Amulemeke Jehova Kwiinda Mumilimo Mibotu
1 Ciindi nomwasikilwa guwo pati, cilakatalusya kaka ikuti naa mwajanaa kutijila! Ikuti kakukasaala, kamukwabilidwe muŋanda alimwi akuti balaaŋanda kabali bantu basamausya, ncobeni inga kamukkomene kukkala muŋanda eeyi. Mulimo wakukambauka Bwami usololela bantu kukulicingilila kuzwa kubweende bwa Saatani. Sena bukkale bwesu bwabuzubaa buzuba inga bwagwasya bamwi ikubona mbocikkomanisya ikujanika muŋanda eeyi iijisi bukwabilizi? Inzya, kweelanaa Jesu mbwakaamba, wakati ibantu ‘nobabona milimo yesu mibotu, bayookulwaizigwa kulemeka Taateesu uuli kujulu.’—Mt. 5:16.
2 Mbuti mbotweelede kulilemeka kutegwa bamwi babona milimo yesu bakulwaizigwe kuboola kuli Jehova akumbunga yakwe? Nkwiinda mukulekela majwi aa Jesu aalembedwe kuli Luka 6:31 alimwi 10:27 kuti abweendelezya buumi bwesu buzubaa buzuba. Eci ciyootukulwaizya kubabikkila maanu ibantuma, ikutwaandaanya kunyika eeyi iitabikkili maanu kubantu.
3 Umwi mucizi iwakali mubwato buzabusya bantu mulwaanje wakabona mwanakazi umwi mwana-mwana walo wakacisidwe kapati akaambo kakuguntauka kwabwaato cakuti cakamwaalila akuti alanganye mwanaakwe muniini. Mucizi ooyu wakalyaaba kuti alanganye mwanooyo. Eelyo mwanakazi ooyu nakali kuyeeya nzila yambwaakali kukonzya kulumba mucizi wesu, mucizi wakati: ‘Amukabaswiilile Bakamboni ba Jehova baakumuswaya ciindi ciboola.’ Mwanakazi ooyo wakacita oobo, aboobo sunu walo antoomwe amulumaakwe Mbaakamboni. Milimo mibotu yakabagwasya kutambula mulumbe wa Bwami.
4 Buumi Bwesu Boonse Bulijatikizidwe: Mbotulilemeka kuli basimukoboma, notuli kumilimo naa kucikolo alimwi aleelo notuli mukulikondelezya, kulijatikizidwe ambobatubona bantu alimwi abukombi bwesu. Aboobo, ncibotu ikulibuzya mibuzyo eeyi: ‘Ino bantu bandilangilila bandibona buti mebo amukwasyi wangu? Sena basimukoboma iŋanda alubuwa lwesu bazibona kuti zilasalala alimwi zibambidwe kabotu? Sena mbotubeleka limwi abaabo mbotwiiya limwi batubona kuti tuli bantu bankutwe alimwi basika aciindi ceelede? Sena bamwi batubona kuti tuli bantu ibatalisumpuli alimwi balilemeka?’ Milimo yesu mibotu ilakonzya kupa kuti kukomba Jehova kwesu kakwiininizya kuli bamwi.
5 Petro wakacenjezya kuti Banakristo bayoosampaulwa. (1 Pet. 4:4) Tweelede kubona kuti ibukkale bwesu teensi mbobupa kuti bantu kabatusendaula. (1 Pet. 2:12) Ikuti milimo yesu njotucita abuzuba kailemeka Leza ngotukomba, nkokuti tuyooba mbuli mimuni iibikkidwe atala, ikusololela bamwi kuŋanda iikwabilila eeyo Jehova njaapa.—Mt. 5:1416.