Kupa Bumboni Kakunyina Kwaambaula
1 Kakunyina kwaambaula, bubumbo bwa Jehova bulayubununa zinji kujatikizya bube bwakwe butalibonyi. (Int. 19:1-3; Rom. 1:20) Mbubwenya buyo, ikulilemeka kwesu, bube bwa Bunakristo alimwi akuboneka kabotu kulapa bumboni kakunyina kwaambaula. (1 Pet. 2:12; 3:1-4) Umwi aumwi wandiswe weelede kuba amakanze ‘aakulemeka muziyanza zyoonse lwiisyo lwa Leza Mufutuli wesu.’—Tit. 2:10.
2 Mbuti mbocikonzyeka kubantu batalondokede kulemeka njiisyo zyamu Bbaibbele? Eeci cilakonzyeka kwiinda mubusolozi bwa Jwi lya Leza alimwi amunguzu zya muuya uusalala. (Int. 119:105; 143:10) Ijwi lya Leza “lili abuumi, lili anguzu, lilabosya kwiinda iceba ilijisi mabemba obile.” (Heb. 4:12) Lilatunjila mukati mwini akutupa kuti tusame buntu bupya. (Kol. 3:9, 10) Muuya uusalala ulazyala micelo mibotu mulindiswe mbuli buuya, bubotu, kubomba moyo alimwi akulyeendelela. (Gal. 5:22, 23) Sena swebo kutugama tuli mukulekela Jwi lya Leza amuuya wakwe kweendelezya buumi bwesu?—Ef. 4:30; 1 Tes. 2:13.
3 Ibamwi balabona: Ciindi notupona kweelena azyeelelo zya Jehova alimwi akusoleka kutondezya bube bwakwe, ibamwi balabona. Mucikozyanyo, amuyeeye mwaalumi umwi iwakali kufwubaazyigwa ambaakali kubeleka limwi akaambo kakuti wakali mufwaafwi. Mucizyi umwi iwakali kubeleka anguwe mu ofesi wakali kumulemeka lyoonse. Eeci cakapa kuti mwaalumi ooyu abuzye mucizyi ooyu ncaakali kwiindanina abamwi. Mucizyi wakapandulula kuti wakali kulilemeka akaambo kakutobela njiisyo zyamu Bbaibbele. Alimwi wakamwaambila kujatikizya bulangizi butaliboteli bwa Bwami. Mwaalumi ooyu wakatalika kwiiya Bbaibbele eelyo wakayaambele akubbapatizyigwa. Naakajokela kucisi cokwabo, ikulilemeka kwakwe kwakabakonda basazinyina eelyo ibunji bwabo bakakatambula kasimpe abalo.
4 Notuli kumulimo, kucikolo naa notuli abasazima alimwi abasimukoboma tulakonzya kupa kuti ibamwi balemeke Leza kwiinda mukulilemeka abukambausi bwesu.—Mt. 5:16.