Amubabikkile Maanu Ibamwi—Kwiinda Mukukambauka Cakutasalulula
1 Mucilengaano, mwaapostolo Johane wakabona mungelo uuluka mujulu kakambauka makani mabotu aateeli kubantu ‘bakumisyobo yoonse akumyaambo yoonse akumikowa yoonse.’ (Ciy. 14:6) Sena tulacitobela cikozyanyo camungelo kwiinda mukukambauka cakutasalulula? Kakunyina akuziba, tulakonzya kuba abukkale bwakusulaikana. Mbotubabona bantu mbotuswaanganya kulakonzya kwiijatikizya nzila njotubelesya mukubakambaukila makani mabotu. Aboobo, tuyandika kubikkila maanu kapati notukambauka kubantu babukkale bwiindene-indene.
2 Amubikkile Maanu Kucilawo Canu: Sena kuli bantu bazwa kumasi aambi naa bazangalisi bali mucilawo canu? Inga tiitwababikkila maanu kapati. Amubweze ntaamu yakubayandaula bantu aaba alimwi akusoleka kubaziba kabotu. Ino nzinzi nzyobayandika anzyobabikkila maanu, nzyobayanda anzyobatayandi, nzyobalibilika alimwi amizeezo iitali kabotu njobajisi? Amusolekesye kuucinca mubandi wanu wamulumbe wa Bwami kweelana abukkale. (1 Kor. 9:19-23) Mbubwenya mbuli mwaapostolo Paulo, tweelede kulimvwa kuba amukuli wakukambauka makani mabotu kumuntu uuli woonse uuli mucilawo cesu, kubikkilizya abaabo bazwa kumasi aambi, aabo bajisi zilengwa ziindene-indene, aabo baambaula mwaambo uumbi alimwi abaabo bavwubide kapati.—Rom. 1:14.
3 Nokuba boobo, ino mbuti mbomukonzya kumukambaukila muntu waambaula mwaambo uumbi? Amubelesye kabbuku kakuti Good News for People of All Nations. Alimwi mulakonzya kubwezelezya amatulakiti naa mabroshuwa aamumyaambo iikananwa kapati mucilawo canu. (Amubone Mulimo Wesu wa Bwami wa July 2003, p. 8, minc 2-3.) Kuyungizya waawo, basikumwaya bamwi basolekesya kwiiya mbobakonzya kwaanzya akutalisya mubandi muuba-uba mumyaambo iimbi. Bantu kanji-kanji balabotelwa kumvwa muntu umwi uusoleka kubandika ambabo mumwaambo wabo, nokuba kwaamba majwi masyoonto buyo, alimwi eeci inga cabapa kuyanda kuswiilila makani mabotu.
4 Amwiiye Jehova: Kwiinda mukubakambaukila bantu babukkale bwiindene-indene, twiiya Leza wesu uutasalululi, Jehova, walo “uuyandisya kuti bantu boonse bafutulwe akuboola kuluzibo lwakuziba lusinizyo.”—1 Tim. 2:3, 4.