Buumi Bwabantu Buli Muntenda!
1 Makanze a Jehova alisalede mu Bbaibbele aakuti “bantu boonse bafutulwe.” Nokuba boobo, ncamasimpe kwaamba kuti buumi bwakumbele bwabantu banji buyeeme ambobalimvwa kujatikizya Jehova Leza alimwi a Bwami bwakwe kwiinda muli Jesu Kristo. Bulangizi bubotu bulakonzya kujanwa buyo ciindi muntu naabaa ‘luzibo lwini-lwini lwakasimpe.’ (1 Tim. 2:3, 4) Kunze lyakuzibya bantu kuti nyika eyi iyoosalazigwa lino-lino kwiinda mukugwisya bubi boonse buliko kutegwa nyika ya Leza mpya yabululami ikkazikwe, kuli mulimo aumbi ngotwakapegwa uuyandika kapati imulimo wakufwutula bantu.—Mt. 24:14; 28:19, 20; Rom. 10:13-15.
2 Nkaambo nzi Ncouyandika Kubinda? Jesu wakacenjezya kujatikizya “mapenzi mapati aatana kubonwa kuzwa kumalengelo aanyika.” (Mt. 24:21) Mapenzi aaya ayoomanizigwaa nkondo ya Harmagedoni. (Ciy. 16:16) Ibantu aabo balangilwa kuyoonyonyoonwa ikuti naa tiibabikkila maanu kumakani mabotu balabikkilizyaa basazima, basimukoboma, mbotubeleka limwi, mbotwiiya limwi kucikolo alimwi abalongwe besu. Pele makanzeesu ngakusikila “bantu boonse” kwiiya Leza walo wakatondezya luyando lwakwe kumuntu umwi aumwi munyika kwiinda mukupa Mwanaakwe Jesu Kristo kuba cinunuzyo kubantu boonse. (Joh. 3:16) Tweelede kusolekesya ikutamba bantu boonse kutijila kubusena bwalufwutuko bwa Leza. Kwiinda mukuucita cakumaninina mulimo wakukambauka, tulakonzya kweeleba mulandu wabulowa.—Ezk. 33:1-7; 1 Kor. 9:16.
3 Ino Tulaa Makanze Nzi? Ikuyandika kwamulimo wakukambauka kulakankaizigwa mu Jwi lya Leza mbolibede. Kweelana abwaamba mwaapostolo Paulo, “kuyanda Kristo nkokutusinikizya” kupona munzila zya Leza. (2 Kor. 5:14) Kunze lyaboobo, Ngazi Yamulindizi kanjikanji ilakankaizyaa mulimo wesu wakukambauka. Mulimo Wesu Wabwami wazumanana kutupa malailile ajatikizya mbotweelede kuweendelezya mulimo wakukambauka. Ibaalu balaweendelezya kabotu mulimo alimwi balatukulwaizya kutola lubazu mumulimo. Basikumwayama balatutamba kuti tubeleke ambabo mumulimo. Nzinji nzyotumvwa kujatikizya kulibambila mbotukonzya kusikila bantu, kumwaya mamagazini alimwi amabbuku aambi, nyendo zyakupilukila, kweendelezya ziiyo zya Bbaibbele alimwi akubelesya kufwumbwa coolwe ncotukonzya kubaancico ikupa bukamboni. Zyoonse eezi zitugwasya kuzuzikizya makanzeesu aakufwutula bantu.—1 Kor. 9:22, 23; Ef. 1:13.