Jesu Kristo—Mulumbe Wakwe Mboukonzya Kumugwasya
“Mebo ndazida kuti babe abuumi, akuti buvule.”—JOHANE 10:10.
JESU KRISTO wakaboola anyika kutegwa azyikupe ikutali kupegwa. Kwiinda mumulimo wakwe, wakabapa cipego cipati bantu—mulumbe iwakali kwaamba kasimpe kaamba Leza amakanze Aakwe. Aabo bautambula mulumbe ooyu balakonzya kuba abuumi bubotu lino, mbubwenya mbuli mbobapona Banakristo banji.a Makani mapati Jesu ngaakakambauka, akali kwaamba cipego ciyandika kapati cabuumi bwakwe bulondokede mbwaakaaba kutegwa tugwasyigwe. Kutegwa swebo tuzumanane kupona mane kukabe kutamani tweelede kuutambula mulumbe ooyu.
Ncaakatupa Leza a Jesu Jesu wakalizyi kuti basinkondonyina baya kumujaya. (Matayo 20:17-19) Nokuba boobo, wakaamba boobu kulugwalo lwa Johane 3:16 kuti: “Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” Alimwi Jesu wakaamba kuti wakaboola “kwaaba buumi bwakwe, bube cinunuzyo cabanji.” (Matayo 20:28) Ino ncinzi ncaakaambila kuti uya kupa buumi bwakwe ikutali kupegwa?
Akaambo kakuti Leza ulabayanda kapati bantu, wakabikka bubambe bwakuti banununwe kucibi alufwu. Leza wakacita oobu kwiinda mukutuma Mwanaakwe simuzyalwa alikke anyika kutegwa akafwe. Jesu wakazumina akwaaba buumi bwakwe kutegwa tugwasyigwe. Bubambe oobu bwa cinunuzyo, ncipego cipati Leza ncaakabapa bantu.b Cipego eeci cilakonzya kutupa kuti tukajane buumi butamani.
Ncomweelede Kucita Sena andinywe cinunuzyo mucibona kuti ncipego cenu? Cili buyo ambomucibona. Mucikozyanyo, amweezyeezye kuti muntu umwi uyanda kumupa cintu cimwi. Mulakonzya kwaamba kuti ncicanu lilikke mwacibweza. Mbubwenya buyo, Jehova watupa cinunuzyo, pesi mulakonzya kwaamba kuti ncipego canu lilikke mwacitambula. Munzila nzi?
Jesu wakaamba kuti ‘bamusyoma’ mbabaya kuba abuumi butamani. Lusyomo lulakonzya kubonwa kweelana ambomupona. (Jakobo 2:26) Tulakonzya kutondezya kuti tulamusyoma Jesu kwiinda mukupona kweelana azyintu nzyaakaamba akucita. Kutegwa mucite oobo, mweelede kumuzyiba kabotu Jesu a Bausyi. Jesu wakaamba kuti, “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.”—Johane 17:3.
Myaka iibalilwa ku 2,000 yainda, Jesu Kristo wakaamba makani aakacinca buumi bwabantu banji nyika yoonse. Sena mulayanda kuzyiba makani manji ngaakaamba Jesu ambwaakonzya kumugwasya abamukwasyi wanu, lino mane kukabe kutamani? Bakamboni ba Jehova balakonzya kumugwasya.
Zibalo zitobela zilamwaambila makani manji kujatikizya Jesu Kristo, muntu iwakaamba makani aakonzya kucinca buumi bwanu kukabe kutamani.
Bupanduluzi buyungizidwe
a Tabali boonse balyaamba kuti Mbanakristo ibamutobela ncobeni Kristo. Basikutobela Jesu beni-beni mbabaabo ibapona kweelana anzyaakayiisya kujatikizya Leza amakanze Aakwe.—Matayo 7:21-23.
b Kutegwa muzyibe makani aayungizyidwe kujatikizya makani aamba cinunuzyo, amubone cibalo 5 cijisi mutwe wakuti, “Icinunuzyo—Ncipego ca Leza Ciinda Zyoonse,” mubbuku lyakuti Ino Ncinzi Cini Bbaibbele Ncoliyiisya? lyakamwaigwa a Bakamboni ba Jehova.