Sena Mulacizuzikizya Ceelelo Canu Coonse Kuli Leza?
“Leza uyoobeteka milimo yoonse, amakani oonse aasisidwe, naaba mabotu naaba mabi.—MUKAMBAUSI 12:14.
1. Nzipego nzi Jehova nzyaabila bantu bakwe?
JEHOVA ulabagwasilizya aabo ibazumanana kumuyeeya kuti Mmulengi wabo Mupati. Ijwi lyakwe lyakasololelwaa muuya lilabapa luzibo iluyandika ikutegwa kabacita buyo zintu nzyakkomanina. Imuuya wa Leza uusalala ulabasololela ikucita kuyanda kwakwe alimwi akuti ‘bazyale micelo yamilimo mibotu yamisyobo yoonse.’ (Ba-Kolose 1:9, 10) Kunze lyaboobo, Jehova ulaabila cakulya cakumuuya alimwi abusolozi bwateokrasi kwiinda ‘mumuzike musyomesi uucenjede.’ (Matayo 24:45-47) Aboobo munzila zinji, ibantu ba Leza balijisi zilongezyo izizwa kujulu mbobabelekela Jehova alimwi mbobazumanana kucita mulimo uuyandika kapati wakukambauka makani mabotu aa Bwami.—Marko 13:10.
2. Mmibuzyo nzi iikonzya kubuzigwa kujatikizya mulimo ngotucita kuli Jehova?
2 Banakristo bakasimpe balakondwa ikujata bubi mumulimo uusetekene ngobabelekela Jehova. Nokuba boobo, bamwi balakonzya kutyompwa akuyeeya kuti kusoleka kwabo kunyina mpindu. Mucikozyanyo, zimwi ziindi Banakristo balyaabide balakonzya kutelaika naa kusoleka kwabo kulaampindu ncobeni. Natelaikaa ciiyo camukwasyi alimwi amilimo iimbi, imutwe wamukwasyi ulakonzya kulibuzya mibuzyo mbuli yeeyi: ‘Sena Jehova ulazikkomanina ncobeni zintu nzyotucita? Sena ncobeni tuli mukuzuzikizya ceelelo cesu coonse kuli Leza?’ Imajwi aamukambausi aabusongo alakonzya kutugwasya kwiingula mibuzyo ili boobu.
Sena Zintu Zyoonse Nzyabuyo?
3. Ncintu nzi ciinda kuba cabuyo kweelana amajwi aali ku Mukambausi 12:8?
3 Ibantu bamwi balakonzya kuyeeya kuti imajwi aamuntu oyo musongo kunyina muntu ngwaakulwaizya—abe mwana naa mupati. “Nzyabuyobuyo! mbwaamba Mukambausi. Zyoonse nzyabuyo.” (Mukambausi 12:8) Atwaambe kuti, cintu ciinda kuba cabuyo nkutamubikkila maanu Mulengi wesu Mupati notucili bakubusi, ikwiile kucembaala kakunyina kumubelekela alimwi akwiile kukkomanina buyo koongola. Kumuntu uli boobo, zintu zyoonse zyali zyabuyo naa zyanyina mpindu nokuba kuti wafwa kavwubide alimwi kajisi mpuwo munyika ino iiyendelezyegwaa mubi, Saatani Diabolosi.—1 Johane 5:19.
4. Nkaambo nzi ncokunga kwaambwa kuti teensi zintu zyoonse izyabuyo?
4 Teensi zintu zyoonse izyabuyo kuli baabo ibayobola lubono lwabo kujulu kabali babelesi ba Jehova ibasyomeka. (Matayo 6:19, 20) Bajisi zyakucita zinji mumulimo wa Mwami alimwi milimo iili boobo taili yabuyo pe. (1 Ba-Korinto 15:58) Pele ikuti katuli Banakristo ibalyaabide, sena tuli mukujata bubi mumulimo Leza ngwaakatupa kuti tuucite mumazuba aano aakumamanino? (2 Timoteo 3:1) Naa sena tujisi bukkale ibwiimpene buyo asyoonto abwabasimukoboma? Balakonzya kuti kabaunka kuzikombelo zyaandeene-andeene alimwi inga kabalyaabide kapati, kabajanika kumaanda aabo aakukombela lyoonse alimwi akusoleka munzila zyoonse ikutobela ncobuyanda kuti bacite bukombi bwabo. Pele tabali basikwaambilizya bamulumbe wa Bwami. Banyina luzibo lwini-lwini lwakuti kuno nkotubede “[n]kumamanino aaciindi” alimwi kunyina anobacibwene ciindi kuti camana kweelana amazuba motubede.—Daniele 12:4.
5. Ncinzi ncotweelede kucita ikuti naa kuyanda kujana zintu zyakumubili caba ncecintu cipati mubuumi bwesu?
5 Kujatikizya ciindi cesu camapenzi, Jesu Kristo wakati: “Nkabela kuboola kwa-Mwana a-Muntu kuyooba mbuli kumazuba aa-Nowa. Nkaambo kumazuba ayo maanzi naatakalina kupaya bakali kulya akunywa, bakali kukwata akukwatizigwa, kusikila kubuzuba obo mbwaakanjila mubwaato Nowa, nkabela teebakezi mane kupaya kwamaanzi kwakasika akubatola. Mbubonya obo mbukuzooba kuboola kwa-Mwana a-Muntu.” (Matayo 24:37-39) Ikulya akunywa nokucitwa munzila yeelede takulubide pe, alimwi lukwato mbubambe bwakatalisigwaa Leza mwini. (Matalikilo 2:20-24) Pele ikuti twabona kuti twatalika kubikkila kapati maanu kubukkale bwakuyandisya kujana zintu zyakumubili, sena eco tatweelede kucipailila? Jehova ulakonzya kutugwasya kubikka zintu zya Bwami mubusena bwakusaanguna, ikucita zintu ziluzi alimwi akuzuzikizya ceelelo cesu kulinguwe.—Matayo 6:33; Ba-Roma 12:12; 2 Ba-Korinto 13:7.
Kulyaaba Aceelelo Cesu Kuli Leza
6. Muunzila nzi iiyandika kapati bantu bamwi ibabbapatizidwe mobakakilwa kuzuzikizya ceelelo cabo kuli Leza?
6 Banakristo babbapatizidwe bamwi bayandika kupaila cakusinizya akaambo kakuti tabazuzikizyi zyeelelo zyabo zyamulimo njobakatambula nobakalyaaba kuli Leza. Ibantu bainda ku 300,000 bali kubbapatizigwa amwaka kwamyaka iili mbwiibede ono, pele imweelwe wa Bakamboni ba Jehova ibasungweede kwiina nowavwula kweelana amyeelwe eyo. Bamwi ibakali basikumwaya ba Bwami bacileka kwaambilizya makani mabotu. Pele bantu beelede kuti kabatola kale lubazu mumulimo wa Bunakristo kabatana bbapatizigwa. Aboobo baluuzi mulimo Jesu ngwaakapa basikumutobela boonse wakuti: “Kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendakamulailila.” (Matayo 28:19, 20) Ccita kuti kabajisi kulezya kulibedelede buya mbuli kuciswa-ciswa alimwi azisinkilizyo zimwi, ibantu babbapatizidwe balo ibacileka kuba Bakamboni ba Leza a Kristo ibasungweede, tabali mukuzuzikizya ceelelo cabo ku Mulengi wesu Mupati.—Isaya 43:10-12.
7. Nkaambo nzi ncotweelede kuswaangana lyoonse kuti tukombe?
7 Israyeli wansiku wakali musyobo uulyaabide kuli Leza alimwi iweendelezyegwaa cizuminano ca Mulawo, ibantu bacisi eco bakajisi mikuli yakuzuzikizya kuli Jehova. Mucikozyanyo, ibaalumi boonse bakeelede kuswaangana kumapobwe aakali kucitwa ziindi zyotatwe amwaka, elyo imwaalumi iwatakatobela mulawo wa Pobwe lya Kwiindilila acaali wakali ‘kujaigwa.’ (Myeelwe 9:13; Levitiko 23:1-43; Deuteronomo 16:16) Ikutegwa bazuzikizye ceelelo cabo kuli Leza kabali bantu bakwe ibalyaabide, bana Israyeli bakeelede kubungana kutegwa bakombe. (Deuteronomo 31:10-13) Kunyina Mulawo mpowakaamba kuti, ‘Amucite eci ikuti kamukonzya.’ Kuli baabo ibalyaabide kuli Jehova ono, mmasimpe imulawo wakubungana antoomwe uyumya majwi aa Paulo aakuti: “Katunga katuyeeyana, k[a]tubusyanya-busyanya mukuyandana akucita milimo mibotu. Tutanoonga katuleka kulibunga-bunga, mbuli bamwi mbubaleka, anu kamucenjezyanya twaambo, kamucita obuya lyoonse mbomukubwene kuti buzuba bwa-Kristo buli afwaafwi.” (Ba-Hebrayo 10:24, 25) Inzya, ikubungana lyoonse abasyomima ndubazu lwaceelelo ca Munakristo uulyaabide kuli Leza.
Amuzilange-lange Camaanu Nzyomusala!
8. Nkaambo nzi imukubusi uulyaabide ncayelede kwaalangisya makani aamulimo wakwe uusetekene?
8 Ambweni uli mukubusi uulyaabide kuli Jehova. Uyoolongezyegwa kapati ikuti zintu zya Bwami wazibikka mubusena butaanzi mubuumi bwako. (Tusimpi 10:22) Kwiinda mukukomba alimwi akulibambila kabotu, mulakonzya kubelesya myaka yanu yabukubusi mumulimo umwi waciindi coonse, yalo iili nenzila mbotu yakutondezya kuti mulamuyeeya Mulengi wanu Mupati. Ibuyo-buyo ikuyandisya zintu zyakumubili kulakonzya kutalika kumumanina ciindi canu cinji akuleka kubikkila maanu kuzintu ziyandika. Mbubwenya bantu banji mbobacita, mulakonzya kufwambaaana kukwata naa kukwatwa akutalika kukweleta mali ikutegwa mujane zintu zyakumubili iziyandika. Ikwiiya mulimo uusumpukide kulakonzya kumumanina ciindi canu anguzu. Ikuti naa mwabaa bana, munoojisi mikuli yamukwasyi kwamakumi aamyaka. (1 Timoteo 5:8) Ambweni inga kamutamulubide buya Mulengi wanu, pele ncamaanu ikuzyiba kuti ikulibambilila limwi naa ikutalibambila, kulakonzya kutondezya bukkale bwabuumi bwanu mwaakukomena. Mumyaka yakumbele, mulakonzya kuyeeya bukkale bwanu bwamusyule akubukkomanina akaambo kakuti bukubusi bwanu bwakabelesyegwa cakumaninina mumulimo uusetekene ku Mulengi wesu Mupati. Mmulekela nzi ikupailila bulangizi bwanu ndilyonya lino, ikutegwa mukaukkomanine mulimo wanu uusalala kuli Jehova mumyaka yabukubusi bwanu?
9. Ncinzi cinga cakonzyeka kumuntu iwacembaala alimwi cimwi ciindi iwakayumwide mukuli mulemu mumbungano?
9 Amuyeeye bukkale bumbi ibwiimpene, ibwamwaalumi iwakabeleka kali mweembeli wa “butanga bwa-Leza” cimwi ciindi. (1 Petro 5:2, 3) Akaambo katwaambo tumwi wakalisalila kuuleka mukuli oyu. Ee, lino wakomena alimwi inga camukatazya kapati kuzumanana mumulimo wa Leza. Pele sena inga cabota kuti alimwi ayaambele kusungwaalila mikuli yateokrasi? Inga waletela bamwi zilongezyo zinji kaka ikuti kakonzya kuyumuna mikuli iimbi mumbungano! Alimwi mbwaanga kunyina muntu uuliponena lwakwe buyo, ibalongwe alimwi abasazinyina bayookkomana ikuti wakonzya kuyungizya mulimo ngwacita kukulemeka Leza. (Ba-Roma 14:7, 8) Icipati kwiinda, Jehova takalubi zintu umwi aumwi nzyacita mumulimo wakwe. (Ba-Hebrayo 6:10-12) Aboobo, ino ncinzi cinga catugwasya ikunooyeeya Mulengi wesu Mupati?
Izintu Zigwasya Mukuyeeya Mulengi Wesu Mupati
10. Nkaambo nzi mukambausi ncaakali muciimo cibotu cakupa malailile kujatikizya kuyeeya Mulengi wesu Mupati?
10 Imukambausi wakali muciimo cibotu kapati cakupa malailile aakuti katuyeeya Mulengi wesu Mupati. Jehova wakayiingula mipailo yakwe njaakapaila camoyo woonse kwiinda mukumupa busongo bugambya. (1 Bami 3:6-12) Solomoni wakazivwuntauzya kabotu-kabotu zintu zyoonse zyabukkale bwabantu. Kunze lyaboobo, wakasololelwaa muuya wa Leza kuti buvwuntauzyi bwakwe bulembwe ikutegwa bugwasye bambi. Wakalemba kuti: “Lino Mukambausi, mbwaakali musongo, wakacili kwiiyisya bantu luzibo. Wakayeeya akulingula akubamba tusimpi tunji. Mukambausi wakali kuyandaula majwi aabotezya, alimwi wakaliluleme kukulemba majwi aalusinizyo.”—Mukambausi 12:9, 10.
11. Nkaambo nzi ncotweelede kutobela lulayo lwa Solomoni lwabusongo?
11 Imajwi aaya mubusanduluzi bwa Bbaibbele lya The Greek Septuagint ilyakasandululwaa Charles Thomson abalwa boobu: “Alimwi mbwaanga imukambausi wakali musongo, akaambo kakuti wakayiisya bantu busongo; ikutegwa imatwi ateelele zintu zibotezya zyamuzikozyanyo, imukambausi wakasungwaala kuvwuntauzya ikutegwa ajane majwi aabotezya alimwi akulemba kuluzi—nkokuti imajwi aakasimpe.” Solomoni wakasoleka kunjila myoyo yabasikubala bakwe kwiinda mukubelesya majwi aabotezya alimwi amakani aaininizya alimwi aagwasya ncobeni. Mbwaanga majwi aakwe aali mu Magwalo akasololelwaa muuya uusalala, tulakonzya kakunyina kweenkeenka ikutobela kuvwuntauzya kwakwe alimwi akulaya kwakwe kwabusongo.—2 Timoteo 3:16, 17.
12. Mumajwi aanu nobeni, mbuti mbomunga mwaamba ncaakaamba Solomoni kubbuku lya Mukambausi 12:11, 12?
12 Nokuba kuti kwakanyina nzila zyakusimbya mabbuku mbuli zyamazubaano, kwakali mabbuku manji kuciindi ca Solomoni. Ino mabbuku aali boobo akeelede kulangwa buti? Wakati: “Majwi aabasongo ali mbuli zibinzyo, atusimpi tuyobolwedwe twamwiyi omwe tuli mbuli manembe aakankamidwe. Mwanaangu, cenjela kuzintu azimwi kutali ezi. Kulemba mabbuku manji takumani, akwiiya kunji kulakataazya mubili.”—Mukambausi 12:11, 12.
13. Ino majwi abaabo ibalaa busongo bwabunaleza inga aba buti mbuli zibinzyo, alimwi ino mbaani aabo ibali mbuli “manembe aakankamidwe”?
13 Imajwi aabaabo ibalaa luzibo lwabunaleza ali mbuli zibinzyo. Munzila nzi? Alabakulwaizya basikubala naa baswiilizi kuti bayaambele kweelana amajwi aabusongo ngobabala naa kuteelela. Kunze lyaboobo, aabo ibajisi bubi kulanga-langa ‘tusimpi tuyobolwedwe,’ naa tusimpi twabusongo alimwi tugwasya bali mbuli “manembe aakankamidwe,” naa aajisi kapati. Eci inga caba boobo nkaambo kakuti imajwi mabotu aabantu bali boobo atondezya busongo bwa Jehova elyo aboobo alakonzya kuzyatya akugwasilizya basikwaabala naa basikwaaswiilila. Ikuti kamuli bazyali bayoowa Leza, sena tamweelede kusolekesya ikuyiisya busongo buli boobo mumizeezo amyoyo yamwanaanu?—Deuteronomo 6:4-9.
14. (a) Nkuumabbuku aali buti nkotuteelede kubaa “kwiiya kunji”? (b) Mabbuku nzi ngotweelede kubikkila maanu kapati, alimwi nkaambo nzi?
14 Pele ino nkaambo nzi Solomoni ncaakaamba makani aayo kujatikizya mabbuku? Ikuti twaayezyanisyaa Jwi lya Jehova, imilwi-milwi yamabbuku aamunyika ino iitamani ajisi buyo mizeezo yabantu. Ibunji bwamizeezo eyo itondezya maanu aa Saatani Diabolosi. (2 Ba-Korinto 4:4) Aboobo, ‘ikwiiya kunji’ kujatikizya mabbuku aali boobo kunyina mpindu iini-ini. Atwaambe kuti, ikuciindizya kucita boobo kulakonzya kuleta mapenzi munzila yakumuuya. Mbubwenya mbuli Solomoni, atuzinzibale kuyeeya ceeco ncolyaamba Jwi lya Leza kujatikizya buumi. Eci ciyooyumya lusyomo lwesu akutuswenya kuli Jehova. Ikubikkila maanu kapati kumabbuku aambi naa zintu zimwi kutegwa tujane lunaanizyo kulakonzya kutubombya. Ikapati ikuti imabbuku aayo akalembwaa bantu basumpula busongo bwanyika ibukazyanya abusongo bwabuna Leza, mmabi alimwi anyonyoona lusyomo muli Leza amuzisyomezyo zyakwe. Aboobo katuyeeya kuti imalembe aakonzya kutugwasya ncobeni aakuciindi ca Solomoni alimwi asunu ngaayo aatondezya busongo ‘bwamwiiyi omwe,’ Jehova Leza. Watupa mabbuku aali 66 aa Magwalo Aasalala elyo kuli yaaya nkotweelede kubikkila maanu kapati. Ibbaibbele alimwi amabbuku aambi aagwasya aalembwaa “muzike musyomesi” atugwasya kuti tujane “luzibo lwa-Leza.”—Tusimpi 2:1-6.
Iceelelo Cesu Coonse Kuli Leza
15. (a) Ino majwi aa Solomoni aa “ceelelo coonse camuntu” inga mwaapandulula buti? (b) Ncinzi ncotweelede kucita ikutegwa tukonzye kuzuzikizya ceelelo cesu kuli Leza?
15 Kamanizya buvwuntauzi bwakwe boonse, imukambausi Solomoni waamba kuti: “Ngaaya mamanino aamakani. Oonse amvwigwa. Lemeka Leza akubamba milazyo yakwe, nkaambo kucita obo nceelelo coonse camuntu. Nkaambo Leza uyoobeteka milimo yoonse, amakani oonse aasisidwe, naaba mabotu naaba mabi.” (Mukambausi 12:13, 14) Ikuyoowa Mulengi wesu Mupati munzila yeelede naa ikumulemeka kapati kuyootukwabilila swebo amikwasyi yesu kuti tutatobeli bukkale bwabufwubafwuba ibunga bwatuletela mapenzi mapati amause swebo alimwi abayandwa besu. Ikuyoowa Leza kuluzi kulasalala alimwi ngamatalikilo aabusongo aluzibo. (Intembauzyo 19:9; Tusimpi 1:7) Ikuti twabaa bupampu ibuyeeme aa Jwi lyakasololelwaa Leza alimwi akutobela lulayo lwalyo muzintu zyoonse, tunoozuzikizya ‘ceelelo cesu coonse’ kuli Leza. Tacaambi kubikka mulongo wazyeelelo pe. Muciindi caboobo, iciyandika ncakuti tulange-lange caamba Magwalo notusola kumanizya mapenzi aamubukkale alimwi akucita zintu lyoonse munzila njayanda Leza.
16. Ikujatikizya lubeta, ncinzi ncayoocita Jehova?
16 Tweelede kuzyiba kuti kwiina cintu ncataboni Mulengi wesu Mupati. (Tusimpi 15:3) “Uyoobeteka milimo yoonse.” Inzya, Mupatikampatila uyoobeteka zintu zyoonse, kubikkilizya azeezyo izisisidwe kumeso aabantunsi. Ikuzyiba zintu zili boobo kulakonzya kuba cintu citukulwaizya ikutobela milazyo ya Leza. Pele icintu ciyootugwasya kapati ceelede kuba luyando ndotujisi kuli Taateesu wakujulu, nkaambo imwaapostolo Johane wakalemba kuti: “Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.” (1 Johane 5:3) Alimwi mbwaanga imilazyo ya Leza yakabambilwa kuti isumpule bukkale bwesu kukabe kutamani, mmasimpe tacili buyo cintu ceelede kucita pele ncabusongo ikwiitobela. Ikucita boobo tauli mukuli uuminya pe kubantu ibayanda Mulengi Mupati. Bayanda kuzuzikizya ceelelo cabo kulinguwe.
Amuzuzikizye Ceelelo Canu Coonse
17. Ncinzi ncotuyoocita ikuti katuyandisya kuzuzikizya ceelelo cesu coonse kuli Leza?
17 Ikuti katuli bantu basongo alimwi katuyandisisya kuzuzikizya ceelelo cesu coonse kuli Leza antoomwe akutobela milazyo yakwe, tuyoobaa buyoofwu bwakucita cintu citamukkomanisyi. Ncobeni, “kulemeka Jehova matalikilo aabusongo,” alimwi aabo ibatobela milazyo yakwe “bali amaanu mabotu.” (Intembauzyo 111:10; Tusimpi 1:7) Aboobo atucite zintu zyoonse camaanu alimwi atumumvwe Jehova muzintu zyoonse. Eci cilayandika ikapati lino nkaambo Mwami Jesu Kristo nkwali alimwi ibuzuba bwakwe bwalubeta kali Mubetesi uubikkidwe aa Leza bulaafwaafwi.—Matayo 24:3; 25:31, 32.
18. Ncinzi ciyoocitika ikuti naa twazuzikizya ceelelo cesu coonse kuli Jehova Leza?
18 Omwe-omwe wandiswe uli mukulangwa-langwa a Leza. Sena zintu zyakumuuya tulaziyandisya, naa sena ikuyunga kwazintu zyanyika twakulekela kuti kuubye-ubye cilongwe cesu a Leza? (1 Ba-Korinto 2:10-16; 1 Johane 2:15-17) Tube bakubusi naa bapati, atucite zyoonse nzyotukonzya ikutegwa tukkomanisye Mulengi wesu Mupati. Ikuti twamumvwida Jehova akutobela milazyo yakwe, tuyoozikaka izintu zinyina mpindu zyamunyika ino yakaindi iili mukuloba. (2 Petro 3:13) Taziliboteli kaka zisyomezyo ezi kuli baabo ibazuzikizya ceelelo cabo coonse kuli Leza!
Inga Mwaingula Buti?
◻ Nkaambo nzi ncomunga mwaamba kuti tazili zintu zyoonse izyabuyo?
◻ Nkaambo nzi Munakristo mukubusi ncayelede kuubikkila maanu kapati mulimo wakwe uusetekene?
◻ Nkuumabbuku aali buti ikunga takukootugwasya kubaa “kwiiya kunji”?
◻ Ino “ceelelo coonse camuntu” ncinzi?
Cifwanikiso icili apeeji 16]
Teensi zintu zyoonse izyabuyo kuli baabo ibabelekela Jehova
Cifwanikiso icili apeeji 18]
Mukwiimpana amabbuku manji aamunyika ino, Jwi lya Leza lilakatalusya alimwi lilagwasya