Ikukambauka Kwiinda Mukulilemeka Kabotu
1 Mubukkale bwabantu sunu ibapona mbuli mbobayanda, ibakubusi banji cabuyamba banyonyoona maumi aabo amisamu iikola, ikutalilemeka, ikuzanga alimwi abulwani. Mukwiimpana, ikulilemeka kabotu kwabakubusi mumbungano ya Banakristo kukkazika moyo alimwi mmasimpe ncintu cimukkomanisya kapati Jehova. Eci caba bumboni bwini-bwini ibukonzya kukwelelezya bamwi kukasimpe.—1 Pet. 2:12.
2 Muziindi zinji kuluulwa kuti ikulilemeka kabotu kwabakubusi Banakristo kwabakkomanisya kapati basikulangilila. Kaamba zyamukubusi Kamboni umwi iwakali sicikolo ngwaakali kuyiisya, mwiiyi umwi wakaambila basicikolo boonse mukkilasi kuti Leza wamusimbi oyu, Jehova, ngu Leza wakasimpe. Siisi oyu wakaamba boobo nkaambo musimbi oyu lyoonse wakali kulilemeka kabotu. Aumwi mwiiyi wakalembela Sosaiti, ulaamba: “Ndiyanda kumulumbaizya akaambo kabakubusi babotu mbomujisi mucikombelo canu. . . . Bakubusi banu nzikozyanyo zini-zini zibotu. Balabalemeka ibapati, mbaasibulemu alimwi basama cakulilemeka. Alimwi balaazi magwalo aamuma Bbaibbele aabo cini-cini! Obu mbobweelede kuba bukombi!
3 Aumbi mwiiyi wakakkomanisigwa kapati akulilemeka kwa Kamboni uulaa myaka iili ciloba mukkilasi yakwe. Oyu siisi wakayandisisya ciimo camusankwa oyu calubomba alimwi cikkomanisya, icakamucitya kuti kaimpene kule-kule abasankwa bamwi. Icakamunjila siisi ncakuti musankwa oyu wakalisinizizye ncobeni mubukombi bwakwe, nokuba kuti wakaliimpene akaambo kalusyomo lwakwe, taakafwa nsoni pe. Mwiiyi wakabona kuti manjezeezya aakwe akayiisigwa alimwi akuti wakali kukonzya “kusala cibotu ecibi.” (Heb. 5:14) Kuciinda buyo kaindi, banyina aamusankwa oyu bakabaswaya baiyi, elyo ciiyo ca Bbaibbele cakatalisigwa. Mukuya kwamazuba, mwiiyi ulya wakabbapatizigwa mpoona kumbele wakaba painiya waciindi coonse!
4 Musankwa umwi wakakkomana akulilemeka kabotu kwa Kamboni umwi kucikolo nkwaakali kwiiya. Musimbi oyu wakaliimpene cini-cini—wakalaa bulemu, wakali sungweede muziiyo alimwi lyoonse wakali kusama cabulemu; alimwi mukwiimpana abasimbi bambi, kwiina walo naakali kuyanda zyakusobana-sobana abasankwa. Musankwa oyu wakabona kuti musimbi oyu wakali kutobela njiisyo zyamu Bbaibbele. Elyo musankwa oyu wakabuzya musimbi imibuzyo kujatikizya zyalusyomo lwakwe alimwi wakazikkomanina zintu nzyaakaiya. Ndilyona wakatalika kwiiya Bbaibbele, muciindi cisyoonto buyo wakabbapatizigwa, alimwi mukuya kwamazuba wakatola lubazu mumulimo wabupainiya alimwi amane wakaya aku Beteli.
5 Ikuti koli mukubusi Munakristo uulombozya kupa bumboni bubotu kuli bamwi, kolangisya kulilemeka kwako munzila zyoonse. Utalilekeli kujatikizigwa muziyanza zyanyika zyakupona mbuli mbobayanda. Upe cikozyanyo cibotu mukukanana kwako, munsamino alimwi amukulibamba, ikutali buyo notola lubazu mumulimo wamumuunda anoli kumiswaangano yambungano, pele alimwi anoli kucikolo anolikondelezya. (1 Tim. 4:12) Muyookkomana cini-cini muntu umwi aakuyanda kasimpe akaambo kakuti lyoonse mwakali ‘kucitya mumuni wanu kumunika’ kwiinda mukulilemeka kwanu kubotu.—Mt.5:16.