‘Ikumunika Mbuli Mimuni’
1 Mubweende bwazintu oobu imuli mudima wakumuuya akutalilemeka, tuulunzuma tusika kucisambomwi twabakombi ba Leza wakasimpe Jehova, bali ‘mukumunika mbuli mimuni’ mumasi aali 234 munyika yooonse. (Flp. 2:15) Eeci citupa kuti katuzyibwa kubantu. Ino mbuti mbotutondezya mumuni uuyandika kapati wakasimpe kazwa kuli Jehova?—2 Kor. 3:18.
2 Milimo Yesu: Bantu balafwambaana kapati kubona mbotulilemeka. (1 Pet. 2:12) Imukaintu umwi wakabona kuti mwaalumi Kamboni ngocakali kubeleka limwi wakali siluse alimwi uugwasya alimwi tanaakali kutukila antela kuseka ciindi bamwi nobali mukunongana. Iciindi bamwi nobakali kusola kumutalika Kamboni ooyu kwiinda mukubelesya matusi awalo kaliko, wakazumanana kuba mutontozi pele uutazungaani kucita zintu ziluleme. Akaambo kaceeci, ino ncinzi cakatobela kumukaintu ooyu? Mboobu mbwaamba: “Ndakakkomana kapati ambwaakali kulilemeka cakunga ndakatalika kubuzya mibuzyo yamu Bbaibbele. Ndakatalika kwiiya Jwi lya Leza, aboobo kumbele ndakabbapatizyigwa.” Mukaintu ooyu ulazumanana kuti: “Ikulilemeka kwakwe nkokwakapa kuti nditalike kulanga-langa njiisyo zya Bakamboni ba Jehova.”
3 Mbotubulanga bweendelezi, micito yamunyika alimwi ambotukanana munzila iiyaka, kupa kuti Bakamboni ba Jehova bazyibwe kapati kuti mbantu batobela zyeelelo zisumpukide zyamu Bbaibbele. Milimo mibotu iili boobu ipa kuti Jehova alemekwe akukwelelezya bantu kubukombi bwakasimpe.
4 Majwi Eesu: Masimpe, aabo babona mbotulilemeka kabotu tabakonzyi kuzyiba kaambo ncotucitila boobu, ccita kuti twabaambila nzyotusyoma. Sena bantu mbomubeleka limwi naa mbomwiiya limwi kucikolo balizyi kuti muli umwi wa Bakamboni ba Jehova? Sena mulasoleka kujana ciindi cakupa bumboni eelyo nomuli mukubandika abantu bamwi? Sena mulikanzide kuti “mumuni wanu umunike kunembo lyabantu” eelyo nomwajana ciindi ceelede?—Mt. 5:14-16.
5 Ikuzuzikizya mulimo wesu mbotuli mimuni kuyandika muuya wakulyaaba. Ikuba amuuya wakuyanda kubeleka camoyo woonse, kuyootukulwaizya kutantamuka zintu zitayandiki kapati kutegwa tubeleke canguzu mumulimo wakuvwuna bantu wakukambauka akubagwasya kuba basikwiiya.—2 Kor. 12:15.
6 Kwiinda mumilimo amajwi eesu, atuzumanane kumunika mbuli mimuni. Ikuti twacita boobo, abambi bayookulwaizyigwa kutusangana mukutembaula Jehova.