“Amuliyumye”

“Muleelede kukakatila kuti mucite ziyanda Leza kutegwa mukatambule nzyaakasyomezya.”—BAHIBULU 10:36, Ci.

1, 2. (a) Ncinzi cakacitikila Banakristo bali mbobabede mumwaanda wamyaka wakusaanguna? (b) Nkaambo nzi ncocili cuuba-uba kuti lusyomo lubombe?

AKATI kabasikulemba Bbaibbele boonse, kwiina uumbi wakaamba lusyomo cakwiinduluka-induluka mbuli mwaapostolo Paulo. Alimwi kanjikanji wakaamba zyabaabo balaalusyomo lwakabomba akumanina limwi. Mucikozyanyo, Humenayo a Alesandro “ba[ka]sweeka kulusyomo.” (1 Timoteo 1:19, 20) Dema wakaleka kweendaa Paulo nkaambo “kakuyanda zintu zyaansi ano.” (2 Timoteo 4:10) Bamwi kwiinda mumicito yabo iitali yabunakristo alimwi yakutabikkila maanu ‘bakalusowa lusyomo.’ Ibamwi bakacengwa abusongo bwakubeja aboobo ‘bakaleya kulusyomo.’—1 Timoteo 5:8; 6:20, 21.

² Nkaambo nzi Banakristo aabo bananike ncobakakakilwa kuzwidilila munzila ezi? “Kusyoma nkutadonaika azintu nzyotulangila akusinizya kuti zintu nzyotutaboni nkozili ncobeni.” (Bahibulu 11:1, Ci) Tutondezya lusyomo muzintu nzyotutaboni. Tatuyandiki lusyomo kuzintu izilibonya. Ncuuba-uba ikubelekela lubono luboneka kwiinda kubelekela lubono lwakumuuya lutalibonyi. (Matayo 19:21, 22) Izintu zinji zilibonya—mbuli “zisusi zyanyama niziba zisusi zyameso”—zilakkomaninwa kapati amibili yesu iitalondokede alimwi zilakonzya kulutola ansi lusyomo lwesu.—1 Johane 2:16.

3. Ndusyomo nzi Munakristo ndwayelede kubaandulo?

³ Pele Paulo waamba kuti, “woonse muntu uuswena kuli [Leza] uleelede kuzumina kuti Leza mpali akuti nguupa cilumbo kulibaabo bamuyandaula.” Musa wakalaa lusyomo luli boobo. “Wakali kucilangila bulumbu ibwakacili kuza,” alimwi “wakalibilamine mbuli sikubona yooyo uutabonwa.” (Ba-Hebrayo 11:6, 24, 26, 27) Munakristo uyandika lusyomo luli boobu. Mbubwena mbokwabonwa mucibalo camusyule, Abrahamu wakaba cikozyanyo cibotu mumakani aya.

Cikozyanyo ca Abrahamu Calusyomo

4. Ino bukkale bwa Abrahamu bwakajatikizigwa buti alusyomo lwakwe?

⁴ Abrahamu wakali ku Uri naakatambula cisyomezyo ca Leza cakuti wakali kuzoozyala lunyungu lwakali kuzyooba cilongezyo kubantu bazisi zyoonse. (Matalikilo 12:1-3; Incito 7:2, 3) Akaambo kacisyomezyo eco, Abrahamu wakamvwida Jehova, kusaanguna wakapolela ku Harani mpoonya azwe kooko wakaya ku Kanana. Ooko, Jehova wakasyomezya kupa nyika kulunyungu lwa Abrahamu. (Matalikilo 12:7; Nehemiya 9:7, 8) Pele, ibunji bwazintu Jehova nzyaakasyomezya zyakali kuzyoozuzikizyigwa Abrahamu kafwide kale. Mucikozyanyo, Abrahamu lwakwe kwiina naakajisi cibeela cimugeme cili coonse ca Kanana—ccita buyo mpangala ya Makipela, njaakaula kuti bube busena bwanamaumbwe. (Matalikilo 23:1-20) Nokuba boobo, wakali kusyoma mujwi lya Jehova. Icipati kwiinda zyoonse ncakuti, wakalaa lusyomo “[mu]munzi mupati uujisi intalisyo injumu, uuyakwa akucitwa a-Leza.” (Ba-Hebrayo 11:10) Lusyomo luli boobo lwakamuyumya mubuumi bwakwe boonse.

5, 6. Munzila nzi lusyomo lwa Abrahamu molwakasunkwa kumakani aacisyomezyo ca Jehova?

⁵ Eci cilalibonya ikapati kujatikizya cisyomezyo cakuti lunyungu lwa Abrahamu lwakali kuzyooba cisi cipati. Ikutegwa eci cicitike, Abrahamu wakayandika kuzyala mwana musankwa, elyo wakalindila kwaciindi cilamfwu kuti alongezyegwe kwiinda mukuzyala mwana oyo. Tatuzi naa wakalaa myaka yongaye yakuzyalwa naakamvwa cisyomezyo ca Leza lutaanzi, pele naakabweza lweendo lulamfwu kuya ku Harani, Jehova tanaakaninga kumupa mwana pe. (Matalikilo 11:30) Wakakkala mu Harani kwaciindi cilamfwu kutegwa ajane ‘mbono abasiŋanda,’ elyo naakalongela ku Kanana wakalaamyaka yakuzyalwa iili 75, Sara kajisi iili 65. Neciba ciindi eco, kwakanyina mwana. (Matalikilo 12:4, 5) Sara naakasisya myaka iibalilwa muma 70, wakasinizya kuti ono wakali cembeede kuzyalila Abrahamu mwana. Aboobo, kwiinda mukutobela cilengwa cakuciindi eco, Sara wakapa mwanakazi muzike Hagare kuli Abrahamu, elyo wakamuzyalila mwana mulombe. Pele oyu tanaakali ngomwana wakasyomezedwe pe. Hagare amwanaakwe, Ismayeli bakazikutandwa. Nokuba boobo, Abrahamu naakakombelezya kuti bataunki, Jehova wakasyomezya kulongezya Ismayeli.—Matalikilo 16:1-4, 10; 17:15, 16, 18-20; 21:8-21.

⁶ Kuciindi Leza mwini ncaakabikkide—nokwakainda ciindi cilamfwu kapati kuzwa nobakamvwa cisyomezyo lutaanzi—Abrahamu iwakali aamyaka yakuzyalwa iili 100 a Sara iili 90, bakazyala mwana musankwa, Izaka. Elo eci cakabakkomanisya kaka! Kubanabukwetene aba ibakacembeede cakaile kuba mbuli kuti mbubuke, iciindi mibili yabo ‘yakafwide kale’ noyakabaletela buumi bupya. (Ba-Roma 4:19-21) Bakalindila kwaciindi cilamfwu, pele cilongezyo nocakazuzikizigwa, ikulindila oko kwakaba aampindu kapati.

7. Ino lusyomo luswaangene buti alukakatilo?

⁷ Cikozyanyo ca Abrahamu cituyeezya kuti lusyomo talweelede kuba buyo lwakaindi kasyoonto pe. Paulo wakalweezyanisya lusyomo akukakatila naakalemba kuti: “Muleelede kukakatila kuti mucite ziyanda Leza kutegwa mukatambule nzyaakasyomezya. . . . Swebo tatuli baabo bapilukila musule akunyonyoonwa, pele tuli baabo basyoma alimwi bayoofutulwa.” (Bahibulu 10:36-39, Ci) Ibanji balindila kwaciindi cilamfwu kuti cizuzikizigwe cisyomezyo. Bamwi bali kulindila mane buumi bwabo boonse. Ilusyomo lwabo luyumu lwabagwasilizya. Alimwi mbubwena mbuli Abrahamu, bayootambula bulumbu caakusika ciindi Jehova ncabikkide.—Habakuku 2:3.

Ikuswiilila Leza

8. Mbuti mbotumuswiilila Leza sunu, alimwi nkaambo nzi kucita boobo ncokutikayumye lusyomo lwesu?

⁸ Atwaambe kuti kuli zintu zyone zyakayumya lusyomo lwa Abrahamu, elyo zintu ezi nzyoonya aswebo inga zyatuyumya. Cakusaanguna, wakatondezya lusyomo lwakwe lwakuti ‘Leza mpali’ kwiinda mukumumvwida Jehova naakali kwaambaula. Aboobo, wakaliimpene aba Juda bakuciindi ca Jeremiya ibakali kusyoma muli Jehova pele ibakanyina lusyomo mumajwi aakwe. (Jeremiya 44:15-19) Sunu, Jehova ulakanana kulindiswe kwiinda mu Bbaibbele, Jwi lyakwe lyakasololelwaa muuya Petro ndyaamba kuti lili mbuli “ilampi limunika mumudima . . . mumyoyo yanu.” (2 Petro 1:19) Notubala Bbaibbele cakuswiilisisya, ‘tulalelwa mumajwi aabuzumino.’ (1 Timoteo 4:6; Ba-Roma 10:17) Kunze lyaboobo, mumazubaano aakumamanino, “muzike musyomesi uucenjede” uli mukutupa ‘zilyo zyakumuuya kuciindi ceelede,’ busolozi mukutobela njiisyo zya Bbaibbele alimwi akumvwisisisya businsimi bwa Bbaibbele. (Matayo 24:45-47) Ikuswiilila Jehova munzila ezi kulayandika kapati kutegwa tube aalusyomo luyumu.

9. Ncinzi ciyoocitika naa twabusyoma ncobeni bulangizi bwa Bunakristo?

⁹ Lusyomo lwa Abrahamu lwakaliswaangene kapati abulangizi bwakwe. “Wakacili kulangila cakusyoma kuti abe wisaabo bazisi zinji.” (Ba-Roma 4:18) Eci ncecintu cabili cikonzya kutugwasya. Tatweelede kuluba kuti Jehova “nguupa cilumbo kulibaabo bamuyandaula.” Mwaapostolo Paulo wakati: “Ncotoondela mulimo akulwanina, nkaambo myoyo yesu ilalangila Leza Muumi.” (1 Timoteo 4:10) Ikuti twasyoma mubulangizi bwa Bunakristo cakusinizya, bukkale bwesu boonse buyooba citondezyo calusyomo lwesu, mbubwena mbocakabede kuli Abrahamu.

Ikukanana a Leza

10. Mupailo uuli buti uuyooyumya lusyomo lwesu?

¹⁰ Abrahamu wakali kukanana a Leza, alimwi eci ncecintu catatu icakayumya lusyomo lwakwe. Sunu, aswebo tulakonzya kukanana a Jehova kubelesya cipego camupailo kwiinda muli Jesu Kristo. (Johane 14:5; Ba-Efeso 6:18) Jesu wakazwide aakwaamba cikozyanyo icikankaizya mbokuyandika kuzumanana kupaila naakabuzya mubuzyo wakuti: “Mwana a-Muntu aakuboola, sena uzoojana lusyomo ansi?” (Luka 18:8) Imupailo uuyumya lusyomo tauli wakwiile kwaamba buyo kakunyina kubikkila maanu. Weelede kubaampindu kapati. Mucikozyanyo, imupailo waambwa camoyo woonse ulayandika kapati notuyanda kusala cakucita naa notuli mupenzi pati.—Luka 6:12, 13; 22:41-44.

11. (a) Ino Abrahamu wakayumizigwa buti naakajula moyo wakwe kuli Leza? (b) Ncinzi ncotukonzya kwiiya kuzintu zyakacitikila Abrahamu?

¹¹ Abrahamu naakali kuya bucembaala Jehova katanamupa lunyungu ndwaakamusyomezezye, wakakanana a Leza kujatikizya kulibilika kwakwe. Jehova wakamusyomezya. Ncinzi cakacitika? Abrahamu “wakasyoma Jehova, nkabela lusyomo lwakwe lwakeelezegwa mbuli bululami.” Mpoonya Jehova wakapa cizyibyo cakusinizya majwi aakwe. (Matalikilo 15:1-18) Ikuti twajula myoyo yesu kuli Jehova mumupailo, twazumina zisyomezyo zya Jehova mu Jwi lyakwe Bbaibbele alimwi na twamuswiilila calusyomo kapati, Jehova uyooluyumya lusyomo lwesu.—Matayo 21:22; Juda 20, 21.

12, 13. (a) Mbuti Abrahamu mbwaakalongezegwa naakatobela busolozi bwa Jehova? (b) Nzyakuluula nzi iziyooyumya lusyomo lwesu?

¹² Icintu cane icakayumya lusyomo lwa Abrahamu ndugwasilizyo Jehova ndwaakamupa naakatobela busolozi bwa Leza. Abrahamu naakaya kuyoovwuna Loti kubami bakali kusaala, Jehova wakamupa luzundo. (Matalikilo 14:16, 20) Nokuba kuti Abrahamu wakali kupona mbuli muntu mwiindilizi buyo mucisi cakeelede kukonwaa lunyungu lwakwe, Jehova wakamuleleka munzila yakumubili. (Amweezyanisye Matalikilo 14:21-23.) Jehova wakakusololela kusoleka kwamulanda wakwe kuti ajanine Izaka mukaintu iweelede. (Matalikilo 24:10-27) Inzya, Jehova “[wa]kapede Abrahamu coolwe muzintu zyoonse.” (Matalikilo 24:1) Akaambo kaceeci, lusyomo lwakwe lwakayuma kapati alimwi cilongwe cakwe a Jehova Leza cakakomena kapati cakuti Jehova wakamwiita kuti “muzolwani wangu.”—Isaya 41:8; Jakobo 2:23.

¹³ Sena aswebo tulakonzya kubaa lusyomo luyumu boobu sunu? Inzya. Ikuti naa swebo mbubwena mbuli Abrahamu twamusola Jehova kwiinda mukutobela milazyo yakwe, uyootulongezya aboobo eco ciyooyumya lusyomo lwesu. Mucikozyanyo, ikuti twalanga-langa Lipooti Yamwaka Yamulimo ya 1998 itondezya kuti ibanji bakalongezyegwa munzila iigambya nobakatobela mulawo wakwe wakukambauka makani mabotu.—Marko 13:10.

Ibumboni Bwalusyomo Sunu

14. Ino Jehova wakakulongezya buti kumwaya kwa Makani aa Bwami No. 35?

¹⁴ Musule mumwaka wa 1997 mu October, ikumwaya kwakacitwa nyika yoonse mbwiizulwa kwa Makani aa Bwami No. 35 kwakacitwa cakuzwidilila cini-cini akaambo kabusungu bwatuulunzuma twa Bakamboni. Cakacitika kucisi ca Ghana cilacitondezya eci. Tupepa tutandila ku 2,500,000 twakamwaigwa mumyaambo yone, aboobo ibantu batandila ku 2,000 bakalomba ziiyo zya Bbaibbele. Ku Cyprus Bakamboni bobile ibakali kumwaya Makani aa Bwami bakabona mupaizi umwi wakali kubaccilila. Kwiinde kaindi, bakamupa kapepa ka Makani aa Bwami. Wakalikajisi kale kapepa elyo wakati: “Ndakaukkomanina kapati mulumbe cakuti ndakayandisisya kulumbaizya bantu ibakakabamba.” Mucisi ca Denmark, itupepa ituli 1,500,000 twa Makani aa Bwami twakamwaigwa akuzwidilila kapati. Imukaintu umwi uubeleka mulimo wakuzibya bantu zyamakwebo kucisi eco wakati: “Ikatulakiti kajisi mulumbe wabantu boonse. Takakatazyi kuswiilila alimwi kalakulwaizya, kapa busungu bwakuzyiba ziyungizidwe. Masimpe kalaiyasa nondo muliso!”

15. Nzyakuluula nzi izitondezya kuti Jehova wakakulongezya ikusoleka kusikila bantu koonse-koonse?

¹⁵ Mu 1998 kwakasolekwa kukambaukila bantu koonse-koonse ikutali buyo muminzi yabo. Mucisi ca Côte d’Ivoire bamishinali bamwi banabukwetene bakanjilauka mumaato mapati aali 322 mumasena mwaaimina. Bakasiya mabbuku aali 247, mamagazini aali 2,284, imabroshuwa aali 500 alimwi amyaanda-myaanda yamatulakiti kubikkilizyaa mavidiyo aakuti basimaato kabalangilila nobali mulweendo mulwizi. Ku Canada Kamboni umwi wakaya kuganda nkobabambila akubambulwida zibili-bili zyamyootokala. Mukamwini ganda elyo wakatondezya luyandisisyo, elyo mukwesu wakakkala oko kwamawoola one acisela, nokuba kuti iciindi cakabelesyegwa mubukambausi boonse cakali buyo atwaambe woola lyomwe kuli basimakwebo. Mpoonya, bubambe bwaciiyo bwakacitwaa ciindi ca 22:00 hrs masiku. Pele zimwi ziindi tiicakali kutalikwa mane do aakaandabwe masiku alimwi cakali kunga kuyoomana do 02:00 hrs kubucedo. Cakutadooneka kwakali buyumuyumu mububambe bwaciindi obu, pele kwakaba kuzwidilila. Mwaalumi oyo wakasala kunoojala ganda lyakwe elyo mu Nsondo kutegwa kajanika kumiswaangano. Walo amukwasyi wakwe ndilyonya bakatalika kuyaambele kapati.

16. Nzyakuluula nzi zitondezya kuti broshuwa ya Ncayanda alimwi abbuku lya Luzibo nzibelesyo zizwidilila kapati mumulimo wakukambauka akuyiisya?

¹⁶ Ibroshuwa ya Ncinzi Leza Ncayanda Kulindiswe? alimwi abbuku lya Luzibo Lutola Kubuumi Butamani zyazumanana kuba zibelesyo zigwasya kapati mumulimo wakukambauka akuyiisya. Ku Italy mukaintu sikulibenga umwi iwakali kulindila bbaasi wakatambula kapepa ka Makani aa Bwami. Buzuba bwakatobela, wakasikilwa alimwi elyo wakatambula broshuwa ya Ncayanda. Mazuba oonse kuzwa buzuba oobo, wakali kubaa ciiyo ca Bbaibbele kwamaminiti aali 10 kusikila ku 15 aacitisyini cabbaasi. Kwiinde buyo mweezi omwe acisela, wakayeeya kuti azwe kuŋanda yabasikulibenga ibakaintu akuunka kumunzi kucisi ca Guatemala kuti akazumanane aciiyo cakwe. Kucisi ca Malawi muntu umwi musungu kapati kuya kucikombelo wazina lya Lobina tanaakakkomana pe bana bakwe basimbi nobakatalika kwiiya Bbaibbele a Bakamboni ba Jehova. Nokuba boobo, basimbi bakali kubaambila kasimpe kamu Bbaibbele banyina ciindi nobakali kukonzya kucita boobo. Mu June 1997, Lobina wakabona bbuku lya Luzibo alimwi wakabaa luyandisisyo naakabona kaambo kakuti “Luzibo Lutola.” Mu July wakazumina kubaa ciiyo ca Bbaibbele. Mu August wakajanika aamuswaangano wacooko alimwi wakaiswiilila kabotu-kabotu pulogilamu yoonse. Kuzikusika kumamanino aamweezi oyo, wakalizwide kale kucikombelo cakwe alimwi wakeelela kuba sikumwaya uutabbapatizidwe. Wakabbapatizigwa mu November 1997.

17, 18. Mbuti mavidiyo aa Sosaiti mbwaajanika kuti alabagwasya bantu “kubona” zintu zyakumuuya?

¹⁷ Imavidiyo aa Sosaiti abagwasya banji “kubona” zintu zyakumuuya. Ku Mauritius mwaalumi umwi wakazwa kucikombelo cakwe akaambo kakutamvwana kwakaliko. Mumishinali umwi wakamutondezya lukamantano luliko akati ka Bakamboni ba Jehova kwiinda mukubelesya vidiyo ya United by Divine Teaching. Kakkomene, mwaalumi oyo wakati: “Nywebo Nobakamboni ba Jehova muli kale mu Paradaiso!” Wakazumina kubaa ciiyo ca Bbaibbele. Mucizi umwi ku Japan wakatondezya mulumaakwe uutasyomi ividiyo ya Jehovah’s Witnesses—The Organization Behind the Name, elyo wakakulwaizigwa kubaa ciiyo ca Bbaibbele cicitwa lyoonse. Naakamana kulangilila ya United by Divine Teaching, wakayanda kuba umwi wa Bakamboni ba Jehova. Izibeela zyotatwe mumulongo wamavidiyo aajisi mutwe wakuti The Bible—A Book of Fact and Prophecy akamugwasya kutobela njiisyo zyamu Bbaibbele mubuumi bwakwe. Mpoonya ividiyo ya Jehovah’s Witnesses Stand Firm Against Nazi Assault yakamutondezya kuti Jehova ulabayumya bantu bakwe kulwana mapenzi aaletwaa Sataani. Mwaalumi oyu wakabbapatizigwa mu October 1997.

¹⁸ Ezi nzisyoonto buyo akati kazyakuluula zinji kapati izyakacitika mumwaka wamulimo iwainda. Zitondezya kuti Bakamboni ba Jehova balaa lusyomo lujisi milimo alimwi akuti Jehova uli mukuluyumya lusyomo olo kwiinda mukulongezya mulimo wabo.—Jakobo 2:17.

Amube a Lusyomo Sunu

19. (a) Ino mbuti mbotuli muciimo cibotu kwiinda ca Abrahamu? (b) Mbangaye mwakali ibakabungana kuti baibaluke lufwu lwa Jesu lwacituuzyo? (c) Nzisi nzi izyakajisi myweelwe yaatala kapati lya Ciibalusyo mwakali? (Amubone mulongo wamyeelwe amapeeji 26 kusikila ku 29.)

¹⁹ Munzila zinji swebo sunu tuli muciimo cibotu kwiinda ca Abrahamu. Tulizyi kuti Jehova wakazizuzikizya zisyomezyo zyakwe zyoonse nzyaakasyomezezye Abrahamu. Lunyungu lwa Abrahamu ncobeni lwakaikona nyika ya Kanana, alimwi bakaba cisi cipati. (1 Bami 4:20; Ba-Hebrayo 11:12) Atwaambe kuti, nokwakainda myaka iili 1,971 kuzwa ciindi Abrahamu naakazwa ku Harani, iwaluzubo lwakwe, Jesu, wakabbapatizigwaa Johane Mubbapatizi mumaanzi alimwi Jehova lwakwe wakamubbapatizyaa muuya uusalala kutegwa abe Mesiya, Lunyungu lwa Abrahamu muciimo cimaninide cakumuuya. (Matayo 3:16, 17; Ba-Galatiya 3:16) Mu Nisan 14, 33 C.E., Jesu wakaaba buumi bwakwe kuti cibe cinunuzyo kuli baabo ibakali kuzyoomusyoma. (Matayo 20:28; Johane 3:16) Ituulunzuma twabantu bakali kukonzya ono kubaa coolwe kwiinda mulinguwe. Mwakali, ibali 13,896,312 bakabungana mu Nisan 14 kuti baibaluke mucito oyo mubotu kapati waluyando. Elo wakasinizigwa kaka Jehova, Sikubamba zisyomezyo Mupati!

20, 21. Mbuti bantu bazwa muzisi zyoonse mbobakabaa coolwe kwiinda mu Lunyungu lwa Abrahamu mumwaanda wamyaka wakusaanguna, alimwi mbuti mbobali mukubaa coolwe sunu?

²⁰ Mumwaanda wamyaka wakusaanguna, ibanji kuzwa muzisi zyoonse—kutalikila kubana Israyeli bakumubili—bakasyoma mu Lunyungu lwa Abrahamu olu elyo bakaba bana ba Leza bananike, ibankamu mpya, ya “ba-Israyeli ba-Leza” yakumuuya. (Ba-Galatiya 3:26-29; 6:16; Incito 3:25, 26) Bakali kulangila buumi butafwiki bwamuuya kujulu kabali basikulelanyina mu Bwami bwa Leza. Balikke ibali 144,000 mbobakali kuzyoolongezyegwa munzila eyi, alimwi ibacisyeede mbace. (Ciyubunuzyo 5:9, 10; 7:4) Mwakali, ibali 8,756 bakatondezya kusyoma kwabo kuti bakali bamweelwe oyu kwiinda mukutola lubazu mukulya akunywa zitondezyo zyamukamu awaini ku Ciibalusyo.

²¹ Sunu ibunji bwa Bakamboni ba Jehova “[mba]nkamu impati” yakasinsimwa ku Ciyubunuzyo 7:9-17. Akaambo kakuti balaa coolwe kwiinda muli Jesu, bajisi bulangizi bwabuumi butamani muparadaiso aanyika. (Ciyubunuzyo 21:3-5) Ibali 5,888,650 ibakatola lubazu mumulimo wakukambauka mu 1998 ncitodezyo cakuti inkamu eyi masimpe “[n]impati.” Cakali kukkomanisya cini-cini, ikapati kubona kuti kwaciindi cakusaanguna cisi ca Russia a Ukraine zyakapa lipooti yabasikumwaya ibainda ku 100,000. Acimwi cilibedelede nilipooti yaku United States—kwakali basikumwaya ibali 1,040,283 mu August! Eezi nzisi buyo zyotatwe akati kazili 19 izyakapa lipooti yabasikumwaya ibainda ku 100,000 imwakali.

Bulangizi Bulaafwaafwi Kuzuzikizigwa

22, 23. (a) Nkaambo nzi ncotweelede kuliyumya sunu? (b) Mbuti mbotunga twatondezya kuti tuli mbuli Abrahamu, ikutali mbuli baabo ibanyina lusyomo mbaakaamba Paulo?

²² Ibakajanika ku Ciibalusyo bakayeezegwa mbuli mbotuswenede kapati kukuzuzikizigwa kwazisyomezyo zya Jehova. Mu 1914, Jesu wakabikkwa kuba Mwami wa Bwami bwa Leza bwakujulu, kwalo ikwakali ngamatalikilo aakubako kwakwe munguzu zya Bwami. (Matayo 24:3, Ciyubunuzyo 11:15) Inzya, Lunyungu lwa Abrahamu ono luleendelezya kujulu! Ku Banakristo bakuciindi cakwe, Jakobo wakati: “Amukazike myoyo yanu, amuliyumye, nkaambo kub[ako] kwa-Mwami kuli afwaafwi.” (Jakobo 5:8) Ikubako oko ono kulicitikide! Tatulivwulili kaka twaambo ncotweelede kuliyumya!

²³ Ilusyomo lwesu muzisyomezyo zya Jehova kaluli mukuyumizigwa lyoonse kwiinda muciiyo ca Bbaibbele alimwi amumupailo uulaampindu. Tutaleki kutambula zilongezyo zya Jehova mbotuzumanana kutobela Jwi lyakwe. Elyo tuyooba mbuli Abrahamu, kutali mbuli baabo balaa lusyomo ilwakabomba akumanina limwi, ibaambidwe aa Paulo. Kwiina cintu ciyootwaandaanya kulusyomo lwesu lusalalisya. (Juda 20) Tupaila kuti eci cikazwidilile kubalanda ba Jehova boonse mumwaka wamulimo wa 1999 akuzumanana mane mubuumi bwakumbele butamani.

Sena Mulizi?

◻ Mbuti mbotunga twamuswiilila Leza sunu?

◻ Nimpindu nzi zijanika notupaila mipailo iilaamaanu kuli Leza?

◻ Ikuti naa twazumanana kumvwida busolozi bwa Jehova, mbuti mboluyooyumizigwa lusyomo lwesu?

◻ Nimbazu nzi zyamulipooti yamwaka (mapeeji 26 kusika ku 29) nzyomwakakkomanina kapati?

[Ccaati iili apeeji 26-29

LIPOOTI YAMWAKA WAMULIMO UWA 1998 YA BAKAMBONI BA JEHOVA NYIKA YOONSE MBWIIZULWA

Amubone Bbaundi Volyumu

[Cifwanikiso icili apeeji 24]

Ikuti twaliswiilila Jwi lya Jehova, lusyomo lwesu muzisyomezyo zyakwe luyooyumizigwa

[Cifwanikiso icili apeeji 31]

Lusyomo lwesu lulayumizyigwa notutola lubazu mumulimo