Amubelesye Zintu Zyakacitika Ino-Ino Kubusya Luyandisisyo
1 Sena mulayanda kuti kamupegwa mizeezo mibotu lyoonse yalo iikonzya kucita mulimo wanu kubaa mupya lyoonse alimwi akukulwaizya bantu kubaa luyandisisyo mumulumbe wamu Bbaibbele? Ikuti naa kakuli boobo amubelesye zintu zicitika munyika alimwi amumunzi momukkede ikutalisya mibandi. Mulakonzya kwaamba makani aakamvwugwa ino-ino mucilawo momukkede alimwi azyakacitika mucisi naa makani aakuzisi zimbi. Zintu eezi ziyaabucinca. (1 Kor. 7:31) Amubone zitondezyo eezi zitobela.
2 Mapenzi aakubula mali alimwi akudula kwazintu ziyandika mubuumi zibapa kulibilika kapati bantu. Aboobo mulakonzya kwaamba kuti:
◼“Sena mwakaamvwa makani aakuti [amwaambe makani ayo] myuulo yakayungizigwa alimwi?” Ambweni mulakonzya kwaamba makani ajatikizya kubula mulimo ikuti naa kakuli bantu banji bakagwisigwa mulimo mukkampani imwi mpati. Cili kulindinywe kusala mbuli mbomuyanda kuzumanana amubandi, mulakonzya kuzumanana kwiinda mukubuzya kuti “Sena kuli nomwakalibuzyide nobeni ncobuli buyumu boobu buumi?” naa “Sena muyeeya kuti cinooli ciyumu mbubwenya obu ikujana nzyotuyandika mubuumi lyoonse?”
3 Malipooti abulwani mbuli mapenzi mumikwasyi naa akati kabasicikolo, nkakaambo kamwi kakonzya kutalisya mubandi. Inga mwabuzya kuti:
◼“Sena mwakaabala makani aakuti [amwaambe ntenda yakacitika mumunzi momukkede] mumuteende naa kwaateelela awailesi?” Mpoonya amubuzye kuti “Ino muyeeya kuti ncinzi cipa kuti kube bulwani boonse oobu munyika?” naa “Sena muyeeya kuti kuli nokuyooba ciindi notuyooliiba buya?”
4 Makani aazambangulwe, mizuzumo yanyika, naa manyongwe aazumanana mumbazu zimbi zyanyika aalo mmakani aakonzya kubusya luyandisisyo. Mucikozyanyo, inga mwabuzya kuti:
◼“Sena Leza nguupa kuti [amwaambe ntenda iijatikizya cilengwaleza yakacitika]?” Ambweni mulakonzya kwaamba zyamanyongwe aali mucisi cimwi akubuzya kuti: “Ikuti bantu boonse kabayanda luumuno, nkaambo nzi ncocili cintu cikatazya kulujana?”
5 Amupakamane kuzintu zicitika kutegwa kamubelesya nzizyo muntalisyo zyanu. Inzila zigwasya zilajanika mukabbuku ka Mboitalikwa Mibandi Akuzumananwa amutwe wakuti “Zintu Izyazwaa Kucitika” apeeji 6. Pele mweelede kucenjela kutegwa mutataliki kubweza lubazu luli loonse mumakani atwaambo twabukkale naa twacisi. Muciindi caboobo, amubikkile maanu ku Magwalo alimwi a Bwami bwa Leza kuti bwalo bulikke mbobuyoomaninzya mapenzi oonse ngobajisi bantu.