Amwiiye Jehova Uutalangi Ciimo Camuntu
1 Jehova ulababikkila maanu bantu. Muntu woonse uucita kuyanda kwakwe ulatambulwa kulinguwe. (Inc. 10:34, 35) Ciindi Jesu naakali kukambaukila bantu, awalo kunyina naakali kulanga ciimo camuntu pe. (Lk. 20:21) Tweelede kwiiya cikozyanyo cabo mbuli mbwaakacita Paulo walo wakalemba kuti: “Mwami wabo boonse nguumwi buyo, ulabavubila boonse bamulilila.”—Rom. 10:12.
2 Notukambaukila bamwi makani mabotu aa Bwami bwa Leza, tupa bulemu kulinguwe. Atuzumanane kukambaukila bamwi mulumbe mubotu, babe bamubala umbi, iciimo, bayiide antela bavwubi naa bacete. (Rom. 10:11-13) Kweelede kukambaukila baabo bayanda kumvwa—babe baalumi, bamakaintu, bana alimwi abacembeede. Tweelede kusika amulyango uli woonse kutegwa siŋanda umwi aumwi apegwe coolwe cakuswiilila kasimpe.
3 Amubabikkile Maanu Bantu Boonse: Mbaakani yesu njakusola kusikila bantu boonse. Akaambo kaboobo, basikumwaya bamwi bazwidilila mukupa bumboni kubantu mumaopesi aabama dokotela, muzibbadela, mumaanda mukkala bantu bacembeede alimwi abaciswa, kubusena nkobagwasya bantu bajisi ziyanza nzyobaalilwa kuleka, kubikkilizya akumaopesi aalanganya zyabukkale bwabantu bapengede. Kunze lyaboobo, basikumwaya bacikonzya kupa bumboni akubantu bajisi mulimo wakweendelezya madilwe, kubeendelezi bazikolo, kulibasikupa lulayo alimwi akubabetesi bamunkuta. Ciindi nomusikila bantu balupati-pati, ncibotu kubalumbaizya kumilimo yabo njobakutauka yakugwasya banamaleya. Amubalemeke, mpoonya musale makani aaendelanaa mulimo ngobacita alimwi amapenzi aajatikizya mulimo wabo.
4 Cimwi ciindi imucizi umwi wakazwidilila mukwaambaula amubetesi muopesi lyakwe. Nowakamana mubandi wabo uukondelezya, mboobu mbwakaamba mubetesi: “Sena ulicizi cindikonda kujatikizya Bakamboni ba Jehova? Mbantu bayiisidwe kabotu alimwi batobela njiisyo nzyobayiya.” Ibumboni bubotu bwakapegwa kumuntu ooyu uulemekwa.
5 Tatukonzyi kuziba zili mumyoyo yabantu. Nokuba boobo, kwiinda mukwaambaula abantu boonse mbotujana, tutondezya kuti tulaa lusyomo munguzu zya Leza zyakutusololela mumulimo wesu. Kunze lyaboobo, eeci cipa coolwe kubantu kuti bamvwe akutambula mulumbe wabulangizi mbotujisi. (1 Tim. 2:3, 4) Atucibelesye cabusongo ciindi cesu akusolekesya kwiiya Jehova uutalangi ciimo kwiinda mukusikila bantu boonse amakani mabotu.—Rom. 2:11; Ef. 5:1, 2.