Mbomukonzya Kulwana Kulibilika
Ikuti kamulibilika kapati, buumi bwanu bulakonzya kunyongana. Alimwi buya cilakonzya kupa kuti munjile mupenzi mpati kwiinda penzi eelyo iimupa kulibilika.
Mizeezo iikonzya kugwasya kucesya kulibilika
Amucesye kweebelela, kuswiilila, naa kubala nyuuzi iityompya. Tamweelede kuzyiba zyoonse zijatikizyidwe kujatikizya cacitika. Ikuti kamuciindizya kweebelela, kuswiilila naa kubala nyuuzi iityompya, ciyoomupa kuyoowa kapati alimwi akubula bulangizi.
Njiisyo yamu Bbaibbele: “Kupengana mumizeezo kupa kuti muntu amaninwe nguzu.”—Tusimpi 17:22.
“Ncuuba-uba kuba acizibilizi cakubona zintu zipya alimwi azintu zityompya aintaneti, pele kalengwa aaka takali kabotu. Ndilaakuleka kulibilika kapati ndacesya-cesya kuswiilila nyuuzi.”—Ba John.
Ncomweelede kuyeeya: Ino nziindi zinji buti nomuyanda kuzyiba nyuuzi mpya?
Amukakatile kumulongo. Amusole kubuka, kulya, kubeleka milimo yaaŋanda, alimwi akoona aciindi ncomwakabikka abuzuba. Ikuti kamujisi mulongo wakucita zintu, buumi bwanu bunooli kabotu alimwi tamunoolibiliki kapati.
Njiisyo yamu Bbaibbele: “Makanze aabankutwe masimpe apa kuzwidilila.”—Tusimpi 21:5.
“Ciindi bulwazi bwa COVID-19 nobwakatalika, ndakacileka kuutobela mulongo wangu akutalika kusowa ciindi kucita zintu zitagwasyi. Ndakali kuyanda kubelesya ciindi cangu cabusongo, aboobo ndakapanga mulongo wazintu nzyondakeelede kucita abuzuba.”—Joseph.
Ncomweelede kuyeeya: Sena mulijisi mulongo uumupa kulimvwa kuti kuli cintu cikatalusya ncomwacita kumamanino aabuzuba?
Amubikkile maano kuzintu zibotu zyamubuumi bwanu. Ikuti mwazumanana kuyeeya zintu nzyomwakeelede kucita munzila iindene kaindi naa zintu zibi zikonzya kucitika kumbele, eeci cilakonzya kupa kuti mwiindile buya kulibilika. Muciindi caboobo, amuyeeye zintu zyobilo naa zyotatwe zikonzya kumuletela lukkomano.
Njiisyo yamu Bbaibbele: “Amutondezye kuti mulalumba.”—Bakolose 3:15.
“Kubala Bbaibbele kulandigwasya kweeleba kumvwa nyuuzi itayi komoonga alimwi kulandigwasya kubikkila maano kuzintu ziyaka. Eeci cilagwasya kapati!”—Lisa.
Ncomweelede kuyeeya: Sena inga mulazumanana kuyeeya zintu zibi zimucitikila mubuumi bwanu mpoonya akuluba zintu zibotu?
Amuyeeye kujatikizya bamwi. Ikuti kanji-kanji mulalibilika, inga mwayanda kuba nyolikke. Muciindi cakucita boobo, amuyeeye mbomukonzya kugwasya baabo ibayandika lugwasyo.
Njiisyo yamu Bbaibbele: “Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.”—Bafilipi 2:4.
“Kucitila bamwi zintu kundipa kukkomana. Inga ndibacitila zintu zikonzya kubapa kulimvwa kabotu, mpoonya aciindi ncomunya, ndicesya kulibilika. Alimwi buya, ndijisi bubi kugwasya bamwi cakuti tandicijisi aciindi cakulibilika.”—Maria.
Ncomweelede kuyeeya: Akati kabantu mbomuzyi, ino mbaani ibanga bayandika lugwasyo lwaalubazu, alimwi ncinzi ncomukonzya kucita kutegwa mubagwasye?
Kamucita zintu zikonzya kumupa kupona kabotu. Amube aciindi cakunyanyaansya mubili alimwi acakulyookezya. Amulye zyakulya zijisi busani. Kuulanganya kabotu mubili wanu kulakonzya kupa kuti kamuzilanga kabotu zintu alimwi akumugwasya kweeleba kulibilika.
Njiisyo yamu Bbaibbele: ‘Zisobano ziyumya mubili zilagwasya.’—1 Timoteyo 4:8, bupanduluzi buyungizyidwe.
“Mebo amwanaangu musankwa inga tatulikwayi kunyanyaansya mubili anze, aboobo twakatalika kucitila muŋanda. Eeci citupa kulimvwa kabotu alimwi akukkazikilana moyo.”—Ba Catherine.
Ncomweelede kuyeeya: Sena muyandika kulanga-langa zyakulya nzyomulya alimwi akunyanyaansya mubili kutegwa mube abuumi bubotu?
Kunze aakutobela mizeezo iikonzya kugwasya kucesya kulibilika, bantu banji bagwasyigwa kapati kwiinda mukwiiya zisyomezyo zyamu Bbaibbele zyabuumi bubotu bwakumbele. Amubone cibalo cakuti “Ino Bwami bwa Leza Buyoocita Nzi?”