Amutole Lubazu Cakumaninina Mubutebuzi
1 Ibasinsimi ba Jehova bakaindi alimwi kubikkilizyaa Jesu Kristo kumugama buya bakakanana kujatikizya mulimo wakuyobolola. (Is. 56:8; Ezk. 34:11; Joh. 10:16) Mulimo oyo uli mukucitwa lino mbokunga makani mabotu aa Bwami ali mukukambaukwa nyika yoonse mbwiizulwa. (Mt. 24:14) Ikwiimpana akati kabaabo bali mukubelekela Leza alimwi abaabo batamubelekeli kuli mukulibonya. (Malk. 3:18) Ino eci caamba nzi kulindiswe?
2 Mmukuli Waumwi Aumwi: Tulakonzya kwiiya cikozyano ca Paulo, walo wakatola lubazu cakumaninina mukusololela mulimo wa Bunakristo. Wakalimvwa kuti wakalijisi mukuli wakukambauka kutegwa bantu boonse babe acoolwe cakuswiilila makani mabotu alimwi aalufwutuko. Eeci cakamukulwaizya kuzumanana kubabelekela. (Rom. 1:14-17) Akaambo kabukkale bukatazya mobajanika bantu sunu, sena tatujisi mukuli mupati kapati wakukambaukila baabo bali mucilawo ncotupedwe?—1 Kor. 9:16.
3 Nciindi Cakutola Ntaamu Cakubindaana: Imulimo wakukambauka ulakonzya kukozyanisigwaa mulimo wakuyandaula alimwi akugwasya bantu bali muntenda. Ibantu beelede kuyandaulwa alimwi akubagamika kubusena bwakufwutukila ciindi nociciliko. Iciindi camana kapati. Bantu bali muntenda! Aanu Jesu ncaakakulwaizya basikwiiya bakwe kuti “amukumbile mwami uuli amuunda kuti atume batebuzi kukutebula kwakwe.”—Mt. 9:38.
4 Ikubikkila maanu sunu kukuyandika kwamulimo cakubindaana, kwapa babelesi ba Bwami banji kuyungizya ciindi ncobatola mumulimo ooyu wakufwutula bantu. Imukubusi umwi wazina lya Hirohisa wakali kukkalaa banyina abanabokwabo basyoonto bali bone mumukwasyi wamuzyali uuli alikke. Wakali kujana mali aakubelesya mumukwasyi kwiinda mukubuka aciindi ca 3:00 koloko wamasiku kutegwa atole miteende mumasena muyakali kuyandika. Nokuba boobo, Hirohisa wakali kuyanda kuyungizya ciindi ncatola mumulimo wakwe wamumuunda, aboobo wakatalika mulimo wabupainiya bwaciindi coonse. Sena kuli nzila nzyomunga mwabelesya kutegwa mutole lubazu cakumaninina mumulimo oyu uutakaindululwi limbi?
5 “Ciindi [cicisyeede] ncifwiifwi.” (1 Kor. 7:29) Aboobo, atucite kusikila aagolela nguzu zyesu mumulimo uuyandika kapati uuli mukucitwa nyika yoonse mbwiizulwa sunu—nkokuti iwakukambauka makani mabotu aa Bwami alimwi akugwasya bamwi kuba basikwiiya. Jesu wakakozyanisya mulimo oyu kumulimo wabutebuzi. (Mt. 9: 35-38) Kwiinda mukutola lubazu cakumaninina mubutebuzi, micelo yamulimo wesu ilakonzya kubikkilizyaa kugwasya muntu umwi ikuba cibeela cankamu mpati yabakombi yaambidwe kubbuku lya Ciyubunuzyo 7:9, 10.