Amucibeleke Kabotu Cilawo Canu
1 Muminzi cimwi ciindi tujana tubaka twamakwebo, mbuli kantoolo mobauzya tuntu tuniini, kaanda mobajikila zyakulya zyakuulisya, naa cintoolo mobasambala zintu zinji ziindene-indene. Ikuti mumasena omu mukambaukwe mbweena mbuli muzilawo zimbi nzyomupedwe, mweelede kumuswaya mbuli mbomuswaya maanda.
2 Mulakonzya mwabelesya nzila yakutalisya makani nguba-uba alimwi majwi mwaamfwiinsye, mwaambe kuti: “Kuli ncondiyanda kumutondezya.” Ikuti sicintoolo uboneka kuti ujisi bubi kwaciindi eco, mulakonzya mwamusomba katrakiti akwaamba kuti: “Njakwiinda alimwi aciindi ncomutapakasizye. Njanda kuziba ncomuyeeya amakani aya.”
3 Tamweelede kuyoowa kubakambaukila pe. Umwi sikumwaya uluula kuti: “Ndakali kuyeeya kuti tabakonzyi kuteelela pe. Pele ndakagambwa kubona kuti mulumbe wa Bwami bakautambula kabotu. Bakali kunditambula kabotu cabulemu alimwi kanjikanji bakali kwaatambula mamagazini.”
4 Umwi mukaintu uubeleka mukkampani iisambala maanda wakabanjizya muopesi lyakwe Bakamboni. Wakatambula mamagazini akutondezya kuti ulayanda kwiiya Bbaibbele. Wakatondezegwa bbuku lya Luzibo, mpoona ciiyo cakatalikwa ndilyonya elyo muopesi lyakwe!
5 Mulimo ngomupedwe wakucibeleka kabotu cilawo canu ulabikkilizya akuswaya basimakwebo bamucilawo eco. (Inc. 10:42) Amukanze kuswaya milyango eyo mbweena mbuli mbomuswaya maanda aabantu. Eci tacikoomugwasya buyo kucibeleka kabotu cilawo canu, mulakonzya mwalumbulwa azintu zikkomanisya!