilatubisyigwa buu mbuli caanda” (Is. 1:18)
10. Mbuti Bbaibbele mbolipandulula kujatikizya Jehova mbwalibambilide kutulekelela?
10 Kweelana ambotwakabandika mucibalo cainda, zibi zikozyanisyigwa ‘kuzikwelete.’ (Mt. 6:12, bupanduluzi buyungizyidwe) Twakazyalwa katujisi cikwelete kapati. Aboobo kufwumbwa ciindi notumubisizya Jehova, cili mbuli kuti cikwelete cesu ciyaabukomena. Pele ciindi Jehova natulekelela zibi, inga cili mbuli kuti wacikkansula cikwelete cesu. Kunyina nayanda kuti tubbadelele zibi nzyaakatulekelela. Eelo kaka tulakatalusyigwa kapati ciindi Jehova natulekelela zibi zyesu!
“Kotulekelela zibi zyesu” (Mt. 6:12)
11. Ncinzi Bbaibbele ncolipandulula ciindi nolyaamba kuti zibi zyesu ‘zilamwaigwa’? (Milimo 3:19)
11 Jehova tazikkansuli buyo zikwelete naa zibi zyesu, pele ulazimwaya. (Amubale Milimo 3:19.) Kutegwa tucimvwisye eeci, amweezeezye kuti muntu iwakamukweletesya mali wabikka X mupati amweelwe wamali ngomwakakweleta. Nokuba boobo, mweelwe wamali inga kaucilibonya nokuba kuti wakkansulwa. Pele kukkansula kuliindene akumwaya cintu cimwi. Kutegwa tucimvwisye cikozyanyo eeci, tweelede kuyeeya kuti kaindi inki iwakali kubelesyegwa wakali kusanganizyigwa a carbon, muro alimwi amaanzi. Muntu wakali kukonzya kubelesya cintu cimwi citete kumwaya zyalembwa. Aboobo ciindi cikwelete nocakali ‘kumwaigwa,’ cakali kucitwa oobo cakumaninina. Bantu tiibakali kukonzya kubona zyakalembedwe. Aboobo cikwelete cakali kulibonya mbuli kuti kunyina nocakaliko. Eelo kaka citupa kukkalwa moyo kuzyiba kuti Jehova tazikkansuli buyo zibi zyesu, pele alimwi ulazimwaya cakumaninina!—Int. 51:9.
“Kutegwa zibi zyanu zimwaigwe” (Mil. 3:19)
12. Ino twiiya nzi kucikozyanyo cijatikizya kkumbi lisiya mbi?
12 Kuli cikozyanyo acimbi Jehova ncabelesya kupandulula mbwatulekelela zibi. Wakaamba kuti: “Ndiyoozimaanya zinyonyoono zyako mbuli kuti zyasiswa kunze aakkumbi azibi zyako mbuli kuti zyasiswa kunze aakkumbi lisiya mbi.” (Is. 44:22) Ciindi Jehova natulekelela inga cili mbuli kuti ubelesya kkumbi lisiya mbi kusisa zibi zyesu kutegwa kazitacilibonyi.
“Ndiyoozimaanya zinyonyoono zyako mbuli kuti zyasiswa kunze aakkumbi” (Is. 44:22)
13. Ino mulimvwa buti ciindi Jehova namulekelela zibi zyanu?
13 Ino zikozyanyo eezyi zituyiisya nzi? Ciindi Jehova natulekelela zibi zyesu, tatweelede kulipa mulandu kujatikizya zibi eezyo mubuumi bwesu boonse. Cipaizyo ca Jesu, cakapa kuti zibi zyesu zibbadelwe cakumaninina. Ciindi Jehova natulekelela cibi inga cili mbuli kuti kunyina notwakacicitide. Aboobo eeci ncencico ncacita Jehova ciindi notweempwa zibi zyesu.
JEHOVA UYANDA KUTI TUBE BALONGWE BAKWE ALIMWI
Ciindi natulekelela Taateesu wakujulu, cipa kuti tube acilongwe cibotu anguwe (Amubone muncali 14)
14. Nkaambo nzi ncotukonzya kusyoma kuti Jehova ulakonzya kutulekelela cakumaninina? (Amubone zifwanikiso.)
14 Ciindi Jehova natulekelela, tulakonzya kuba masimpe kuti uba mulongwe wesu alimwi. Akaambo kakuti Jehova ulalekelela cakumaninina, tatweelede kuzumanana kulipa mulandu naa kulibilika kuti ulatubikkilila akutalika kuyandaula nzila yakutusubula. Eeco kunyina nociyoocitika. Ciindi Jehova natwaambila kuti watulekelela, tweelede kumusyoma. Musinsimi Jeremiya wakazubulula majwi ngaakaamba Jehova naakati: “Ndiyoobalekelela cinyonyoono cabo, alimwi cibi cabo tandikaciyeeyi limbi pe.” (Jer. 31:34) Mwaapostolo Paulo wakali kuzubulula majwi aali kulugwalo lwa Bahebrayo 8:12. Pele ino eeci caamba nzi?
“Cibi cabo tandikaciyeeyi limbi pe” (Jer. 31:34)
15. Ino caamba nzi kuti Jehova taciziyeeyi limbi zibi zyesu?
15 Mu Bbaibbele, ibbala lyakuti ‘kuyeeya’ talili lyoonse nolyaamba muntu umwi kayeeya cintu cimwi cakacitika musyule. Muciindi caboobo, lilakonzya kwaamba ntaamu njabweza muntu ooyo. Mucikozyanyo, cigwebenga icakaanzikidwe acisamu munsi-munsi a Jesu cakalomba kuti: “Jesu, ukandiyeeye waakunjila mu Bwami bwako.” (Lk. 23:42, 43) Cakali kulomba Jesu kuti acicitile cintu cimwi aciindi eeco. Bwiinguzi bwa Jesu bwakatondezya kuti wakali kuyoocibusya cigwebenga eeci. Aboobo, ciindi Jehova naamba kuti taciziyeeyi limbi zibi zyesu, caamba kuti kumbele kunyina nayootusubula akaambo kanzizyo.
16. Ino Bbaibbele lilupandulula buti lwaanguluko luboola akaambo kakulekelelwa ncobeni?
16 Bbaibbele libelesya cikozyanyo cimbi, ikutugwasya kumvwisya lwaanguluko luboola akaambo kakulekelela ncobeni kwa Jehova. Akaambo kakutalondoka tukozyanisyigwa ‘kubazike bacibi.’ Pele ciindi Jehova natulekelela, tuba mbuli bazike ‘baangununwa kucibi.’ (Rom. 6:17, 18; Ciy. 1:5) Aboobo, tulakonzya kukkomana kapati mbubonya mbuli muzike waangununwa.
“Mwakaangununwa kucibi” (Rom. 6:18)
17. Mbuti kulekelelwa mbokupa kuti tuponesyegwe? (Isaya 53:5)
17 Amubale Isaya 53:5. Cikozyanyo camamanino ncotuyanda kulanga-langa citukozyanisya kubantu ibajisi bulwazi bujaya. Akaambo kacipaizyo cacinunuzyo Jehova ncaakatupa kwiinda mu Mwanaakwe, twakaponesyegwa munzila yamaambilambali. (1Pet. 2:24) Ciindi notwabisya, cilongwe cesu a Jehova cilanyongana. Pele akaambo kacinunuzyo, ulakonzya kutulekelela mpoonya tulakonzya kuba acilongwe ciyumu anguwe alimwi. Mbubwenya mbwakkomana muntu iwalikuciswa bulwazi bujaya ciindi naapona, andiswe tulakkomana kapati ciindi notwaponesyegwa munzila yakumuuya akutalika kukkomaninwa a Jehova alimwi.
“Akaambo kazilonda zyakwe swebo twakaponesyegwa” (Is. 53:5)
NCOKWAAMBA KULEKELELA KWA JEHOVA KULINDISWE
18. Ncinzi ncotwaiya kuzikozyanyo zyamu Bbaibbele zijatikizya kulekelela kwa Jehova? (Amubone akabbokesi kakuti “Mbwatulekelela Jehova.”)
18 Ncinzi ncotwaiya kuzikozyanyo zyamu Bbaibbele zijatikizya kulekelela kwa Jehova? Ciindi natulekelela, ulacita oobo cakumaninina. Eeci citupa kuba acilongwe cibotu a Taateesu wakujulu. Nokuba boobo, tulizyi kuti kulekelela kwini-kwini ncipego. Kayi Jehova ulatulekelela akaambo kakuti ulatuyanda alimwi mwaabi, ikutali kuti tuleelela.—Rom. 3:24.
19. (a) Nkaambo nzi ncotweelede kumulumba kapati Jehova? (Baroma 4:8) (b) Ncinzi ncotuyoobandika mucibalo citobela?
19 Amubale Baroma 4:8. Eelo kaka tulamulumba kapati Jehova akaambo kakuti “ulalekelela ncobeni”! (Int. 130:4) Nokuba boobo, ikuti katuyanda kuti Jehova atulekelele, tweelede kucita cintu cimwi ciyandika kapati. Jesu wakaamba kuti: “Kuti kamutalekeleli bantu milandu yabo, awalo Uso takamulekeleli milandu yanu.” (Mt. 6:14, 15) Aboobo tweelede kwiiya Jehova alimwi akulekelela bamwi. Mucibalo citobela, tuyoobandika mbotukonzya kucita oobo.
LWIIMBO 46 Twalumba Jehova
a Mbolibelesyedwe bbala lya Chihebrayo ikwaamba kulekelela, kutondezya kuti ooku nkokulekelela kulikke kwancobeni. Alimwi kulekelela kwa Jehova ooku kuliindene akulekelela kwabantu. Busanduluzi bunji bwama Bbaibbele tabukwaambi kwiindana ooku kuyandika kapati, pele Bbaibbele lya Busanduluzi Bwanyika Mpya lilakwaamba, calo cipa kuti busanduluzi bwa Intembauzyo 130:4 kabulibedelede.