Bakubusi Bamunika Mbuli Mimuni
1. Mbuti Bbaibbele mbolitondezya kuti Banakristo bayooindana abamwi, alimwi mbuti majwi aaya mbwaamba bakubusi Banakristo bamazubaano?
1 Jesu wakaambila basikwiiya bakwe kuti: “Ndinywe mumuni wanyika.” (Mt. 5:14, 16) Mbubwenya mbuli munzi uuyakidwe atala aacilundu uuŋaima nokuli zuba, mbobakali kuyooindana abamwi. Mazubaano bakubusi banji Banakristo bali “mbuli mimuni yakumunika ansi” kwiinda mukulilemeka alimwi abukambausi bwabo bwabusungu.—Flp. 2:15; Malk. 3:18.
2. Muunzila nzi zimwi momukonzya kubakambaukila bamayi abasicikolonyoko?
2 Kucikolo: Mbuti mbomukonzya kupa bumboni kucikolo? Bakubusi bamwi babelesya ciindi nokuli mibandi mucikolo yatwaambo mbuli misamu iikola, kusanduka, alimwi ankondo. Umwi mucizyi wakabelesya mulaso ngwakaambilidwe kuti alembe uujatikizya milimo yazigwebenga kutegwa ape bumboni kujatikizya Bwami bwa Leza kuba bulangizi bwini-bwini kubantu. Mwiiyi wakakkomana kapati akaambo kakuluula ooku kwakalibambilwa kabotu, alimwi eeci cakapa coolwe cakupa bumboni abumwi.
3. Mbuti mbomukonzya kucita kuti mumuni wenu umunike nomuli kucikolo kwiinda mukulilemeka?
3 Nzila imwi yakumunika mbuli mumuni nkwiinda mukulilemeka, kusama akulibamba kabotu kwenu. (1 Kor. 4:9; 1 Tim. 2:9) Ciindi basicikolo abamayi nobabona kuti kulilemeka kwenu kuliimpene abamwi, ibamwi balakonzya kukwelelezyegwa kukasimpe akaambo kakulilemeka kwenu alimwi ciyoomupa ciindi cakubandika kasimpe kamu Bbaibbele. (1 Pet. 2:12; 3:1, 2) Kuba abukkale bumukkomanisya Leza cilakonzya kuba cintu cikatazya, pele Jehova uyoomulongezya kapati. (1 Pet. 3:16, 17; 4:14) Kutegwa mukulwaizye bantu kuba aluyandisyo kumakani mabotu, mulakonzya kubala bbuku lyaamba zyamu Bbaibbele ciindi cakulyookezya naa kulisiya mpobakonzya kulibona ibamwi.
4. Nkugwasyigwa kuli buti kumwi kujanwa mukukambauka nomuli kucikolo?
4 Kumunika kwenu nomuli kucikolo kuyumya-yumya lusyomo lwenu alimwi kulamugwasya kuba akulikankaizya kuli kabotu nomubelekela Jehova. (Jer. 9:24) Alimwi cilaba ncocilikwabilizyo. Umwi mucizyi wakaamba kuti: “Cimwi cacilongezyo cakwaambaula nzyondisyoma ncakuti basicikolo kunyina nobandisungilizya kucita zintu ziteendelani ancolyaamba Bbaibbele.”
5. (a) Mbuti bakubusi bamwi mbobauyungizya mulimo wabo? (b) Ino nimbaakani nzi zyakumuuya nzyomujisi?
5 Mulimo Uuyungizyidwe: Nzila imwi bakubusi mobamunika mbuli mimuni nkwiinda mukuyungizya mulimo wabo. Naakamanizya cikolo cakusekondali, umwi mukwesu wakalongela kuyoobelekela kubusena bubulide bakambausi ba Bwami. Wakali mumbungano nsyoonto yakajisi buyo mwaalu omwe. Wakalembela mweenzinyina ŋwadi kati: “Ndilikkomene kapati okuno. Mulimo ulakatalusya kapati. Tulabandika kwamaminiti aali 20 amunzi aumwi nkaambo bantu balayanda kuswiilila zyoonse nzyotubaambila.” Wakayungizya kuti: “Nocabota kuti mukubusi uuli oonse kacita cintu camusyobo ooyu akulimvwa mbondilimvwa. Kunyina cintu cikkomanisya kwiinda kubelekela Jehova azintu zyoonse nzyotujisi.”
6. Ncinzi cimupa kukkomana kujatikizya bakubusi bali mumbungano yenu?
6 Eelo tulikkomene kaka akaambo kabakubusi bamunika mbuli mimuni! (1 Tes. 2:20) Mbomuyaabubelekela Jehova amoyo wenu woonse, muuya, mizeezo, alimwi anguzu zyenu zyoonse, muyootebula ‘kuciindi ecino buncilincili . . . eelyo muciindi ciboola muyoojana buumi butamani.’—Mk. 10:29, 30; 12:30.