Sena Mulakulwaizigwaa Luyando lwa Kristo?
1 Kayeeya buumi bwa Simalelaakwe, imwaapostolo Johane wakalemba kuti: “Jesu, . . . mbwaakali kubayanda bana bakwe abali munyika ino, wakabayanda mane kusikila kumamanino.” (Joh. 13:1) Muciindi ecino ca Ciibalusyo, tubikkide mizeezo yesu yoonse kuluyando lwa Kristo lutalikomeneni ndwaakatutondezya. Tulakonzya kukulwaizigwa aluyando olu kwiinda mukusungwaala mumulimo wakukambauka alimwi akuliyumya “kusikila kumamanino” mbubwena mbwaakacita Jesu.—Mt. 24:13; 28:19, 20; Joh. 3:16.
2 Kukulwaizigwaa Luyando lwa Kristo: Mumvwiki yamamanino yabuumi bakwe kalaa nyika, Jesu wakali munkutwe kapati mumulimo wakwe. (Mt. 21:23; 23:1; 24:3) Mbotuli mukwiiya Jesu, andiswe luyando olo lulatukulwaizya ‘kusolekesya’ mumulimo wa Jehova. (Lk. 13:24) Sena mulakonzya kubelesya bubambe bubikkidwe bwakuyooyungizya mulimo wabukamboni mumwezi wa April kwiinda mukuyungizya ciindi ncomubeleka mumulimo?
3 Mwaka uno Mulalilo wa Mwami uyooba muli Bwatatu mu April 19 mangolezya. Ino mbangaye ibayoojanika kumuswaangano oyu uuyandika kapati? Eeci kapati cili kulindiswe. Sena mwalemba mulongo wamazinaa bantu mbomuyanda kuyootamba—mbomwiiya limwi Bbaibbele abamwi buyo ibayanda, abasazinyoko, ambomucita limwi makwebo alimwi ambomwiiya limwi kucikolo? Sena kuli nomwakaambaula ambabo akubatamba? Sena muyoobayeekezya kwacaala mazuba masyoonto kacitanacitwa Ciibalusyo? Sena bayooyandika kuti mukabagwasye kujatikizya mbobaya kweenda kuya kooko nkomuyoocitila Ciibalusyo? Baalu abalo bayootamba kufwumbwa baabo ibakacileka kuunka mumulimo. Ikuba kwa Ciibalusyo mukati kamvwiki mangolezya muciindi cakuba kumamanino aansondo tacaambi kuti caleka kuba muswaangano uuyandika kapati akuti taakwe ndaba nokuba kuti muntu tanaajanika pe.
4 Amukaboole Kamulibambilide: Cilayandika kapati kuti katulibambilide kabotu alimwi katuli aamizeezo mibotu notuli ku Ciibalusyo. Paulo wakakulwaizya basyominyina ikubona mbociyandika kulemeka ciindi eci. (1 Kor. 11:20-26) Mulakonzya kubala Makani Mabotu aakalembwaa Johane aamu zyaandaano 13 kusika ku 17 ciindi nomucita ciiyo ca Bbaibbele camukwasyi mpoonya akubuzya umwi aumwi wamukwasyi kuti aambe mbwalimvwa kujatikizya ncocaamba cipaizyo ca Jesu kulinguwe. Mutalubi kubala cibalo ca Bbaibbele cabuzubaa buzuba munsondo ya Ciibalusyo!
5 Luyando lwesu kuli Kristo lulatukulwaizya kapati alimwi tunoolimvwa boobu lyoonse ikutali buyo mubuzuba bwa April 19. Tulikanzide kutondezya luyando lwesu kulinguwe kusikila kukabe kutamani! Ciibalusyo camwaka uno ciyootugwasya kuti tuliyumye mumakanze aayo.