Amwiiye Ncolyaamba Jwi Lya Leza
Mbuti Mboukonzya Kuba Alukkomano Mukwasyi Wanu?
Cibalo eeci cili amibuzyo ambweni njomwakalibuzyide kale alimwi cilatondezya nkomukonzya kubujana bwiinguzi mu Bbaibbele lyanu. Bakamboni ba Jehova bayookkomana kubandika andinywe bwiinguzi kumibuzyo eeyi.
1. Nkaambo nzi cikwati ncociyandika kutegwa mukwasyi ukkomane?
Jehova, Leza uukkomene, ngookatalisya cikwati. Cikwati cilayandika kutegwa kube lukkomano mumukwasyi nkaambo tacipi buyo kujana mulongwe pele cilapa alukwabililo kubana kutegwa bakomene kabotu. Ino Leza ucibona buti cikwati? Uyanda kuti kacitamani, kabakkede mwaalumi amukaintu bakakwatana mumulawo. (Luka 2:1-5) Leza uyanda kuti banabukwetene kabasyomeka kuli umwi amweenzinyina. (Bahebulayo 13:4) Jehova ulabazumizya Banakristo kulekana akukwata naa kukwatwa kumbi lilikke kuti ngobakwetene limwi wacita bumambe.—Amubale Matayo 19:3-6, 9.
2. Ino banabukwetene beelede kweendelezyanya buti?
Jehova wakalenga bamaalumi abamakaintu kutegwa kabagwasyanya mucikwati. (Matalikilo 2:18) Mulumi mbwali silutwe wamukwasyi, weelede kubayandawida banamukwasyi zyintu zyakumubili alimwi akubayiisya kujatikizya Leza. Weelede kulyaaba mukutondezya luyando kumukaintu wakwe. Banabukwetene beelede kuyandana alimwi akulemekana. Akaambo kakuti bamalumi abamakaintu boonse tabalondokede, kwiiya kulekelelana nenzila iikonzya kubapa lukkomano mucikwati cabo.—Amubale Baefeso 4:31, 32; 5:22-25, 33; 1 Petulo 3:7.
3. Ikuti kamutakkomene mucikwati canu, sena mweelede kumusiya ngomukwetene limwi?
Ikuti nywebo angomukwetene limwi kamujisi mapenzi, amweendelezyanye caluyando. (1 Bakolinto 13:4, 5) Ijwi lya Leza talikulwaizyi kwaandaana kuti nenzila yakumana mapenzi mucikwati. Nokuba boobo, ikuti mapenzi aindila, Munakristo weelede kulisalila kuti naa inga caba kabotu kwaandaana naa pe.—Amubale 1 Bakolinto 7:10-13.
4. Nobana, ncinzi Leza ncayanda kuti mube aancico?
Jehova uyanda kuti kamukkomene. Ulamupa lulayo lubotu lukonzya kumupa kukkomana mubukubusi bwanu. Uyanda kuti bumugwasye busongo aluzyibo lwabazyali banu. (Bakolose 3:20) Jehova ulalumba kuli zyoonse nzyomucita kutegwa mumutembaule.—Amubale Mukambausi 11:9–12:1; Matayo 19:13-15; 21:15, 16.
5. Nobazyali, ino bana banu inga balujana buti lukkomano?
Mweelede kubeleka canguzu kutegwa mubajanine cakulya, ŋanda, alimwi azyakusama bana banu. (1 Timoteyo 5:8) Pele kutegwa bana banu bajane lukkomano, alimwi mweelede kubayiisya kuyanda Leza akwiiya kulinguwe. (Baefeso 6:4) Cikozyanyo canu cakutondezya luyando kuli Leza cilakonzya kumugwasya mwanaanu. Ikuti malailile aanu kaayeeme a Jwi lya Leza, alakonzya kumugwasya mwanaanu kuyeeya munzila yeelede.—Amubale Deuteronomo 6:4-7; Tusimpi 22:6.
Bana balagwasyigwa kuti mwabakulwaizya akubalumbaizya. Alimwi bayandika kululamikwa akulaigwa. Kubayiisya kuliboobu kuyoobakwabilila kutacita micito iikonzya kubapa kutakkomana. (Tusimpi 22:15) Pele lulayo talweelede kuba lwabukali naa lwalunya.—Amubale Bakolose 3:21.
Bakamboni ba Jehova bamwaya mabbuku manji aakonzya kugwasya bazyali alimwi abana. Mabbuku aaya aamba zizwa mu Bbaibbele.—Amubale Intembauzyo 19:7, 11.
Kutegwa muzyibe zinji, amubone cibalo 14 mubbuku eeli lya, Ino Ncinzi Cini Bbaibbele Ncoliyiisya? lyakamwaigwa a Bakamboni ba Jehova.