Matayo 6:34—“Mutanoolibiliki Zyabuzuba Butobela”

“Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo. Buzuba bumwi abumwi bulijisi mapenzi aambubo aakkwene.”—Matayo 6:34, Bbaibbele lya Busanduluzi Bwanyika Mpya.

“Mutalibilikili zyajunza, nkaambo bwajunza bulalibilikila bwini. Buzuba bwasunu bulizulide mapenzi aabo bwalo.”—Matayo 6:34, The Bible in Tonga Lyamu 1963.

Bupanduluzi bwa Matayo 6:34

Jesu, iwakaamba majwi aayo, wakabasyomezya baswiilizi bakwe kuti tiibakeelede kuciindizya kulibilika kujatikizya mapenzi aali kumbele. Muciindi caboobo, bakali kuyandika kulanganya penzi lyabuzuba abumwi aciindi comwe.

Jesu tanaakaamba kuti tatweelede kuyeeya kujatikizya zintu zyabuzuba butobela naa kulibambila zyakumbele. (Tusimpi 21:5) Muciindi caboobo, wakali kutugwasya kutaciindizya kulibilika, kujatikizya zintu zilangilwa kucitika buzuba butobela. Kulibilika kuli boobo kulakonzya kutumanina lukkomano alimwi akunyonganya mulimo ngotweelede kucita. Tatukonzyi kwaamana mapenzi aatanacitika. Alimwi buya, zintu nzyotulibilika inga tazicitiki akucitika naa tazicitiki kweelana ambotwali kuyeeyela.

Makani aayengelede lugwalo lwa Matayo 6:34

Majwi aaya aa Jesu ncibeela ca Mulumbe uudumide Waacilundu, aajanika ku Matayo zyaandaano 5-7. Mumulumbe wakwe, Jesu wakapandulula kuti kuciindizya kulibilika takukonzyi kupa kuti buumi bube kabotu naa kubuyungizya. (Matayo 6:27) Kuyungizya waawo wakaamba kuti, ikuti twabikka Leza mubusena bwakusaanguna mubuumi bwesu, tatukaciindizyi kulibilika kujatikizya buzuba butobela. Ikuti naa Leza ulazibikkila maano zisyango alimwi abanyama, uyakwiinda kubabikkila maano aabo bamubelekela.—Matayo 6:25, 26, 28-33.