“Majwi Aambwa Kuciindi Ceelede”
1 Sena cilamukatazya ikwaabila bamwi mulumbe wabuumi? Sena mulimvwa kuti mweelede kwaamba cintu cimwi cikondelezya kutegwa mubakkomanisye bamuswiilila? Jesu naakatuma basikwiiya bakwe wakabaambila kuti: “Nkabela mwanooya bweenda kamunooyookambauka kuti, Bwami bwakujulu buliswenede.” (Mt. 10:7) Teewakali mulumbe uukatazya pe, pele wakali muuba-uba kwaambila bamwi. Takwe kwiindanaa sunu pe.
2 Kanjikanji kuyandika buyo majwi masyoonto ikutalisya mubandi. Filipo naakayaanya muzibe muna Etiopiya wakamubuzya kuti: “Sena ulacimvwisya eco ncobala?” (Inc. 8:30) Elo kaka wakali mubandi uugwasya ngobakalaanguwo akaambo ka “majwi aa[kaa]mbwa kuciindi ceelede”!—Tus. 25:11.
3 Mulakonzya kubelesya nzila njiyona eyi mumulimo wanu. Munzila nzi? Kwiinda mukubikkila maanu kuzintu alimwi akusala majwi ayelede kwaambwa kweelanaa bukkale buliko aciindi eeco. Amubuzye mubuzyo alimwi amuswiilile bwiinguzi bupegwa. Ino mmubuzyo wamusyobo nzi?
4 Mibuzyo Imwi Myuuba-uba: Mukutalisya mubandi mulakonzya kusola imwi yamibuzyo eeyi:
◼ “Sena mulaubelesya Mupailo wa Mwami (naa wa Taateesu) mubukombi bwanu?” (Mt. 6:9, 10) Amwaambe cibeela cimwi camupailo oyu mpoonya akwaamba kuti: “Bamwi bantu balabuzya kuti, ‘Ino ndizina nzi lya Leza, Jesu ndyaakaamba kuti lilemekwe (naa kusalazigwa)?’ Ibamwi babuzya kuti, ‘Ino Mbwami buli Jesu mbwakaamba kuti tweelede kubupailila?’ Sena kuli nomwakajana bwiinguzi buzulide bwamibuzyo eyi?”
◼ “Sena kuli nomwakabuzide kuti: ‘Ino buumi buli amulimo nzi?’” Amutondezye kuti buliswaangene aluzibo lwa Leza.—Muk. 12:13; Joh. 17:3.
◼ “Sena kuli nomuyeeya kuti kuyooba ciindi lufwu nolutakooyooba limbi?” Amubelesye Isaya 25:8 alimwi a Ciyubunuzyo 21:4 ikujana bwiinguzi busyomeka.
◼ “Sena kuli nzila imwi nguba-uba yakumanizya manyongwe aali munyika?” Amutondezye kuti Leza uyiisya kuti “Yanda mweenzinyoko.”—Mt. 22:39.
◼ “Sena nyika yesu azilenge zyiyoonyonyoonwa akulobesegwa buzuba bumwi?” Amubatondezye kuti Ibbaibbele litusyomezya kuti nyika inooliko kusikila kukabe kutamani.—Int. 104:5.
5 Atukambauke makani mabotu munzila nguba-uba iigaminina alimwi yaluzyalo. Jehova uyoomulongezya mukusola-sola kwanu kwaabila bamwi “majwi” aakasimpe.