“Aumunike Mumuni Wanu”
1. Ino tujisi coolwe cakwaabila nzi?
1 Kuzwa kubucedo kusikila kumangolezya, kubota kwamumuni uumweka kutembaula Jehova Leza. Pele wakali mumuni uumbi Jesu ngwaakaambila basikwiiya bakwe kuba anguwo—“mumuni wabuumi.” (Joh. 8:12) Kuba amumuni wakumuuya ncoolwe cipati cibikkilizya kuba amulimo mupati. Jesu wakayiisya kuti: “Aumunike mumuni wanu kubantu,” kutegwa mubagwasye. (Mt. 5:16) Mumudima uusiya mbi wakumuuya uuliko mazuba aano, mumuni ooyu weelede kwaabilwa kubantu, alimwi ulayandika kapati lino. Mbuti mbotukonzya kupa kuti mumuni wesu umweke, mbuli mbwaakacita Kristo?
2. Mbuti Jesu mbwaakatondezya kuti kulayandika kapati kwaabila bamwi mumuni wakumuuya?
2 Kwiinda Mukukambauka: Jesu wakabelesya ciindi ncaakajisi, nguzu zyakwe, alimwi azyintu nzyaakajisi kutegwa amunike mumuni wakasimpe kubantu mumaanda aabo, mumigwagwa, atala aazilundu—kufwumbwa nkobakali kujanika. Wakabona kuti cilayandika kapati kumunika mumuni wakasimpe wakumuuya. (Joh. 12:46) Kutegwa asikile bantu banji, Jesu wakayiisya basikwiiya bakwe kuti babe “mumuni wanyika.” (Mt. 5:14) Bakamunika mumuni wabo kwiinda mukucitila basimukobonyina zyintu zibotu akubaambila kasimpe kakumuuya.
3. Mbuti mbotukonzya kutondezya kuti tulalumba mumuni wakasimpe?
3 Bantu ba Leza balaubikkila maano mulimo ‘wakweenda kabali bana bamumuni,’ alimwi balakambauka kufwumbwa nkobakonzya kujana bantu. (Ef. 5:8) Kubala Bbaibbele naa mabbuku eesu aa Bunakristo mubuleya, notuli kumilimo naa kucikolo kulakonzya kupa kuti tutalike mubandi wamu Magwalo. Kwiinda mukubelesya nzila njiyonya eeyi mucizyi umwi uucili mukubusi wakatalisya ciiyo ca Bbaibbele akwaabila mabbuku kuli basicikolonyina bali 12.
4. Nkaambo nzi ‘kumunika mumuni wesu’ ncokubikkilizya akulilemeka kabotu?
4 Kwiinda Mumicito Mibotu: Kumunika kulabikkilizya amicito yesu yabuzuba abuzuba. (Ef. 5:9) Kumilimo, kucikolo, alimwi amubuleya, kulilemeka kwa Bunakristo kupa coolwe cakuti twaabile bamwi kasimpe kamu Bbaibbele. (1 Pe. 2:12) Mucikozyanyo, kulilemeka kabotu kwamwana musankwa uujisi myaka yosanwe yakuzyalwa kwakapa kuti bayi bakwe babaite bazyali bakwe. Bakaamba kuti, “Tandinabona mwana uulilemeka kabotu mbuli yooyu, uusyoma kuti cilayandika kapati kucita ciluzi!” Masimpe, mulimo wesu wakukambauka akulilemeka kabotu zipa kuti bantu bazyibe “mumuni wabuumi” akutembaula Leza.