Ikukambauka Munyika Bukkale Mobuya Bucinca
1 Elo kaka zintu zilakonzya kucinca mukaindi buyo kasyoonto! Mukaindi kasyoonto buyo, intenda iiletwa azilengwaleza, ikuyuma kwabukkale, ikuzwangana mutwaambo twamapolitikisi, naa ntenda yakacitika iili mukwaambilizyigwa kapati alakonzya kuba ngamakani mumibandi. Mukaindi buyo kasyoonto, mizeezo yabantu ilakonzya kugama kucintu cimbi. (Inc. 17:21; 1 Kor. 7:31) Munyika eeyi bukkale mobuya bucinca, ino mbuti mbotunga twacita kutegwa tubagwasye bantu kubikkila maano akubaambila mulumbe wa Bwami?
2 Amuzyibe Bantu Zintu Nzyobalibilika: Inzila imwi mbotukonzya kubagwasya bantu kubikkila maano nkwiinda mukwaamba zintu zili mukucitika. Naakali kukulwaizya baswiilizi bakwe kuti babikkile maano kapati kucilongwe cabo a Leza, Jesu aciindi cimwi wakaamba ntenda zyakazwide aakucitika nzyobakacili kuyeeya. (Lk. 13:1-5) Mbubwenya buyo, notukambauka makani mabotu, inga twacita kabotu kubikkilizya amakani aali mukucitika munyika naa makani aakacitika kubusena nkotubede ngobakonzya kubikkila maano aabo bali mucilawo cesu. Pele, notubandika makani aayo, tweelede kucenjela kutegwa tutabi kulubazu luli loonse mutwaambo twamapolitikisi antela tujatikizya bukkale bwabantu.—Joh. 17:16.
3 Ino mbuti mbotunga twazyiba nzyobali mukuyeeya bantu aciindi eeco? Ambweni nzila mbotu njakwiile kubuzya buyo mubuzyo mpoonya akuswiilila. (Mt. 12:34) Ikubabikkila maano bantu kuyootukulwaizya kuzibikkila maano zyobayeeya bamwi alimwi akuyaambele kubabuzya munzila yabupampu. Izintu nzyakonzya kwaamba siŋanda uutalibambilide zilakonzya kuyubununa nzyobalibilikide banji mubusena oobo alimwi akujula nzila yakukambauka.
4 Kulibambila Makani Aakutalisya Mubandi: Notulibambila mulimo wamumuunda munyika bukkale mobuya bucinca, tulakonzya kubelesya bbuku lya Kukambitsirana. Inzila zigwasya mbuli mbotunga twabikkilizya twaambo tuli mukucitika mumakani eesu aakutalisya mubandi zilibikkidwe apeeji 10-11, akatwe kaamba kuti “Upandu/Chisungiko” alimwi akakuti “Zochitika Zatsopano.” Makani aakozyenyi ayaayo alakonzya kujanwa mu Mulimo Wesu Wabwami wamu September 2000 apeeji 4. Nomulibambila makani aanu aakutalisya mubandi, amubone kuti mwabikkilizya alugwalo lweelede.
5 Mbotuyaabubikkila maano kuzintu zizumanana kupa bantu kulibilika mucilawo cesu, tweelede kweendelanya makani eesu aamulumbe wamakani mabotu munzila yeelede. Ikuti twacita oobo, nkokuti tubandika abantu zintu nzyobabikkilide kapati maano. Aboobo, tugwasya bantu banji kuzyiba Yooyo uujisi bukkale alimwi azyeelelo zitacinci.—Jak. 1:17.