Amuyandisisye Kukambauka Makani Mabotu
1 “Ndayandisya kumubona . . . [kutegwa nkamukambaukile] Makani Mabotu anywebo.” Oobo mbwaakaamba mwaapostolo Paulo kumatalikilo aalugwalo lwakwe ndwaakalembela babunyina ku Roma. Ino nkaambo nzi Paulo ncaakali kuyandisisya kubaswaya? Wakaamba kuti: “Kuti nkajane micelo imwi akati kandinywe . . . Nkaambo nsiusi insoni ku-Makani Mabotu aa-Kristo pe, nkaambo ninguzu zya-Leza zyakufutula.”—Rom. 1:11-16.
2 Paulo wakalutondezya luyandisisyo olu naakali kukananina baalu baku Efeso. Wakabayeezya kuti: “Kuzwida kubuzuba mbwendakatalika kusika mu-Asiya . . . nsikamusisilide akaniini kumwaambila [makani] aamweelede, ndakamwiisya mukati kabantu akunjilauka mumaanda. Ndakali kulungulwida ba-Juda aba-Helene.” (Inc. 20:18-21) Paulo wakali kanzide kukambauka makani mabotu aalufwutuko mumasena oonse ngaakapedwe kutegwa micelo ya Bwami iboneke. Ooyu mmuuya mubotu ngotweelede kubaawo!
3 Imubuzyo ngotunga twalibuzya ngwakuti: ‘Sena ambebo ndayandisisya kukambauka makani mabotu mumunzi mondikkala? Muciindi cakukambauka kwiinzya buyo mulawo, sena ndayandisisya kukambauka makani mabotu kubantu banji? Sena ndaliyeeya? Mucilawo ncondibelekela, sena ndasola kubelesya nzila zyoonse zikonzeka, mbuli kukambauka mulyango amulyango, mumugwagwa, mumasena aamakwebo, kubelesya luwaile alimwi amuciindi cakwiizya?’
4 Amuyandisisye Kukambauka mu April: Imwezi wa April mmwezi mubotu umwi aumwi wandiswe nayelede kubeleka canguzu mumulimo wakukambauka. Akaambo kakuti mweelwe wamawoola aayandika wacesegwa, ibanji inga bakonzya kucita bupainiya bwakugwasilizya. Ambweni andinywe inga mwacikonzya kucita bupainiya bwakugwasilizya mu April a May. Ikuti kacikonzeka inga mwalilembya bupainiya bwaciindi coonse akaambo kamweelwe wamawoola aayandika wacesegwa. Ikuti naa uli sikumwaya mumbungano, sena inga tokonzyi kubeleka ciindi cilamfwu kwiinda mbobeleka lyoonse mumulimo wamumuunda mwezi uno autobela, ikugwasilizya baabo bakonzya kucita bupainiya? Eco inga cakonda moyo wa Jehova!
5 Boonse basikumwaya bamakani aa Bwami abazumanane kuyandisisya kuyaambele mumulimo wakukambauka mbubonya mbuli Paulo. Ikuti naa twasola kubeleka mbuli mbotukonzya mumulimo cilatuletela lukkomano lwini-lwini. Oolu ndolukkomano ndwaakajisi Paulo mumulimo wakwe uusetekene. Andiswe tweelede kuba mbuli nguwe.—Rom. 11:13; 1 Kor. 4:16.