Kubelesya Majwi Aatakatazyi Kumvwa Njenzila Iigwasya Kapati
1 Nkaambo nzi bantu ncobabaswiilila ciindi basikumwaya bana-bana nobabandika ambabo mulumbe wa Bwami? Ikaambo kamwi nkakuti tababelesyi majwi aakatazya kumvwa pe. Basikumwaya bamwi balakonzya kuyeeya kuti kutegwa bazwidilile mukupa bukamboni beelede kubelesya majwi mayumu. Pele kweelanaa mbuli mbokwakabonwa kale, ikubelesya majwi aatakatazyi kumvwa njenzila iigwasya kapati.
2 Jesu wakaambilizya Bwami bwa Leza kwiinda mukubelesya majwi aatakatazyi kumvwa, munzila nguba-uba alimwi wakayiisya basikwiiya bakwe kucita mbubwenya. (Mt. 4:17; 10:5-7; Lk. 10:1, 9) Wakabelesya ntalisyo, mibuzyo alimwi azikozyanyo zyuuba-uba ikutegwa basikumuswiilila bamvwe alimwi akuti abakulwaizye. (Joh. 4:7-14) Atwiiye cikozyanyo cakwe mukubelesya majwi aatakatazyi kumvwa.
3 Mulumbe ngotuyandika kwaambilizya “[m]makani mabotu aa-Bwami.” (Mt. 24:14) Kwiinda mukubikka Bwami kuba mutwe mupati wamakani aanu, ciyoomugwasya lyoonse kubelesya majwi aatakatazyi kumvwa. Amwaambe zintu zijatikizya basikumuswiilila. Bamakaintu ikanjikanji balayandisya kumvwa makani aajatikizya mukwasyi wabo ikutali makani aatwaambo twacisi pe. Makani ngayandisya kumvwa wisi wabana ajatikizya mbwakonzya kukwabilila mulimo alimwi amukwasyi wakwe. Ibakubusi babikkila maanu kubukkale bwabo bwakumbele; balo ibacembeede, babikkila maanu kubuumi bwabo bubotu alimwi alukwabililo. Ibantu kanjikanji babikkila maanu kuzintu zicitika kubusena nkobakkala ikutali zyeezyo zicitika mumasi aali kule. Mwamana kubandika makani aajatikizya bantu boonse, amubikkile maanu kuzilongezyo nzyobayakubaanzizyo bantu bamvwa mubulelo bwa Bwami bwa Leza. Majwi buyo masyoonto aatakatazyi kumvwa alimwi kubikkilizyaa lugwalo alakonzya kuba nzila iigwasya mukukulwaizya sikumuswiilila kubaa luyandisisyo.
4 Mulakonzya kutalisya mubandi kwiinda mukwaamba kuti:
◼ “Ndasyoma kuti mulazumina kwaamba kuti bantunsi bapenga kapati amalwazi manji aatakonzyi kusilikwa. Pele sena mulizi kuti Leza wakasyomezya kuyoomanizya malwazi oonse kubikkilizyaa lufwu?” Amulindile bwiinguzi, mpoonya mubale Ciyubunuzyo 21:3, 4.
5 Kwiinda mukubelesya majwi aatakatazyi kumvwa alimwi anzila nguba-uba, makani alakonzya kubanjila mumizeezo alimwi amumyoyo bantu banji mucilawo canu ikubagwasya kwiiya zya Jehova alimwi abulangizi bwakupona kukabe kutamani.—Joh. 17:3.