Ndilombozya Kutalisya Ciiyo ca Bbaibbele!
1 Bunji bwandiswe tulatondezya kuti tulombozya kutalisya ciiyo ca Bbaibbele, alimwi tulacita obo akaambo kabotu. Imulimo waciiyo ca Bbaibbele ngouzwidilizya mbaakani yesu yakugwasya bantu kuba basikwiiya bapya. (Mt. 28:19, 20) Pele banji akati kesu kwainda myeezi ambweni myaka kakunyina kujana lukkomano lulibedelede mukuyiisya umwi kasimpe. Ncinzi ncotunga twacita kumakani aaya mumweezi wa November? Mbwaanga bbuku lya Luzibo ndelimwaigwa mweezi uno, tulakonzya kucita bubambe bwaalubazu kulibelesya kutalisya ziiyo zya Bbaibbele zipya.
2 Amubikke Ambali Mazuba Aakumamanino kwa Mvwiki Yomwe naa Aaindaawo: Twamukulwaizya nyoonse ikubikka ambali ciindi mumweezi uno kuti mubikkile maanu kukutalisya ciiyo ca Bbaibbele cipya. Ibacitya Ciiyo Cambungano Cabbuku beelede kusala mazuba aakumamanino kwamvwiki yomwe naa iziindaawo aayoobelesyegwa mumulimo oyu mpoona akweendelezya tubunga twabo ikusolekesya caantoomwe mumulimo wanyendo zyakupilukila.
3 Amuletelezye akapepa mpomwakalemba nyendo zyakupilukila kumiswaangano eyi yamulimo wamumuunda. Mpoonya amuunke kuli baabo boonse ibakatondezya luyandisisyo, ibakabweza mabbuku naa ibakajanika aamiswaangano cimwi ciindi. Mukuswaya kumwi akumwi amube aambaakani iigaminide yakutalisya ciiyo.
4 Amupe Citondezyo ca Ciiyo ca Bbaibbele: Ciindi camiswaangano iisalidwe yamulimo wamumuunda, icitondezyo icakalibambilwa kabotu ceelede kucitwa, ceelede kutondezya mbokutalikwa ciiyo aalweendo lwakupilukila. Mulakonzya kwaamba kuti: “Ibantu banji balijisi Bbaibbele, pele kwiina nobazyi kuti lilayiingula mibuzyo iiyandika kapati toonse njotuyaana aayo mubuumi. [Amutondezye mulongo wazili mukati mubbuku lya Luzibo, akubala mitwe yazibalo 3, 5, 6, 8 alimwi a 9.] Kwiinda mukubelesya bbuku eli ligwasya kwiiya kwawoola lyomwe amvwiki, mulakonzya kuteelela kabotu makani mapati aa Bbaibbele mumyeezi misyoonto buyo. Naa mwasala cibalo comwe akati kazeezi, ndilakonzya kumutondezya ipulogilamu eyi mboibeleka.” Ikuti naa muntu wawayawaya kwiiya akaambo kakujata bubi, amupandulule kuti tulijisi alimwi ipulogilamu iifwiinsidwe. Amumutondezye broshuwa ya Ncayanda, mpoonya amucite bubambe bwakunooiya ciiyo cifwaafwi comwe amvwiki kwamaminiti aali 15-30.
5 Ikuti naa toonse twabelekela aantoomwe kutalisya ziiyo alimwi ikuti twapailila zilongezyo zya Jehova aakusoleka kwesu, masimpe tuyoojana ziiyo zipya! (1 Joh. 5:14, 15) Ikuti kamulombozya kutalisya ciiyo ca Bbaibbele, eci inga caba ncecoolwe canu cakucita boobo.