Amubone Kuti Mwapilukila!
1 “Elo wali mubandi mubotu! Tandeleede kuluba kuyoopilukila kuya alimwi.” Sena kuli nomwakaambide boobo elyo mwamana mwakuluba nkwakkala muntu oyo? Kuti naa mwakalicitide kale obo, amuzibe kuti inzila ilikke iikonzya kugwasya njakwaalemba buya makani ayo.
2 Amwaalembe Oonse: Kamuciyeeyede ncomwali kubandika amuntu uulaa luyandisisyo, amwaalembe oonse makani ngomwabandika. Amulilembe zina lyamuntu ooyu azyoonse zikonzya kumuyeekezya mbwabede. Amulembe kkeyala yakwe pele mutaiyeeyeli buya pe, amumubuzye kutegwa mulembe iiluzi. Amuulembe mutwe wamakani ngumwali kubandika amagwalo naa kuli ngimwabala alimwi abbuku lili lyoonse ndimwamusiila.
3 Ikuti naa kuli mubuzyo ngomwamusiila kuti ukaingulwe mukuswaya kutobela, amuulembe awalo. Sena kuli ncimwakabandika amuntu oyo cipandulula mbwabede walo, imukwasyi wakwe naa nkwakomba? Ikuti naa mwakacita obo, amuzilembe zyoonse ezyo. Mpoonya mwaakumuswaya lwabili muntu oyo, mwayootubandauka twaambo otu ciyootondezya kuti mulaaluyandisisyo mulinguwe. Mwamana kuzilemba ezi zyoonse, amucilembe ciindi alimwi abuzuba mbumwakaliko ciindi cakusaanguna alimwi anomwakasyomezya kuti muyoopilukila. Ikuti naa mwaalemba kabotu makani oonse, muyakuyeekezegwa alimwi ciyoomupa kuti mutakakulubi oko nkomwakasyomezya kupilukila.—1 Tim. 1:12.
4 Mbumwamanina buyo kwaalemba makani aya, amukabikke kabbuku momulembela mazina abantu antoomwe azintu zyoonse nzimubelesya mumulimo wamumuunda mbuli cibbeeke camabbuku, Ibbaibbele, ibbuku lya Kukambitsirana amabbuku aambi ikutegwa makani aayo kaali afwaafwi lyoonse. Inga cabota kuti naa mwaalemba nsini maanda awo mpumwatajana bantu alimwi awaawo mpumwakasyomezya kuti muyoopilukila. lcintu ciyandika kapati ncakuti mweelede kupilukila.
5 Kamumuyeeya Muntu Ooyo: Nemulibambila kuunka mumulimo wamumuunda, amulange-lange mpumwakalemba ikutegwa mubone nkumweelede kupilukila. Amumuyeyele muntu umwi aumwi mbomukonzya kubandika anguwe mwapilukila. Amuyeeye mbumukonzya kugwasya muntu oyo kutegwa abe aluyandisisyo lwakuba aciiyo ca Bbaibbile caaŋanda. Ikulibambila kuli boobu kulakonzya kuyungizya lukkomano lwanu akuzwidilila mumulimo wamumuunda mbomuli bakambausi bamakani mabotu.—Tus. 21:5a.
6 Ciindi ciboola mwaakujana muntu ulaa luyandisisyo, mutakayeeyi kuti tamukalubi pe. Pele amukaalembe makani oonse, amwaaindulule makani ayo, kamumuyeeya lyoonse muntu oyo alimwi amukabone kuti mwapilukila!—Flp. 1:10, 11.