“Zintu Eezyi Kozibikka Mumaanza Aabantu Basyomeka”

1, 2. Ino bantu banji baubona buti mulimo wabo?

KANJI-KANJI bantu balalipandulula kweelana amulimo ngobabeleka. Bantu banji babona kuti, mulimo naa cuuno muntu ncajisi ncocipandulula bulemu mbwayelede kupegwa. Muzilengwa zimwi, ikuti koyanda kuzyiba muntu umwi, umwi wamubuzyo uusaanguna kubuzyigwa ngwakuti, “Ino mubeleka mulimo nzi?”

² Zimwi ziindi Bbaibbele lipandulula bantu bamwi kweelana amulimo ngobakali kucita. Lilaamba kujatikizya “Matayo simutelo”; “Simoni, imusuki wazipaya”; alimwi a “Luka, imusilisi uuyandwa.” (Mt. 10:3; Mil. 10:6; Kol. 4:14) Mikuli naa milimo yakumuuya ayalo ilabapandulula bantu. Tulabala kujatikizya Mwami Davida, musinsimi Elija, alimwi amwaapostolo Paulo. Aaba bamaalumi bakali kwiikkomanina milimo yabo njobakapegwa a Leza. Ikuti katujisi milimo yakumuuya, andiswe tweelede kwiikkomanina.

3. Ino nkaambo nzi ncociyandika kuti bapati bayiisye bana-bana milimo? (Amubone cifwanikiso icili kumatalikilo aacibalo.)

³ Bunji bwesu tulaiyanda milimo yakumuuya njotucita alimwi tuyanda kuti tuzumanane kwiicita lyoonse. Nokuba boobo, cuusisya ncakuti, kuzwa kumazuba a Adamu, izyalani limwi lilainda alimwi kuboola limbi. (Muk. 1:4) Mazuba aano, kucinca ooku kwaleta buyumuyumu bukatazya kapati ku Banakristo bakasimpe. Mulimo wabantu ba Jehova wakomena kapati. Mbotuyaabucita milimo mipya, inga kulaba nzila zipya zyakucita zintu—kanji-kanji nzila eezyi zijatikizya kubelesya makkompyuta alo aasumpuka ciindi aciindi. Bapati bamwi inga cilabayumina kweendela antoomwe akucinca ooku. (Lk. 5:39) Nokuba kuti aaka inga tiikaba kaambo keni, bana-bana inga balijisi nguzu kwiinda bapati. (Tus. 20:29) Aboobo, ncaluyando alimwi cilagwasya kubapati kuyiisya bana-bana kuba amikuli mipati.—Amubale Intembauzyo 71:18.

4. Nkaambo nzi ncocili ciyumu kuli bambi ikupa bamwi mikuli? (Amubone kabbokesi kakuti “Twaambo Tupa Kuti Bantu Bamwi Kabatapi Bamwi Mikuli.”)

⁴ Aabo ibali mubweendelezi ambweni inga cabayumina ikupa bana-bana mikuli. Bamwi bayoowa kusweekelwa mukuli ngobayanda kapati. Bamwi balalibilika kuti ambweni inga zintu zyanyongana, kabayeeya kuti bana-bana tabakonzyi kuzyeendelezya kabotu zintu. Alimwi bamwi inga bayeeya kuti tabajisi ciindi cakuyiisya muntu umwi. Kulubazu lumbi, aabo ibacili bana-bana beelede kukazyika moyo ikuti naa tiibapegwa milimo minji.

5. Ino cibalo eeci cilalanga-langa mibuzyo nzi?

⁵ Atwaabandike makani aaya aajatikizya kupa bamwi mikuli mumbazu zyobilo. Cakusaanguna, mbuti bapati mbobakonzya kubagwasya bana-bana kutegwa beelele kupegwa mikuli minji, alimwi nkaambo nzi kucita boobo ncokuyandika kapati? (2Tim. 2:2) Cabili, nkaambo nzi ncociyandika kapati kuti bana-bana kabazibona munzila yeelede zintu ciindi nobagwasya bakwesu ibajisi luzyibo lunji alimwi akwiiya kulimbabo? Cakusaanguna, atubone Mwami Davida mbwaakamuyiisya mwanaakwe kuti acite mulimo uuyandika kapati.

DAVIDA WAKAMUYIISYA AKUMUGWASYA SOLOMONI

6. Ncinzi Mwami Davida ncaakali kuyanda kucita, pele ncinzi Jehova ncaakamwaambila?

⁶ Naakakkala kwamyaka minji kaile kwiingaila, Davida wakaba mwami alimwi wakali kukkala muŋanda mbotu. Wakatyompwa kapati kuti kwakanyina “ŋanda,” naa tempele yaabidwe kuli Jehova, aboobo wakali kuyanda kuyakila Leza ŋanda. Aboobo wakaambila Natani musinsimi kuti: “Bona, mebo ndikkede muŋanda iiyakidwe amasamu aakkedari kakuli bbokesi lyacizuminano lya Jehova likkede mutente.” Natani wakavwiila kuti: “Kocita kufwumbwa cili mumoyo wako, nkaambo Leza mwini-mwini uli anduwe.” Nokuba boobo, Jehova ncaakalailila cakaindana ancaakaamba Natani. Wakaambila Natani kuti aambile Davida kuti: “Toli nduwe uutiindiyakile ŋanda yakuti ndikkale mumo.” Nokuba kuti Jehova caluyando wakasyomezya Davida kuti wakali kuyoozumanana kumulongezya, Leza wakalailila kuti mwana wa Davida Solomoni ngonguwe uyooyaka tempele. Ino Davida wakalimvwa buti?—1Mak. 17:1-4, 11, 12; 29:1.

7. Ino Davida wakalimvwa buti kubusolozi mbwaakapa Jehova?

⁷ Davida wakazumanana kumugwasya, tanaakalibilika kuti tali nguwe wakali kuyoolumbaizyigwa akaambo kakuyakwa kwatempele. Mubwini, tempele yakayakwa, yakaitwa kuti tempele lya Solomoni, ikutali lya Davida. Nokuba kuti ambweni Davida wakatyompwa akaambo kakutazuzikizya eeco ncowakali kuyanda moyo wakwe, mulimo wakuyaka tempele wakaugwasyilizya cakumaninina. Caluyandisisyo wakapanga tubunga twabantu babeleka alimwi wakabunganya butale, mukuba, nsiliva, alimwi angolida kubikkilizya azisamu zyakkedari. Kuyungizya waawo, wakakulwaizya Solomoni kuti: “Lino mwanaangu, Jehova abe anduwe alimwi uzwidilile akuyaka ŋanda ya Jehova Leza wako mbubonya mbwaakaamba kujatikizya nduwe.”—1Mak. 22:11, 14-16.

8. Ino nkaambo nzi Davida ncaakayeeyela kuti Solomoni tanaakali kweelela, pele ino ncinzi ncaakacita?

⁸ Amubale 1 Makani 22:5. Kweelede kuti Davida wakayeeya kuti Solomoni tanaakali kukonzya kwaayendelezya mayake mapati aaya. Alimwi buya, tempele yakeelede kuba “ŋanda yeebeka kapati,” alimwi Solomoni aciindi eeco wakali ‘muniini alimwi tanaakajisi luzyibo.’ Nokuba boobo, Davida wakalizyi kuti Jehova wakali kuyoomugwasya Solomoni kutegwa aubeleke kabotu mulimo ngwaakapegwa. Aboobo Davida wakabikkila maano kuzintu nzyaakali kukonzya kugwasya, mbuli kubunganya zintu zinji alimwi azibelesyo izyakali kuyandika.

AMUKUKKOMANINE KUYIISYA BAMWI

9. Ino mbuti bapati mbobakonzya kujana lukkomano ciindi nobapa bambi mikuli? Amupe cikozyanyo.

⁹ Kubakwesu aabo ibeelede kupa bambi mikuli tabeelede kubijilwa ikuti naa kwayandika kuti bakwesu bambi ibacili bana bana bapegwe mikuli. Pele cigwasya mulimo kuti uunke ambele ciindi aabo ibacili bana-bana nobayiisyigwa kubeleka milimo imwi. Baalumi basalidwe beelede kukkomana kapati ciindi bana-bana aabo mbobakayiisya nobeelela kubeleka milimo. Mucikozyanyo, amuyeeye kujatikizya usyi uuyiisya mwanaakwe kweenzya mootokala. Mwana nacili muniini, ulabalangilila bausyi. Akomena-komena, bausyi balamupanduluda ncobacita. Mpoonya, mwana asika aciimo ceelela, ulatalika kweenzya mootokala ciindi bausyi nobazumanana kumulailila. Zimwi ziindi balakonzya kucincana kweenzya, pele mukuya kwaciindi abusena bwabausyi bayaabucembaala, mwana inga nguutalika kweenzya ziindi zinji naa lyoonse buya. Usyi musongo ulakkomana kuti mwanaakwe watalika nguwe kweenzya alimwi talimvwi kuti ngonguwe weelede kweendelezya. Mbubwenya buyo, bapati balakkomana ciindi nobayiisya baabo bacili bana-bana kuti babeleke milimo yakumuuya.

10. Ino Musa wakalimvwa buti kujatikizya bulemu alimwi anguzu nzyaakajisi?

¹⁰ Tobapati, tatweelede kuba amunyono pe. Amubone Musa ncaakacita ciindi bantu bamwi munkambi ya Israyeli nobakatalika kucita zintu mbuli kuti mbasinsimi. (Amubale Myeelwe 11:24-29.) Joshua, mugwasyi wa Musa, wakali kuyanda kubakasya. Cakutadooneka wakali kuyeeya kuti bakali kuyanda kunyanga Musa bulemu alimwi anguzu nzyaakajisi. Pele musa wakaamba kuti: “Sena ulibilikila ndime? Mebo ndilombozya kuti bantu ba Jehova boonse nobali basinsimi, alimwi akuti Jehova naabapa muuya wakwe!” Musa wakabona janza lya Jehova mumakani aaya. Naakakaka kuti apegwe bulemu, Musa wakatondezya kuti wakali kuyanda kuti zipego zyakumuuya nzyaakajisi zipegwe akubabelesi bambi ba Jehova. Mubwenya mbuli Musa, sena tulakkomana ikuti bamwi bapegwa mikuli yaleelede kupegwa ndiswe?

11. Ncinzi ncaakaamba mukwesu umwi kujatikizya kupa bambi mulimo wakwe?

¹¹ Mazuba aano, kuli zikozyanyo zinji zyabakwesu babeleka canguzu kwamyaka minji alimwi ibayiisya bamwi kutegwa beelele kupegwa mikuli iiyungizyidwe. Mucikozyanyo, mukwesu wazina lya Peter wakabeleka kwamyaka iinda ku 74 mumulimo waciindi coonse, myaka iili 35 wakabelekela kuofesi yamutabi ku Europe. Kusikila lino-lino aawa, wali kubeleka kali mulangizi ku Dipatimenti ya Mulimo. Lino, Paul mwaalumi uucili mwana-mwana walo iwali kubeleka aba Peter kwamyaka minji, nguujisi mukuli ooyo. Ciindi ba Peter nobakabuzyigwa kujatikizya mbobakalimvwa akaambo kakucinca kwamulimo, bakaingula kuti, “Ndilikkomene kapati kuti kuli bakwesu ibakayiisyigwa kubeleka milimo mipati alimwi ibacita kabotu mukulanganya milimo eeyo.”

ATUBABIKKILE MAANO BAPATI IBALI AKATI KESU

12. Ino nciiyo nzi ncotweelede kwiiya kucibalo camu Bbaibbele ca Rehoboamu?

¹² Solomoni naakafwa, mwaanaakwe Rehoboamu wakaba mwami. Ciindi naakali kuyanda lugwasyo lwambwakonzya kuubeleka mulimo wakwe, wakasaanguna kubuzya bapati. Pele wakalukaka lulayo ndobakamupa! Muciindi caboobo, wakatobela mizeezo yabaalumi bacili bana-bana mbaakakomena limwi aabo lino ibakali basikumugwasyilizya. Zintu zyakacitika zyakali zibi. (2Mak. 10:6-11, 19) Ino twiiya ciiyo nzi? Ncamaano kulomba lulayo akulutobela cakubikkila maano oolo luzwa kubapati aabo ibajisi luzyibo. Nokuba kuti bana-bana tabeelede kulimvwa kuti lyoonse beelede kukakatila kunzila zintu mbozyakali kucitwa kaindi, tabeelede kufwambaana kukaka lulayo lwabapati.

13. Mbuti bana-bana mbobakonzya kubelekela antoomwe abapati?

¹³ Bana-bana bamwi lino balakonzya kabeendelezya milimo iibikkilizya bakwesu ibapati. Nokuba kuti bana-bana aabo bajisi mikuli lino, cilakonzya kubagwasya kulomba busongo alimwi aluzyibo kuzwa kubapati kabatanasala cakucita. Ba Paul, ibaambwa munsi oomu, aabo ibakanjila mubusena bwaba Peter akuba mulangizi wadipatimenti yamu Beteli bakati, “Ndakajana ciindi cakulomba lulayo kuzwa kuli ba Peter, alimwi ndakabakulwaizya bamwi mudipatimenti kuti abalo bacite mbubwenya.”

14. Ncinzi ncotwiiya kuzwa kukubelekela antoomwe kwa Paulo alimwi a Timoteyo?

¹⁴ Timoteyo, mwaalumi iwakacili mwana-mwana, wakabeleka amwaapostolo Paulo kwamyaka minji. (Amubale Bafilipi 2:20-22.) Paulo wakalembela bana Korinto kuti: “Ndimutumina Timoteyo, nkaambo mwanaangu uuyandwa alimwi uusyomeka mu Mwami. Uyoomwiibalusya nzila zyangu kujatikizya Kristo Jesu, mbubonya mbondili mukuyiisya mumasena oonse mumbungano imwi aimwi.” (1Kor. 4:17) Majwi aaya atondezya kumvwana kwakaliko kapati akati ka Paulo a Timoteyo. Paulo wakali kujana ciindi cakuyiisya Timoteyo ‘nzila zyakwe kujatikizya Kristo.’ Timoteyo wakayiisyigwa kabotu alimwi eeci cakapa kuti Paulo amukkomanine, alimwi Paulo wakalisinizyide kuti Timoteyo wakali kukonzya kuzilanganya kabotu zintu zyakumuuya nzyobakali kuyandika bantu baku Korinto. Eelo kaka eeci ncikozyanyo cibotu mazuba aano kubaalu ciindi nobayiisya baalumi bamwi kuti beendelezye mumbungano!

TOONSE TULIJISI MULIMO WAKUCITA

15. Mbuti lulayo lwa Paulo ku Banakristo baku Roma mbolweelede kutugwasya ciindi notwajatikizyigwa akucinca?

¹⁵ Tupona muziindi zikkomanisya kapati. Cibeela caanyika cambunga ya Jehova ciyaabukomena munzila zinji, pele ziyandika akaambo kakukomena ooku zilacinca-cinca. Mbotuyaabujatikizyigwa akucinca ooku, tweelede buyo kulicesya, alimwi akubikkila maano kuzintu zya Jehova ikutali zyesu. Ikucita boobo kuleta lukamantano. Ku Banakristo baku Roma, Paulo wakalemba: “Ndaambila nyoonse ooko kuti mutayeeyi kuti mulayandika kapati kwiinda bwini mbomubede, pele kamuyeeya kabotu kweelana alusyomo umwi aumwi wanu ndwaakamupa Leza. Nkaambo mbubonya mumubili omwe mbotujisi zizo zinji, pele zizo zyoonse eezyi tazibeleki mulimo omwe, mbubonya buyo aswebo, nokuba kuti tuli banji, tuli mubili omwe muli Kristo, pele toonse tuli zizonyina kuli umwi aumwi.”—Rom. 12:3-5.

16. Ino ncinzi bapati alimwi abana-bana, kubikkilizya abamakaintu babo, ncobakonzya kucita kutegwa bagwasye kubamba luumuno alimwi alukamantano lwambunga ya Jehova?

¹⁶ Aboobo kufwumbwa mubukkale motubede, toonse atubeleke kutegwa tutole ambele ziyandika mu Bwami bwa Jehova ibubotu kapati. Nywebo nobapati, amubayiisye bana-bana kucita milimo njomucita. Nywebo nobakwesu nomucili bana-bana, amuzumine kupegwa mikuli, amulibombye, alimwi akuba abulemu kubapati. Andinywe nobamakaintu, amwiiye Purisila imukaintu wa Akula, iwakasangana Akula alimwi akumugwasilizya cakusyomeka ciindi bukkale nobwakali kuyaabucinca.—Mil. 18:2.

17. Ino ndusyomo luli buti Jesu ndwaakajisi muli basikwiiya bakwe, alimwi ino wakabayiisya mulimo nzi?

¹⁷ Kujatikizya kuyiisya bamwi kuti beelele kupegwa mikuli iiyungizyidwe, Jesu ncecikozyanyo cibotu kwiinda mumakani aaya. Wakalizyi kuti mulimo wakwe waanyika uyoomana akuti bamwi bayoozumanana kuubeleka mulimo wakwe. Nokuba kuti basikwiiya bakwe tiibakalondokede, wakalijisi lusyomo mulimbabo alimwi wakabaambila kuti bakali kuyoocita milimo mipati kwiinda njaakacita. (Joh. 14:12) Wakabayiisya cakulomya, alimwi bakamwaya makani mabotu munyika yoonse iyakali kukkalwa bantu aciindi eeco.—Kol. 1:23.

18. Ino mbulangizi nzi mbotujisi bwakumbele, alimwi ino ncinzi ncotweelede kucita lino?

¹⁸ Naakafwa kali cipaizyo, Jesu wakabusyigwa kuunka kujulu kwalo nkwaakapegwa mulimo mupati wakucita alimwi abweendelezi ‘busumpukide kapati kwiinda mfwulumende zyoonse, bweendelezi buli boonse, basinguzu boonse, bulelo buli boonse akulemekwa.’ (Ef. 1:19-21) Ikuti twafwa katusyomeka kaitanasika Amagedoni tuyoobusyigwa munyika mpya yabululami, mwalo muyooba milimo minji yakucita iikkomanisya. Nokuba boobo, lino kuli mulimo uuyandika kapati walo ooyo toonse motukonzya kutola lubazu—mulimo wakukambauka makani mabotu alimwi akugwasya bantu kuba basikwiiya. Toonse buyo, naa tuli bapati naa tuli bana, tweelede kuzumanana ‘kuba azintu zinji zyakucita mumulimo wa Mwami’—1Kor. 15:58.