“Amubelekele Jehova cakulitakata Mbuli Bazike”
“Amube basungu, mutabi batolo pe. . . . Amubelekele Jehova cakulitakata mbuli bazike.”—LOM. 12:11.
INO MUYEEYA BUTI?
Ncinzi cijatikizyidwe mubuzike bwaambidwe mulugwalo lwa Baloma 12:11?
Ncinzi ncotweelede kucita kutegwa tutabi bazike ba Saatani anyika yakwe?
Mbulumbu nzi Jehova mbwapa bazike bakwe?
1. Amwaambe lwiindano luliko akati kakuyeeya kwabantu banji kujatikizya muzike akooko kukulwaizyidwe mulugwalo lwa Baloma 12:11.
BANTU banji bayeeya kuti muzike kanji-kanji muntu weendelezyegwa alimwi uutalanganizyigwi kabotu asimalelaakwe. Pele kuba muzike wa Leza kuliindene kapati ambobayeeya. Ijwi lya Leza lyaamba kuti Munakristo ulakonzya kusala kuba muzike wa Simalelo siluyando. Ciindi mwaapostolo Paulo naakali kukulwaizya Banakristo bamumwaanda wamyaka wakusaanguna kuti ‘babelekele Jehova cakulitakata mbuli bazike,’ wakali kukulwaizya mulimo uusetekene uucitwa akaambo kaluyando kuli Leza. (Lom. 12:11) Ino ncinzi cijatikizyidwe mubuzike oobu? Mbuti mbotukonzya kutantamuka kuba bazike ba Saatani anyika yakwe? Alimwi mbulumbu nzi ibujanwa akaambo kakubeleka cakusyomeka katuli bazike ba Jehova?
“NDAYANDISYA SIMALELAANGU”
2. (a) Ncinzi cakali kukonzya kupa kuti muzike muna Israyeli akake kwaangununwa? (b) Ino kuzumina kwamuzike kuti adonkolwe kutwi cakali kutondezya nzi?
2 Kweelana a Mulawo Leza ngwaakapa bana Israyeli, tulakonzya kubona iciyandika kutegwa tube bazike ba Jehova. Muzike muna Hebrayo wakali kwaangununwa mumwaka waciloba wabuzike bwakwe. (Kul. 21:2) Pele ikuti muzike kamuyandisisya simalelaakwe alimwi katayandi kumusiya, wakali kukonzya kuzumanana kukkala anguwe. Mulawo wa Jehova wakali kuzumizya kucita oobo. Simalelaakwe wakeelede kumutola kumulyango naa kumunsende akudonkola kutwi kwakwe acakudonkozya. (Kul. 21:5, 6) Cikkomanisya ncakuti bubambe oobu bwakali kubikkilizya akudonkola kutwi. Mumwaambo wa Chihebrayo, bbala lyakumvwida lilabikkilizya amuzeezo wakumvwa akuswiilila. Aboobo, kwiinda mukudonkolwa kutwi, muzike wakali kutondezya kuti wakali kuyanda kuzumanana kumubelekela simalelaakwe akumumvwida. Eeci cilatugwasya kubona icijatikizyidwe mukulyaaba kwesu kuli Jehova—tutondezya kuti tulayanda kumumvwida akaambo kakuti tulamuyanda Leza.
3. Ino kulyaaba kwesu kuli Leza kuyeeme aanzi?
3 Ciindi katutana kubbapatizyigwa, twakasala kuti tuyanda kumubelekela Jehova, kuba bazike bakwe. Kulyaaba kwesu kwakaboola akaambo kakuyanda kumvwida Jehova akucita kuyanda kwakwe. Kunyina wakatusinikizya kucita oobo. Inzya, nobaba bana baniini ibabbapatizyigwa balacita oobo bamana kulyaaba lwabo beni kuli Jehova, kutali buyo kuyanda kukkomanisya bazyali babo. Kaambo ikapa kuti muntu alyaabe akuba Munakristo, nduyando ndwajisi kuli Simaleleesu wakujulu, Jehova. Mwaapostolo Johane wakaamba kuti: “Kuyanda Leza caamba kuti katubamba milawo yakwe.”—1 Jo. 5:3.
TULAANGULUKIDE, PELE TULI BAZIKE
4. Ncinzi ciyandika kutegwa tube “bazike babululami”?
4 Tulamulumba kapati Jehova akaambo kakuti ulatupa zyoonse zyintu nzyotuyandika kutegwa tube bazike bakwe! Lusyomo lwesu mucipaizyo cacinunuzyo ca Kristo lupa kuti tutabi bazike bacibi. Nokuba kuti tucili bantu batalondokede, cakuliyandila twasala Jehova a Jesu kutweendelezya. Paulo wakacipandulula eeci kabotu-kabotu mulugwalo lwakwe lumwi ilwakasololelwa amuuya uusalala, naakati: “Amulibone kuti mulifwide cakumaninina kucibi, pele kuti mulapona kuli Leza kwiinda muli Kilisito Jesu.” Mpoonya wakacenjezya kuti: “Sena tamuzyi kuti, ikuti naa kamulyaaba kuli umwi mbuli bazike bamvwida, muli bazike bamuntu ooyo ngomuswiilila? Aboobo ikuti kamuli bazike bacibi muyootambula lufwu, pele ikuti kamuli bazike bakuswiilila muyootambula bululami. Pele aalumbwe Leza kuti nokuba kuti mwakali bazike bacibi, mwakaziswiilila kuzwa ansi amoyo injiisyo eezyo nzyomwakapegwa. Inzya, mbwaanga mwakaangununwa kucibi, mwakaba bazike babululami.” (Lom. 6:11, 16-18) Amubone kuti mwaapostolo waamba ‘kuswiilila kuzwa ansi amoyo.’ Aboobo, kulyaaba kwesu kuli Jehova kupa kuti tube “bazike babululami.”
5. Ninkondo nzi njotulwana toonse, alimwi nkaambo nzi?
5 Nokuba boobo, kuli buyumuyumu mbotweelede kulwana kutegwa katupona kweelana akulyaaba kwesu. Kuli nkondo zyobilo nzyotweelede kulwana. Yakusaanguna, ninkondo Paulo njaakali kulwana naakati: “Mumoyo wangu ndilabotelwa kapati amulawo wa Leza, pele mumubili wangu ndibona mulawo uumbi uulwana mulawo uuli mumizeezo yangu, alimwi uundipa kuba mwaange wamulawo wacibi ooyo uuli muzizyo zyangu.” (Lom. 7:22, 23) Mbwaanga andiswe tatulondokede, tweelede kuzumanana kulwana nkondo eeyi. Tweelede kuzumanana kuzilwana zisusi zyesu zyanyama. Mwaapostolo Petro wakatukulwaizya kuti: “Amube mbuli bantu baangulukide, pele lwaanguluko lwanu mutaluciti kuba civwumbyo cabubi pe, pele mbuli bazike ba Leza.”—1 Pe. 2:16.
6, 7. Mbuti Saatani mbwapa kuti nyika eeyi kaiboneka kubota?
6 Kuli nkondo imbi alimwi njotweelede kulwana, tweelede kulwana nyika eeyi yeendelezyegwa amadaimona. Saatani, mweendelezi wanyika eeyi, ufwusa mivwi yakwe aali ndiswe kutegwa tuleke kusyomeka kuli Jehova a Jesu. Ulayandaula nzila mwakonzya kupa kuti tube bazike bakwe kwiinda mukutusunka kuba cibeela canyika yakwe. (Amubale Baefeso 6:11, 12.) Nzila imwi njabelesya Saatani nkwiinda mukupanga nyika yakwe kuboneka kubota alimwi iyoongelezya. Mwaapostolo Johane wakacenjezya kuti: “Ikuti naa muntu kayanda nyika, nkokuti iluyando lwa Taata taluko pe mulinguwe; nkaambo zyintu zyoonse zili munyika—zisusi zyanyama alimwi azisusi zyameso amambonwa akaambo kazyintu nzyajisi muntu—tazizwi kuli Taata pe, pele zizwa munyika.”—1 Jo. 2:15, 16.
7 Nyika yoonse mbwiizulwa, bantu bayanda kuba aazyintu zinji zyakumubili. Saatani upa bantu kusyoma kuti kuba amali manji kuyakubapa kukkomana. Zintoolo zipati-pati zyavwula. Basikwaambilizya zyintu zyakusambala basumpula buumi bwakuba aazyintu zinji akulikkomanisya. Aabo ibacita makwebo aazyakweendela bapa zyoolwe zyakuunka mumasena mabotu kapati antoomwe abantu bakunyika. Inzya, toonse buyo tulaambilwa kubotya buumi bwesu pele kutali kweelana azyeelelo zya Leza.
8, 9. Nintenda nzi iiliko ncobeni, alimwi nkaambo nzi?
8 Kujatikizya baabo ibakali mumbungano ya Bunakristo mumwaanda wamyaka wakusaanguna, Petro wakacenjezya kuti: “Cilabakkomanisya kupona buumi bwabutaka, nociba ciindi casyikati. Aaba bantu ntubala atumpenda, ibabotelwa kapati anjiisyo zyabo zyalweeno nibalya andinywe mumapobwe. Nkaambo baamba majwi aakulitukumuna aabuyo. Alimwi kwiinda mukukwelelezya bamwi azisusi zyanyama alimwi amicito yabo iisesemya boongelezya bantu ibatija baabo ibacita zyintu zitaluleme. Nokuba kuti basyomezya bamwi lwaanguluko, balo beni mbazike babubozi. Nkaambo ikuti umwi wazundwa aumbi, uba muzike wakwe.”—2 Pe. 2:13, 18, 19.
9 Kukkutya “zisusi zyameso” takupi muntu kwaanguluka pe. Muciindi caboobo, uba muzike wasimalelo wanyika eeyi uutalibonyi, Saatani Diabolosi. (1 Jo. 5:19) Kuli ntenda yakuba muzike walubono, alimwi kuti twaba bazike bandulo nciyumu kwaanguluka.
MULIMO UULETELA LUKKOMANO
10, 11. Mbaani mazuba aano Saatani mbayandisya kunyonganya, alimwi mbuti lwiiyo lwamunyika mbolukonzya kupa kuti cibayumine?
10 Mbubwenya mbwaakacita mumuunda wa Edeni, mazuba aano aalo Saatani ulibakanzide aabo batakwe luzyibo. Bantu mbayandisya kapati mbana bacili basyoonto. Saatani takkomani pe kubona mwana musyoonto, naa muntu uumbi buyo, kasala kuba muzike wa Jehova. Sinkondonyina wa Leza uyanda kuti aabo boonse ibakaaba buumi bwabo kuli Jehova baalilwe kumubelekela cakumaninina alimwi cakusyomeka.
11 Atubone alimwi cikozyanyo camuzike iwakasala kudonkolwa kutwi kwakwe. Muzike ooyo kweelede kuti wakali kumvwa kucisa kwaciindi cisyoonto; mpoonya kwakali kucaala citondezyo camulimo wakwe wabuzike. Mbubwenya buyo, nciyumu kubakubusi kusala kucita zyintu ziindene azyeezyo nzyobasala bamuselanyina. Saatani usumpula muzeezo wakuti kujana mulimo umwi munyika yakwe nkokukonzya kupa muntu kukkomana, pele Banakristo tabeelede kuluba kuti kuyumya cilongwe cabo a Leza nkokuleta lukkomano mubuumi. Jesu wakayiisya kuti: “Balikkomene aabo bazyi kuti bayandika zyintu zyakumuuya.” Mt. 5:3) Banakristo bakalyaaba kuti bacite kuyanda kwa Leza, kutali kwa Saatani. Balaukkomanina mulawo wa Jehova, alimwi balazinzibala kuyeeya aali nguwo masiku amasyikati. (Amubale Intembauzyo 1:1-3.) Nokuba boobo, lwiiyo lunji mazuba aano talubapi ciindi babelesi ba Jehova cakuzinzibala kuyeeya akukkutya ziyandika zyabo zyakumuuya.
12. Nkusala kuli buti bana basyoonto nkobeelede kucita mazuba aano?
12 Simalelo wanyika ulakonzya kupa kuti buumi bumuyumine muzike Munakristo. Mulugwalo lwakusaanguna kubana Korinto, Paulo wakabuzya kuti: “Sena wakali muzike nowakaitwa?” Kumane wakakulwaizya kuti: “Citakupi kulibilika eeco pe; pele ikuti naa kocikonzya kwaanguluka, acikubede coolwe eeco.” (1 Ko. 7:21) Ikuti kajisi simalelo wakunyika uumupenzya, lwaanguluko kuzwa kubuzike lwakali kuyakusalwa. Mazuba aano, mumasi manji, kuli mulawo wakuti bana basyoonto beelede kuunka kucikolo kwamyaka iili mbwiibede. Mpoonya bamana, basicikolo balakonzya kusala. Kuzumanana alwiiyo lwakunyika kutegwa baiye milimo imwi kulakonzya kupa kuti babule lwaanguluko lwakucita mulimo waciindi coonse.—Amubale 1 Bakolinto 7:23.
LWIIYO LWAATALA NAA LWIIYO ILWIINDA KUBOTA?
13. Ndwiiyo luli buti iluyakubagwasya kapati babelesi ba Jehova?
13 Paulo wakacenjezya Banakristo baku Kolose kuti: “Amucenjele kutegwa kutabi muntu uumoongelezya kuti mucegwe kwiinda mubusongo bwabantu alweeno, kweelana atunsiyansiya twabantu azyintu zitakwe mulimo zyamunyika eeyi ikutali kweelana a Kilisito.” (Kol. 2:8) Bamayi banji mazuba aano bayiisya “busongo bwabantu alweeno, kweelana atunsiyansiya twabantu.” Lwiiyo lwaatala lwalo ziindi zinji ilubikkilizya njiisyo zili boobu, talupi basicikolo luzyibo lwakucita zyintu, alimwi inga tabacikonzyi kulwana buyumuyumu bwamubuumi. Mukwiimpana, babelesi ba Jehova balasala lwiiyo lukonzya kubagwasya kucita milimo iiyandika kutegwa kabapona buumi butayandiki zyintu zinji kutegwa babelekele Leza. Balalubikkila maano lulayo Paulo ndwaakapa Timoteo, lwakuti: “Ncobeni, kuli mpindu mpati mukubelekela Leza cakulyaaba, ikuti naa twakkutila azyintu nzyotujisi. Aboobo twanoojisi cakulya azyakulivwumba, tunookkutila azyintu eezyi.” (1 Ti. 6:6, 8) Muciindi cakulijanina madigili akulipangila mpuwo, Banakristo bakasimpe balabikkila maano kujana ‘magwalo aabalumbaizya’ kwiinda mukutola lubazu mumulimo wakukambauka kusikila mpobagolela.—Amubale 2 Bakolinto 3:1-3.
14. Kweelana alugwalo lwa Bafilipi 3:8, ino Paulo wakacibona buti coolwe cakuba muzike wa Leza a Kristo?
14 Amubone cikozyanyo camwaapostolo Paulo. Wakayiisyigwa amwiiyi uucibwene wa Mulawo waba Juda Gamaliyeli. Lwiiyo ndwaakatambula Paulo lulakonzya kukozyanisyigwa alwiiyo lwakuyunivesiti mazuba aano. Pele mbuti Paulo mbwaakalubona lwiiyo oolu naakalweelanya acoolwe cakuba muzike wa Leza a Kristo? Wakalemba kuti: “Zyintu zyoonse ndizibona kuti nzyabuyo akaambo kampindu mpati yaluzyibo lwa Kilisito Jesu Mwami wangu.” Kumane wakayungizya kuti: “Akaambo kanguwe izyintu zyoonse ndizibona kuti nzyabuyo akuti mulwi buyo wazifwuse, ikutegwa ndijane Kilisito.” (Flp. 3:8) Kulanga zyintu mbuli mbwaakazilanga Paulo kulakonzya kubagwasya bana basyoonto Banakristo abazyali babo ibayoowa Leza kutegwa basale kabotu mumakani aalwiiyo. (Amubone zifwanikiso.)
AMUGWASYIGWE ALWIIYO ILWIINDA KUBOTA
15, 16. Ino mbunga ya Jehova ipa lwiiyo luli buti, alimwi ncinzi cibikkilwa maano mulwiiyo oolu?
15 Ino buumi buli buti muzikolo zyalwiiyo lwaatala? Bantu ibajanika mumasena aaya kanji-kanji balimvwa kwaanguluka kuzangila mfwulumende abweendelezi. (Ef. 2:2) Mukwiimpana, mbunga ya Jehova ilapa lwiiyo ilwiinda kubota mumasena imuli luumuno mumbungano ya Bunakristo. Umwi aumwi wesu ulijisi coolwe cakugwasyigwa a Cikolo Camulimo Weendelezyegwa aa Leza nsondo ansondo. Mpoonya kuli lwiiyo lwaalubazu lubambilidwe bakwesu bapainiya ibatakwete (Cikolo Cakwiiya Bbaibbele Cabakwesu Batakwete) abapainiya banabukwetene (Cikolo Cakwiiya Bbaibbele ca Banakristo Banabukwetene). Zikolo izili boobu zyabunaleza zilatugwasya kumvwida Jehova, Simaleleesu wakujulu.
16 Tulakonzya kubelesya Laibbulali yaa Intaneti ya Watchtower kulangaula lubono lwakumuuya. Cintu cibikkilwa maano mulwiiyo oolu mbukombi bwa Jehova. Tulayiisyigwa mbotukonzya kubagwasya bantu bambi kuyanzana a Leza. (2 Ko. 5:20) Eeci ciyakupa kuti abalo bayiisye bamwi.—2 Ti. 2:2.
BULUMBU BWAMUZIKE
17. Mbulumbu nzi ibuboola akaambo kakusala lwiiyo ilwiinda kubota?
17 Mucikozyanyo ca Jesu camatalenta, bazike bobilo ibasyomeka bakalumbaizyigwa alimwi bakakkomana antoomwe asimalelaabo kwiinda mukupegwa mulimo munji. (Amubale Matayo 25:21, 23.) Kusala lwiiyo ilwiinda kubota mazuba aano kuletela lukkomano abulumbu. Amubone cikozyanyo caba Michael. Bakacita kabotu kapati mulwiiyo lwabo lwakucikolo cakuti bamayi babo bakabaita kutegwa babaambile ncobakali kunga bacita kutegwa baunke kuyunivesiti. Icakabagambya ncakuti, ba Michael bakasala kucita kkoosi iitola buyo ciindi cisyoonto yalo iyakali kuyakubagwasya kujana ziyandika zyamubuumi ciindi nobakali kucita bupainiya bwaciindi coonse. Sena balimvwa kuti bakaindwa munzila imwi? Bakaamba kuti: “Lwiiyo lwabunaleza ndondatambula kandili mupainiya—alimwi lino kandili mwaalu mumbungano—lulagwasya kapati kwiinda. Zilongezyo azyoolwe nzyondijisi tazikonzyi kweelanisyigwa amali aali woonse ngondali kunoovwola. Ndilikkomene kapati kuti tiindakasala lwiiyo lwaatala.”
18. Ncinzi cimupa kusala lwiiyo ilwiinda kubota?
18 Lwiiyo ilwiinda kubota lulatugwasya kuzyiba kuyanda kwa Leza akutugwasya kubelekela Jehova mbuli bazike. Lutugwasya kuba aabulangizi ‘bwakwaangununwa kubuzike bwakubola’ mpoonya kumbele tuyakutambula “lwaanguluko lwabulemu bwabana ba Leza.” (Lom. 8:21) Kwiinda zyoonse, tulaiya mbotukonzya kutondezya kuti tulamuyanda ncobeni Simaleleesu wakujulu, Jehova.—Kul. 21:5.
[Cifwanikiso icili apeeji 12]
[Zifwanikiso izili apeeji 14, 15]
Ngusimalelo uli ngomuyakubelekela?