Ikaambo NCOCIGWASYA Kuzumanana Kupona

Nokwakainda buyo mwaka omwe kuzwa ciindi bakaintu babo nobakafwa, ba Faizal bakali kuyandika kwaandulwa moyo. Bakaamba kuti: “Ciindi nondakabala bbuku lya Jobu, ndakazyiba kuti kuli kaambo Jehova ncaakalibikkilizya bbuku eeli mu Bbaibbele. Ciindi notutyompedwe kapati kumane twabala mu Bbaibbele kujatikizya muntu iwakacitikilwa zintu zikozyenye azyesu, tulaumbulizyigwa kapati.” Bakayungizya kwaamba kuti: “Kuli kaambo ncotweelede kuzumanana kupona.”

Ba Tarsha bakafwidwa banyina ciindi nobakacili baniini. Bakaamba kuti: “Akaambo kakuti ndilimuzyi Mulengi wangu, ndipona buumi bulaampindu, ndilijisi bulangizi alimwi ndilikkomene nokuba kuti mapenzi ngondijisi manji. Tulijisi lusyomo lwakuti Jehova ulakonzya kutuyumya-yumya alimwi akutugwasya kulwana mapenzi aatusikila buzuba abuzuba.”

ZIBALO ZYAINDA zyatondezya zintu ziyoosya kapati mbozikonzya kupa kuti buumi bulibonye kuti bulakatazya kapati. Ciindi nomuliyumya kumapenzi ngomujisi, mulakonzya kutalika kudooneka naa cilagwasya kupona akuti naa kuli muntu uumubikkila maano. Amube alusyomo lwakuti Leza ulaabwene mapenzi aanu. Mulayandika kapati kulinguwe.

Mulembi wa Intembauzyo 86 wakatondezya lusyomo ndwaakajisi muli Leza naakati: “Mubuzuba bwamapenzi aangu ndilakwiita, nkaambo ulandivwiila.” (Intembauzyo 86:7) Aboobo mulakonzya kulibuzya kuti, ‘Ino Leza inga wandivwiila buti “mubuzuba bwamapenzi aangu”?’

Nokuba kuti Leza ambweni inga tanaagwisya mapenzi aanu mpoonya-mpoonya, Jwi lyakwe Bbaibbele lisyomezya kuti ulakonzya kumupa luumuno lwamumizeezo kutegwa mucikonzye kuliyumya. Lyaamba kuti: “Mutalibiliki acintu nociba comwe, pele muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba; eelyo luumuno lwa Leza oolo lwiinda maano oonse luyookwabilila myoyo yanu amizeezo yanu.” (Bafilipi 4:6, 7) Amubone magwalo aatobela aamu Bbaibbele mbwaasinizya kuti Leza ulatubikkila maano ncobeni.

Leza Ulamubikkila Maano Ncobeni

“Kunyina nokaba komwe [katiiti] katabikkilwi maano kuli Leza. . . . Nywebo mulayandika kwiinda tutiiti tunji.”—Luka 12:6, 7, bupanduluzi buyungizyidwe.

AMULANGE-LANGE KAAMBO AAKA: Tuyuni tusyoonto kapati mbuli tutiiti tulakonzya kulibonya mbuli kuti tatuyandiki kapati kubantu, pele Leza ulatubikkila maano. Leza ulakabona katiiti kamwi akamwi kaniini kapati; nkakaambo kaako umwi aumwi wesu ncilenge ciyandisi kuli Leza. Pele bantu balayandika kapati kuli Leza kwiinda mbotuyandika tutiiti. Mbwaanga bantu balayandika kapati kwiinda zilenge zyoonse Leza nzyaakalenga anyika, nkakaambo kaako bakalengwa “mucinkozya” cakwe alimwi balakonzya kutondezya bube bubotu kapati mbubwenya mbuli mbwajisi Leza.—Matalikilo 1:26, 27.

“O Jehova, wandilingula alimwi ulindizyi. . . . Ulaizyiba mizeezo yangu . . . Kondilingula, wiizyibe mizeezo iindilibilisya.”—Intembauzyo 139:1, 2, 23.

AMULANGE-LANGE KAAMBO AAKA: Leza ulimuzyi kabotu nywebo kumugama. Ulizyi mbomulimvwa mumoyo alimwi azintu zimupa kulibilika. Nokuba kuti bamwi inga tiibabumvwisya bukkale bwanu bukatazya, Leza walo ulamubikkila maano alimwi uyanda kumugwasya. Eeci cipa kuti kacigwasya kuzumanana kupona.

Buumi Bwanu Bulaampindu

“O Jehova, komvwa mupailo wangu; akusike kulinduwe kukwiila kwangu nondilomba lugwasyo. . . . Kocenjeka kutwi kwako kulindime; kofwambaana kundivwiila nendiita. . . . Uyooswiilila mupailo wabaabo bapengede kapati.”—Intembauzyo 102:1, 2, 17.

AMULANGE-LANGE KAAMBO AAKA: Cili mbuli kuti kuzwa ciindi bantu nobakatalika kupenga, Jehova uliibwene misozi yabantu balila akaambo kakupenga. (Intembauzyo 56:8) Eeci cilabikkilizya amisozi yanu. Leza ulaayeeyede mapenzi aanu oonse alimwi amisozi yanu nkaambo mulayandika kapati kulinguwe.

“Utalibiliki pe, nkaambo ndime Leza wako. Ndilakuyumya, inzya ndilakugwasya . . . mebo nde Jehova Leza wako . . . ndendime Yooyo uukwaambila kuti, ‘Utayoowi pe. Mebo ndilakugwasya.’”—Isaya 41:10, 13.

AMULANGE-LANGE KAAMBO AAKA: Leza ulilibambilide kumugwasya. Ikuti mwawa, uyoomubusya.

Kuli Bulangizi Bubotu Kumbele

“Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.”—Johane 3:16.

AMULANGE-LANGE KAAMBO AAKA: Leza ulamuyanda kapati cakuti wakaaba Mwanaakwe, Jesu kali cipaizyo akaambo kandinywe. Cipaizyo eeci cipa kuti mube abulangizi bwakuyoopona buumi bukkomanisya mane kukabe kutamani.a

Nokuba kuti ambweni muli mubukkale bukatazya kapati alimwi buumi bwanu ambweni inga kabulibonya mbuli kuti tabukonzyi kucinca, amwiiye Jwi lya Leza cakusitikila akuyumya lusyomo lwanu muzisyomezyo zya Leza. Eeci inga camugwasya kuba alukkomano alimwi akuba alusyomo lwakuti masimpe cilagwasya kuzumanana kupona.

a Kutegwa muzyibe zinji kujatikizya mbomukonzya kugwasyigwa acipaizyo ca Jesu, amweebelele kavidiyo kakuti Amuyeeye Lufwu lwa Jesu awebbusaiti ya www.jw.org. Amubone aalembedwe kuti KUJATIKIZYA NDISWE > CIIBALUSYO.