Sena Inga ‘Mwazubukila ku Makedoniya Kuyoobagwasya’?
1 Ibunji bwandiswe twakaamvwa majwi aakuti: “Zubukila ku-Makedoniya, utugwasye,” alimwi acakapa kuti majwi ayo aambwe tulicizi. (Inc. 16:6-10) Paulo a Barnaba bakali kubayanda bantu. Ikulisungula kwabo kwakalibonya mumicito yabo. Asunu muuya oyu wakulisungula tulaubona akati kabalanda ba Jehova. (Int. 110:3) Nywebo nobamwi mwalongela mumbungano zimwi kutegwa mugwasye kubeleka zilawo zitabelekwi-belekwi alimwi akuti kamukulwaizya. Tulizi kuti aabo bacita boobo balelekwa kapati mbubonya mbuli Paulo a Barnaba.
2 Tutanooyeeyi kuti kulonga kuyoobelekela kubusena kuyandika lugwasyo nkwabaalu abapainiya balo pe. Ikanjikanji iba Sosaiti balatambula magwalo kuzwa kubalangizi babbazu alimwi akumbungano aakulomba mikwasyi kuti ilongele nkuko kuyoogwasilizya, kubikkilizya akupa lugwasyo mukubeleka cilawo. Aboobo, boonse ibakonzya bakulwaizigwa kuyeeya kulongela kumasena aatabelekwi-belekwi kwamyezi yobile, July a August mwaka uno. Ncomuyoojana tamukacilubi pe, nkaambo muyoojana kuti bantu balayandisya kumvwa mulumbe muzilawo izitanabelekedwe caino-ino.
3 Ibabelesi Ibalisungwide Balayandika Lino: Nkweena kumatalikilo, imbungano ya Bunakristo yakakutauka kapati. Ibumboni buzwide bwakapegwa munzi wa Jerusalemu kuutanazundwa mu 70 C.E. Iciindi eco basikwiiya ba Jesu ‘bakapede ciindi cabo coonse kukukambauka.’ (Mili. 18:5, Ci) Ikuvwula kwakapa kuti kuyandike kuyiisya bakambausi bambi alimwi abeembezi akubanjizya mumulimo wakugwasya. Ibaalumi ibazi mbobeendelezegwa baleli bacisi alimwi abambi ibacibwene kweendelezya mulimo wakubwezelela akwaabanya lubono bakali kuyandika. (Inc. 6:1-6; Ef. 4:11) Nokuba kuti ibasyoonto bakabaa mpuwo, ibunji bwabo teebakazizilwe pe. Pele boonse ‘bakasolekesya’ kubelekela antoomwe camoyo woonse kucita kuti mulimo ucitwe.—Lk. 13:24.
4 Ino ncinzi cipa kuti kulisungula kwabantu ba Jehova kakulibedelede? Mmuuya wakupa. Ibwaabi bwabo tabujatikizyi buyo mali naa lubono lwakumubili—‘balalisungula. (Intembauzyo 110:3, BT) Eeci ncecaamba ikulyaaba kuli Jehova. Tulalumbulwa munzila iilibedelede. Tujana “lukkomano lunji” alimwi ‘tulatebula cakuvuzya’ nkaambo bantu bamwi balalumba milimo yesu, elyo balatulumbula. (Inc. 20:35, NW; 2 Kor. 9:6; Lk. 6:38) Sikutulumbula mupati ngu Taata wesu wakujulu, Jehova, walo ‘uuyanda muntu uupa calumwemwe.’ (2 Kor. 9:7) Uyootulumbula kapati azileleko nzyotunoojisi kukabe kutamani.—Malk. 3:10; Rom. 6:23.
5 Ikaambo ncotuyandila kulongela kubusena kuyandika lugwasyo keelede kakasalala. Iceelede kutupa kulonga nkuyanda kugwasya. Mukwesu amukaintu wakwe alimwi amwana musankwa ibabeleka kwamyaka minji mumbungano iziyandika lugwasyo, bakaamba kuti kanjikanji kuyandika kuliimya. Wakati, “Utasoli kwiicinca mbungano kutegwa ibe mbuli mboiyanda, kobeleka anjiyo, kosyoma muli Jehova kuti akugwasye mumulimo, zyaŋanda yakukkala alimwi azimwi ziyandika. Kotambula kufwumbwa zintu nzyakupa.” Aayo malailile taaliboteli! Mulangizi weendelezya Mbungano ya Maera wakalemba kuti: “Imbungano yesu yoonse yagwasigwa kwiinda mubapainiya bobile basungu ibakaboola kuzootugwasya. Iziiyo zya Bbaibbele Zyaaŋanda izisika ku 48 izyakacitwa mwezi uno zyakali zinji cini-cini kweezyanisyaa basikumwaya ibali 15 ibamumbungano eyi. Imyeelwe yabasikujanika kumiswaagano nsondo ansondo yakomena. Nokwakamanwaa kucita ciiyo ca Ngazi Yamulindizi, umwi wakaamba kuti naa kuli mbunga yabukombi iisanina kabotu bantu bayo munzila yakumuuya, nimbunga ya Bakamboni ba Jehova.”
6 Acimbi ncomweelede kuyeeya ncakuti mumasena manji muyandika lugwasyo milimo yakumubili taijaniki-janiki pe. Mweelede muyeeyesye kamutanalonga. Amukkale ansi. (Lk. 14:28) Mweelede kupaila kuli Jehova nyoonse antoomwe mumukwasyi, mumulombe kuti amusololele. Boonse banamukwasyi beelede kugwasilizya bubambe obo. Sena muliyandide kulisungula akucinca bukkale bwanu?
7 Ncinzi ncomweelede kucita naa mwasala kulongela kumbungano kuyandika lugwasyo? Ikusaanguna amubale caambwa mubbuku lya Mulimo Wesu amapeeji 134 alimwi a 135. Mpoonya amulembe lugwalo, mubikke zina lyamuntu ngomuli limwi, mwamana mulupe bakkomitii yamulimo kutegwa balembe kuti balasyoma kuti bantu aaba bayoocikonzya mumulimo. Balalusaina lugwalo akulutuma ku Sosaiti.
8 Ndugwasyo nzi Luyandika? Naakali kwaamba kuti kuyandika basimilimo Banakristo banji, Jesu wakati, “Kutebula kwavula, batebuzi bacea.” Mbotupona muciindi cakumamanino, sunu mane kuyandika basikugwasya kapati kwiinda muciindi ca Jesu. Aboobo, tulamvwa malailile aa Jesu, ‘tukumbila mwami uuli amuunda kuti atume batebuzi kukutebula kwakwe.’—Mt. 9:37, 38.
9 Nokuba kuti twasakana kapati mukutebula, tatunamana pe. Jehova Leza ucizumanana kutuleleka mumulimo wesu cakuti kuli kuvwula kapati mumuunda, pele tacili citete kuyiisya bapya. (Mt. 28:20) Ibunji bwambungano zyamuminzi mucisi cino tazili mukumanizya lyoonse kubeleka cilawo ncozipedwe nkaambo zilawo nzipati kapati. Kuyandika lugwasyo cakufwambaana ilwababelesi mumbungano ezi ibatibeleke cilawo ‘akuyandaula baabo beelede.’—Mt. 10:11.
10 Alimwi kuyandika kapati kuyumya mbungano munzila yakumuuya. Ibaalu, bakutausi, imikwasyi ya Bunakristo miyumu munzila yakumuuya alimwi abapainiya inga babelesegwa mumbungano zili mbozibede. Ikuti naa babelesi bali boobu babikkwa mumbungano, ibakwesu balayumizigwa, elyo kulaba kuvwula. Aboobo, iciindi nomwajulilwa mulyango mumulimo wa Jehova, sena muyoolisungula akwiingula mbuli Isaya kuti: “Mpendi, Unditume mebo”?—Is. 6:8.
11 Ikuti mbungano yanu kaibeleka cilawo cayo coonse kanjikanji alimwi naa kakuli baalu banji, ibakutausi naa bapainiya ibalanganya ziyandika zyambungano, sena inga bamwi tabakoolisungula kuyoogwasya kumasena aambi? Muntu amuntu alimwi amikwasyi bayandika kulilingula babone zipego nzyobajisi munzila yakumuuya. Sena inga takukookonzeka kulongela kuyoobelekela ku “Makedoniya” kwaciindi cili mbocibede naa ambweni kulongela limwi kuyoogwasya mbungano iili boobu nkobali basyoonto babelesi?
12 Acimbi ncomweelede kuyeeya nkuti mumbungano nsyoonto inga kamunoojisi zyakucita zinjaanji mumiswaangano, alimwi miswaangano inga kaitanoneezyi mbuli njomuzibide. Kunze lyakuyandisya kugwasya, mweelede kamubayanda kapati bakwesu. Ikuteelela ncocaamba kulyaaba kulayandika kapati. Sena muleelela? Ilugwasyo lulayandika! Sena mulilibambide?
13 Ino Lugwasyo Luyandika Inga Lwapegwa Buti? Akaambo kakuti ciindi cacaala canyika eyi yakaindi camana, ncibotu kaka ikugwasya bakwesu alimwi abambi bantu basinizizye ibacijisi nyota yakasimpe. Tulamupailila mukaambo aka kapati. Jehova atusololele toonse twanoobeleka cabusicamba kukambauka makani mabotu.—Inc. 4:29.
14 Amulange-lange mulongo uumanikidwe mubone masena momuyandika kugwasya. Tusyoma kuti ibunji bwabaabo ibalisungwide kulonga balaazi masena aaya. Aabo ibayanda malailile aambi kujatikizya nkwaabede masena aaya ngobasala inga balembela mbungano eezyo babuzye mbobanga beenda kusika kooko. Ikuti naa aabo bakwesu basala kulemba inga babelesya kkeyala eyi: (Izina lyambungano iiyandika lugwasyo), c/o Watch Tower Society, Box 33459, LUSAKA. Mpoonya iba Sosaiti balalutuma lugwalo kumbungano eyo. Ikujatikizya mabbuku aakumwaya, tumukulwaizya kumwaya broshuwa ya Ncayanda naa bbuku lya Luzibo mumulimo wamumuunda. Ikuti naa basiŋanda kabaajisi kale mabbuku aaya, amubape aambi ngobatajisi.
15 Tulasyoma kuti muyoobalwiida bakuofesi lyamutabi izintu zikkomanisya nzyomuyooswaangana azyalo mumulimo wanu wakukambauka makani mabotu muzilawo zitabelekwi-belekwi. Tupailila kuti Jehova akabuleleke bubambe obu kubikkilizya andinywe nyoonse.