MIBUZYO YAMU BBAIBBELE YAINGULWA

Mbuti mbomukonzya kujana lukkomano mucikwati?

Lulayo lwamu Bbaibbele lujatikizya mbobakonzya kujana lukkomano banabukwetene lulabeleka akaambo kakuti luzwa kuli Sikutalisya cikwati, Jehova Leza. Bbaibbele lituyiisya kuba abube bukonzya kuleta lukkomano mucikwati alimwi lilatucenjezya kujatikizya zyintu zikonzya kunyonyoona cikwati. Alimwi lilayiisya mbokubandikwa kabotu kutegwa kube lukkomano mucikwati.—Amubale Bakolose 3:8-10, 12-14.

Banabukwetene beelede kulemekana. Kuti boonse bobilo bazumina kucita zibeela nzyabapede Leza mucikwati, balakonzya kukkomana.—Amubale Bakolose 3:18, 19.

Ncinzi cipa kuti cikwati citamani?

Banabukwetene balakonzya kukkala antoomwe kuti kabayandana. Leza ulatuyiisya luyando mbolweelede kuba. Walo alimwi a Mwanaakwe, nzikozyanyo zilondokede zyaluyando lwakulyaaba.—Amubale 1 Johane 4:7, 8, 19.

Kuti banabukwetene kababulemeka bubambe bwa Leza bwacikwati, balakonzya kukkala antoomwe. Leza wakatalisya cikwati kuti cibe caanzyo citamani akati kamwaalumi amukaintu kutegwa mikwasyi kaikwabilidwe. Cikwati cilakonzya kuzumanana nkaambo Leza wakalenga bamaalumi abamakaintu kuti kabagwasyanya kumubili amumizeezo. Alimwi wakabalenga mucinkozya cakwe, kuti kabacikonzya kwiiya luyando lwakwe.—Amubale Matalikilo 1:27; 2:18, 24.

Kutegwa muzyibe zinji, amubone cibalo 14 cabbuku eeli, Ino Ncinzi Cini Bbaibbele Ncoliyiisya? ilyakamwaigwa a Bakamboni ba Jehova

Mulakonzya kukkopa a Web site ya www.jw.org

[Cifwanikiso icili apeeji 16]

Ino nkubandika kuli buti kupa kuti kube lukkomano mucikwati?