“Mumuni Wanu Umunike”
1 Inyika njotukkede ili mumudima mumakani aakulilemeka alimwi azyakumuuya. Kutegwa tuzyeelebe zilebyo eezi ziletela lufwu, mumuni wakasimpe ulaiyubununa “milimo yabuyo” yamumudima. Nkakaambo kaako, imwaapostolo Paulo wakakulwaizya Banakristo kuti: “Amweende mbuli bana balugwemuko.”—Ef. 5:8, 11.
2 “Micelo yalugwemuko” iliindene kapati amudima wanyika. (Ef. 5:9) Ikutegwa tube amicelo eeyi, tuyandika kuzwidilila mukuba zikozyanyo zibotu mubukkale bwa Bunakristo, kuba bantu bakkomaninwaa Jesu. Alimwi tweelede kutondezya bube ibumbi mbuli bwakulyaabaa moyo woonse, kusyomeka alimwi akusungwaalila kasimpe. Micelo eeyi tweelede kwiitondezya mubukkale bwesu bwabuzubaa buzuba alimwi amumulimo wesu.
3 Atumunike Kufwumbwa Mpotubede: Jesu wakaambila basikwiiya bakwe kuti: “Mumuni wanu umunike kunembo lyabantu.” (Mt. 5:16) Mukwiiya Jesu, tulaumwesya mumuni wa Jehova kwiinda mukukambauka makani aajatikizya Bwami bwa Leza alimwi amakanzaakwe. Tulamweka mbuli mimuni eelyo notuswaya maandaa bantu alimwi anotumwaya mulumbe wakasimpe kumilimo, kucikolo, kuli basimukoboma naa kuli koonse nkotukonzya kujana coolwe cakucita boobo.—Flp. 2:15.
4 Jesu wakaamba kuti ibamwi bayoowusulaika mumuni. (Joh. 3:20) Aboobo tacitutyompyi eelyo banabunji nobatazumini kuti bapaswidwe “mumuni wa-Makani Mabotu aabulemu bwa-Kristo.” (2 Kor. 4:4) Jehova ulabona zili mumyoyo yabantu alimwi tayandi kuti kube basikucita zintu zitaluleme akati kabantu bakwe.
5 Eelyo notutobela nzila zya Jehova alimwi akutambula mumuni wakumuuya, tulakonzya kutondezya bamwi mumuni. Ikuti naa baziba kuti ‘tulaamumuni wabuumi’ kwiinda mukubona mbotulilemeka, mpoonya abalo balakonzya kukulwaizigwa kucinca mumbazu eezyo mobayandika kucinca kutegwa babe basikuyumuna mumuni.—Joh. 8:12.
6 Kwiinda mukulekela mumuni wesu kuti umunike, tutembaula Mulengi wesu alimwi akugwasya baabo bajisi myoyo mibotu kuti bamuzibe akubaa bulangizi bwabuumi butamani. (1 Pet. 2:12) Mbwaanga tuluujisi mumuni, atuubelesye kusololela bamwi kuzwa mumudima wakumuuya kutegwa babeleke milimo yamumuni.