Ibbaibbele—Leza Ndyabelesya Kusololela Bantu Boonse
1 Ima Bbaibbele aatandila kutuulunzuma tuli zyuulu zyone asimbwa mumilaka amyaambo iinda ku 2,100, eci capa kuti Ijwi lya Leza libalwe amweelwe wabantu munyika uuinda ku 4,000,000,000. Nokuba boobo kuli nzala munyika “yakuswiilila majwi aa-Jehova.” (Am. 8:11) Ibunji bwabantu bajisi Bbaibbele tabalibali naa tabazi zilembedwe mukati. Ino tulabakulwaizya buti kubelesya Bbaibbele, kabalibona kuti ndelinga lyabasololela kabotu mubukkale?
2 Mu December tuyoomwaya bbuku litegwa The Bible—God’s Word or Man’s? Tuyookonzya alimwi kumwaya Bbaibbele ilyatugwasya kwamyaka iili 47 yainda litegwa—New World Translation. Eeci inga cacitwa kwiinda mukutondezya mbolimvwika kabotu Bbaibbele eli alimwi akuti libelesya mulaka wamazubaano. (Amubone bbuku lya “All Scripture” apeeji 328, amuncali 6.) Tulatondezya kuti tulilumbide kapati kucipego eci cakazwa kuli Jehova kwiinda mukusungwaala kugwasya bantu kuti basyome kuti Bbaibbele ndyabelesya Leza kusololela bantu boonse.
3 Mulakonzya mwatalisya makani kwiinda mukubelesya kapepa kakuti “Ikaambo Ncomukonzya Kusyoma Ibbaibbele.” Mulakonzya kwaamba kuti:
◼ “Nokuba kuti bantu bainda ku 4,000,000,000 munyika balijisi Bbaibbele, mbasyoonto balibala. Muyeeya kuti nkaambo nzi?” Amubale mincali yobile yamatalikilo yakapepa kamakani kubikkilizya a 2 Timoteo 3:16. Amulombe kusiya bbuku lya God’s Word amuulo walyoonse. Ikuti naa bbuku lyakakwa, amumulombe simunzi kubala kapepa koonse. Amubandike mutwe wamamanino wakuti, “Kwaambilalimwi Zyakumbele.”
4 Nomwapilukila kubantu mbomwakasiila kapepa kakuti “Ikaambo Ncomukonzya Kusyoma Ibbaibbele,” ambweni inga mwasola kwaamba kuti:
◼ Mwamanaa kulipandulula alimwi, amubale mincali yamamanino yakapepa kamakani. Amumubuzye simunzi naa ulasyoma kuti muntu ulakonzya kupona kukabe kutamani anyika. Aingula, amwaambe kuti: “Bakamboni ba Jehova tabadooneki kuti businsimi boonse ibuli mu Bbaibbele buyoozuzikizigwa kubikkilizya aboobo businsima kuti kumbele zintu ziyoobota kubantu boonse batobela milawo ya Leza.” Amutondezye cifwanikiso icili apeeji 13 mubroshuwa ya Ncayanda, amujokele kuciiyo 5, mulombe kubandika kwiingula kwamibuzyo iindandamikidwe, nkokuti mutalisye ciiyo.
5 Mucilawo bantu mobali bakombi, mulakonzya kusola nzila eyi yakutalisya makani:
◼ “Tukulwaizya bantu kulemeka kapati Ibbaibbele. Mikwasyi minji ilijisi Ibbaibbele, pele tabalibelesyi-belesyi kuyandaula lulayo ciindi nobabaa mapenzi mapati. Sena andinywe mulaabwene makani ayo? [Amulindile kwiingula.] Ambweni bayeeya kuti Ibbaibbele ndyakaindi. Eeli bbuku lyakuti, The Bible—God’s Word or Man’s?, lilasinizya munzila iitadoonekwi kuti Ibbaibbele ndyamasimpe caboola kukubandika makani aa sayaansi alimwi lilatondezya mapenzi aasunu aakatazya mbwaakonzya kumanizigwa.” Amubandike twaambo tusyoonto kuzwa mumutwe 8 naa 12 wabbuku, mwamana mulombe kulisiya.
6 Nomwapilukila nkomwakasiya bbuku lya “God’s Word,” mulakonzya mwaamba kuti:
◼ “Ciindi nondakamuswaide, twakabandika Ibbaibbele mboligwasya kumana mapenzi aakatazya sunu. Aabo balisyoma kuti ndi Jwi lya Leza bagwasigwa alimwi kuti kabakkomana mubuumi. Ndilomba kumutondezya njiisyo imwi iigwasya ya Bbaibbele iipandululwa mubbuku ndyondakamusiila.” Amubandike njiisyo imwi yamu Magwalo iili mumutwe 12, mincali 3-6, mpoonya mumanizye akubala muncali 7. Ikuti naa luyandisisyo lwatondezegwa, amulombe kutalisya ciiyo mubbuku lya Luzibo naa mubroshuwa ya Ncayanda.
7 Intalisyo yamakani eyi inga yabakonda bacembeede:
◼ “Kuli ciindi Ibbaibbele nolyakali kubalwa mumaanda manji alimwi mikwasyi noyakali kutobela njiisyo zyalyo. Sena mbocakabede amumukwasyi wanu? [Amulindile kwiingula.] Sunu, cilibonya kuti bantu banji balilipakasizye cakuti tabajisi ciindi cakubala Ibbaibbele naa ambweni bayeeya kuti njiisyo zyalyo zyabukkale nzyakaindi. Mumutwe 13 wabbuku eli, The Bible—God’s Word or Man’s?, kubandikwa icakacitika ncobeni kubantu botatwe ibakasanduka nobakayiya Ibbaibbele. Ikuti naa mulayanda kubala mbobakagwasigwa anguzu zya Jwi lya Leza, inga ndamusiila bbuku eli.”
8 Nomwapilukila, inga mwaamba kuti:
◼ “Mumubandi wesu ciindi cainda, twakazuminana kuti njiisyo zya Bbaibbele zyabukkale tazili mukutobelwa pe abantu sunu. Sena eco tweelede kucibikkila maanu? [Amulindile kwiingula.] Jesu Kristo wakaamba kuti kwiiya Bbaibbele ncintu ciyandika kapati.” Amubale Johane 17:3. Mpoonya amubandike muncali 5 wamutwe 1 mubbuku lya Luzibo. Amupandulule ciiyo ncotwiiya abantu ca Bbaibbele, amulombe kubatondezya mbocicitwa.
9 Amupaile kuli Jehova kuti aileleke milimo yanu yakukulwaizya lusyomo mu Bbaibbele—ndyabelesya Leza kusololela bantu boonse.