Ciindi Ngomukwetene Limwi Naatasyomeka Mucikwati
KUTASYOMEKA mucikwati kulatyompya citaambiki. Masimpe kuti, banabukwetene bamwi balacikonzya kumulekelela muntu ngobakwetene limwi iweempwa alimwi akubeleka canguzu kubukulusya luyando lwabo.a Pele kufwumbwa naa banabukwetene basala kuzumanana kukkala antoomwe naa pe, aabo ibazyiba kuti muntu ngobakwetene limwi tanaali kusyomeka mucikwati cabo, cilabacisa kapati. Ino inga baliyumya buti bantu ibali mubukkale oobu?
MAGWALO AAMU BBAIBBELE AAKONZYA KUGWASYA
Nokuba kuti balakopana mumizeezo, bantu banji ibajisi mweenzinyina wamulukwatano iwatakasyomeka balajana luumbulizyo kwiinda mu Magwalo. Bakaiya kuti Leza ulaibona mizosi yabo alimwi ulabeetelela.—Malaki 2:13-16.
“Mizeezo minji iilibilisya neyakandikatazya, yebo wakanduumbulizya akunditontozya.”—Intembauzyo 94:19.
Ba Bill bakaamba kuti: “Ciindi nondakali kubala lugwalo oolu, ndakali kweezyeezya Jehova kanditontozya caluyando kukucisa nkondakamvwide, mbubwenya usyi silubomba mbwakonzya kucita.”
“Kumuntu uusyomeka, yebo ulasyomeka.”—Intembauzyo 18:25.
Ba Carmen ibajisi balumi ibatakali kusyomeka kwamyezi iili mbwiibede, bakaamba kuti: “Balumi bangu tiibakali kusyomeka. Pele ndakali masimpe kuti Jehova walo ulasyomeka. Kunyina nakonzya kundityompya.”
“Mutalibiliki acintu nociba comwe, pele muzintu zyoonse, kwiinda mumupailo akukombelezya . . . amumuzyibye Leza nzyomulomba; eelyo luumuno lwa Leza oolo lwiinda maano oonse luyookwabilila myoyo yanu.”—Bafilipi 4:6, 7.
Ba Sasha bakaamba kuti: “Ndakali kulubala lugwalo oolu cakwiinduluka-induluka. Aboobo nondakazumanana kupaila, Leza wakandipa luumuno mubuumi bwangu.”
Bantu boonse ibaambwa atala aawa, zimwi ziindi bakali kulimvwa mbuli kuti tabakonzyi kuzumanana kuliyumya. Pele bakasyoma Jehova Leza alimwi akubala Bbaibbele kutegwa bacikonzye kuliyumya. Ba Bill bakaamba boobu: “Lusyomo lwangu lwakandigwasya kubona kuti buumi bulaampindu nokuba kuti zintu zyoonse zyakali kulibonya kuti zyanyongana. Nokuba kuti kwaciindi cili mbocibede ndakali ‘kweenda mukkuti lisiya mbi,’ Leza wakali aandime.”—Intembauzyo 23:4.
a Kujatikizya makani aakumulekelela naa kutamulekelela muntu ngomukwetene limwi, amubone zibalo izili mu Sinsimuka! yamu Chingisi ya April 22, 1999 iijisi mutwe wakuti, “When a Mate Is Unfaithful.”