Nkaambo nzi Ncotuceyelwa Ciindi?

ICIINDI. Inga catukatazya kulipandulula kabotu ibbala eli, pesi tulizi kwaamba kuti taakwe notuboneka kubaa ciindi cinji. Alimwi tulizi kuti cileenda kufwaambana. Kanjikanji tulatongooka kuti “Iciindi cilafwambaana.”

Nokuba boobo, cili masimpe kwaamba kuti sikweema muna Britain, Austin Dobson wakali luzi naakaamba boobu mu 1877: “Mwaamba kuti ciindi cileenda? Aayo, taali masimpe pe! Ciindi taceendi, iswe ndiswe tweenda.” Kwainda myaka iitandila ku 80 kuzwa naakafwa Dobson mu 1921; ciindi nkocicili.

Tulaa Ciindi Cinji

Ikujatikizya Mulengi wesu Ibbaibbele litwaambila kuti: “Zilundu kazitana lengwa, kotana akubumba nyika, kuzwa lili alili nduwe Leza.” (Intembauzyo 90:2, BT) Naa kweelana ambolyaamba The New Jerusalem Bible, “nduwe Leza kuzwa kuciindi citamani kusikila kuciindi citamani.” Aboobo ciindi cinooliko lyoonse mbuli Leza mbwaanooliko—kusikila kukabe kutamani!

Kujatikizya kwiindana kupati kuliko akati kabantu a Leza uulaa ciindi citamani, mboobu mbotubala: “Nkaambo mazuba esu oonse amaninina mubukali bwako, tulamanizya myaka yesu mbuli kusintimuka. Myaka yabuumi bwesu ili makumi aali musanu aabili, na tuli basinguzu ambweni ilasika kumakumi aali musanu aatatu; pele bunji bwayo makatazyo buyo amapenzi, nkaambo ilafwamba kumana, nkabela tulauluka.”—Intembauzyo 90:9, 10.

Ino nkaambo nzi buumi sunu ncobuli bufwaafwi boobu kakuli Bbaibbele liyiisya kuti makanze aa Leza ngakuti muntu kapona kukabe kutamani? (Matalikilo 1:27, 28; Intembauzyo 37:29) Muciindi cakubaa buumi buteeli kweelana amakanze aa Leza, ino nkaambo nzi bantu banji ncobapona kwamazuba masyoonto aatasiki kumazuba aali 30 000? Nkaambo nzi bantu ncobajisi kaindi buyo kaniini? Ino nguni naa ncinzi cakapa kuti kube penzi eeli? Ibbaibbele lipa bwiinguzi busalede alimwi bumvwika.a

Ciindi Ciyaabumana

Ibapati balazumina kuti mumakumi aamyaka eeyi yainda ciindi ncotupona ciyaabumana. Simubweza twaambo Dr. Sybille Fritsch wakaamba kuti myaaka iili 200 yainda, maoola ngobabeleka bantu amvwiki aceya kuzwa ku 80 kusika ku 38 “pesi eeci tiicatupa kuti tuleke kutongooka kuti tatujisi ciindi.” Wakapandulula kuti: “Nsijisi ciindi; ciindi cilakatazya kujana; tulaciyandisisya ciindi mbubwena mbuli mbotuyanda muuya ngotuyoya; tuli bantu babindide lyoonse mubuumi.”

Izintu zipya izipangwa zyaleta bulangizi ibwatakali kuyeeyelwa amazyalani ainda. Pele kubaa zintu zinji zyakucita ciletela kutyompwa kuti naa muntu katajisi ciindi cakucita zintu ezyo. Mazubaano, ibunji bwabantu mumbazu zyoonse zyanyika bajisi bubi kuzuzikizya mbaakani zyabo. Bataata beelede kuunka kumilimo aciindi ca 7:00 mafwumofwumo abalo Bamaama bayandika kutola bana kucikolo aciindi ca 8:30 mafwumofwumo Bakaapa abalo bayandika kuya kubonana amusilisi kucibbadela aciindi ca 9:40 mafwumofwumo, kwamana toonse tuyandika kulibambila kuyoojanika kumuswaangano uuyandika kapati aciindi ca 19:30 kumangolezya. Mukusola kuti tumanizye milimo yoonse eyi, taaku aciindi cakupumuna. Aboobo tulatongooka akaambo kamilimo iiminya njotukutauka abuzuba.

Tatuli Ndiswe Tolikke Notutajisi Ciindi

Sinkondonyinaa Leza, Saatani Diabolosi walo wakapa kuti bantu kabapona buyo kwakaindi kasyoonto, awalo lino camutobela cibi cakwe. (Amweezyanisye Ba-Galatiya 6:7, 8.) Nolyaamba kuzyalwa kwa Bwami bwabu Mesiya kujulu, ibbuku lya Ciyubunuzyo 12:12 litupa kaambo ncotweelede kubaa bulangizi noliti: “Nkaambo kaako amusekelele nomajulu, anywebo nomukala mulingao. Pele nywebo nonsi alwizi, muli mumapenzi, ikuti Diabolosi wamuselukila abukali bupati, nkaambo ulizi kuti ciindi ncacijisi nciniini buyo.”

Kweelana abupime bwaciindi bwa Bbaibbele busyomeka alimwi akuzuzikizigwa kwabusinsimi bwa Bbaibbele, lino tukkede kumamanino ‘aciindi ciniini’ eci. Elyo cilakkomanisya kaka kuziba kuti ciindi ncajisi Saatani ciyoomumanina lino-lino! Aakugwisigwa Saatani, ibantu bamvwa bayoopilusigwa kubulondosi, alimwi bayoocikonzya kubaa buumi butamani Jehova mbwaakakanzide kubapa kumatalikilo. (Ciyubunuzyo 21:1-4) Penzi lyakubula ciindi talikooyooba limbi.

Sena inga mweezeezya mbokuyooba twaakupona buumi butamani? Tamunakupengi alimwi kuyeeya zintu nzyomwatamanizya kucita. Ikuti naa muyanda ciindi cinji, cinooliko junza naa mvwiki itobela nuuba mwaka uboola—munoojisi ciindi cinji citeeli!

Kucibelesya Kabotu Ciindi Ncotujisi Lino

Akaambo kakuti ulibwene kuti ujisi buyo ciindi cisyoonto cakoongelezya bantu, Saatani wapa kuti bantu bajate bubi kutegwa batabi aciindi cakuswiilila makani mabotu aa Bwami bwa Leza bukkazikizidwe. Aboobo tucita kabotu kutobela lulayo lwa Leza lwakuti: “Amucenjele loko mbumweenda. Muteendi mbuli bafubafuba, pe, amweende mbuli basimaanu. Amujatisye loko ciindi canu coonse, nkaambo kakuti mazuba aasunu mabi, aboobo tamweelede kufubaala, muleelede kumvwisya mbulubede luyando lwa-Mwami.”—Ba-Efeso. 5:15-17.

Tweelede kucibelesya kabotu ciindi kwiinda mukucita zintu zilaampindu kapati ikutali kusowa buyo ciindi cesu kuzintu zitagwasyi pe! Tweelede kubaa muuya ngwaakajisi Musa naakalomba Jehova amajwi aaya aazwa mumoyo aakuti: “Utwiiyisye kubala mazuba esu, kuti tujane moyo wabusongo.”—Intembauzyo 90:12.

Ibantu boonse sunu munyika bajisi bubi. Nokuba boobo, Bakamboni ba Jehova balamukulwaizya kuti kamubelesya ciindi canu kwiiya zyeelelo zya Leza ziyandika kutegwa muntu akajane buumi butamani mubweendelezi bwa Bwami bwakwe. Ikuti naa mwatola buyo woola lyomwe amvwiki kwiiya Bbaibbele ‘kumvwisya mbulubede luyando lwa Jehova,’ eci inga camugwasya kubona mbwaazuzikizigwa majwi aakuti: “Leka bubi, ucite kabotu, kuti ukalilile lyoonse. Balulami bayookona nyika, bayookala alinjiyo lyoonse.”—Intembauzyo 37:27, 29.

Bupanduluzi buyungizidwe