Tweelede Kuba Bamayi, Ikutali Buyo Bakambausi
1 Kulibonya kuti “Bakamboni ba Jehova bakasika kale abukambausi bwabo kufwumbwa nkowaunka munyika.” Ino eci cikonzeka buti? Teensi kunguzu zyabuntunsi pe, pele nkwiinda munguzu zyamuuya wa Leza uuyeendelezya babelesi bakwe ciindi nobabelesya nzila zisiyene-siyene kuzuzikizya ibutume bwabo bwakuyiisya alimwi akukambauka.—Zek. 4:6; Inc. 1:8.
2 Imabbuku alagwasya kapati mukuzuzikizya mulimo wesu wakukambauka. Mumyaka minji yainda, izyuulu-zyuulu zya tuulunzuma twamabbuku, itubbuku tusyoonto, imabroshuwa, imamagazini alimwi atumatulakiti zyakasimbwa akumwaigwa a Bakamboni ba Jehova ikutegwa zibagwasye kuzibya makani mabotu aa Bwami. Imalipooti mu 1997 Yearbook atondezya kuti imweelwe wamabbuku aakasimbwa wakali mupati cini-cini kwiinda mabbuku aambi aali woonse. Kuzikusika sunu, ima Bbaibbele aa New World Translation aainda ku 91,000,000 akasimbwa. Mumwaka omwe imweelwe wamamagazini aa Ngazi Yamulindizi alimwi a Awake! iwakasimbwa mu United States wakayungizigwa a 7.1 pasenti. Mucisi ca Germany, ikusimbwa kwamamagazini kwakayungizigwa a 35 pasenti. Imweelwe uutandila kucisela camamagazini aasimbwa kucisi eci ngwamumulaka waci Russia.
3 Nkaambo nzi mabbuku manji-manji aali boobu ncaayandika? Inyika yoonse mbwiizulwa, ibunji bwabantu balisungula kukukulwaizigwa kwakapegwa kwakuti tweelede kukambauka koonse-koonse kufwumbwa kujanika bantu. Akaambo kakuti ibunji bwesu twauyungizya mulimo wesu wabukambausi—mumasena aakubuleya, mumigwagwa alimwi amuzilawo zyamakwebo—imabbuku manji alimukusiigwa kubantu ibatondezya kuyanda. Ibunji bwabaaba inga taakwe anobakajene coolwe cakuswiilila mulumbe wa Bwami cimwi ciindi mazuba aainda. Ikutegwa bantu aba basikilwe, imbungano lyoonse inga zilibambide imisyobo-misyobo yamabbuku aakubelesya muzibeela zyoonse zyamulimo wamumuunda.
4 Tujisi Mbaakani nzi Notumwaya Mabbuku? Imbaakani yesu teensi yakusiya buyo mabbuku pe. Imulimo ngotutumidwe wakugwasya bamwi kuba basiciiya ujatikizya zibeela zyobile—ikukambauka alimwi akuyiisya. Lutaanzi, tujisi coolwe cakukambauka makani mabotu aa Bwami, ikuzibya bantu kuti obu mbobulangizi bulikke bwabanamaleya. (Mt. 10:7; 24:14) Imabbuku eesu aapandulula zyamu Bbaibbele azwidilila kwamyaka minji alimwi agwasya kapati mukubusya kuyanda kwabantu akubapa luzibo lujatikizya Bwami obo.
5 Icabili, ikutegwa tugwasye bantu kuba basiciiya, tweelede kuyiisya zintu zyoonse Jesu nzyaakalailila. (Mt. 11:1; 28:19, 20) Alimwi, imabbuku ajisi mulimo mupati mukucitya kasimpe kuti kabanjile mbotuyiisya, ikubagwasya kuti abalo babe basiciiya.
6 Ibunji bwabantu ibaatambula mabbuku inga baba buyo ‘basikumvwa bamakani,’ pele tacilangilwi kuti inga baba basikucita bamakani kuti kakunyina wakubagwasya. (Jak. 1:22-25) Mbasyoonto kapati ibanga baba basiciiya ikuti kwiina wakubasololela. (Inc. 8:30, 31) Bayandika mwiiyi uukonzya kubagwasya kulibonena lwabo beni kuti zili mu Magwalo nzyamasimpe. (Inc. 17:2, 3) Imbaakani yesu njakuyanda kubagwasya kuyaambele mane bakalyaabe akubbapatizigwa alimwi akubayiisya kuba bantu beelela kuyiisya bamwi.—2 Tim. 2:2.
7 Bamayi Banji Balayandika Kapati: Iciindi notukambauka, twaambilizya makani mabotu kubuleya. Pele, ikuyiisya kujatikizya kulailila muntu bucebuce kuya kumbele. Nokuba kuti kwiinda mukukambauka bamwi balaumvwa imulumbe wa Bwami, ikuyiisya kugwasya bantu kuti baatambule makani mabotu akutobela ncaamba. (Lk. 8:15) Imwiiyi tayiili buyo aakwaambilizya; ulapandulula, ulatusalazya twaambo kabotu-kabotu, ulapa zikozyanyo zyazintu zyakacitika alimwi ulazula napandulula twaambo.
8 Ibunji bwandiswe tweelede kuba bamayi, ikutali buyo bakambausi. (Heb. 5:12a) Ikumwaya mabbuku ncibeela cipati camulimo wesu, pele ikuzwidilila mumbaakani yesu yabili yamulimo wesu wamumuunda mucini-cini kuyeeme aazintu nzyotucita tobamayi. Nokuba kuti tulakkomana ciindi notukonzya kusiya mabbuku manji, ikutegwa tumanizye mulimo wesu wamumuunda kabotu, ikumwaya oku tatweelede kukubona kuba mbaakani yesu yamamanino. (2 Tim. 4:5) Ikusiya mabbuku ninzila mbotu kapati yakujula milyango yakuyiisya bamwi kasimpe.
9 Amucite Nyendo Zyakupilukila Kutegwa Mutalisye Ziiyo zya Bbaibbele: Toonse kutegwa twakasiya mabbuku, mabroshuwa alimwi amamagazini aali mbwaabede, aakonzya kutupa nyendo zyakupilukila. Tweelede kubaa bubambe bwakuti ciindi coonse katupilukila kuya kubusya luyando lwabo. Imakanze eesu mapati ciindi notupilukila taali aakuyanda kusiya buyo mabbuku aambi pe, pele nkuya kukulwaizya bantu kuti kababala akugwasigwa amabbuku ngobajisi kale. Ino swebo notwakayiila ali munzila yakumuuya kuti nokwataali muntu wakali kutuyiisya, wakali kupilukila lyoonse kuzyikutugwasya kujana luzibo lwini-lwini?—Joh. 17:3.
10 Amupilukile koonse nkomwakajana luyando kamujisi makanze aakutalisya ciiyo ca Bbaibbele mubroshuwa lya Ncinzi Leza Ncayanda Kulindiswe? naa mubbuku lya Luzibo Lutola Kubuumi Butamani. Aaya mabbuku obile apandulula mulumbe wa Bwami munzila iimvwika kabotu-kabotu. Ibroshuwa ya Ncayanda ijisi ciiyo cizwide, icijatikizya ziiyo zyoonse zyantalisyo zyamu Bbaibbele. Ibbuku lya Luzibo ligwasya sikuyiisya kuti ayiisye kasimpe cakusindamizya, pele munzila nguba-uba, munzila imvwika kabotu alimwi mubufwaafwi.
11 Ipulogilamu yakuyiisya nguba-uba, mbweena mbuli mboyakapandululwa mupepa lyamukati lya Mulimo Wesu Wabwami wa June 1996, ipa kuti cuube-ube kuli sikuyiisya ikulailila kabotu-kabotu alimwi akuli sikwiiya ikumvwisya. Amulibambe ipepa elyo mpomunga mwalijana kufwumbwa ciindi ikutegwa kamwiindulula inzila zyakuyiisya izyagwasya kwaciindi cilamfwu. Imalailile amwi ngolipa ajatikizya mbokuyandika ikubaa luyando lwacigaminina mumuntu ngotuyiisya, ibulamfwu bwaciiyo ncotunga twaiya mukuswaangana kumwi akumwi, mbotunga twaingula mibuzyo iitajatikizyi ciiyo ncotuli mukwiiya, imwiiyi alimwi asikwiiya boonse bobile mbobeelede kulibambila ciiyo kabatana kuswaangana, alimwi ambotunga twagamika sikwiiya kumbunga ya Jehova. Kwiinda mukutobela malailile aya, ibunji bwandiswe, kubikkilizya abapya, tuyakukonzya ikucitya ziiyo ziyaambele.
12 Ikuluula Mbobazwidilila Bamwi Mumuunda: Ibroshuwa ya Ncayanda alimwi abbuku lya Luzibo zyaba zibelesyo izigwasya kapati mukufwambaanya mulimo wakugwasya bamwi kuba basiciiya. Mbwaakaitambuda buyo ibroshuwa ya Ncayanda, imukwesu umwi mucisi ca Bolivia ndilyonya wakaibelesya kutalisya ciiyo kumwaalumi umwi. Imyeezi yone yakatobela kumuswaangano wacooko, sikwiiya oyu wakali akati kabantu bakkomene ibakali mumulongo wabasikubbapatizigwa!
13 Ibanji bali mukukulwaizigwa kulyaaba kuli Jehova mbobamanizya buyo ciiyo cabo mubbuku lya Luzibo. Mumbungano imwi kucisi ca Angola, imweelwe waziiyo zya Bbaibbele zyakali kucitwa abasikumwaya wakavwula kuzwaa 190 kusika ku 260 alimwi imweelwe wabantu bakali kujanika aamiswaangano wakayungizigwa ziindi zyobile kuzwaa 180 kusikaa 360 mumyeezi buyo iili yone kuzwa ciindi ibbuku lya Luzibo nolyakatalika kubelesegwa mucilawo eco. Muciindi cisyoonto buyo, kwakayandika kuti kube mbungano imbi.
14 Naakazwaa kutalisya ciiyo cakwe citaanzi mubbuku lya Luzibo, mukwesu umwi wakaamba kuti kucitya ciiyo “ncuuba-uba ikuti naa sikucicitya ubuzya buyo mibuzyo, ulimukubala zibalo zyamagwalo zyeelede, alimwi akubona kwaamba kuti sikwiiya wamvwisya.” Nokuba kuti lyoonse wakali kuyeeya kuti mbaasikumwaya buyo ibacibwene kabotu bakonzya kucitya ziiyo zya Bbaibbele ziyaambele alimwi akuti walo kwiina nanga wacikonzya, wakabona kuti inga wacikonzya, wakati: “Ikuti naa mebo ndacikonzya, nkokuti kufwumbwa muntu umbi inga wacikonzya awalo.”
15 Icinga capa kuti tuzwidilile kuzuzikizya mbaakani yesu yakugwasya bantu kuba basiciiya, ikucitya ziiyo zya Bbaibbele ziyaambele tweelede kucibona kuti nimbazu yamulimo wesu wamumuunda. Aabo ibacikonzya kabotu kutola lubazu mucibeela eci camulimo wamumuunda bajana kuti cibakkazyika moyo alimwi akubalumbula kapati. Andiswe atukaambwe kuti ‘tulimukukambauka zyabwami bwa Leza akwiisya makani aa Mwami Jesu Kilisito. Tulaamba cakutayoowa alimwi katwaangulukide.’—Mili. 28:31, Ci.