“Mwati Kuli Nobayooyandana Buya Bantu Boonse?”
1 Imulumbe mubotu uukulwaizya alimwi uutontozya moyo uyakwaambilizigwa nyika yoonse mbwiizulwa mumilaka iili 169. Ino mmulumbe nzi oyu? Alimwi uyooambilizigwa buti?
2 Oyu mulumbe ngwakuyanda muntunyoko. Ujanwa mu Makani aa Bwami No. 35, aali amutwe wakuti: “Mwati Kuli Nobayooyandana Buya Bantu Boonse?” Aaya Makani aa Bwami alapandulula mubufwaafwi ciimo cabukkale sunu munyika yoonse mboizulwa, alatondezya kuti icileta mapenzi amacise nciimo cakubula luyando akati kabantu. Alapandulula kaambo bantu ncobatayandani mazubaano alimwi eci ncociyakuleta kumbele aamazuba.
3 Kunze lyaboobo, Makani aa Bwami No. 35 alatondezya kuti kuyandana kwini-kwini akati katuulunzuma tuli mbotubede twabantu nkokuli munyika mazubaano. Azibya bantu aabo ibatola lubazu mukubusya Bunakristo bwini-bwini—ibukozyanya abukombi bwamumwaanda wakusaanguna, ibwakazwide luyando lwamuntunyina mbuli bwakalailila Jesu Kristo.—Lk. 10:25-37.
4 Makani aa Bwami No. 35 alamanizya abupanduluzi bwambuli nyika yoonse mboizulwa mboiyootondezya kuyandana akati kabantu ino-ino mubweendelezi bwa Bwami bwa Leza kwiinda muli Kristo. Aabo babala makani aaya bakulwaizigwa kujana broshuwa yakuti Ncinzi Leza Ncayanda Kulindiswe? kutegwa baiye mbobanga batola lubazu mububambe obu bwaluyando bwanyika yoonse mboizulwa ibupandululwa kabotu mu Jwi lya Leza.
5 Nguni Uyookambauka Makani Aaya? Bakamboni ba Jehova nyika yoonse mboizulwa banookambauka makani aaya aakuyandana kwabantu, kubeenzinyina, kuli basimukobonyina alimwi akubasazinyina mumyezi ya October a November. Boonse ibali muciimo cizumizya kucita boobo bakulwaizigwa kutola lubazu mukumwaya Makani aa Bwami No. 35 kubanamaleya.
6 Imbaakani yakwaambilizya makani aaya njakukulwaizya bantu kubaa ciiyo ca Bbaibbele mubroshuwa ya Ncayanda naa mubbuku lya Luzibo. Kunze lyaboobo, ikubeleka camoyo woonse mumulimo oyu kwaumwi aumwi wababelesi ba Jehova kulapa kuti kupegwe bukamboni kujatikizya Leza waluyando, Jehova alimwi a Mwanaakwe Jesu Kristo.