Ibanamukwasyi Mbobabelekela Antoomwe Ikutegwa Batole Lubazu—Mumulimo Wabo Wamumuunda
1 Ino ncinzi cimbi cinga catukkazika moyo kwiinda kubona balumi abakaintu babo, ibazyali abana babo kababelekela antoomwe mumulimo wa Bunakristo, kabatembaula zina lya Jehova kubuleya? (Int. 148:12, 13) Mikwasyi yoonse yeelede kaili aciindi cakutola lubazu lyoonse mumulimo wamumuunda. Sena mukwasyi wanu ulijisi buzuba bwakuunka mumulimo wamumuunda nsondo ansondo? Ikuti naa zintu obo mbozibede, caamba kuti muntu amuntu ulizi kabotu cakucita alimwi ulakonzya kuzuzikizya mulimo wakwe.—Tus. 21:5a.
2 Kabutanasika buzuba bwakuti mukwasyi uye mumulimo, ino nomutabelekeli antoomwe kulibambila ntalisyo zyamakani nzyobayoobelesya banamukwasyi? Ikuti mwabaa ciindi cakuziiya ntalisyo ezi inga cagwasya alimwi inga caleta muuya wakubelekela antoomwe. Ikaka cilagwasya kuti naa mukwasyi woonse kautola lubazu mumulimo wamumuunda alimwi akuti banamukwasyi boonse kabalibambila kabotu!
3 Mulangizi weendeenda wakabelekaa mukwasyi woonse mumulimo wakumwaya mamagazini. Naakali kubeleka ŋanda aŋanda aumwi mwana musimbi, oyu musimbi wakabuzya kuti: “Ino mulabeleka ciindi cilamfwu buti andime?” Mpoonya wakapandulula kuti ulabeleka abausyi bamanizya. Tacidoonekwi pe kuti mwana oyu abausyi bakali kukkomana kubeleka limwi mumulimo wamumuunda. Ooyu muuya tauliboteli mumukwasyi!
4 Imwi mikwasyi inga yacitilaamwi bupainiya bwakugwasilizya mwezi omwe mumwaka. Ikuti kacikonzeka omwe buyo mumukwasyi ulakonzya kuzumanana kucita bupainiya bwakugwasilizya naa kulilembya kucita bupainiya bwaciindi coonse. Ikuti naa zintu bazyeendelezya kabotu alimwi babelekela antoomwe, ambweni banamukwasyi boonse inga bakonzya kuyaambele mumulimo wabo wamumuunda kwiinda mukugwasilizya yooyo uucita bupainiya. Oonse mukwasyi ulagwasigwa akaambo kalusumpuko olu mumulimo alimwi azintu zinji ziluulwa izijanika mumulimo.—Malk. 3:10.
5 Ikuzuzikizya mulimo wabukambausi cigwasya mikwasyi kuti kiikamantene, kiisungweede, izwidilile alimwi kiikkomene kucita mulimo wa Jehova!—Amweezyanisye Ba-Filipi 2:1, 2.