Amusyome Kuti Jehova Wakamulekelela

1-2. Ncinzi Jehova ncacita ciindi notweempwa zibi zyesu? (Amubone icili aacivwumbyo.)

MWAMI Davida wakali kulipa mulandu akaambo kazibi nzyaakacita musyule. (Int. 40:12; 51:3; katwe kamakani) Nokuba boobo, ciindi naakeempwa kuzwa ansi aamoyo, Jehova wakamulekelela. (2Sam. 12:13) Akaambo kaceeci, wakakkomana kapati kuzyiba kuti Jehova wakamulekelela.—Int. 32:1.

² Mbubwenya mbuli Davida, andiswe tulakonzya kukkomana kapati ciindi Jehova naatulekelela zibi zyesu. Eelo kaka cilaumbulizya kuzyiba kuti Jehova ulilibambilide kutulekelela zibi zyesu noziba zeezyo zipati ikuti tweempwa kuzwa ansi aamoyo, twalyaambilila alimwi akusolekesya kutaziinduluka! (Tus. 28:13; Mil. 26:20; 1Joh. 1:9) Alimwi cilaumbulizya kuzyiba kuti ciindi natulekelela, ulacita oobo cakumaninina mbuli kuti kunyina notwakacitide cibi.—Ezk. 33:16.

3-4. Ino mucizyi umwi wakalimvwa buti ciindi naakamana kubbapatizyigwa? Ncinzi ncotutiibandike mucibalo eeci?

³ Zimwi ziindi, bamwi cilakonzya kubakatazya kusyoma kuti Jehova wakabalekelela zibi zyabo. Amubone cakuluula camucizyi Jennifer, walo iwakakomenena mukasimpe. Ciindi naakali mukubusi, wakatalika kucita zintu zibi bazyali bakwe kabatazyi. Pele nokwakainda myaka iili mbwiibede, wakacinca bukkale bwakwe, wakalyaaba kuli Jehova mpoonya akubbapatizyigwa. Wakaamba kuti: “Ndakali kupona buumi bwakuyandisya zintu zyakumubili, kutalilemeka, kuciindizya kunywa bukoko alimwi akunyema cakuzwa munzila. Pele ndakalizyi kuti Bbaibbele lyaamba kuti akaambo kacipaizyo ca Kristo, Jehova ulakonzya kutulekelela zibi zyesu. Nokuba boobo, cakali kundaalila kusyoma kuti Jehova wakandilekelela ncobeni.”

⁴ Sena zimwi ziindi cilamukatazya kusyoma kuti Jehova wakamulekelela zibi nzyomwakacita kaindi? Ikuti naa mboobo, Jehova uyanda kuti musyome kuti wakamulekelela mbubwenya mbuli Davida. Aboobo mucibalo eeci, tulabandika kaambo ncotweelede kusyoma kuti Jehova wakatulekelela zibi alimwi acikonzya kutugwasya kucita boobo.

NKAAMBO NZI NCOCIYANDIKA KUSYOMA KUTI JEHOVA WAKATULEKELELA?

5. Ncinzi Saatani ncayanda kuti tusyome? Amupe cikozyanyo.

⁵ Kwiinda mukusyoma kuti Jehova wakatulekelela, tulakonzya kukeeleba kakole ka Saatani. Kamuyeeya kuti Saatani uyoocita cili coonse kutegwa atulesye kubelekela Jehova. Kutegwa aazuzikizye makanze aakwe, ulakonzya kutupa kusyoma kuti zibi zyesu tazikonzyi kulekelelwa. Mucikozyanyo, amubone cakacitikila mwaalumi waku Korinto walo iwakagusyigwa mumbungano akaambo kakucita bwaamu. (1Kor. 5:​1, 5, 13) Kumbele mwaalumi ooyu wakeempwa. Pele Saatani wakali kuyanda kuti aabo ibakali mumbungano batamulekeleli akukaka kumutambula mumbungano. Ikuti nobakakaka kumulekelela, mwaalumi ooyo naakalimvwa kuti Jehova kunyina naakamulekelela alimwi naakacileka kumubelekela. Eeci ncayanda Saatani amazuba aano. Pele swebo “tulizizyi nzila zyakwe zyabucenjezu.”—2Kor. 2:​5-11.

6. Ncinzi cikonzya kutugwasya kutazumanana kulipa mulandu?

⁶ Kwiinda mukusyoma kuti Jehova wakatulekelela, tulakonzya kuleka kuzumanana kulipa mulandu. Ciindi notwacita cibi inga tulaakulipa mulandu. (Int. 51:17) Alimwi eeci cili buyo kabotu, nkaambo kucita boobo kulakonzya kutukulwaizya kucinca bukkale bwesu akucita ciluzi. (2Kor. 7:​10, 11) Nokuba boobo, ikuti twazumanana kulipa mulandu akuyeeya kuti Jehova tanaakatulekelela, tulakonzya kutyompwa akucileka kumubelekela. Pele ikuti twasyoma kuti Jehova wakatulekelela, tulakonzya kucileka kulipa mulandu, calo cikonzya kupa kuti tuzumanane kumubelekela calukkomano alimwi katujisi manjezyeezya aasalala. (Kol. 1:​10, 11; 2Tim. 1:3) Aboobo mbuti mbotukonzya kuba masimpe kuti Jehova wakatulekelela ncobeni?

NCINZI CIKONZYA KUTUGWASYA KUSYOMA KUTI JEHOVA WAKATULEKELELA NCOBENI?

7-8. Ino Jehova wakalipandulula buti kuli Musa? Ncinzi ncotukonzya kuba masimpe? (Kulonga 34:​6, 7)

⁷ Amuzinzibale kuyeeya Jehova mbwaakalipandulula. Mucikozyanyo, ciindi Musa naakali kuyanda kuzyiba zinji kujatikizya Jehova, amuyeeye ncaakaambilwa a Cilundu ca Sinai.a (Amubale Kulonga 34:​6, 7.) Nokuba kuti Jehova ulijisi bube bubotu bunji, wakasala kwaambila Musa kuti ngu “Leza siluse alimwi silweetelelo.” Sena Leza uujisi bube buli boobu, takonzyi kumulekelela mukombi wakwe ikuti weempwa ncobeni? Ulakonzya, kayi ikuti tanaacita oobo kulakonzya kuba kuyuma moyo, bube mbwatajisi Jehova.

⁸ Tulakonzya kuba masimpe kuti ciindi Jehova naamba kuti ngusiluse, inga waamba masimpe, takonzyi kubeja pe. (Int. 31:5) Aboobo tulakonzya kuzisyoma zyoonse nzyaamba. Ikuti kacimukatazya kuleka kulipa mulandu akaambo kazibi nzyomwakacita kaindi, amulibuzye kuti: ‘Sena ndilasyoma ncobeni kuti Jehova ngusiluse alimwi ngusilweetelelo akuti ulakonzya kumulekelela sizibi uuli woonse iweempwa?’ Ikuti kamusyoma, nkokuti mweelede kuba masimpe kuti andinywe wakamulekelela.

9. Ino caamba nzi kujatilwa zibi? (Intembauzyo 32:5)

⁹ Amuzinzibale kuyeeya Jehova ncaakasololela balembi ba Bbaibbele kuti balembe kujatikizya kulekelela kwakwe. Mucikozyanyo, amubone mulembi wa Bbaibbele Davida mbwaakakupandulula kulekelela kwa Jehova. (Amubale Intembauzyo 32:5.) Davida wakaamba kuti: “Yebo wakandijatila mulandu wazibi zyangu.” Ibbala lya Chihebrayo ilyakasandululwa kuti ‘kujatila,’ lilakonzya kwaamba “kunyamuna” naa “kugusya.” Aboobo ciindi Davida naakalekelelwa a Jehova, wakalimvwa mbuli kuti mukuli ngwaakanyamwide wagusyigwa. Akaambo kaceeci, Davida wakakkomana kuzyiba kuti Jehova wakamulekelela cakumaninina. (Int. 32:​2-4) Andiswe tulakonzya kulimvwa boobo. Aboobo ciindi notweempwa kuzwa ansi aamoyo, tatweelede kuzumanana kulipa mulandu akaambo kazibi eezyo, nkaambo Jehova wakatulekelela cakumaninina.

10-11. Ino majwi aakuti “ulilibambilide kulekelela zibi” atwaambila nzi kujatikizya Jehova? (Intembauzyo 86:5)

¹⁰ Amubale Intembauzyo 86:5. Davida wakaamba Jehova kuti “ulilibambilide kulekelela zibi.” Kujatikizya majwi aaya, bbuku limwi ilyaamba zyamu Bbaibbele lyakaamba Jehova kuti: “Ngusikulekelela alimwi oobo ‘mbwabede.’” Nkaambo nzi ncali boobo? Cibeela citobela calugwalo lwa Intembauzyo caamba kuti: “Luyando lutamani ndojisi kulibaabo boonse bakukwiilila ndupati.” Mbubwenya mbotwakaiya mucibalo cainda, Jehova usyomezya kutondezya luyando lutamani kuli baabo bamuyanda alimwi takabasiyi pe. Akaambo kaceeci, ‘uyoobalekelela camoyo woonse’ ibasizibi ibeempwa. (Is. 55:​7, bupanduluzi buyungizyidwe.) Aboobo ikuti kamucidooneka ikuti naa Jehova wakamulekelela akaambo kazibi nzyomwakacita kaindi, amuyeeye kujatikizya kaambo aaka: ‘Ikuti kamusyoma kuti Jehova ulilibambilide kubalekelela aabo boonse ibeempwa akumulomba kuti abafwide luse, nkokuti mweelede kuba masimpe kuti andinywe wakamulekelela ciindi nomwakamulomba kuti amufwide luse.’

¹¹ Alimwi cilaumbulizya kuzyiba kuti Jehova ulituzyi kabotu mbotubede. (Int. 139:​1, 2) Eeci cilalibonya ku Intembauzyo iimbi ya Davida yalo iikonzya kutugwasya kusyoma kuti Jehova wakatulekelela.

NCINZI JEHOVA NCAIBALUKA KUJATIKIZYA NDISWE?

12-13. Kweelana alugwalo lwa Intembauzyo 103:​14, ncinzi Jehova ncaibaluka kujatikizya ndiswe? Ino eeci cimupa kuti katweendelezya buti?

¹² Amubale Intembauzyo 103:14. Davida wakaamba kuti Jehova “ulaibaluka kuti tuli bulongo buyo.” Majwi aaya atondezya kaambo Jehova ncalibambilide kulekelela bakombi bakwe ibeempwa. Ulizyi kuti tatulondokede. Kutegwa tukamvwisye kaambo aaka, amuleke twaalange-lange majwi aa Davida cakulomya.

¹³ Davida wakaamba kuti Jehova “ulizyi kabotu mbotupangidwe.” ‘Wakabumba Adamu kuzwa kubulongo bwaanyika.’ Aboobo ulizyi bantu mbobapangidwe alimwi azintu nzyobayandika. Mucikozyanyo, ulizyi kuti bayandika kulya, koona alimwi akuyoya. Nobaba bantu bakalondokede bakali kuyandika zintu eezyi. (Matl. 2:7) Pele ciindi ba Adamu a Eva nobakabisya, kuba bulongo kwakaba abupanduluzi bumbi. Mbotuli bana babo, twakakona cibi citupa kuti katuyanda kucita zintu zitali kabotu. Jehova ulikazyi kabotu kaambo aaka. Pele ciindi Davida naakalemba kuti Jehova “ulaibaluka” kuti tuli bulongo buyo, alimwi wakali kupandulula kuti ulizyi kuti tatulondokede. Aboobo lyoonse ulatweendelezya calweetelelo. Mubufwaafwi, tulakonzya kwaamba majwi aa Davida kuti apandulula kuti: Jehova ulizyi kuti zimwi ziindi tulakonzya kulubizya. Aboobo ciindi notwalubizya, ulilibambilide kututondezya luse akutulekelela ikuti tweempwa cakumaninina kuzwa ansi aamoyo.—Int. 78:​38, 39.

14. (a) Ncinzi cimbi Davida ncaakaamba kujatikizya kulekelela kwa Jehova? (Intembauzyo 103:12) (b) Ncinzi ncotukonzya kwiiya kunzila Jehova njaakamulekelela Davida? (Amubone akabbokesi kakuti “Jehova Mbwalekelela Akuluba.”)

¹⁴ Ncinzi acimbi ncotukonzya kwiiya kulugwalo lwa Intembauzyo 103 kujatikizya Jehova mbwatulekelela? (Amubale Intembauzyo 103:12.) Davida wakaamba kuti ciindi Jehova nalekelela, ubikka zibi zyesu kule andiswe “mbubonya kumapolelo aazuba mbokuli kulamfwu kapati kuzwa kumabbililo aazuba.” Nkolizwida zuba alimwi ankolibbilila, nkulamfwu kapati cakuti masena aaya obilo taakonzyi kuswaangana. Ino eeci citwaambila nzi kujatikizya Jehova mbwalekelela zibi? Kujatikizya kapango aaka, bbuku limwi lyakaamba kuti: “Jehova ubikka zibi zyesu kule andiswe, cakuti cili mbuli kanunko kacintu cimwi ikatacilimvwisyi naaceya. Aboobo tulakonzya kuba masimpe kuti kunyina nayooziyeeya limbi naa kutuyeezya kujatikizya nzizyo.” Amuyeeye buyo, kanunko kacintu cimwi kalakonzya kumuyeezya cintu cakacitika kaindi. Pele ciindi Jehova nalekelela, cili mbuli kuti kunyina kanunko kasyaala ikakonzya kumuyeezya cintu eeco icakacitika.—Ezk. 18:​21, 22; Mil. 3:19.

15. Ncinzi ncotweelede kucita ikuti katucizumanana kulipa mulandu akaambo kazibi nzyotwakacita kaindi?

¹⁵ Mbuti majwi aa Davida aajanika kulugwalo lwa Intembauzyo 103 mbwaakonzya kutugwasya kusyoma kuti Jehova wakatulekelela ncobeni? Tweelede kuyeeya kujatikizya Jehova mbwalimvwa. Ulaibaluka kuti tatulondokede alimwi ulabalekelela boonse aabo ibeempwa akucinca bukkale bwabo mbubwenya mbomwakacita. Kunze lyaboobo, tweelede kuyeeya kuti Jehova wakaziluba zibi nzyaakatulekelela, takonzyi kutuyeezya kujatikizya zibi eezyo. Aboobo kunyina nayootusubula akaambo kanzizyo. Mbwaanga Jehova kunyina nazumanana kuyeeya zibi nzyotwakacita kaindi, nkokuti andiswe tatweelede kucita oobo. (Int. 130:3) Ciindi notusyoma kuti Jehova wakatulekelela ncobeni, tuyooleka kulipa mulandu akaambo kazibi eezyo alimwi tuyoozumanana kumubelekela calukkomano.

16. Amupe cikozyanyo citondezya ntenda iikonzya kuboola ikuti twazumanana kulipa mulandu akaambo kazibi nzyotwakacita kaindi. (Amubone acifwanikiso.)

¹⁶ Amubone cikozyanyo eeci. Kuzumanana kulipa mulandu akaambo kazibi nzyotwakacita kaindi, cili mbuli kuzumanana kulanga mugilazi litondezya zintu zicitika musyule ciindi notweenzya moota. Masimpe cili buyo kabotu kulibelesya zimwi ziindi kutegwa tweelebe ntenda. Pele kutegwa tuzumanane kweenda kakunyina ntenda, tweelede kubikkila maano kulanga kumbele. Mbubwenya buyo, zimwi ziindi cili buyo kabotu kuyeeya kulubizya nkotwakacita kaindi nkaambo kulakonzya kutugwasya kutakwiinduluka. Pele ikuti twazumanana kukuyeeya, cilakonzya kutumanina lukkomano akutupa kwaalilwa kumubelekela kabotu Jehova. Aboobo tweelede kubikkila maano kukubelekela Jehova alimwi akuzilongezyo nzyatubambilide kumbele ciindi zintu zibi ‘nozitakaibalukwi limbi.’—Is. 65:17; Tus. 4:25.

AMUZUMANANE KUSYOMA KUTI JEHOVA ULAMUYANDA ALIMWI WAKAMULEKELELA

17. Nkaambo nzi ncotweelede kuzumanana kusyoma kuti Jehova ulatuyanda alimwi wakatulekelela?

¹⁷ Tweelede kuzumanana kusyoma kuti Jehova ulatuyanda alimwi wakatulekelela. (1Joh. 3:19) Nkaambo nzi? Akaambo kakuti Saatani uyoozumanana kutupa kulimvwa kuti Jehova tatuyandi alimwi takonzyi kutulekelela. Nkaambo uyanda kuti tuleke kubelekela Jehova. Aboobo mbotuyaabuswena kumamanino aabweende bwazintu oobu, uyoosolekesya canguzu kucita boobo kayi ulizyi kuti ujisi buyo kaindi kaniini. (Ciy. 12:12) Pele tatweelede kumulekela kuti azwidilile.

18. Ncinzi ncomweelede kucita kutegwa musyome kuti Jehova ulamuyanda alimwi wakamulekelela?

¹⁸ Kutegwa muyumye lusyomo lwakuti Jehova ulamuyanda, mweelede kubelesya mizeezo iyakaambwa mucibalo cainda. Kumane kutegwa musyome kuti Jehova wakamulekelela, amuzinzibale kuyeeya mbwaakalipandulula alimwi ancaakasololela balembi ba Bbaibbele kulemba kujatikizya kulekelela kwakwe. Tamweelede kuluba kuti ulizyi kuti tamulondokede, aboobo uyoomweendelezya caluzyalo. Kunze lyaboobo, mweelede kuyeeya kuti ciindi nalekelela, ulacita oobo cakumaninina. Mpoonya muyookkomana mbubwenya mbuli Davida akaambo kakuba masimpe kuti Jehova ulamutondezya luse akwaamba kuti, “Ndakulumba kaka Jehova akaambo ‘kakundijatila zibi zyangu’!”—Int. 32:5.