Izikonzya Kutugwasya Kukomba Mumukwasyi Alimwi Aciiyo Cesu Tobeni

KUMATALIKILO aamwaka wa 2009, mbungano zya Bakamboni ba Jehova nyika yoonse zyakacinca bubambe bwamiswaangano. Miswaangano yobilo iyakali kucitwa akati kansondo yakatalika kucitwa mubuzuba bomwe alimwi boonse bakakulwaizyigwa kubelesya buzuba bumwi oobo kukomba mumukwasyi naa kucita ciiyo cesu tobeni. Sena mulabutobela bubambe bupya oobu? Sena bubambe oobu bwamugwasya?

Ibamwi tabatuzyi kabotu twaambo tweelede kubandikwa nobakomba mumukwasyi. Kabunga Keendelezya takajisi makanze aakubikka nzila yeelede kutobelwa amikwasyi yoonse. Mbokunga bukkale bulaindana-indana, cilayandika kuti mutwe wamukwasyi aumwi naa muntu uuli alikke kubona mbwakonzya kubelesya ciindi eeci munzila iili kabotu ansondo.

Bamwi balalibambila miswaangano yambungano mubuzuba bwakukomba mumukwasyi, pele eeci tacili ncecintu calikke ceelede kucitwa. Bamwi balabala, balabandika akusobana zibeela zimwi zyamu Magwalo ikapati kutegwa bana bagwasyigwe. Zimwi ziindi taciyandiki kuti kamubelesya nzila yakubuzya akwiingula mbuli mbokucitwa kumiswaangano. Ikuti bantu kabaliibide tacikatazyi kubandika alimwi cilauba-uba kupana mizeezo. Kuti kakuli boobo, cipa kuti boonse kabaciyeeya ncobaiya alimwi cilabakkomanisya.

Usyi bana botatwe uumwi wakalemba kuti: “Kanji-kanji nzyotucita nzyeezyo nzyotubala mu Bbaibbele. Aumwi ulabala zyaandano zyamu Bbaibbele kakucili ciindi, ibana balasala zibeela zyakuvwuntauzya mpoonya balaamba nzyobakajana. Michael [uuli amyaka yakuzyalwa iili 7] ulazekaula zifwanikiso naa kulemba muncali wazyintu nzyaali kubala. David a Kaitlyn [bali amyaka iili 13 a 15] balakonzya kulemba zyakuluula zyamu Bbaibbele kweelana ambobazimvwa. Mucikozyanyo, nitwakali kubala cakacitika kuli Josefa naakali kupandulula ciloto ca Farao camujiki asikukutauka wakwe, Kaitlyn wakalemba cibalo kweelana ambwaakacibona mwaange naakali kweebelela nicakali kucitika ciloto eeci.”—Matl. caandano 40.

Zyintu zilacinca kweelena abukkale. Icikonzya kubeleka kumuntu naa kumukwasyi uumwi tacikonzyi kubeleka kumuntu naa kumukwasyi uumwi. Kabbokesi katobela katondezya mizeezo iikonzya kubelesyegwa ciindi cakukomba mumukwasyi naa aciiyo cesu tobeni. Mubwini mulakonzya kuyeeya nzila zinji zimbi.

[Kabbokesi/Cifwanikiso icili apeeji 6, 7]

Bali mumikwasyi muli bakubusi:

• Amubale akubandika bbuku lya Questions Young People Ask—Answers That Work.

• Amucite zitondezyo. (Amubone Ngazi Yamulindizi yamu May 15, 1996, peeji 13, mincali 17-18.)

• Amubandike mbaakani zyaciindi cilamfwu azyaciindi cisyoonto.

• Ciindi aciindi mweelede kweebelela akubandika mavidiyo aamakani aamu Bbaibbele.

• Amulange-lange zibalo zyakuti “Cibeela Cabana” mu Ngazi Yamulindizi.

Banabukwetene batajisi bana:

• Amubandike zili mucibalo 1, 3, 11-16 mubbuku lya Inzila Yakujana Lukkomano Mumukwasyi.

• Kamubandika makani ngomwakajana nimwakali kubala Bbaibbele molikke.

• Amulibambile Ciiyo ca Bbaibbele ca Mbungano naa Ciiyo ca Ngazi Yamulindizi.

• Amubandike mbomukonzya kuyungizya ciindi ncomubeleka mumulimo wamumuunda mbuli banabukwetene.

Kubakwesu abacizyi batakwete naa batakwetwe naa aabo bali mumikwasyi mobaindene zikombelo:

• Amubale mabbuku mapya aakazwa lyamuswaangano wacooko.

• Amubale ma Yearbook mapya aakaindi.

• Amuvwuntauzye mibuzyo bantu njobabuzya kapati kubusena nkomukkala.

• Amulibambile nzyomuyakwaamba mumulimo wamumuunda.

Mumikwasyi muli bana basyoonto:

• Amucite zisobano zyamakani aamu Bbaibbele.

• Amubandike zibeela zyakwiinduluka mumukwasyi zili amapeeji 30 a 31 mu Sinsimuka!

• Zimwi ziindi amucite zyintu zyakuliyeeyela izijatikizya Bbaibbele zyalo zikonzya kumugwasya. (Amubone cibalo cakuti “Cilayandika Kusolekesya” mu Ngazi Yamulindizi ya February 15, 2011, peeji 11.)

• Amulange-lange cibeela cakuti “Amubayiisye Bana Banu” mu Ngazi Yamulindizi.