MIBUZYO YAMU BBAIBBELE YAINGULWA
Sena pulaneti yesu kuli ncoyakabambilwa?
Nyika yakabambilwa kuti kauli munzi wabantu uukkomanisya kukkala
Pulaneti yesu yakabambwa munzila yakuti zintu zipona zilakonzya kukkala mumo. Ilijisi maanzi manji, alo aapa kuti kakuli buumi. Akaambo kakuti nyika yakacengama asyoonto alimwi ilazinguluka, zyoonse zipa kuti maanzi mulwizi kaataangani naa kubila akuyuminina. Alimwi mulenga-lenga alimwi anguzu zikwela zitegwa magnetic field zilaikwabilila pulaneti kumumuni uutali kabotu uuzwa kuzuba. Cilagambya kubona zisyango alimwi abanyama mbozigwasyilizyanya anyika. Aboobo banji cibapa kwaamba kuti kuli kaambo pulaneti yesu ncoyakabambilwa.—Amubale Isaya 45:18.
Pele mulakonzya kulibuzya kuti: Sena kupenga alimwi akutalulama cakali cibeela cabubambe oobu?—Amubale Deuteronomo 32:4, 5.
Sena nyika kuli noiyooba kweelana ancoyakabambilwa?
Nyika yakabambilwa kuti kabuli busena bukkomanisya kutegwa bantu balemekana alimwi ibamuyanda mulengi wabo kabakkala mumo. Aboobo, buumi bwabantu bulisumpukide kapati kwiinda bwazisyango alimwi abwabanyama. Tobantu tulakonzya kumuzyiba mulengi wesu kuti nguni alimwi tulakonzya kubotelwa alimwi akwiiya luyando alimwi abululami bwakwe.—Amubale Mukambausi 12:13; Mika 6:8.
Mulengi wesu ulakonzya kuzicita zyoonse nzyayanda kucita. Aboobo tulakonzya kuba masimpe kuti uyoogwisya kupenga akutalulama akupanga pulaneti yesu kuba munzi wabantu uulondokede alimwi uukkomanisya kukkala.—Amubale Intembauzyo 37:11, 29; Isaya 55:11.