Mutanoolibiliki

NJIISYO YAMU BBAIBBELE: “Amuleke kulibilika kujatikizya buumi bwanu.”—Matayo 6:25.

Ino eeci caamba nzi? Jesu wakaamba majwi aayo mu Mulumbe wakwe Waacilundu. Kweelana abbuku limwi lipandulula mabala aamu Bbaibbele, ibbala lya Chigiriki ilyakasandululwa kuti “kulibilika” lilakonzya kwaamba “ncakonzya kucita muntu akaambo kabucete, nzala alimwi amapenzi aamwi aakonzya kumusikila mubuumi.” Kanji-kanji kulibilika kujatikizya zintu zilangilwa kucitika kumbele. Tacilubide alimwi cileelela kulibilika kujatikizya zintu nzyotuyandika kumubili alimwi azyabayandwa besu. (Bafilipi 2:20) Pele Jesu naakaamba kuti “mutanoolibiliki,” wakali kwaambila basikumutobela kuti tabeelede kuciindizya kulibilika nkokuti kuciindizya kuyoowa zintu zikonzya kucitika kumbele kwalo kukonzya kutupa kubula lukkomano lino.—Matayo 6:31, 34.

Sena cilagwasya mazuba aano? Ncamaano kutobela malailile aa Jesu. Ino nkaambo nzi? Buvwuntauzi bumwi butondezya kuti ikuti naa bantu kabalibilika kapati, cipa kuti nsinga kazibeleka lyoonse alimwi eeci “cilijatane amalwazi mbuli zilonda zyamwida, kuciswa moyo, alimwi akufwundilila.”

Jesu wakaamba kaambo kalimvwisya ncotuteelede kuciindizya kulibilika: Takugwasyi pe. Jesu wakabuzya kuti: “Nguni akati kanu kwiinda mukulibilika uukonzya kuyungizya buumi bwakwe naaceya? (Matayo 6:27) Kubikkila kapati maano kuzintu zitulibilisya takukonzyi kuyungizya buumi bwesu naaceya. Alimwi kanji-kanji zintu inga tazicitiki mbotwali kuyeeya. Sikwiiya makani aamu Bbaibbele umwi wakaamba boobu: “Kulibilika zyakumbele nkusowa ciindi, alimwi kanji-kanji kumbele inga nkubotu kwiinda mbotuyeeya.”

Mbuti mbotukonzya kutantamuka kulibilika kapati? Cakusaanguna, atusyome muli Leza. Ikuti naa Leza ulabasanina bayuni akusamika maluba-luba, sena inga takonzyi kupa bantu ziyandika mubuumi balo ibabikka bukombi bwakwe mubusena bwakusaanguna? (Matayo 6:25, 26, 28-30) Cabili, atulanganye buyo zyabuzuba oobo. Jesu wakaamba kuti: “Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo.” Sena inga tamuzumini kuti “buzuba bumwi abumwi bulijisi mapenzi aambubo aakkwene”?—Matayo 6:34.

Ikuti naa twaatobela malailile aa Jesu, tulakonzya kulikwabilila kumalwazi. Kuyungizya waawo, tuyooliiba mumizeezo—Bbaibbele ncolyaamba kuti “luumuno lwa Leza.”—Bafilipi 4:6, 7.