Kwaambilizya Makani Mabotu Cakusungwaala
1 Toonse tulakondwa akulimvwa kabotu muzintu nzyetucita, ikapati mumulimo wakupa kuti bantu babe basiciiya. Ncinzi cituletela kukondwa kuli boobu? Citalikila kukusungwaala kumizeezo ciindi notubeleka mulimo mubotu wakugwasya bamwi. (Tus. 11:25) Inzila njetwaambilizya makani mabotu yeelede kutondezya kuti tulacisyoma ncobeni ncotuli mukwaamba. Kuti waamba amoyo woonse, kusinizya kwesu akusyoma kwesu tobeni kuyoolibonya. (Lk. 6:45) Kwiinda mukulibambila kwaambilizya kwesu, tunooli alusyomo ciindi notwaambaula abantu bamumuunda. Eeci cilagwasya kapati mumwezi oyu wa September ciindi notunoomwaya mabbuku aa Mulakonzya Kupona Kukabe Kutamani mu-Paradaiso Anyika alya Kupangitsa Moyo Wanu wa Banja Kukhala Wachimwemwe. Inzila zitobela izikulwaizigwa mulakonzya kuzibona kugwasya mukwaambilizya makani mabotu cabusungu.
2 Banji balalibilika apenzi lyamilandu iliyaabukomena. Mulakonzya kubelesya majwi aamatalikilo aali mucibeela cilaa mutwe wakuti “Ibubi/Lukwabililo” apeeji 3 yakabbuku lya “Mboitalikwa Akuzumananwa Mibandi ya Bbaibbele”:
◼ “Tubandika abantu makani aajatikizya mbwanga muntu wakwabililwa. Kuli zintu zibi izinji zicitika munyika alimwi zilatujatikizya. Sena mulayeeya kuti cilasika ciindi ibantu mbuli ndime andinywe notuyakukonzya kweenda masiku munzila kakunyina akuyoowa?” Mulakonzya kubala Intembauzyo 37:10, 11 akwaamba zilongezyo nzibuyooleta Bwami bwa Leza, kamubelesya mapeeji 156-8 mubbuku lya Kupona Kukabe Kutamani.
3 Ikuti naa mwakabandika zyabukkale bwamunyika ibuyaabubija ciindi citaanzi nomwakaswaya, mulakonzya kuyungizya lino akwaamba kuti:
◼ “Ndasyoma inga mwazumina kuti kuyandika kucinca kupati kutegwa tukabe notukkala muluumuno. Ibbaibbele litondezya kuti Saatani ngonguwe mwini-mwini uutuletela mapenzi. Banji baleezeezya kuti naa nkaambo nzi Leza ncamuzumizizye kuti azumanane kwaciindi cilamfwu boobu. Muyeeya buti?” [Amulindile kwiingula.] Amujule kupeeji 20, mincali ya 14 a 15, mubbuku lya Kupona Kukabe Kutamani, mupandulule Saatani ncatana jaigwa. Mpoona mukabale Ba-Roma 16:20, yalo iitondezya ncotunga twalangila kuboola ino-ino.
4 Ciindi nomumwaya bbuku lya “Moyo Wabanja,” mulakonzya kwaamba boobu mwaswaya lwakusaanguna:
◼ “Ndiyaabubandika makani aapenzi lijatikizya buumi bwamumukwasyi. Toonse tulayanda kuti mikwasyi yesu kiikkomana, pele tulizi kuti sunu mikwasyi minji tiikkomani pe. Mwayeeya nywebo ncinzi cinga cilagwasya bantu kujana lukkomano lunji mumikwasyi yabo? [Amulindile kwiingula.] Sena tamuzumini kuti inga cagwasya ikuswiilila ncaamba Sikwaanza mukwasyi? Ulapa malailile aayandika mu Bbaibbele. Eezi njiisyo zilabandikwa mubbuku lya Kupangitsa Moyo Wanu Wabanja Kukhala wa Cimwemwe. Amubone mbazu zyamakani aaya izibandikwa mumo. [Amutondezye aalembedwe zili mukati.] Eeli bbuku alimwi lilatondezya imamanino eeni-eni aamapenzi aabantu. Tusyoma kuti anywebo mulaapailila. Tee muluuzi Mupailo wa Mwami? [Amuzubulule zili ku Matayo 6:9,10] Leza uyanda kuti bwami bwakwe bukagwisye bubi anyika eyi alimwi eeco ciyoogwasya buumi bwamumikwasyi yabantu boonse balo lino ibabikka lusyomo lwabo mubwami bwa Leza.” Amusoleke kupa bbuku amweelwe uubikkidwe.
5 Ciindi nomupilukila kuyooswaya baabo mbumwakasiila bbuku lya “Moyo Wabanja,” inga mwayanda kwaamba kuti:
◼ “Ciindi cakamana twakabandika busongo bujanika mukutobela njiisyo zya Bbaibbele kutegwa tube amukwasyi uukkomana. Ino ncinzi nywebo ncomuyeeya kuti ngokkii wakukamantanya mikwasyi sunu?” [Amulindile kwiingula.] Amwaambe zili mumuncali wa 31 apeeji 80, akubala Ba-Kolose 3:9,10, 12-14. Kamuciyaambele-mbele ikutondezya mbuli luyando lwini-lwini mbolunga lwakamantanya mikwasyi. Amutondezye mbukunga kwagwasya kumana mapenzi ikulitobelezya kabotu-kabotu kuliiya bbuku lya Moyo Wabanja.
6 Ikuti mwayanda kubelesya nzila iibaanga ninguba-uba yalo, inga mwabelesya majwi aamatalikilo aakonzyenye ayaalya aali apeeji 12 mubbuku lya “Mboitalikwa Akuzumananwa Mibandi ya Bbaibbele”:
◼ “Tuyaabukulwaizya basimukoboma kuti kabayeeya bubotu buza kumbele bwalo Bbaibbele mbolitusyomezya. [Amubale Ciyubunuzyo 21:3, 4.] Sena aya makani alamubotela? [Amulindile kwiingula] Cibalo ca 19 mubbuku eli cilatondezya zilongezyo zimbi nzibayoojana bantu bamvwida Leza mu Bwami bwakwe.” Kuti balibonya kuyanda kuzumanana, amusoleke kubasiila bbuku lya Kupona Kukabe Kutamani.
7 Ikuti mwakabandikide zileleko iziyooletwa abulelo bwa Bwami, mwapilukila inga mwayanda kwaamba kuti:
◼ “Bulelo bwa Leza buyooletela nyika eyi abantu bayo izileleko zinji. Eezi zileleko zilakozyanisyigwa kabotu-kabotu amapeeji 12 alimwi a 13. Mwalanga nywebo ncinzi awa icinga camubotela? [Amulindile kwiingula.] Amuyeeye buyo mbocinga caba ikukkala munyika iili boobu.” Amubale muncali wa 12. Kuti walibonya kuyanda kuzumanana, amubuzye mubuzyo wamuncali wa 13, mpoona mubandike mbowiingulwa. Amwaambe kuti cibalo eci cilaingula mibuzyo minji imbi iijatikizya zilongezyo zya Bwami eelyo nywebo inga mwakkomana kuzoozibandika ciindi citobela mwaakuunka.
8 Mbutuli “basimilimonyina Leza,” tujisi kaambo buya kazulide ikakusungwaala ciindi notwaambilizya makani mabotu. (1 Kor. 3:9) Kuti twazumanana kusungwaala tuyoobaa zilongezyo zinji zya Jehova.