MAKANI AAYEEME AMUTWE UULI ACIVWUMBYO | NKAAMBO NZI NCOTWEELEDE KUSYOMEKA?

Kutasyomeka Mbokumujatikizya

“Lyoonse kuli bukkale bumwi bukatazya bukonzya kumana ikuti twaleka kusyomeka asyoonto.”—Ba Samantha, baku South Africa.

Sena mulaazumina majwi aayo? Mbubwenya mbuli ba Samantha, toonse twakalijana kale mubukkale bukatazya aciindi cimwi. Mbotweendelezya bukkale bumwi abumwi ciindi notwasunkwa kutasyomeka kulakonzya kutondezya zintu nzyotubikkila kapati maano. Mucikozyanyo, ikuti kukwabilila mpuwo yesu ncecintu ncotubikkila kapati maano, nkokuti kutasyomeka inga yaba nzila imwi iikonzya kugwasya kuzuzikizya mbaakani eeyo. Pele kuti kasimpe kazyibwa, kanji-kanji kutasyomeka inga kuletela mapenzi. Atulange-lange twaambo tutobela.

KUTASYOMEKA KUNYONGANYA ZILONGWE

Zilongwe zilaba akaambo kakusyomeka. Ikuti bantu bobilo kabasyomana, balalimvwa kukwabililwa. Pele kusyomana takucitiki buyo mukaindi kasyoonto. Bantu balatalika kusyomana ciindi nobaba antoomwe, nobabandika cakusyomeka alimwi anobacita zintu cakutaliyanda. Nokuba boobo, cilongwe cilakonzya kunyongana akaambo kakutasyomeka ciindi comwe buyo. Alimwi ikuti bantu bacileka kusyomana, cilakatazya kutalika kusyomana alimwi.

Sena kuli nomwakeenwa kale amuntu ngomwakali kuyeeya kuti mulongwe mubotu? Ikuti kakuli boobo, ino mwakalimvwa buti? Kulangilwa kuti cakamucisa kapati alimwi mwakatyompwa. Cakutadooneka, eeco cilalimvwisya. Tacidoonekwi kuti kutasyomeka kulakonzya kunyonyoona zilongwe zibotu.

KUTASYOMEKA KULAYAMBUKILA

Kweelana abuvwuntauzi ibwakacitwa aba Robert Innes, basyaazibwene mumakani aamakwebo ku University of California, bakajana kuti “kutasyomeka kulayambukila.” Aboobo, kutasyomeka kulakonzya kukozyanisyigwa kukazunda—ikuti lyoonse katuyanzana amuntu uutasyomeki, andiswe tulakonzya “kuyambukilwa” akutasyomeka.

Mbuti mbomukonzya kweeleba kakole kakutasyomeka? Bbaibbele lilakonzya kumugwasya. Mwalombwa kuti mulange-lange njiisyo zyamu Bbaibbele zisyoonto.

Bantu Mbobatondezya Kutasyomeka

Kubeja

INO CAAMBA NZI? Nkwaamba kaambo kakubeja kumuntu umwi weelede kwaambilwa masimpe. Kubeja kulakonzya kubikkilizya akucinca twaambo naa kutaamba bwini mbozibede zintu, kusiya twaambo tuyandika ikusola kweena muntu uumwi, alimwi akuyungizya twaambo twakubeja.

NCOLYAAMBA BBAIBBELE: “Nkaambo muntu mumpelenge ncisesemyo kuli Jehova, pele balulami mbabajisi cilongwe ciyumu anguwe.” (Tusimpi 3:32) “Mbwaanga lino mwakaleka kubeja, umwi aumwi wanu aambe zyamasimpe kumweenzinyina.”—Baefeso 4:25.

Kubejelezya

INO CAAMBA NZI? Nkwaamba zintu zibyaabi alimwi zyakubeja izibisya mpuwo yamuntu.

NCOLYAAMBA BBAIBBELE: “Simanjaka ulabusya mazwanga, alimwi sikubejelezya ulabaandaanya balongwe beni-beni.” (Tusimpi 16:28) “Kuti kakunyina nkuni mulilo ulazima, alimwi ikuti kakunyina sikubejekezya mazwanga alamana.”—Tusimpi 26:20.

Kuunina

INO CAAMBA NZI? Nkunyengelela muntu umwi kuti amupe mali naa zintu kumwi kamujisi muzeezo wakumubbida.

NCOLYAAMBA BBAIBBELE: “Toyelede kuunina mubelesi wako uupengede alimwi mucete.” (Deuteronomo 24:14, 15) “Ooyo wuunina muntu uupengede usampaula Mulengi wakwe, pele ooyo uufwida lubomba mucete ulamulemeka Leza.”—Tusimpi 14:31.

Kubba

INO CAAMBA NZI? Nkubweza cintu camuntu kakunyina kumulomba.

NCOLYAAMBA BBAIBBELE: “Ooyo uubba atabbi limbi pe, muciindi cakubba abeleke mulimo canguzu, acite mulimo mubotu amaanzaakwe, kutegwa abe acintu cakupa yooyo uubulide.” (Baefeso 4:28) “Mutalyeeni pe. . . Babbi, basyaacivwulemwangu, bakolwi, basimatusi alimwi azigwebenga, tabakanjili mu Bwami bwa Leza.”—1 Bakorinto 6:9, 10.