Tulikkomene Kuti Jehova Ulatutondezya Nzila Yakwe

“Ncobeni Leza inzila yakwe ililuleme. Ijwi lya-Jehova lilasalala.”—2 SAMUELE 22:31.

1, 2. (a) Ncintu nzi cipati bantu boonse ncobayandika? (b) Ncikozyanyo cani cinga catugwasya naa twacitobela?

IBANTU boonse balabuyandisisya busolozi. Ncobeni, tuyandika lugwasyo lwakutusololela mubuumi bwesu. Ncobeni Jehova wakatupa busongo alimwi amanjezeezya aakutugwasya kuzyiba cintu cibotu acibi. Pele, ikutegwa manjezeezya eesu abe busolozi busyomeka, ayelede kuyiisigwa. (Ba-Hebrayo 5:14) Ikutegwa tukonzye kusala kabotu zintu zyakucita, imizeezo yesu iyandika kuti kaijisi makani aaluzi antoomwe alwiiyo lwakuti twaamvwisye makani aayo. (Tusimpi 2:1-5) Nokuba boobo, akaambo kakutasyomwa kwabuumi, ikusala kwesu kulakonzya kwacitika munzila mukwatali kuyeeyelwa. (Mukambausi 9:11) Iswebo, tunyina nzila iisyomwa yakuzyiba bukkale bwakumbele.

² Akaambo katwaambo ootu alimwi atumwi tunji, musinsimi Jeremiya wakalemba kuti: “O Jehova, ndizi kuti muntu waansi tezi kubamba kabotu inzila yakwe. Muntu ulaya bweenda, pele tabwene kweenzya intaamu zyakwe.” (Jeremiya 10:23) Jesu Kristo, imuntu mupati kwiinda boonse iwakaponede, wakazumina kusololelwa. Wakati: “Mwana takonzya kucita cintu mwini, pele ncabona icicita Wisi nkaambo zintu izili buti nzyacita, awalo Mwana ulazicita mbubonya.” (Johane 5:19) Aboobo ncamaanu kapati kaka ikwiiya Jesu alimwi akulanga kuli Jehova kuti atugwasye mukweenzya ntaamu zyesu! Mwami Davida wakaimba kuti: “Ncobeni Leza inzila yakwe ililuleme. Ijwi lya-Jehova lilasalala. Nintobo kuliboonse bamusyoma.” (2 Samuele 22:31) Ikuti twasala kweenda munzila ya Jehova muciindi cakutobela busongo bwesu tobeni, tuyoojana busolozi bulondokede. Ikukaka kweenda munzila ya Leza kusololela kumapenzi.

Jehova Ulaitondezya Inzila

3. Ino Jehova wakabeendelezya buti ba Adamu a Eva, alimwi ino wakabapa bulangizi nzi?

³ Amubone cakacitika kuli ba Adamu a Eva. Nokuba kuti bakanyina cibi, bakali kuyandika busolozi. Jehova kwiina naakalekela kuti Adamu alyeendelezezye zintu zyoonse lwakwe mwini mumuunda uuyebeka wa Edeni. Muciindi caboobo, Leza wakamupa mulimo wakucita. Cakusaanguna, Adamu wakeelede kuulika mazina aabanyama boonse. Mpoonya Jehova wakapa ba Adamu a Eva imbaakani zyamubuumi bwabo boonse. Bakeelede kubombya nyika, ikwiizuzya abana mbobakali kunoozyala alimwi akulanganya banyama boonse. (Matalikilo 1:28) Oyu wakali mulimo mupati, pele wakali kunoocita kuti nyika yoonse mbwiizulwa ibe paradaiso iijisi bantu balondokede ibakkede calukamantano abanyama boonse. Tabuliboteli bulangizi obo kaka! Kunze lyaboobo, ba Adamu a Eva nobakali kuyoozumanana kweenda cakusyomeka munzila njayanda Jehova, bakali kunooyoobandika anguwe. (Amweezyanisye Matalikilo 3:8.) Taciliboteli kaka coolwe eco—ikubaa cilongwe citamani cakaanzambwene a Mulengi!

4. Mbuti ba Adamu a Eva mbobakatondezya kubula lusyomo akutasyomeka, alimwi ino ncintu nzi cibyaabi cakacitika akaambo kaceeci?

⁴ Jehova wakabakasya banabukwetene bakusaanguna kulya micelo yamusamu wakuzyiba cibotu acibi iwakali mu Edeni, elyo eci cakabapa coolwe ndilyonya icakutondezya kumvwa kwabo—iluyandisisyo lwabo lwakweenda munzila njayanda Jehova. (Matalikilo 2:17) Pele tiilyakalampa, ikumvwa oko kwakasunkwa. Saatani naakabasikila amajwi aalweeno, ba Adamu a Eva bakeelede kutondezya kusyomeka kwabo kuli Jehova alimwi akusyoma muzisyomezyo zyakwe ikutegwa bazumanane kumvwa. Mukubula coolwe, bakanyina lusyomo pe. Saatani naakasyomezya Eva lwaanguluko alimwi akutamikizya Jehova kuti wakali kubeja, wakeenwa elyo wakatyola mulawo wa Leza. Awalo Adamu wakamutobela mucibi. (Matalikilo 3:1-6; 1 Timoteo 2:14) Ikusweekelwa nkobakasweekelwa kwakali kupati cini-cini. Ikweenda munzila njayanda Jehova nokwakabapa lukkomano lutamani mbobakali kunooyaa buzuzikizya kuyanda kwakwe buce-buce. Muciindi caboobo, bakali kupona buumi bwakutyompokelwa akuciswa kusikila ciindi nobakafwa.—Matalikilo 3:16-19; 5:1-5.

5. Mmakanze nzi aateeli Jehova ngajisi, alimwi mbuti mbwagwasya bantu basyomeka ikulibonena kuzuzikizigwa kwangawo?

⁵ Nokuba boobo, Jehova kwiina naakacinca makanze aakwe aakuti bumwi buzuba inyika yoonse mbwiibede yakali kuzooba munzi waparadaiso kubantu balondokede ibanyina cibi. (Intembauzyo 37:11, 29) Alimwi kwiina naakaalidwe ikupa busolozi bulondokede kuli baabo ibeenda munzila njayanda alimwi ibalangila kuyoolibonena kuzuzikizigwa kwacisyomezyo eco. Kuli baabo bandiswe ibajisi matwi aamvwa, ijwi lya Jehova lili kusule lyesu, kalyaamba kuti: “Njeeyi inzila, amweende mulinjiyo.”—Isaya 30:21.

Bamwi Bakeenda Munzila Njayanda Jehova

6. Mbaalumi nzi bobile bakaindi ibakeenda munzila njayanda Jehova, alimwi ncinzi cakacitika akaambo kakucita boobo?

⁶ Kweelana amakani aamu Bbaibbele, ibantu basyoonto buyo akati kalunyungu lwa Adamu a Eva mbabakeenda munzila njayanda Jehova. Abelo ngowakusaanguna akati kabaaba. Nokuba kuti wakajaigwa kufwambaana, wakafwa kali muntu uukkomaninwaa Jehova, aboobo ulaabulangizi businizidwe bwakuyootola lubazu ‘mububuke bwabaluleme’ ciindi ca Leza caakusika. (Incito 24:15) Uyoolibonena kuzuzikizigwa kwamakanze aa Jehova mapati kujatikizya nyika abantu. (Ba-Hebrayo 11:4) Uumbi iwakeenda munzila njayanda Jehova wakali Enoki walo uulaabusinsimi bujatikizya mamanino aabweende bwazintu ibulondwedwe mubbuku lya Juda. (Juda 14, 15) Awalo Enoki wakakoswedwa mazuba aakwe aakupona. (Matalikilo 5:21-24) Nokuba boobo, “wakalungululwa kuti wakali kukonda Leza.” (Ba-Hebrayo 11:5) Mbubonya mbuli Abelo, awalo naakafwa wakalaa bulangizi bwabubuke alimwi unooli akati kabaabo ibayoolibonena kuzuzikizigwa kwamakanze aa Jehova.

7. Ino Nowa amukwasyi wakwe bakatondezya buti kuti balasyomeka akuti bakajisi lusyomo muli Jehova?

⁷ Inyika yakuciindi kalitanasika Zambangulwe mboyakali kuyaabwiindila muzibi, ikumvwida Jehova kwakaindila kuba munsunko wakusyomeka. Kumamanino aanyika eyo, ikakamu komwe buyo kaniiini nkakakajanika kakeenda munzila njayanda Jehova. Nowa amukwasyi wakwe bakamuteelela Leza alimwi bakazisyoma zyoonse nzyaakabaambila. Cakusyomeka bakacita milimo njobakapegwa kuti bacite alimwi bakalikasya kuyungwa amicito mibyaabi yanyika yakumazubaayo. (Matalikilo 6:5-7, 13-16; Ba-Hebrayo 11:7; 2 Petro 2:5) Tulabalumba akaambo kakuteelela kwabo calusyomo. Akaambo kalusyomo bakafwutuka ciindi ca Zambangulwe, aboobo bakaba basyaanene besu.—Matalikilo 6:22; 1 Petro 3:20.

8. Kuluzubo lwaba Israyeli, ncinzi cakajatikizidwe mukweenda munzila njayanda Leza?

⁸ Mukuya kwaciindi, Jehova wakatanga cizuminano abasiluzubo lwa Jakobo musyomesi, elyo bakaba musyobo wakwe uulibedelede. (Kulonga 19:5, 6) Jehova wakapa busolozi kubantu bakwe bamucizuminano kwiinda mu Mulawo uulembedwe, ibupaizi alimwi abusolozi bwabusinsimi buzumanana. Pele bana Israyeli bakeelede kulisalila ikubutobela busolozi obo. Jehova wakacitya musinsimi wakwe kuti aambile bana Israyeli kuti: “Amubone! Buzuba obuno ndamubikila lulongezyo alutuko: nkokuti lulongezyo na mwaswiilila milazyo ya-Jehova Leza wanu njendamulailila buzuba obuno, alutuko na mwakaka kuswiilila milazyo ya-Jehova Leza wanu, na mwaleya kuzwa munzila njendamulailila buzuba obuno akuya butobela baleza bambi mbemutana kuziba.”—Deuteronomo 11:26-28.

Bamwi Ncobakalekela Kweenda Munzila Njayanda Jehova

9, 10. Mbukkale buli buti bana Israyeli mbobakayandikila kuba bantu basyomeka alimwi ibasyoma muli Jehova?

⁹ Mbubwena mbuli ba Adamu a Eva, bana Israyeli bakali kuyandika kumusyoma Jehova akuba bantu basyomeka kulinguwe ikutegwa bazumanane kuba bantu bamvwa. Ibana Israyeli bakali musyobo muniini iwakazingulukidwe aabasimukobonyina babyaabi. Kumusanza lwaambo kwakali Egepita a Etiopiya. Kunyika lwaajwe kwakali Aramu a Asuri. Munsi-munsi kwakali Filisitiya, Amoni, Moabu alimwi a Edomu. Muziindi ziindene-indene zisi ezi zyoonse zyakali basinkondonyina acisi ca Israyeli. Kunze lyaboobo, zyoonse zyakajisi bukombi bwakubeja ibwakajisi mpuwo yakukomba mituni, kulingula nyenyeezi alimwi muziindi zimwi izilengwa zibyaabi zyakoonana alimwi akutuula bana munzila yalunya. Basimukobonyina abana Israyeli bakali kusyoma baleza babo kuti mbobakali kukonzya kubapa mikwasyi mipati, ibutebuzi bubotu alimwi aluzundo munkondo.

¹⁰ Bana Israyeli balikke mbabakali kukomba Leza omwe buyo, Jehova. Wakabasyomezya zilongezyo kujatikizya kuba amikwasyi mipati, ibutebuzi bubotu alimwi alukwabililo kuli basinkondonyina ikuti nobakatobela milawo yakwe. (Deuteronomo 28:1-14) Mukubula coolwe, ibanji mu Israyeli bakakakilwa kucita boobu. Kuli baabo ibakeenda munzila njayanda Jehova, ibunji bwabo bakapenga akaambo kakusyomeka kwabo. Bamwi mane bakapenzyegwa bulanga, bakasampaulwa, bakaumwa zimboko, bakaangwa muntolongo, bakawaalwa mabwe alimwi bamwi mane bakajaigwa abana Israyelinyina. (Incito 7:51, 52; Ba-Hebrayo 11:35-38) Oyo wakali musunko mupati cini-cini kuli baabo ibakali kusyomeka! Pele, ino nkaambo nzi banji ncobakaleya kuzwa munzila ya Jehova? Izikozyanyo zyobile mubukkale bwabana Israyeli zilatugwasya kubona mbokwakalubide kuyeeya kwabo.

Icikozyanyo ca Ahazi Cibyaabi

11, 12. (a) Ahazi naakakongwa aba Aramu, ncinzi caakakaka kucita? (b) Nkuumasena nzi obile Ahazi nkwaakalisyomezya kujana lukwabililo?

¹¹ Ahazi wakali kweendelezya bwami bwakumusanza bwa Juda mumwaanda wamyaka walusele B.C.E. Ibweendelezi bwakwe tiibwakali bwaluumuno pe. Aciindi cimwi, iba Aramu alimwi abwami bwakunyika bwa Israyeli bakaswaangana kuti bamulwane, elyo “moyo wakwe amyoyo yabantu bakwe yakakankama.” (Isaya 7:1, 2) Pele, Jehova naakasyomezya kuti inga wamugwasya akwaambila Ahazi kuti amusole, Ahazi wakakaka, ikukakila limwi! (Isaya 7:10-12) Akaambo kaboobo, Juda wakazundwa munkondo elyo ibantu banji bakafwa.—2 Makani 28:1-8.

¹² Nokuba kuti Ahazi wakakaka kusola Jehova, tanaakaba simapuwo mukulomba lugwasyo kumwami wa Asuri. Nokuba boobo, Juda yakazumanana kupenzegwa azisi zyakeengelede. Iba Aramu abalo nobakazangila Ahazi ‘akumupenzya buyo,’ imwami “wakapaila mizimu ya-Damasko iyakamuzunda. Wakati, Baleza babami ba-Aramu babagwasya. Nkabatuulile zipaizyo, bandigwasye ambebo.”—2 Makani 28:20, 23.

13. Ncinzi Ahazi ncaakatondezya kwiinda mukusyoma baleza baba Aramu?

¹³ Kumbele, Jehova wakaambila bana Israyeli kuti: “Ndime Jehova Leza wako. Ndime uukwiiyisya kuti ugwasigwe. Ndime uukweenzya munzila njoelede kutola. Nicakabota niwakaswiilila milazyo yangu! Lino luumuno lwako nilwakaba mbuli mulonga, abululami bwako nibwakaba mbuli mayuwe aalwizi.” (Isaya 48:17, 18) Mukulangila lugwasyo kuzwa kuli baleza baba Aramu, Ahazi wakatondezya mbwaakaleyede kapati ‘mukweenda munzila njaakeelede kutola.’ Wakeenwa cakumaninina amizeezo yabamasi kwiinda mukusyoma nzila zyalukwabililo zyakubeja muciindi cakusyoma Jehova.

14. Nkaambo nzi Ahazi ncaakanyina mbwalilekelela naakatalika kusyoma baleza bakubeja?

¹⁴ Baleza bamasi kubikkilizyaa baabo babana Aramu bakabwenwe kuti ‘nzikozyanyo buyo zyamituni’ zinyina mpindu ikuzwa kaindi. (Isaya 2:8) Musyule, mubulelo bwa Mwami Davida, ikusumpuka kwa Jehova kulibaleza baba Aramu kwakabonwa caantangalala ibana Aramu nobakaba balanda ba Davida. (1 Makani 18:5, 6) Jehova alikke, “Leza wabaleza, mwami wabami, Leza mupati singuzu uuyoosya,” nguukonzya kupa lukwabililo lwini-lwini. (Deuteronomo 10:17) Pele, Ahazi wakamukaka Jehova alimwi wakasyoma baleza bamisyobo kuti bamukwabilile. Bana Juda bakanjila mumapenzi mapati cini-cini akaambo kaceeci.—2 Makani 28:24, 25.

Iba Juda Kabali aa Jeremiya mu Egepita

15. Muunzila nzi mobakabisya ba Juda bakali mu Egepita kuciindi ca Jeremiya?

¹⁵ Akaambo kakutasyomeka kwabantu bakwe ikwakaindila, Jehova wakazumizya bana Babuloni kuti banyonyoone Jerusalemu atempele lyakwe mu 607 B.C.E. Ibunji bwabasicisi bakatolwa mubuzike ku Babuloni. Pele bamwi bakacaala musyule, akati kabo kakuli musinsimi Jeremiya. Mweendelezi Gedaliya naakajaigwa, inkamu eyi yakatijila ku Egepita, bakamutolelezyaa Jeremiya. (2 Bami 25:22-26; Jeremiya 43:5-7) Ooko bakatalika kutuulila baleza bakubeja. Jeremiya cakusinizya wakabandika aba Juda batasyomeki, pele bakali basicinguni. Bakakaka kupilukila kuli Jehova alimwi bakazumanana kwaamba kuti balaya kumbele ikutuulila “mwami mwanakazi wakujulu.” Ino nkaambo nzi? Nkaambo eci ncobakali kucita balo abamasyaanyinakulu ‘muminzi ya-Juda amumigwagwa ya-Jerusalemu. Nkaambo kuciindi eco bakali kukkuta insima akujana coolwe akutabona mapenzi.’ (Jeremiya 44:16, 17) Iba Juda abalo bakakazya balaamba: “Kuzwa kuciindi eco nitwakaleka kutentela mwami mwanakazi wakujulu tununkilizyo akumutilila zipaizyo twakabula zintu zyoonse, alimwi ipanga apamba zilatumanisya.”—Jeremiya 44:18.

16. Nkaambo nzi ba Juda bakali mu Egepita ncobakalubizizye cakumaninina mukuyeeya kwabo?

¹⁶ Elo mizeezo ilakonzya kubaalusalila kaka kuzintu nzyalombozya muntu! Ino kwakali twaambo nzi? Masimpe, iba Juda bakatuulila baleza bakubeja munyika Jehova njaakabapede. Zimwi ziindi, mbubwena mbuli kuciindi ca Ahazi, bakapenzyegwa akaambo kakuleya oko. Nokuba boobo, Jehova ‘tanaakafwamba kukalalila’ bantu bakwe mbaakatangene abo cizuminano. (Kulonga 34:6; Intembauzyo 86:15) Wakatuma basinsimi bakwe kuti bakabakulwaizye kweempwa. Zimwi ziindi, imwami naakali kusyomeka, Jehova wakali kumulongezya elyo bantu bakali kugwasigwaa lulongezyo olo nokuba kuti ibunji bwabo tiibakali kusyomeka. (2 Makani 20:29-33; 27:1-6) Bakali lubizide kaka ba Juda abo bakali mu Egepita nobakalitaminina kuti ibuvwubi boonse bwakaliko musyule munyika yabo bwakazwide kuli baleza babo bakubeja!

17. Nkaambo nzi Juda ncaakasweekelwa nyika yakwe atempele?

¹⁷ Kautanasika mwaka wa 607 B.C.E., Jehova wakaambilide bantu baku Juda kuti: “Amuswiilile ijwi lyangu, lino njooba Leza wanu, anywebo muyooba bantu bangu. Amweende munzila zyoonse nzindamulailila, kuti mujane coolwe.” (Jeremiya 7:23) Iba Juda bakasweekelwa tempele lyabo anyika yabo nkaambo bakakaka ‘kweenda munzila zyoonse Jehova nzyaakabalailide.’ Atulikasye kulubizya kuli boobo kwalo ikuletela lufwu.

Jehova Ulabalongezya Aabo Ibeenda Munzila Yakwe

18. Ncinzi ncobeelede kucita aabo ibeenda munzila njayanda Jehova?

¹⁸ Sunu mbubwena mbuli kaindi, ikweenda munzila njayanda Jehova kuyandika kusyomeka—ikukanza kubelekela nguwe alikke. Kuyandika kuti katusyoma—ilusyomo lumaninide lwakuti izisyomezyo zya Jehova nzyakasimpe alimwi ziyoocitika. Ikweenda munzila njayanda Jehova kuyandika ikumvwa—ikutobela milawo yakwe kakunyina kuleya alimwi kuyandika kutobela zyeelelo zyakwe zisumpukide. “Jehova uliluleme, ulayandisya milimo iiluleme.”—Intembauzyo 11:7.

19. Mbaaleza nzi mbobakomba sunu bantu banji, alimwi ino ncinzi cacitika akaambo kakucita boobo?

¹⁹ Ahazi wakasyoma baleza bamu Aramu kuti bamukwabilile. Bana Israyeli mu Egepita bakasyoma kuti “mwami mwanakazi wakujulu,” leza mwanakazi iwakali kukombwa kapati ku Middle East yansiku, ngowakali kunoobavwubya. Sunu, ibunji bwabaleza taili mituni iini-ini pe. Jesu wakacenjezya kutabelekela “Lubono” muciindi cakubelekela Jehova. (Matayo 6:24) Mwaapostolo Paulo wakaamba ‘zyakulikumbuzya, cili ncintu comwe buyo akukomba mituni.’ (Ba-Kolose 3:5) Alimwi wakaamba zyabaabo ibakali kutegwa “Leza wabo ndida.” (Ba-Filipi 3:19) Inzya, mali alimwi azintu zyakumubili zili akati kabaleza banji ibakombwa sunu. Imasimpe ngakuti, ibanji—kubikkilizyaa bantu banji balyaamba kuti mbakombi—‘basyoma buvwubi butasyomeki.’ (1 Timoteo 6:17) Ibanji balabeleka canguzu kubelekela baleza aabo, alimwi bamwi balajana mpindu akaambo kakucita boobo—bakkede mumaanda mabotu, bajisi zintu zidula alimwi balya zyakulya zinono. Pele tabali boonse ibali muciimo eco. Nobaba baabo ibajisi zintu zili boobu, mukuya kwamazuba bazibona kuti izyalo tazibakkomanisyi pe. Tazisyomeki, nzyakaindi kaniini buyo alimwi kwiina nozizuzikizya zintu nzyotuyandika munzila yakumuuya.—Matayo 5:3.

20. Nkutaciindizya kwamusyobo nzi nkotweelede kubikkila maanu?

²⁰ Masimpe, tweelede kujana nzila zigwasya mubukkale bwesu bwamumazuba aamamanino aabweende obu bwazintu. Tweelede kubweza ntaamu zigwasya kutegwa tukonzye kusanina mikwasyi yesu munzila yakumubili. Pele ikuti twayandisisya kubaa bukkale busumpukide, ikuyandisisya mali naa zintu zili boobo kwiinda kubelekela Leza, atuzibe kuti twanjila mumusyobo umwi wakukomba mituni alimwi tatuceendi munzila njayanda Jehova. (1 Timoteo 6:9, 10) Pele ino mbuti ciindi notunjila mumapenzi aakuciswa-ciswa, aakubula mali naa mapenzi aambi? Tutabi mbuli ba Juda abaya bakali mu Egepita ibakati bakajisi mapenzi nkaambo kakubelekela Leza. Muciindi caboobo, atumusole Jehova calo icili ncecintu Ahazi ncaakakakilwa kucita. Atusyome Jehova Leza kuti ulakonzya kutupa busolozi. Atubutobele busolozi bwakwe cakusinizya alimwi atupailile kupegwa nguzu abusongo bwakweendelezya bukkale buli boonse. Mpoonya, calusyomo atulindile lulongezyo lwa Jehova.

21. Nzilongezyo nzi iziboola kuli baabo ibeenda munzila njayanda Jehova?

²¹ Mukuya kwamazuba mubukkale bwa Israyeli, Jehova wakabalongezya kapati aabo ibakeenda munzila yakwe. Mwami Davida wakaimba kuti: “Kondeenzya mubululami bwako, O Jehova, nkaambo kabasinkondoma.” (Intembauzyo 5:8) Kulinguwe, ngu Jehova iwakamugwasya kuzunda munkondo nzyaakalwana zisi zyakeengelede zyalo kumbele zyakazikulwana Ahazi. Mubweendelezi bwa Solomoni, ibana Israyeli bakalongezegwa kwiinda mukubapa luumuno abuvwubi bwalo mbobakazoolombozya kumbele iba Juda bakali mu Egepita. Kuli Hezekiya imwanaa Ahazi, Jehova wakamugwasya kuzunda bana Asuri ibakali basinguzu kapati. (Isaya 59:1) Inzya, ijanza lya Jehova tiilyakafwiinsigwa pe kubantu bakwe ibasyomeka aabo ibatakaima “munzila yabasizibi” pele ibakali kukondelwa mulawo wa Leza. (Intembauzyo 1:1, 2) Ncimwi buyo asunu, ucicita obo. Pele ino mbuti swebo sunu mbotunga twasinizya kuti tuli mukweenda munzila njayanda Jehova? Eci ciyoobandikwa mucibalo citobela.

Sena Mulayeeya?

◻ Mbube nzi mbotuyandika kubaambubo ikuti katuyanda kweenda munzila njayanda Jehova?

◻ Nkaambo nzi kuyeeya kwa Ahazi ncokwakali kwakubeja?

◻ Ncinzi cakalubide kujatikizya kuyeeya kwaba Juda ibakali mu Egepita?

◻ Mbuti mbotunga twayumya makanze eesu aakuyandisisya kweenda munzila njayanda Jehova?

[Cifwanikiso icili apeeji 13]

Ahazi wakasyoma baleza baba Aramu muciindi cakusyoma Jehova